90
انا: حتى انا حمقة حيت فكرت فاحتمال انني كنعجبو... عندو الحق انا غير وحدة حاملة ومعارفاش شكون باه اش غيعجبو فيا.... نضت دخلت للدوش دوشت خرجت صليت صلاتي ونشفت شعري وانا نزل لقيت كلشي جالس حتى من جاد وبلاصة وحدة لي خاوية حداه
انا: (مشيت عند زياد) زياد نقدر نجلس بلاصتك ونتا جلس لهيه
زياد: علاش
انا: بغيت نجلس حدا ماما
زياد: هههه واخة الالة... ناض وانا نجلس بلاصتو
ماما: مالك ابنتي
انا: والو علاش
ماما: شفتك مغوبشة ياكما مقلقك جاد
انا: (بعصبية) علاش شنو بيني وبينو باش يقلقني
ماما: ياك قلتي بلي كتبغيه... نضت بالزعاف خرجت ركبت طموبيلتي وكسيريت ماوقفت حتى للبحر حيدت صباطي ونزلت... بقيت كنتمشا حتى عييت وانا نجلس....
*في القصر*
ماما: جاد واش مقلق نور
جاد: لا معرفتش مالها قبيلة جيت نهضر معاها وهي تغوت عليا
ماما: ممم واخة اولدي
خ. حورية: ياكما كتوحم عليك
جاد: كيفاش كتوحم عليا
خ. حورية: كاين شي عيالات ففترة الوحم كيوليو كيحماقو على رجلاتهم وكاين العكس لي غير تقربليها تنوض ترد ومكتكونش حاملة تهضر معاك
جاد: (تفكر gاع التصرفات ديالها ولقا ماماه عندها الحق حيت نور كانت متبتة.. ودبا لا فوقما كتلقا فرصة كتبوسو وكتبغي يهزها) ممم واخة
*عند نور*
بقيت كنفكر فحياتي وفاش نولد شنو غادي يوقع وشنو غانقول لولدي... قررت نمشي دبا ناكل حيت مكليتش من بعد نمشي نتبع مع شي طبيبة على الحمل ونشوف شي طبيب على حساب الذاكرة ديالي.... وانا غادا لطموبيلتي لمحت بحال شي واحد حاضيني درت بانلي غادي بالزربة ومغطي وجهو مهتميتش وركبت.... وصلت للكافي طلبت gاع داكشي لي تشهيت كليت حتى شبعت ومشيت للكلينيك شفت طبيبة الولادة تسنيت نوبتي.. من بعد ساعة دخلت
الطبيبة: السلام تفضلي
انا: شكرا
الطبيبة: هدا اول حمل ليك
انا: اه وبغيت نعرف صحة الجنين
الطبيبة: اوكي زيدي معايا... مشيت تكيت وبدات كدوزلي على كرشي وبقات كتشوف كملات عطاتني كلينيكس مسحت كرشي وقاديت حوايجي.. تبعتها للبيرو وجلست
انا: كاين شي مشكل
الطبيبة: لا الحمد لله الجنين فصحة جيدة غادي نعطيك فيتامينات تبقاي تاخديهم
انا: اوكي.. فوقاش نقدر نعرف جنس الجنين
الطبيبة: دبا عندك 3شهور ونص دونك الموعد جاي غادي نعرفو
انا: واخة شكرا بزاف
الطبيبة: هدا واجب... خرجت من عند الطبيبة وانا شادا فكرشي والابتسامة مرسومة على وجهي توجهت نيشان لطبيب نفساني خديت موعد لغدا ومشيت للمول بقيت كندور واي حاجة تشهيتها فالماكلة ولا الحوايج شريتها شفت الساعة لقيتها 7 هبطت للريسطو ديال المول خديت بيتزا كبيرا طحت فيها عمية... كملتها خلصت وخديت كلاص فيدي ومشيت ركبت طموبيلتي راجعة للدار.... وصلت جا واحد هز الميكات من عندي دخلت للدار لقيت ماما وبابا وجاد شادين تليفونهم وكيدورو فالدار شافوني وهوما يجيو....
