حياة

٤

مر اسبوع كامل .. توصلينا الجامعة بقى حاجة ثابتة عند عبد الرحمن .. تعاملي مع كمال ما تغير فيهو شي ولا تعاملو معاي كان بجي بسلم علي رنا و انا بسلم علي من بعيد و كنت برد ليهو في سري بأفظع الشتائم لانو في كل مرة بشوفو كنت بتذكر احرجني كيف ..
عبد الرحمن كان زول كويس شديد رغم تعاملي الجاف معاهو طيبتو ما اتغيرت معاي
نزلنا قدام الجامعة و رنا كانت بتتكلم بالتلفون اتقدمت شوية قدامي قمت جيت لي عبد الرحمن بالشباك
_ عبد الرحمن ياخ و الله عارفاها جات متأخرة ، بس شكرا لي تعبك معانا الايام الفاتت دي كلها
عبد الرحمن ابتسم
_ ي بت تعب شنو اول شي البت المعاك دي اختي و لو عليك انتي مننا و فينا و مافي داعي دة واجب بسيط
_ بس عشان حسيتا حركة بايخة انو انت ما مقصر معاي و انا مرات لئيمة شوية ههه معلش
ما عارفة جاتني الشجاعة دي كلها من وين، اني اقيف قدامو و اقول كدة بس حسيت انو حمل انشال عن ضهري و حسيت نفسي انبسطهه
خشيت البوابة بي نفس و فجأة النفس دي اتسدت لما شفت كمال ناطي قدامنا و طبعا رنا ما تصدق تلقاهو ،
رنا : كنت مشرك لينا بجاي ولا شنو؟
كمال : و الله جيت بدري عشانكم تصدقي
عاينت لي رنا و قلت ليها
_ عايني انا ماشة اشرب شاي لانو في البيت ما شربتو
رنا: ارح ماشين معاك
قمنا قعدنا بي مزاج، قصدي هم الكانوا قاعدين بمزاج اما انا فكالعادة
رنا وقفت
_ انا ماشة ادخل أحمد جا برا
_ م تتأخري
مشت و بقينا قاعدين انا و كمال
و هو سارح فيني و انا عارفاهاو بعمل كدا عشان اتغاظ
_ تقول ما بتصافح و هسي عايز تقددني بعيونك؟
بي ضحكة:  عليك الله دة كل المكرهك فيني كدة؟
_ اي ما اكذب عليك ، لانك بايخ
_ طيب لو خليتك تتسدي حقك حتشيلي وش الفقر دة ؟!
قمت بدون ما احس ضحكت كدة و سكت سريع
قام قعد يكورك
_ ايوااا بس دي كنتي داساها وين
_ خلاص عايزة اسألك السؤال الواقف لي في حلقي ؛ عملت كدة ليشنو يعني ؟!
_ ساي بس حركات مني ، لمن الواحدة م تخش راسي بقول ليها كدة
_ يعني انا ما خشيت راسك
_ اول مرة بس
_ و ان شالله عمري ما اخش
_ طيب هسي البطلعك شنو
_ ي ود تطلع روحك اختاني
_ جادي معاك الدنيا دي فيها شنو عشان تشيلي الحقد دة كلو في قلبك
اللحظة ديك حسيت نفسي فعلا حاقدة
_ مادام عارف انو الدنيا ما فيها حاجة مافي داعي للبتعمل فيهو
_ توبة ياخ تبت بعدك م حأعمل حاجة زي دي
_ تتوب ما تتوب دة كلو برجع ليك
_ أنا آسف ، سامحيني يا تيتي
قمت ضحكت تاني و عاينت ليهو ،
_ طيب ولا يهمك
قام وقف علي حيلو و بانفعال
_ يعني خلاص فكيتي حظري ؟
قمت هزيت راسي(اي)
_ طيب انا عازمك
_ عازمني؟
_ اي عشان اعتذر ليك
_ لو رفضت حأحرجك؟
_ اي و الله مافي بت رفضت لي قبل كدا
_ طيب ما حأقبل
_ عايزة تنتقمي مني ؟ مش اتصافينا
بي ضحكة
_ يا زول صافية لبن لكن انا م قبلانة و خلاص
_ ما حأحنسك كتير عشان هيبتي م تروح
_ انت عندك هيبة يعني؟
_ الزيك ما بشوفوها
و رجع قعد
بالجد أول مرة احس كدة  انو زول بسيط شديد حتى في طريقة كلامو و وضوحو ما عارفة اليوم داك حسيت انو الحقد القالو دة راح حبة
اليوم التاني انا و رنا رجعنا من الجامعة بدري ؛ كان عندنا محاضرتين بس ، بعد المغرب فتحت شيتاتي و قعدت اقرا قامت فلانة جاتني و وقفت لي جمب باب الغرفة و قعدت تعاين و تتبسم لي ..
_ بسم الله ، اول مرة تجي خاشة بدون ما اسمع لعلعتك من برا
قامت ما ردت علي و جات خاشة قعدت جنبي و فتحت الشيتات
_ قعد تقري قلتي لي
قامت علي حيلها و مرقت و جات شايلة لي علبة
_ طبعا اتوقعت القاك في المطبخ مشيت ختيتا ليك هناك
_ دة شنو جبتي لي حاجة حلوة؟
_ جبت ليك بسبوسة يا حب
انتي حاسة بشنو الليلة معقولة جبتيها لي براك كدا؟
_ انا عندي منو غيرك اجيب ليهو؟ 
قمت خطفت منها العلبة و قمت بيها طبعا كنت بموت في البسبوسة ، الغريبة انو رنا ما مدت يدها و لا سألتني قمت قطعت أكلي و عاينت ليها لقيتا تتبسم ، قمت قفلت العلبة و عاينت ليها بخباثة
_ يا بت انتي ما طبيعية الليلة ، عايزة مني حاجة صاح
_ عايزة منك شنو يعني؟
_ طيب مالك ظريفة معاي كدا و بتكسري تلج كمان
قامت نطت قريب مني و مسكتني لمن اتخلعت
_ تيتي ، مش انا صحبتك اختك حبيبتك
_ لا ولا بعرفك
_ ياخ عليك الله ما نفسك تغيري رايك؟
_ راي بتاع شنو؟
_ رايك في الارتباط .. و كدة
_ و ليه بتسأليني مش احنا قفلنا السيرة دي؟
_ تيتي انتي ما شفتي عبودي اخوي ميت عليك كيف
قمت نطيت من السرير و وقفت علي حيلي و بقيت اعلي صوتي
– ميت علي أنا؟
قمت وعيت لي صوتي و قفلت خشمي سكتنا ثانيتين
رنا بي وشوشة:  يا حيوانة الله يفضحك ، امك دي بتسمعنا
قامت قفلت باب الغرفة سريع
_ قلتي لي شنو يا بت م سمعتك كويس
_ زي ما قلت ليك ، و ليهو يومين زاني في راسي قال لي إلا اكلمك لانو هو ما قادر
قمت قعدت في السرير و انا سارحة
_ يا زولة هو جاهز و كمان بتقدم ليك
_ و الله ما عارفة اقول ليك شنو لكن ...
قاطعتني: عايني ما تستعجلي و فكري كدا
قمت اتلفت عليها سريع
_ افكر شنو يا رنا انا عبد الرحمن اخوك دة ما خاتاهو في حساباتي لا و كمان معتبراهو اخوي زي ما هو اخوك انا مستحيل اقدر اوافق
_ يا زولة ما اخوك ولا شي
_ عايني اوعك تكلميهو انك وريتيني و خليهو ينسى الموضوع دة
_ حيكون مستنيني اجي عشان اوريهو قلتي شنو
_ ياخ قولي ليهو لقيتا نايمة و لا ماف المهم ما توريهو اني عرفت
_ حياة حرام عليك و الله هو بحبك شديد
_ نحن لحد هنا كويسين انا ما عايزة اخسرو
_ طيب ، وريني السبب البخليك ترفضيهو شنو؟
_ مافي سبب بس انا ما بقدر .. افهميني ياخ
_ طيب
طبعا رنا زعلت و طلعت سريع يمكن كلامي كان قاسي شديد و زعلها لانو اخوها و انا عارفاها بتريدو قدر شنو و ما بهون عليها ينكسر ؛ و انا ما لحقتها بقيت مكاني
كان الباب فاتح و انا سارحة ، جات امي خاشة و بقت تعاين لي و انا ما انتبهت ليها ، جات قعدت جنبي
_ يا بتي ، ما حتلقي احسن منو
انا جسمي كش و اتخلعتهه و عاينت لامي
_ صوتكم كان عالي و سمعت كلامكم بدون قصد 
انا طبعا بقيت اتمتم و ما قادرة اجمع انو امي سمعت كل شي