حياة

١٥

و بعد لقيت مكالمات رنا احترت و رجعت بسرعة اتصل ، خش معاي جرس و فصلت الخط في وشي ،
بتفصل في وشي طيب كانت عايزة شنو ؟
نمت و كان نفسي اصحى القى دة كلو حلم ،
اليوم التاني ما قدرت اصبر لبست توبي و مشيت بيتهم ، ما قدرت اخش الاوضه طوالي قعدت برا و قلت لهبه تناديها لي مشت و جات قالت لي رنا نايمة ، استنيت شوية و مشيت جيت  خاشة البيت لقيت امي و ابوي يتكلموا جيت بعندهم امي نادتني
_ حياة انتي مش ناس طه ديل بايعين بيتهم ؟
_ كانوا عارضنو لكن ما عارفة هسي الحصل شنو
جيت قعدت جنبهم
ابوي : لو اتباع كان شفنا ناس جو هنا
امي : خلاص انا بسأل
ابوي : هو مبني جاهز؟
امي : اي كان بنوهو و سافروا ما شاء الله سمح و الله
ابوي عاين لي كدا : مالك يا بتي ؟
_ مالي؟
_ ما من عادتك تسكتي كدا
_ و الله شوية زهجة يا ابوي بس ماف حاجة
امي هزت راسا بأسف ، قمت منهم دخلت جوا عاينت لتلفوني ، اتصلت لكمال كنت فاقداهو شديد و محتاجة ليهو ، لقيت تلفونو مقفول زهجت و قفلت تلفوني و فتحت شيتاتي عشان اقرا مع انو رنا كانت شاغلة بالي شديد ..

عدت الاسبوعين و جات الامتحانات كنت حاسة نفسي لأول مرة ما قريت حاجة و ما جاهزة و لا متحمسة للامتحان ، و لأول مرة امشي الجامعة براي ، طلعت بدري و قعدت في واحد من البنشات و انا بقرا ، كنت حاسة بالوحدة شديد
جاتني مكالمة من رقم غريب اترددت حتى رديت
_ الو
_ ألو ي جميل
الصوت ما كان غريب علي سكتت شوية
_ مالك قاعدة براك و جاية من الصباح كدا الامتحان لسة ، زحيت تلفوني و قعدت تلفتت
_ انت منو ؟
_ معقولة؟
زهجت و قفلت الخط في وشو .. و ختيت التلفون بعد شوية جا كمال يضحك : يا هبلة يا عديمة الاخلاق
من شفتو قلبي دق بسرعة بجد كنت مشتاقة ليهو و مستنياهو بي كلو بس ما بينت ليهو اي شي من دة مع انو نظراتي كانت كاشفاني ، دنقرت و ما رديت ليهو
_ يا بت حياة
_ امشي ما عندك عشرة
_ انا الما عندي ؟
_ اي ما بتسأل مني ليه
_ شايفة الرقم الغريب تلفوني اتسرق و جبت تلفون قولي مبروك
قعد جنبي و انا ما رفعت ليهو راسي
_ صحي وين تومتك ؟ حتكون فاتت الكافتيريا من الصباح طبعا
رديت بكل برود : ما بعرف
عاين لي باستغراب و سكت شوية : ما بتعرفي ؟
اخدت نفسي و ختيتو بيأس
قال لي بجدية : حياة ، اختلفتو ولا شنو وريني
اتلفت عليهو و حكيت ليهو الحصل الفترة الفاتت كلو ، و هو بقى متفاجيء ، حتى هو ما صدق انها تعمل كدا
_ معناها احاسيسك تجاه البت الاسمها جواهر دي كلها كانت صاح
_ ما عارفة يا كمال لكن حاسة انها حتخرب علاقتها مع احمد برضو
_ المهم انتي ما تخسري صاحبة عمرك
_ صاحبة عمري هي الخسرتني
_ يمكن اي شي يتغير لمن تشوفو بعض الليلة
دنقرت : بالجد ما نفسي الاقيها يا كمال ، ما عايزة
_ حتلاقيها قلت ليك و ما حتهربي
ما رديت ، قعد شوية و فات كان عندو محاضرة ، الامتحان كان ببدأ الساعة 8 .. مشيت الكافتيريا اشتري لي عصير اخدتو وطلعت فجأة اتصدمتت مع بنات في الباب .. رنا ؟؟
حسيت لي سنوات ما شفتها ، كانت مع الشلة الكريمة ، عاينت لي بكل احتقار و فاتت .. مشت ، انا كنت بعاين ليها بي كسرة و هزيمة ، ناديتها مرتين اتلفتت علي ببرود مشيت عليها و انا كلي اسئلة
_ ها ؟بسرعة عايزة شنو مستعجلة انا
تمتمت : رنا ليه بتعملي كدا ؟
قربت مني و مدت اصبعها نظراتها لي كانت كلها حقد : انتي يا حياة ، ما حتقدري تمحي شخصيتي و ما حتقدري تحتكريني لي نفسك .. انا ما خايفة منك فاهمة؟
_ نسيتي صحبتنا هنت عليك ؟
_ انتي استغلالية انتي ما صاحبة
ما سمعت مني رد و فاتت ، لأول مرة في حياتي اشوفها متغيرة بالصورة دي ، رجعت محل كنت قاعدة في كل حزن و انا بفكر ، كل القراية القريتها راحت بقى تفكيري كلو حولها و عقلي عايز يضرب .
خشيت الامتحان بدون تركيز ، الامتحان بدا و الناس دخلت الا رنا و جواهر و البتين صحباتهم طبعا ما كانوا هاميني بس رنا ، كل مرة كنت بعاين للباب مستنياها تجي ما كنت مركزة مع امتحاني ، و اخيرا جات خاشة متأخرة و لا عاينت لي نهائيا ، كانت قاعدة قدامي ، قربت ابكي بس اتماسكت
بعد الجلسة طوالي طلعت و رجعت البيت حاولت قدر الامكان انو ما الاقيها او المحها ، اخدت نومة و صحيت تلفوني دق شلتو بي خلعة لقيتو دة كمال رديت سلم علي
_ و الله يا كمال الامتحان خلص و طلعت طوالي كنت تعبانة و عايزة اصل البيت ارتاح
_ تعبانة ولا هاربة
قمت سكتت مسافة ..
_ ما تعملي في نفسك كدا ركزي مع قرايتك هسي
_ بحاول
الامتحانات قربت تخلص و كنا بنفس الحالة كنت مرات ما بشوف رنا الا في قاعة الامتحان ، بجي قبل الامتحان بشوية و بطلع بعدو طوالي ، كمال ما كنت بقعد معاهو في الجامعة كتير عشان متجنبة شوفة رنا كان بينا التلفون اكتر ، كان بحاول يطلعني من المود الكنت فيهو بس انا ما كنت بساعدو ولا اساعد نفسي ، و يوم الجمعة عزمني علي كافيه و طبعا بالقوة حتى وافقت و كنت متحججة ليهو بالقراية ، اتلاقينا و قعدنا .. و انا ساكتة و ومدنقرة و هو علي غير العادة ساكت كان بعاين لي و كنت حاسة بنظراتو ..
_ حياة ، اشتقت ليك و الله
رفعت راسي بي خلعة و عاينت ليهو و اتلفت منو سريع
_ انا قاصد اني مشتاق لي حياة القديمة العرفتها اول مرة ، حياة القوية العصبية و الشكالة و الحقانية .. الانا شايفها قدامي دي ما حياة البعرفها ..
و في اللحظة ديك وقعت دمعة في خدي ، كلامو كلو كان صاح
_ شايفة ؟ عايني لي انتي مقتنعة انو دي انتي ؟ الحياة دي ما سهلة و حتلاقيك حاجات كتيرة ما ممكن تتكسري من اول عترة
_ الحياة ما قدرت تكسرني قبل كدا لانها كانت معاي لكن الكنت بتكل عليها كسرتني
_ مافي شي واقف عليها ، ما تضعفي قدام زول الضعف و الانكسار ديل خليهم بينك و بين نفسك ، تعالي ابكي براك لكن ما تبكي قدام زول ما تضعفي قدام زول خليك قوية قدامهم لحد اخر لحظة عشان ماف زول يستغلك .
عاينت ليهو متفاجأة ما مصدقة انو دة كمال الهزلي ذاتو ؟ كان بتكلم معاي بكل جدية ما شفتها قبل كدا في وشو