حياة

٥٣

سكت و انا بقيت بردد في كلامي ، كمال قفل الخط في وشي ، عاينت للتلفون و جدعتو في السرير بزهج .. بعد نص ساعة و انا لسة ما سكت من البكا ، اتصل لي ، رديت ليهو قال لي : حياة خليك جنب الباب
رديت : اوعك تجي لأني ما حأطلع
كمال : انا ما جاي بس انتي خليك قريبة للباب و ماف زول يفتحو غيرك
مسحت دموعي و طلعت .. امي كانت نايمة و مؤيد لسة ما جا من المدرسة
قعدت في البرندة .. قام الباب دق طوالي مشيت فتحتو و عيوني مورمة .. لقيت واحد شايل بوكس كبير بابتسامة مداهو لي و فات طوالي .. انا بقيت مستغربة قفلت الباب براحة و انا بعاين ليهو .. خشيت الاوضة و فتحتو ، لقيتو كلو ورود و شوكلاتة .. اتفاجئت شديد ، اي حاجة بحبها كانت فيهو ..
سمعت صوت SMS من تلفوني فتحتو ، لقيت كمال مرسل لي " شكلك متضايقة و زعلانة شديد اول شي روقي و متى ما حسيتي انك عايزة تحكي لي انا قاعد" و رسالة بعدها محتواها "بحبك"
كان مفترض العملو يسكتني بس لا .. خلاني ابكي زيادة ..
بعد سكتت مشيت غسلت وشي .. و جيت عاينت للبوكس تاني ، حسيت بسعادة ما طبيعية .. بس فجأة اتذكرت كلام خالتو سمية ، اخدت نفس عميييق و شلت التلفون اتصلت لي كمال .. رد لي طوالي كأنو التلفون في يدو و قال لي : الحلو هدا خلاص؟
_ كمال
_ عيون كمال .. وريني؟ الببكيك كدا شنو
اول شي كنت مترددة اقول ليهو السمعتو .. : كمال انت امك ما كانت عايزاني ليك؟
_ و دة منو القال؟
سكتت شوية : كانت عايزاك لي لينا صاح؟
_ جبتي الكلام دة من وين؟
_ بس وريني يا كمال الكلام دة بالجد؟
_ عايني اي كلام تقولو ليك لينا ما تاخدي بالك منو و ما تصدقيها كويس
قلت بخنقة : بس سمعتو من امك
كمال سكت مسافة و قال : بس يا حياة .. انا عمري ما كنت عايز لينا دي .. و معتبرها زي اختي
بكيت : بس خالتو سمية عايزاها .. و ماا عايزااني اناا
سكت شوية تاني و قال بهدوء : هسي دة الموضوع المبكيك كدا و عايزة تسيبيني عشانو؟
سكت و قعدت ابكي ، قام قال لي : طيب انتي بهمك رايي اكتر ولا راي امي؟
_ امك برضو رايها مهم يا كمال .. رضاها لازم .. وانا جرحني الكلام القالتو ، معناها هي ندمانة انها خطبتني ليك و قالت انها اتسرعت ..
_ بعيدا عن راي اي زول تاني .. حياة انتي عندي بالدنيا كلها و انا ما برضى ابدلك بغيرك .. ولا بقدر اعيش مع واحدة تانية .. انتي اختياري سواء كنتي اختيار امي ولا لا
بديت افكر و سألتو : طيب .. الحل شنو؟
_ كيف يعني الحل شنو ، يا بت انا ربطتك فيني و انتهى الموضوع .. مافي خيارات تانية ولا عايزها و الموضوع دة لا تفكري فيهو ولا يهمك كتير ختي في بالك انو انا ليك بس ..
قشيت دموعي و قلت : طيب
_ بس الشي الزعلني انك طوالي جارية تسيبيني .. كأنك ما صدقتي لقيتي سبب
_ كماال .. صدقني القلتو ليك دة في لحظة غضب بس
_ طيب يا حياة .. المهم انتي ما تبكي و ما تفكري كتير
يمكن بعد كلامو خشيت في حالة ندم عميقة .. ياريتني شاكلتو و قلت ليهو خبيت عني ليه بس ما كنت اقول ليهو نسيب بعض .. ياريتني قلت ليهو اي حاجة غير دا .. و ليه اصلا دي اول حاجة فكرت فيها .. ؟