عمي: (عنق بابا) خويا توحشتكك
بابا: حتا انا اخويا توحشتك بزاف
عمي: (شافني) تبارك الله على بنت خويا كبرات.. عنقني وبادلتو العناق هزينا باليزاتنا وشدينا الطريق للدار وصلنا لواحد القصر كبير وزوين بزااف دخلنا لقيت بزاف دالناس بقا بابا كيعرفني عليهم.. خلاصة القول عندي 2عمامي احمد ويوسف.. احمد مزوج بسعاد عندهم ولد وبنت (زياد ومروى) اما عمي يوسف مزوج بحورية وعندهم 2ولاد وبنت (جاد متعرفتش عليه حيت مكاينش وحمزة واريج) عندي عمتي وحدة سميتها منى مزوجة باسماعيل وعندها 2بنات و ولد (لمياء وصفاء وعادل) طلعوني بنات العائلة لواحد البيت قالولي هدا هو بيتي مي انا معجبنيش حيت فالغوز
مروى: ديما كنسمع بيك وكنت متشوقة نتعرف عليك
انا: شكرا
اريج: قاليا بابا دايرة ادارة الاعمال
انا: اه
اريج: راه غنقراو فنفس الجامعة مي تخصص مختالف غدا نمشيو بجوج
انا: اوكي ان شاء الله
لمياء: افف امتى حتى انا ندخل لشي جامعة
صفاء: وانتي دوزي غير الباك بعدا عاد فكري فالجامعة
انا: عندك الباك هاد العام
لمياء: اه اختي غير الله يدوزو على خير
انا: متخافيش راه ساهل غير خدمي ويكون خير
صفاء: غير بقاي فالباك على اساس حنا طفرناه فالجامعة هههه
مروى: بعدي من ختك.. لمياء راه غير كتكدب عليك قراي ونجحي باش من بعد ديري داكشي لي بغيتي... بقينا مجمعين وهوما كيضحكو حتى داتني عيني ونعست... فقت فالليل جات عندي الخدامة قاتلي نزل نتعشا وداكشي لي كان كنا مجموعين كاملين فالطبلة وكلشي فرحان وضاحك كنشوف فبابا حسيت بيه فرحااان عجبني الحال....
صبح نهار جديد فقت ولبست حوايجي جات عندي اريج ومشينا بطموبيلتها وراتني لفاك كيدايرة باش منتلفش وواعدتني فالويكاند تخرجني توريني الرباط تفارقنا ومشيت دخلت للحصة ديالي قريت وعجبني الحال فاش خرجت مشيت قلبت على فين كيشريو شي كاطو خديتو وجيت نرجع تلفت بقيت كنسول حتى لقيت بنت وصلاتني مسسكينة دخلت لقيت البروف بادي متسوقتش ومشيت جلست
البروف: اش هاد الوقيتة لي داخلة فيها
انا: راني تلفت على لونفي
البروف: هههه زوينة عندك هادي اصلا انا عمري شفتك عاد طفات عليك الشمعة وجايا تقراي.. بقيت كنشوف فيه وانا ندير نضاضري وخرجت
البروف: دوزي تجلسي واش عندي كوري انا.. متسوقتش خليتو كيهضر وخرجت مشيت جلست فالجردة كنساين اريج حتى جات ورجعنا للدار
بابا: كيف جاتك القراية ابنتي
انا: مزياانة.. بابا بغيت ناخد طموبيل
بابا: واخة ابنتي غدا نمشيو ناخدوها
انا: اوكي.. طلعت لبيتي لبست شورط وتيشورت فالكحل خرجت للبالكون كنفكر كيفاش غندير نخرج قررت نصبر شوية باش حتى الى حصلوني عادي ماشي بحال دبا حشومة مزال مسخنت بلاصتي نزلت تعشيت وخرجت مع ولاد عمي للجردة جالسين مجمعين
عادل: اوى انور عاوديلينا على راسك شوية
انا: مكاين ميتقال حياتي دازت فالقراية والدار صافي
زياد: ممم زعما كنتي فامريكا مادرتي حتى زبلة
انا: لا
حمزة: واش كتلبسي غير الكحل منين جيتي ونتي كتلبسيه
انا: اه لوني المفضل.. كلشي بقا كيشوف فيا باستغراب حيت حتى يدي صابغاهوم بالكحل
انا: احم ياله تصبحو على خير
الكل: تصبحي على خير.....
حمزة: نور بانتليا فشكل وحتا من الضحك مكضحكش
عادل: وي بالصح واش زعما ماتكونش راضية بينا
زياد: وعلاش مالنا صافي خليوها دبر راسها
صفاء: حشمو شوية متنساوش بلي ماماها ماتت فاش كانت عندها 16 عام
مروى: اه بصح راه غتكون حاسة بنقص المهم حنا نحاولو نهدرو معاها وانا متاكدة غادي تندامج معانا
اريج: وي البنات عندهم الحق.... طلعت بيتي نعست وانا كنفكر فالخطوة لي غادي ندير صبح الصباح لبست حوايجي لي عبارة عن سروال كحل و تشورت و كويرة فالكحل نزلت لتحت فطرت وخرجت انا وبابا مشيت خديت رونج روفر كحلة قادينا المسائل ومشيت مع 2 قريت كانت عندي مع 4 حصة عند داك البروف لي وقعلي معاه داك المشكيل.. وصلات 4 دخلت لونفي جلست
شويا دخل شافني وهو يجي لعندي.......
#يتبع
