مقبرة الحب الاول

مقبرة الحب الأول

ظنت عزة أن عمر سيقدر موقفها معه وسيبتسم فى وجهها على الأقل ، لكنه ظل كما هو عابث الوجه ، قليل الكلام ، يقضى أغلب وقته بعيدا عنها ، لم يوجه لها حتى كلمة شكر ، وكأن ما أعطته له حق مكتسب .

باع عبد الرحمن الأرض ووضع المبلغ بالكامل أمام سميرة .
سميرة : بعتها بسرعة كدة ؟ ده ما عداش أسبوع .
عبد الرحمن : الرجل كان جاهز ، وبقاله سنين يتحايل عليا .
سميرة : كام ؟
عبد الرحمن : ٤٥٠ ألف جنيه .
سميرة : بس ؟!
عبد الرحمن : دى زراعة ، و ده أعلى سعر ممكن تجيبه .
سميرة : طب أنا هاخد خمسين ألف أغير حاجات فى الشقة ونجيب بالباقى دهب .
عبد الرحمن : أنا هاخد الخمسين الف أعمل عمرة أنا والحاجة وانتى حرة فى الباقى .
سميرة : ما أمك راحت كذا مرة حج مش عمرة .
عبد الرحمن : لا حول ولا قوة الا بالله ، ربنا يهديكى يا سميرة .
سميرة : خلاص اللى تشوفه ، مش مهم أجهزة ولا حاجة نجيب بالفلوس كلها دهب .
عبد الرحمن : أنتى حرة ، بس ما ترجعيش تشتكى من الغسالة والغسيل .
سميرة : طب ياللا حالا نخرج نشترى دلوقتى .
عبد الرحمن: النهار له عنين يا سميرة ، دلوقتى عايزة تخرجى ؟ ده أنتى ما بتحبيش السهر .
سميرة : خلاص يا عبد الرحمن ، أنا بس كنت خايفة على الفلوس ، احنا الاتنين بنخرج وساعات والدتك هى كمان بتخرج .
عبد : امال هتشيلى الدهب هنا إزاى ؟
سميرة : ما تقلقش أنا هأتصرف .

اشترى عبد الرحمن لسميرة كل ما اختارته من الحلى ، كلها ذهب جديد ، أحدث الموديلات ومن الذهب اللازوردى ذو المصنعية المرتفعة ، لم يهتم عبد الرحمن كثيرا بهذا الأمر ، كل ما كان يشغله أن يرى الابتسامة لأول مرة على وجه سميرة .
سميرة : ربنا يخليك ليا يا حبيبى .
عبد الرحمن : ياريتنى أقدر أشترى لك كل يوم دهب قد ده عشان أسمع منك الكلمة الحلوة دى .
سميرة : هتجيب منين ٤٠٠ ألف جنيه كل يوم ؟
عبد الرحمن : ربك قادر على كل شئ ، بلاش كل يوم ، كل شهر .
سميرة : ولا كل سنة يا عبدو ، أنت موظف حكومة ، وإلا بقى لو سرقت والا بعت مخدرات .
عبد الرحمن : أعوذ بالله .
سميرة : أنا بأضحك معاك ، بس خلينا واقعيين ، المبلغ ده مرة واحدة ومش هيتكرر .
عبد الرحمن : الحمد لله على نعمته ، المبلغ مرة واحدة والكلمة مرة واحدة .
سميرة : كلمة إيه ؟
عبد الرحمن : حبيبى .
سميرة : ما تكسفنيش بقى ، انت عارف إنى بأنكسف .
عبد الرحمن : عارف ، ده انتى لحد دلوقتي بتصممى نطفى النور فى أوضة النوم ، حد يصدق انى بقالى ١٢ سنة متجوزك وما شوفتش جسمك ؟
سميرة : عبدووو قلت لك بأنكسف .
عبد الرحمن : الحياء مطلوب ، لكن أنا جوزك حلالك .
سميرة : والله أنا قلت لك من أول الجواز إنى بأنكسف وطلبت منك تنام فى أوضة لوحدى انت رفضت ، ووافقت إنى أفضل معاك وأطفى النور .
عبد الرحمن : كان عندى أمل تتغيرى ، يا سميرة ده أنا.....
قاطعته سميرة : سيب كل حاجة للأيام ، جايز فى يوم أتعود .
عبد الرحمن : ولا يهمك يا أم عبد الله ، أنا يكفينى تكونى فى بيتى وجنبى ، معطرة دنيتى بنفسك الحلو .
سميرة : إيه الكلام الحلو ده ؟ ده أنت قربت تبقى شاعر .
عبد الرحمن : اللى يشوف جمالك لازم يبقى شاعر .
سميرة : كان فين الكلام الحلو ده من زمان ؟
عبد الرحمن : موجود ، بس بانكسف .
ضحك عبد الرحمن وسميرة .
وفى الصباح لم تذهب سميرة إلى العمل لكنها ذهبت إلى
انتظروا الحلقة القادمة بإذن الله