مقبرة الحب الاول

مقبرة الحب الأول

عقوبة المبتز الالكترونى هى السجن عامين ، أوغرامة قد تصل إلى ثلاثين ألف جنيه .

حرصت عزة على إخفاء ما حدث عن زميلات مايسة ، حتى لا تشعر بالحرج .
مايسة : مش عارفة أقول لك إيه ؟
عزة : قولى إن اللى حصل ده مش هيحصل تانى .
مايسة : ربنا اللى عالم إنى توبت فعلا .
عزة : ربنا يهديكى ويصلح حالك .
مايسة : أنا عارفة إنك زعلانة مني .
عزة : ربنا بيسامح وفاتح بابه على طول للمستغفرين ، وبيفرح بتوبة عبده ، أنا بقى يا عبد هازعل؟
مايسة : تفتكرى هيسامحنى صحيح ؟
عزة : قل ياعبادي الذين أسرفوا على أنفسهم لا تقنطوا من رحمة الله إن الله يغفر الذنوب جميعا إنه هو الغفور الرحيم ، صدق الله العظيم .
مايسة : طب وانتى مسامحانى ونسيتى اللى حصل ؟
عزة : أتمنى أن الناس هى اللى تنسى .
مايسة : أنا مش راجعة المكان اللى كنت فيه تانى ، هاعيش هنا وأهو ما حدش هنا عارفنى .
عزة : بيتى مفتوح لك لحد ما يجى لك ابن الحلال .
انقبض قلب مايسة بشدة وشعرت بالخوف ، لكنها تماسكت وقالت : ولو ما جاش هتزهقى منى ؟
عزة : بيتى مفتوح لكوا كلكوا ، وبرضو ربنا يصلح حالك .

وما أن فاقت عزة من مشكلة مايسة حتى وجدت هند تطلب الحديث معها على إنفراد .
عزة : بقيت باقلق منكوا ، خير ؟ عايزة إيه ؟ ما أنا هاتفرغ لكوا مش هاشوف بناتى ولا أولاد أختى .
هند : جاى لى عريس .
عزة : ألف مبروك ، ده أنا مبروكة بقى ، دعوتى لحقت تتحقق ؟ شوفتيه فين ؟ وشغال إيه ؟
هند : شوفته فى فرح زينب ، ابن خالها ، وموظف فى شركة سيراميك .
عزة : طب كويس ، طالما قريب زينب يبقى أكيد محترم ، أهل زينب ناس محترمين .
هند بتردد : مطلق .
عزة : إيه يا بت انتى ما بيعجبكيش الا المتجوزين ؟
هند : ده مطلق ، طلق مراته من شهر ونص وعنده عيلين .
عزة : هو لحق ؟ طب يستنى لما تخلص العدة .
هند : هى العدة دى مش للست ؟
عزة : شرعا هى لسة على ذمته ، ابعدى عنه يمكن يرجعها .
هند : هو حلف إنه ما هيرجعها ، مالهمش عيش مع بعض .
عزة : حرام عليكى يا هند ، ما تساعديش الشيطان على خراب بيتهم .
هند : هو مخروب من قبل ما أشوفه ، بينهم مشاكل كتير .
عزة : كل البيوت فيها مشاكل ، ودى عملة شيطان لو انتى واللى زيك رفضتوا هيفوق ويرجع لها .
هند : تحبى أخليه يستنى لما عدة مراته تخلص عشان تتأكدى إنه مش هيرجعها ؟
عزة : يا بت انتى مستقلية بنفسك ليه ؟ مصغرة نفسك ليه ؟ انتى تستاهلى حد أحسن من كدة ، رجل يكون له لوحدك ، ما عندوش مشاكل وبيت تانى مفتوح .
هند : هو أنا جالى غيرهم ؟
عزة : هيجى لك يا حبيبتى ، ما تستعجليش كل شئ بآوان .
هند : طب شوفيه واقعدى معاه يمكن يعجبك ؟
عزة : أنا هاقول لك حاجة واحدة بس ، بصى على بناتى ، رغم إنى مش حارماهم من حاجة ، وإنى عايشة ليهم ، ورغم إن أبوهم بقى يزورهم لكن دايما مكسورين وعينيهم حزينة ، يمكن أكتر من أولاد خالتهم الأيتام ، الطفل اللى أبوه وأمه منفصلين يبقى تعيس أكتر من اليتيم ، عارف إن له أب ومحروم أكتر الوقت منه ، أو محروم من أمه ، ليه تكونى سبب تعاسة طفل مالوش ذنب غير إنه طلع لقى أمه وابوه مختلفين ؟
هند : خلاص يا زوزو .
عزه: ربنا يهديكى ويصلح حالك.
انتظروا الحلقة القادمة بإذن الله