اولاد الحكم

تكملة البارت ٥٩

#اولاد_الحكم
للكاتبة روشان (مروج الشمري)

مساء الخير ورداتي اعذرو اغلاطي الاملائية البارت غير منقه

تكملة البارت ٥٩

طال الزمان وبعُد المكان ، وما زال ذكراك في العقل يجول ، اما عن نار نحرك امام عيني  ،فلم اجد ما يستطيع اخمادها طوال الثلاث وثلاثون عاماً من عمري ... لعل وقوفي امام قبرك يفعل.

بتار: اريد عنوان بيت جدي اهل امي هيفاء ، تندليه مو ؟

الكل استغرب واتفاجأ من طلبه ... ردت خالة سنية بصدمة

سنية: وشتسوي بي يمة؟ بعد كل هالسنين!!!!

بتار : اريد اعرف المكان الي دفنو بي جثة امي

انخطف لونهم كلهم وكامو يباوعون واحد للثاني مرة بقهر ومرة بأستغراب ،لان هاي اول مرة يطلب هالطلب من ماتت امه لحد الان، ويمكن عبالهم هي بالنسبة اله مو اكثر من ذكرى عابرة بالاخص بعد ما اخذ بثارها ،

سنية : شتريد منه حبيبي يمة ،ليش تفتح جروحك بيدك ، اذا مشتاقلها اقرالها الفاتحة وثوبلها مو الا تشوف گبرها وتعذب نفسك

دنك راسه مبتسم بوجع وحجى
بتار : ليش منو كال جروحي مسدودة حتى افتحهن بشوفة گبرها ... اني جرحي عليها لايبرى ولا يطيب لحد ما اموت

سنية : اسم الله عليك ،عمرك طويل امي ...

بتار: ما كلتيلي تتذكرين عنوانهم مو ؟ اني بصراحة ما اتذكره لان اخر مرة رحتلهم بيها من جانت هي عايشة

سنية : اندلهم اي شلون ما اندل ، حتى بأخر كم سنة سمعت بس خالك الصغير باقي عايش يي

بينت علامات الانزعاج على وجهة وحجى بعصبية
بتار : لتكولين خالي ولتنسبين اي واحد من ذيج الملة القذرة الي

امي وحيدة وطالعة من فطر الحايط ، عاشت وحيده وماتت وحيدة وحتى بعد موتها ضلت وحيدة ....

سنية : الله يجازيهم على سواياتهم بس شنسوي يبقون اهلها وهناك تاخذ حقها منهم يم الواحد الاحد

بتار : اهلها ما اتذكروا نفسهم اهلها من شمروها عالحكم وهي مراهقة ، ما اتذكروا نفسهم من جانت تروح تبجي يمهم وتتوسل بيهم حتى يطلكوها منه ، من انذبحت ظلم ما اتذكروا هاي بتهم وراحو جابو حقها من رجلها الي ذبحها لو النگس الي داس بيتها ولوث سمعتها وشرفها !!! لتكولين اهلها هالحجاية لو انطبكت السماء عالكاع ما ترهم الهم

سنية : انعل ابوهم لابو ، ليش حارك دمك علمودهم يطبهم الف مرض ... بس لتغث روحك اني باجر لو عكبة اجيبلك الاخبار مضبوطة اذا بعدهم بنفس البيت لو لا وحتى اذا شايلين هم اجيبلك العنوان الجديد من صديقاتي القديمات بالمنطقة

بشير : بعد شتريد امي راح تحرك عناصرها المخفية وتشغل الخلايا النائمة مالتها كلها لخاطرك