حياة

٣

مشيت لي رنا و لقيت احمد مشى ،
_ اها ي بت الشمار شنو من قبيل مستنية
_ ما شفتي زولنا القال ما بصافح
و طبعا حكيت ليها الحصل كلو ، رنا بقت تضحك
_ و الله يا حياة شكلو كان ناوي يحرجك انتي بس
_ يحرجني شنو هو بعرفني من وين؟
_ بيني و بينك شكلو مفتري كدة و هسي لو سألتيهو عملت كدة ليه م بكون عندو مبرر ، يعني نوع الاولاد البحبو يحرجوا البنات ساي و بكونوا مبسوطين بكدا
_ الله لا جاب باقيهو
_ خلينا منو كدي ارح نشوف محاضرتنا دي
حضرنا محاضرتنا و طلعنا زي الساعة 4 كدة و كنا جيعانين مشينا الكافتيريا و قعدنا ناكل
_ انتي احمد مالو قبيل مشى سريع كدة؟
_ قال عندو شغل كتير
_ غايتو ربنا يوفقو
قامت رنا سرحت كدا و سألتني
_ حياة ، انتي حاسة انو أحمد دة حيواصل معاي للآخر بجد و ما بخذلني؟ 
قربت اتشرق و اتخلعتهه طبعا لانو علاقتهم ببعض كانت قوية شديد و ما توقعت سؤال زي دة يخطر في بالها
_ انتي ما واثقة فيهو ولا شنو؟
ضحكت براحة
_ لا و الله واثقة .. بس مرات الشيطان بلعب بأفكاري و بقعد اسأل نفسي ؛ انا خايفاهو يتخلى عني
_ انتي شايفاهو تعبان كيف و شغال دوامين عشان يجي يتقدم ليك ، فشنو ما تجازيهو بظنونك دي
_ انا ذاتي مرات بعاتب نفسي لكن م علي لوم بعد الحصل المرتين الفاتو لي حق اخاف
_ ربنا يجعل ليك خير في الجاي م تشيلي هم
_ يشيلك السيل انا مش طالباك بارد؟
_ بارد شنو يا زولة اختيني
_ ما بختاك
و بقينا داقين الحجة مع انو كان كلو هظار ؛ فجأة زول يخت قارورتين بارد في الطربيزة قدامنا،  احنا الاتنين سكنا و عاينا ليهو .. هه طلع دة كمال و كمان مبتسم ليهو ابتسامة هبلة كدة
حياة : دة شنو دة مالو دة؟
كمال : و الله كنت في الكافتيريا و شفتكم قلت اديكم طلة
طبعا رنا و لا كضبت طوالي شالت القارورة و فتحتها
_ الله علي طلتك !
انا بقيت اودي وشي شمال و يمين و اتصرصر
هم الاتنين قعدتوا يقصوا و يرصوا و انا قفلت معاي قربت اخلي ليهم المكان و امشي اما كمال دة فكان دمو بارد لأبعد الحدود
كنت بعاين ليهو في وشو و بحمر ليهو و هو يتبسم
قام موبايل رنا رن
شالتو و مشت تتكلم
و انا شلت تلفوني فتحتو و بقيت بعاين فيهو
هو كان بدق في الطربيزة بشكل مزعج
قمت قلت اوووف بصوت عالي
قام زاد صوت الدقة
_ لو سمحت يا أخينا ممكن تبطل حركة شفع الروضة دي
حسيت نفسي فقدت سيطرتي لانو الصوت عمل لي توتر
المشكلة رفع لي حاجبو و ما رد علي ..
و بعد مسافة ...
_ يعني ولا فكرتي تعايني للبارد الجبتو ليك
قمت عملت نفس الشي ، ما رديت ليهو
قامت رنا جات خاشة
_ اسمعي يا تيتي دة عبد الرحمن قال م نطلع حيجي يسوقنا من هنا
قام كمال فكا ليهو ضحكة زي ضحكة رنا و قال:  تيتي؟
_ عبد الرحمن جاي متين
_ في الطريق
_ الله يجيبو بسرعة عشان انا زهجت بعد دة
كمال و رنا رجعوا يتونسوا و يضحكوا و يعلقوا علي الناس
كمال،كل دقيقتين بجي كوم حق بنات يسلم عليهو
بنات اول مرة اشوفهم ذاتو
انا كنت ماسكة خشمي علي و قاعدة و كل مرة بسأل من عبد الرحمن تقريبا سألت منو اربعة مرات عديل
_ ياخ اتأخر شديد
كمال : الله يديني وحدة تحبني زي حبها لي عبد الرحمن دة
قمت اتخلعت و كوركت فيهو
_ هييي دي منو البتحب عبد الرحمن؟
قامت رنا قعدت تكتم في الضحك
كمال عاين ليها و قال
_ دي مالا السألها منو؟
رنا : خليها خليها
قمت عفصتها و قلت ليها
_ اصلك يا كلبة من تلقي زول تاني طوالي بتبيعيني
رنا: لحد هسي نحن حلوين
قمت شلت شنطتي
_ عايني انا طالعة اشم هوا برا لانو هنا نفسي اتضايق ، انا طالعة حأستنى في الشارع
_ طيب حأجي لاحقاك
اتلفت عشان امشي اسمع كمال
_ جارية لي عبد الرحمن جري
وقفت كدا تاني استهديت بالله و مشيت ساي وقفت برا البوابة و بقيت مربعة يديني و مستنية متين يجي عبد الرحمن و ارجع بيتنا
بس اشوفو ليك وقف العربية كنت عايزة امشي تاني وقفت نفسي قلت استنى رنا لمن تطلع و هو اكيد حيتصل ليها
كان واقف قريب شديد و انا عاملة نفسي ما شايفة ؛ لمن هو شافني قعد يأشر لي و في النهاية م قدرت اتجاهلو و مشيت سلمت عليهو و وقفت
_ رنا دي وينها بتصل ليها م بترد
_ اي حتجي هسي هي
_ خلاص تعالي اركبي من الشمس دي
_ ا .. لا لا م مشكلة ..
_ يا بت انتي مالك معقدة كدة
اتلفت عليهو سريع لمن اتخلع
_ لا و الله ما معقدة .. بس م بحب اقعد في العربية و هي ما متحركة
_ دة كلام شنو الغريب دة؟
و نحن الاتنين مترقبين البوابة عشان رنا تطلع و بقيت ادعي انها تجي سرعة ، قامت اخيرا طلعت و انا و هي ركبنا
رجعت البيت و اتجدعت في السرير كنت مبسوطة انو بكرة الجمعة و حأنوم علي كيفي
نمت و صحيت بليل علي صوت امي
_ ي بت من جيتي شكلك لا صليتي لا اكلتي قومي بعد دة كفاك
يا الله يا الله قمت علي حيلي و بقيت اتلفت
_ أمي ، ابوي وينو الليلة ما سامعة صوتو في البيت
_ ابوك سافر البلد عندهم وفاة
_ عليك الله سافر يا الله ياخ كنت مشتاقة ليهو
مشيت صليت و جيت قعدت آكل في المطبخ و أسمع ليك صوت رنا تكورك و تلعلع مع امي برا و جات خاشة تووش المطبخ قعدت معاي تاكل
_ كنت بتصل ليك مالك ما بتردي؟
_ كنت نايمة و تلفوني من الشنطة ما طلعتو يادوب صحيت
_ نوم الهنا
قام جاتا رسالة فتحت تلفوتا و قعدت تضحك
_ بسم الله
_ دة كمال و الله الولد دة ظريف خلاص!
قمت عاينت ليها بي قرف
_ عايني لا جد ما تعايني لي كدة و الله طلع زول كويس عكس الانطباع الاول
_ غيرتي رايك مش قلتي شكلو مفتري؟
_ غيرتو و الله زول طيبان
_ هه طيبة انا
_ و الله يا حياة لو صاحبتيهو حتحبيهو ياخ واحد عسل خلاص هههههههههه
_ لا شكرا صاحبيهو انتي عليك الله
_ صحبتك بتحب ليك الخير بس انتي وحدة غبية
_ الله اكبر علينااااا
_ خلاص ي تيتي
_ اوعك تقولي لي تيتي دي قدامو
_ طيب يا تيتي
_ الله ياخدك