حياة

٣٤

قاطعتني بإصرار و الدموع مالية وشها : لأ لأ يا حياة انا لازم احكي ليك اي شي فاهماني؟
فكيتها براحة و رجعت قعدت ، قلت اسيبها تفضفض لي يمكن ترتاح شوية .. مسحت دموعها و واصلت : بس .. بس لقيت انو حتى القروش البسرقها ما جايبة حقها و ما بتسد لي غرص ، جواهر كانت بتطلب مني قروش بتقولي دة حق التوصيلة .. كنت مضطرة ادفع كتير يا حيااة .. ما كنت بشوف قدامي عميت ، وقتها كان ممكن أعمل اي حاجة عشان القروش و .. قمت اضطريت .. انو ..
قطعت كلامها و رجعت تبكي تاني ، قلبي كان مقطوع عليها و ما بإيدي شي غير اسمع ، اقول ليها شنو بس ؟ اقول شنو ممكن يخفف ليها وجعها و غصتها
مسكت يدها ضغطت عليها و سألتها بقوة : انو شنو يا رنا واصلي ؟
قالت بصوت متحشرج مختلط بآهات البكا : اضطـ..ريت اشتغل شغل وسخ ، .. (صرخت) و من تاني يوووم اتمسكت ياا حياااة
كانت بتبكي و تتكلم بحرقة و تضرب رجلها في الارض ، كانت حاسة بندم عمرها ما حست ولا حتحتس زيوو
اتمساكت و حضنتها و بقيت بهدي فيها :  انا آسفة لأنك عشتي دة كلو و ما لقيتيني معااك ، ما لقيتيني جنبك يا رنا انا ذاتي اسفة سامحيني لأني ما بعدتك من الطريق دة
كانت بتغرس اضافرها فيني و تهز راسها و تقول : لالالا يا حياااة انا الحصل لي دة عقااب عشااان غبائي لاني بعتك بسهوولة بعد السنوات دي كلهاا ، انتي طول عمرك بتخافيي علي و ما بتزصي فيني شر بس انا فرطت فييك ياا حيااة انا الندماانة و انا الآسسفة
طلعت من المصحة بعد هدت و نامت ، اتكلت علي الحيطة البرا و قعدت ابكي بحرقة ، كنا وين و بقينا وين يا رنا؟ يحليل ايامنا و يحليلنا .. الظروف اتغيرت بشكل كلي ، من بعد ما كنتي الطاقة الايجابية بقيتي كتلة حزن متحركة ..
مسحت دموعي و مشيت شوية لقيت لي مزيرة وقفت فيها و غسلت وشي ... اتلفت علي الزلط شفت لي حاجة كبيرة لابسة نضارات سودا و شايلة ليها اكياس و واضح من ملابسها انو وضعها تعبان ،كانت بتحاول تقطع الزلط .. عدلت شنطتي و سرعت عليها .. مسكت منها الاكياس و قطعتها الزلط ..
_ يا بتي الله يديك العافية ما قصرتي
_ الله يعافيك يا امي انتي طالعة براك كدا مافي زول معاك ؟
_ و الله يا بتي الزمن دة الفاضي للتاني منو عشان يزاكك فيهو محل ماشي
ابتسمت بحزن : ربنا يقويك ياخي .. بيتك وين انتي ؟
(اشرت بي يدها ) : شوية لي قدام كدا
قمت وقفت لي ركشة قالت لي بسرعة : دة شنو اوعك تكوني موقفاها لي
_ يا أمي الواطة حارة و المشوار بلاكياس دي بعيد عليك
بقينا نحلف انا و هي حتى بتاع الركشة بقى يحنس فيها معاي و في النهاية اقنعتها و ركبت و رفعت ليها الاكياس ، قعدت تدعي لي لحد ما الركشة فاتت .. حسيت بشعور راحة ما طبيعية .. وقفت للمواصلات و ركبت .. وصلت الجامعة و كانت المحاضرة باقي ليها نص ساعة و تبدأ .. دخلت الكلية و قعدت لي في واحد من البنشات ، بعد شوية جات واحدة بتقرا معانا سلمت علي و قالت لي : في واحدة من قبيل بتسأل منك و من قبيل مستنياك تجي
_ منو ؟
هزت لي اكتافها بعدم معرفة و وصفت لي مكانها ، مشيت عليها و كانت مدنقرة مع تلفونها ، وقفت قدامها و قلت:  السلام. عليكم
رفعت راسها طوالي و من شفتها اتذكرت وشها طوالي مع انها كانت لمحة لكن كنت متذكرة تفاصيلها كويس ، البت الكانت مع كمال في المطعم .. كان شكلها اكبر مني شوية و ما شاء الله كانت جميلة شديد و انيقة الصراحة ..
وقفت علي حيلها و سلمت علي و انا طبعا بعد شفت وشها و عرفتها بقيت ساكتة و بعاين ليها باستغراب و غضب ..
قامت سألتني:  مش انتي حياة؟
هزيت ليها راسي بعدم صبر: ايوة انا حياة
كان شكلها نوع البنات الواثقات من نفسهم و شخصيتها واضح عليها القوة : جيت عايزاك في موضوع و على ما اظن حتكوني عرفتيني لأنو كان بينا لقاء
_ عرفتك اي
_ طيب حتكوني بتتسآئلي انا جيت هنا ليه .
ببرود:  فعلا .. اتفضلي
قعدنا في البينش الكانت قااعدة فيهو
_ طيب يا حياة ... الحكاية كلها سوء فهم ، أنا و كمال ما بينا حاجة زي ما انتي تخيلتي لمن شفتينا و كل البينا شغل كنا بنتناقش فيهو ..
دنقرت راسي بحزن قامت واصلت : انا الجابني احساسي بالذنب ما عايزة اكون سبب في مشكلة لي اتنين بحبو بعض و من وقتها و أنا ضميري انبني و قلت الا اجي و افهمك الحاصل .. رغم اني كمال دة ما بعرفو كويس بس حبو ليك واضح يا حياة اوعك تفرطي فيهو و تخلي سوء فهم يسبب فجوات بينكم
رديت بحزن : كتر خيرك ، مـ.. ما عارفة اقوليك شنو يعني لو واحدة تانية اكيد ما كانت حتعمل العملتيهو تخلي اشغالها و تنتظرني لحد ما اجي
_ زي ما قلت ليك ما بحب اسبب مشكلة لي زول صدقيني حتى النوم ما بقدر انوم
_ طيب عايزة اسألك .. انتي اسمك مهاد؟
_ لأ انا اسمي منار
استغربت و سكتت شوية قامت قالت لي : و بعد وريتك خلاص انا بعددة ح أمشي
_ ليه مستعجلة؟
ابتسمت : و الله عندي شغل و كدا و هسي اتأخرت عليهو شوية
_ اعفي لي عذبتك معاي
_ ههه مافي عذاب ( مسكت كتفي) بس برجع و بقول ليك كمال ما تفرطي فيهو يا حياة
ابتسمت:  ان شاءالله
_ و بعدين انا مخطوبة و عرسي قريب لازم تجوني
و فعلا عاينت للدبلة في يدها : ربنا يتمم ليك علي خير يا رب
_ عقبالكم
ابتسمت بشوية فرح مخلوط بحزن ، منار كانت ظريفة معاي بس راسي كان ملخبط بعد فاتت قعدت و مسكت راسي بنفاد صبر ..
دخلت المحاضرة و بالي مشغول و بفكر في الحصل .. و اول ما طلعت من المحاضرة مشيت سألت بنات من سنة رابع عن البت الاسمها فادية ، واحدة قالت لي انو عندهم فادية واحدة في دفعتهم .. قلت ليها:  عايني انا عايزاها ضروري
_ طيب بتصل ليك عليها اذا بتستني
قعدت قريب ليهم و البت رفعت التلفون:  ي بت وين انتي؟ ... طيب يعني بتقدري تجي .. نحن جنب القاعات .. خلاص بسرعة عليك الله .. ههههه ... تمام
قفلت الخط و انا قاعدة علي امل انو دي هي نفس البت البفتش فيها .. جات خاشة و سلمت علي البنات الاتصلوا ليها قاموا وصفوا ليها علي وقفت باستغراب سلمت عليها و سألتها طوال : انتي فادية؟
_ اي عايزاني انتي؟
بس دي ما كانت نفسها فادية اللاقيتها سألت باستغراب اكتر : دقيقة يعني جد جد كدا ما عندكم فادية تانية؟
ردت لي:  لا انا الوحيدة ، بتفتشي في واحدة انتي
سكتت مسافة بتذكر : واحدة كدا قصيرة شوية و لونها فاتح شديد عندها شامة جنب عينها اليمين و اسمها فادية
_ انا ما عارفة انتي قاصدة منو بس ماف غيري فادية في دفعتنا دي
_ طيب في واحدة اسمها مهاد ؟
هزت لي راسها *لا*
_ طيب اسفة علي الازعاج ما قصرتو
مشيت بسرعة و انا بفكر ، طيب دي منو البت الجاتني ديك و قالت اسمها فادية ؟ معقول تكون كذابة ... ما بعيد بس هدفها شنو ، قعدت راسي جايط و وسط الجوطة ديك اتذكرت كمال
كمال .. انا ظلمتو شديد و اتسرعت في الحكم عليهو ، كنت خجلانة و خايفة ارفع تلفوني اتصل ليهو ، بياتو عين اتصل ؟.. بس في نفس الوقت ما كنت قادرة أاجل الموضوع و الفجوة تكبر اكتر مع الوقت .. حاولت اتشجع و اتصل علي رقمو .. اتصلت و دخل معاي جرس و وقتها كمت خاسة قلبي عايز يطلع برا و سامعة ضرباتو الزي الطبلة و أول ما سمعت صوتو اتوترت اكتر ..