حياة

٦٤

و تاني يوم ، علي الموعد جاني مزاج اتزبط .. طلعت و مشيت عبد الرحمن كان مستنيني في راس الشارع .. جيت سلمت عليهو و ركبت و طول الطريق كنا بنتونس عادي لحد ما وصلنا المطعم و نزلنا قعدنا جوا .. زح علي المنيو و قال لي : اختاري و اطلبي
ابتسمت وقلت ليهو : شوية كدا .. طبعا رنا لو عرفتنا جينا هنا بدونها بتقتلنا هههههههه
_ يا زولة رنا بي راجلها انا تاني ما مسؤول منها
ضحكت : صاح
_ بالمناسبة ورتني شغلك في التطريز .. ما شاء الله اول مرة اعرفك مبدعة
ضحكت و قلت ليهو : صراحة حتى انا اول مرة اعرف ... حاجات مدفونة طلعت في وقتها، بس يعني ما للدرجة يادوبني مبتدأة
_ هههههه لا بجد واصلي
بعداك قمنا طلبنا بيتزا بالهوت دوق الحجم العائلي الانا بحبو
و اثناء ما بناكل قام قال لي : حياة عارفة انا جبتك هنا ليشنو؟
و دة الانا كنت مستنياهو من قبيل ، عاينت ليهو بتركيز .. قام واصل : صراحة انا ما عارف اذا الوقت مناسب لموضوع زي دة ولا لأ بس .. يعني انا ما قادر اصبر اكتر من كدا
انا خلاص بقيت اتبلع .. و انا بعاين ليهو
_ المرة دي حأقولها ليك بنفسي يا حياة ... (اتنحنح) تتزوجيني؟
حسيت اللقمة وقفت في حلقي .. و طيرت عيوني بسكات .. حسيت اني ما قادرة اجمع ولا كلمة عشان اقولها
هو قال سريع : اا.. ما تستعجلي و فكري براحتك، انا ما حأضغط عليك بس .. مستني قرارك
شال مفاتيحو و طلع .. و خلاني في حيرة من امري .. ختيت يديني في راسي و عصرت عليهو و بعد مسافة قمت مشيت البيت .. و كنت لسة  ما مستوعبة انو طلبني للمرة التانية ..
ختى كرامتو علي جنب و ما فكر الا في حبو لي .. اتصلت لي رنا و كلمتها فردت لي : هههه انا عارفة
قلت متفاجئة : كنتي عارفة ؟ يعني كلمك؟
_ أنا شجعتو بالمناسبة .. يا حياة عبد الرحمن من زمان بحبك و لسة بحبك صدقيني و لمن سافر عشان ينساك ما قدر و خطب روعة عشان فقد الامل في انك تكوني ليهو انتي ما عارفة كان بتعذب كيف .. هسي حاليا ما عايز يضيعك من يدو .. عليك الله يا حياة وافقي ما ح تلقي زول يحبك زيو
يمكن مشكلتي كانت زي مشكلة رنا .. ما كنت عايزة أقبل بيهو و انا في قلبي واحد تاني ، كدا بحس كأني ظالماهو ..

بعد تلاتة ايام جاتني الموافقة علي الوظيفة،  الساعة ديك الدنيا ما شالتني من الفرحة و جريت كلمت امي .. و قالت لي : ربنا يفتحها عليك محل ما تقبلي

و تاني يوم مشيت الشركة ، كان راقية شديد .. شلت اوراقي و حاجاتي معاي و جيت اقابل المدير .. كلمت السكرتيرة : انا جيت لي الوظيفة
_ انتي من الاتعينو جديدين؟
_ ايوة
قالت لي بابتسامة : طيب استني هناك دقيقتين ما بأخرك
دخلت جوا المكتب و جات قالت لي اتفضلي .. انا جيت دقيت الباب ع الخفيف و دخلت .. و لمن قبلت عليهو و شفتو اطرافي اتجمدت و ثبت مكاني بهلع .. كمال؟  ..اخر حاجة عرفتها عنو انو سافر مع امو و خالتو ... بس حاليا ماسك ادارة شركة هنا؟
بعد الغيبة الطويلة دي .. كان شكلو متغير بس عرفتو من اول نظرة .. كان حالق شعرو و لابس بدلة سودا .. قلبي وصل حلقي و انا لسة مبحلقة باستغراب
كان بكتب و لمن رفع راسو عاين لي ملامحو اتغيرت و ظهر علي وشو نفس التفاجؤ ..
يمكن كانت اصعب لحظة اتلاقت فيها عيوننا بعد الخذلان و الوجع الضقتو من وراهو .. عيوني خلاص رقرقت .. و نزلت دمعة علي خدي ، فتحت الباب و طلعت بسرعة رهيبة .. كنت بجري بس عشان اطلع و الناس يعاينوا لي باستغراب .. الدموع كانت مالية عيوني و حاجبة عني الرؤية .. لحد ما طلعت برا و شميت الهوا .. قعدت لي في كنية حديد كدا و دنقرت راسي و بقيت ابكي .. قلبي كان مقطوع شديد .. حاولت اتمالك نفسي و امسح دموعي بس كانت لسة بتنزل .. فجأة سمعت صوت زول بناديني بإسمي .. اي كان صوتو .. وقف قدامي و انا مدنقرة بقيت امسح في دموعي سريع .. رفعت راسي و عيوني مورمة .. لاقيت عيونو تاني و قلبي رجف .. هو شكلو كان متردد .. بقينا اللتنين في حالة صمت .. انا قمت و جريت من جنبو بسرعة و ركبت المواصلات ما كنت عارفاها ماشة علي وين اصلا .. المهم ركبت و خلاص