حياة

٦

كان في شوية ناس ماشين بالشارع لما شافوا المشكلة بدوا يتلموا عشان يفرقوهم ..
أنا كنت بحاول اهدي الوضع شوية بس الاتنين كانوا غضبانين و أصواتهم عالية .. انا زهجت و كوركت فيهم
_ بس ياخ
ماف زول اشتغل بي
مسكت عبد الرحمن من يدو حاولت الزو
قام عاين لي بي زعل
_ دة منو يا حياة؟
قمت صرخت فيهو
_ انت دة المنو؟ انت قايل نفسك منو عشان تجي تضرب ود الناس قبل ما تفهم حاجة ، انت ما مسؤول مني ولا بحق ليك تعمل العملتو دة
هو طبعا سكت نهائي و بقى واقف ما قادر يرد لي
_ و ياريت تمشي من هنا .. أمشي ياخ
قام مشى بسرعة و زعل و ركب عربيتو و رزع بابها و فحط
واحد من المتلمين بدا يوزع في الناس و شغال ليهم مشكلة و اتحلت يلا يلا
انا بقيت اشيل نفسي و اختو ، اتلفت علي كمال
_ كمال ، حقك علي و الله ، الحصل ليك دة كلو بي سببي
_ دة منو دة يا حياة ببقى ليك
_ لا ياخ دة عبد الرحمن اخو رنا
_ اخو رنا ؟ طيب مالو ؟
_ انا ذاتي ما متوقعة منو حاجة زي دي ، زعلني شديد و فضحني في الشارع ، هسي الناس يقولوا علي شنو اكيد حيفهموا المشكلة غلط و اي زول حيفسر علي هواهو
_ برضو لكن ، شكلك بتهميهو شديد
عاينت ليهو بزعل
_ ما اظن
_ طيب مشكلتو معاك ؟
_ ما عارفة
و انا كنت عارفة مشكلتو معاي ؛ انو كان بحبني و العملو دة كان سببو انو حس بالغيرة لمن شاف كمال ماشي معاي
وصلت البيت و كنت قرفانة من اليوم دة ، اترميت في السرير و ما قادرة انسى اي لحظة من الموقف
قام تلفوني رن لقيتو كمال
_ الو
_ حياة اها وصلتي؟
_ اي يادوب خشيت
_ كويس طيب وريني لو حصل شي ، انا خايف الزول دة يعمل ليك مشاكل مع ناس البيت او يفهمهم غلط
_ لا ما اظن يصل مرحلة زي دي ، انا لو لاقيتو بتفاهم معاهو
_ بكون احسن
قفلت تلفوني و اخدت لي نومة ، المحاضرة بتاعتنا كانت متأخرة طلعت قبل الضهر بشوية ؛ لاقيت رنا في الجامعة و اتحاضنا كداا
_ و الله ما قايلة نفسي بفقدك يا تيتي
_ ولا أنا لكن بعد دة فقدتك
_ امبارح وين ما خشيتي الواتس
_ كالعادة تلفوني ما فتحتو
_ يعني لا تفقدي لا يفقدوك
_ كنت فترانة ياخ
_ استني الفتر الجايينا تاني
_ اي بعد شوية حيضغطونا في القراية
_ لا م قصدي القراية، قصدي الملح هههههه عبد الرحمن اخوي امبارح سافر تاني حنتمرمط
كانت بتضحك و انا واقفة اعاين ليها عبد الرحمن سافر ؟! و في نفس اليوم ؟
رنا شافتني سرحت قامت سكتت و بقت تعاين لي
_ يا بت مالك
_ انتي يا رنا ما شفتي الحصل امبارح
_ خير في شنو
_ عبد الرحمن سافر ليه ؟
_ أمي قالت لي تبع الشغل .. حصل شنو امبارح ؟!
حكيت ليها الحصل كلو ، و رنا بقت مخلوعة
_ يعني معقولة يكون سافر عشان كدا ؟
_ انا ما عارفة بس لو ما سافر كنا حنشوف بعض حتى لو صدف و يمكن هو ما عايز يشوف وشي
_ ما توقعت يا حياة الموضوع يتطور كدة
_ اخوك عصبي !
_ هو ما عصبي لكن بحبك
قمت ضحكت ليها باستهتار كدا
_ و الله دة حب دة
_ انتي ما حاسة بيهو زيي
_ لا يا حساسة .. اها هو جاي متين ؟
_ ما معروف مرات بعدي شهرين عديل
_ كويس للوقت داك نكون نسينا الحصل
_ و يمكن هو سافر عشان كدة
_ كانت لحظة غضب ، حتى الكلام القلتو انا كان لحظة غضب
_ لكن كان كلو صاح ، انتي ما غلطتي
_ بس طريقتي
_ طيب ما حاولتي تكلمي كمال ؟
_ اكلمو بشنو
_ ما عايزة تكلميهو بمشاعرك ؟
_ انتي هبلة يا بت ، اكلمو كيف؟
قامت اتلفتت مني فجأة كمال جا من ورانا و نحن الاتنين قبنا طار
_ خلعتنا الله يخلعك
قام ضحك
_ و انتن مالكن ملبوشات زي دة ؟
انا و رنا عايننا لي بعض كدا قامت رنا صرت ليهو و قالت بي نهرة : ماف شي
كمال : دي مالا الليلة ؟ .. يا بت احمد مزعلك ولا شنو ؟
حياة : أحمد يزعلا ياخ معقولة؟
رنا : هبل خلاص ، كدي استنوني هنا جاية ..
ختت لي شنطتا و فاتت جا كمال قعد جنبي قمت لمحت شلخ في وشو و كان ظاهر
_ دة شنو الفي وشك دة
قام هبشو بي يدو كدا
_ قصدك الشلخة دي ؟
_ اي
_ دة اثر ضربة امبارح
_ بالجد ؟ امس ما لاحظت ليها
_ انا حسيت بيها لكن ما اشتغلت بالموضوع
قمت سكت و حسيت بي غصة في قلبي هو اظنو حس اني اتضايقت شوية
_ يا بت عايني ، الموضوع ما يهمك كتير انا متعود علي مشاكل اكبر من دي
_ خليها تجيك المشاكل ، بس وقت تجيك ما تكون بسببي أنا
_ خلاص انسينا من الموضوع دة .. انتي و رنا كنتوا بتقولوا في شنو ؟
قمت عاينت ليهو باستغراب
_ و انت مالك؟
قام ضحك و قال:  و الله لو ما سمعت إسمي في الموضوع ما كان سألت
قمت اتخلعت و قلت خلاص معناها سمع كلامنا داك كلو و بقيت اتبلع
_ كنت بتتصنت علينا ؟
_ لا و الله صدفة بس
_ عليك الله
_ اها وريني كلام شنو العايزة توريني ليهو ؟
_ ما عايزة اوريك اي كلام
_ حياة ..
و بقيت افكر .. تاني البحلني من كمال العبيط شنو
_ انت مش قصدك كلام رنا معاي؟ كانت عايزاني اوريك انو عبد الرحمن سافر
_ انتي جادة ؟ متين؟
_ امبارح دي و الله
_ احسن
حسيت بيهو ما صدق لكن برضو مشاني ساي و قفلنا الموضوع علي كدة ..
بعد مسافة من الصمت الغير معتاد كمال وقف و قال لي : يلا انا ماشي محاضرتي قربت تبدا
حياة : طيب ، انا مستنية الزفتة ديك هناا
كمال : صحي مالا اتأخرت كدة
حياة : حتكون لقت ليها ناس تنبص معاهم اصلها بتحب النبصي
كمال : ما عارف لكن شكلها زعلانة زعلانة كدة
حياة : لالا طبيعية
_ طيب يا زولة بنتلاقى
و قام مشى .. بقيت قاعدة ربع ساعة و رنا لسة ما جات قلبي اكلني البت اتأخرت كدة مالا شلت التلفون و اتصلت قام تلفونها رن و كان في شنطتها
قعدت اتلفت و قمت من مكاني مشيت الاستراحة قعدت افتش فيها هناك .. فجأة اشوفا قاعدة مع بنات من دفعتنا و اكتر بنات ما كان عندنا ليهم حاجة ، استغربت و جيت وقفت ناديتا ، قامت قطعت ضحكتها و عاينت لي قمت جدعت ليها شنطتها و مشيت ، جات لاحقاني سريع
_ يا بت حياة
وقفت و اتلفت عليها
_ انا بيهناك مستنياك و انتي قاعدة لي في نص ناس جواهر و تضاحكي ؟