حياة

٨

و زي ما قلت ... اثناء ما واقفة لمحت كمال طالع من الصالة بقيت مخلوعة فيهو و اعاين قلت يمكن غلطانة و مشبهاهو لكن كل مرة بوضح لي اكتر انو دة هو و احترت الجابو هنا شنو ..
اداني ضهرو و وقف مع واحد بقى بتكلم معاهو ؛ طبعا كان بعيد شوية مني و ما شايفني ، فتحت تلفوني سريع و رسلت ليهو رسالة
" القميص الكبدي ما عجيب لكن "
الرسالة مشت و بقيت مراقباهو ، كان ماسك تلفونو ف ايدو قام نور شالو فتحو و وقف مسافة ، الزول المعاهو سلم عليهو و مشى و كمال تاني رجع للتلفون و بقى يتلفت يمين و شمال و انا عايزة اموت من الضحك .. قام رسل لي
_ العرفك شنو يا بت؟
رديت ليهو
_ خش جوة عشان ما يسحروك
قرا الرسالة و اتصل لي ، طبعا اتخلعت و مشيت ابعد شوية و رديت
طوالي رد لي بي خلعة
_ بس ما تقوليلي انتي هنا ؟
_ هنا وين قصدك؟
_ ما تتهابلي معاي انتي عارفة قصدي
_ ي ود انا في بيتنا ناكشة شعري و مفرزعة شيتاتي
_ بيتكم دة عملوا ليكم في نصو زلط ؟
قعدت اضحك : زلط شنو
_ ولا شنو صوت العربات الماشة جاية دي ؟
_ اهااا لا دة هوا المكيف
قام سكت مسافة و ما رد علي عاينت لقيت الخط فاتح بقيت انادي فيهو
قام فجأة ظهر لي قدامي ..
_ هدا مكيفك؟
قمت نطيت و قلبي بقى شغال دلوكة .. قام قعد يضحك
_ اقسمبالله انتي وحدة هبلة و ما بتعرفي تكذبي
_ هو عدم المعرفة كعب يعني
_ في الحالة دي كعب
و بعد ما شغلا لي و ارتاح سلمنا علي بعض و طلعنا من الحتة ديك
_ اها ما قلت لي انت جاي للحفة دي جادي ؟
_ اي طبعا ، انتي الجابك شنو بتعرفي الناس ديل من وين ؟
_ ديل اهلنا ياخ اهل امي
_ كذابة و الله
_ ما تقول لي بس انهم اهلك برضو و نطلع قرايب و فيلم هندي زي دة
_ هم م اهل لكن و الله زي اهلنا جيراننا من زمان
_ شوف الصدف سبحان الله !
_ اخر شي توقعتو اشوفك هنا ، و الله لو شفتك انا اول كان لعبت بيك لعب
_ الله لا وقعني فيك ، كويس الشفتك انا
_ هههههه الله ستر
قمت فجأة اتذكرت امي و ضربات قلبي زادت ، اتذكرت اني اتأخرت و حتكون قالبة الحتة علي
قمت رفعت فستاني و مشيت سريع من قدام كمال بدون ما اقول ليهو حاجة ، قم جا لاحقني
_ بسم الله يا بت شفتي شنو
قمت وقفت و كنت متوترة
_ نسيت اهلي الجاية معاهم قاعدين جوا
_ حيجيهم شنو يعني ؟
_ خلاص النمشي اوري امي وشي و اجي
_ لا لا الموضوع خطير يعني ؟
_ انت مالك بس
قام عاين لي رجليني عشان كنت رافعة الفستان و مات بالضحك
_ دة شنو يا متخلفة ؟ جاية حفيانة معقول
_ عليك الله ما تركز معاي خليك في حالك
_ و الله الما بلاحظ حيلاحظ ليك
طبعا ما اشتغلت بيهو ، خشيت الصالة و الناس دي شغالة تتجدع و تترقص جيت قعدت جنب امي براحة ، و هي ما كانت شايفاني قامت فجأة اتلفتت لقتني قاعدة طوالي مسكتني قرصتني براحة
_ ي بت مشيتي وين دة كلو
_ ما قصدي اتأخر كدا ي امي
_ خلاص ما تتحركي عشان بعد شوية اوديك لي خالاتك الما بتعرفين تسلمي عليهن
_ ديل منو كمان
_ بسألوني طوالي اولادك كيف و بتك كبرت؟
_ يعني حأقعد ليهم صغيرة عمري كلو
المهم جبرت نفسي كدا و قعدت ، جابوا العشا و انا ما صدقت و وقعت خبت في الصحن كنت جيعانة و اتذكرت اني ما اكلت الا في الجامعة .. قمت شلت تلفوني فتحتو لقيت 3 مكالمات فائتة من كمال طبعا ما سمعت التلفون بسبب الحفلة
قمت رسلت ليهو رسالة
_ ما سمعت التلفون ، في شنو؟
_ أنا واقف جنب الساوند العلي يمينك و شايفك
قمت اتلفت و من الزحمة يا الله شفتو قام ضحك لي من بعيد
_ شفتك يا اهبل اها الفهم شنو؟
_ تعالي هناك سريع ضروري
_ لالا طبعا اهلي هنا اجي كيف ؟ و كمان ناس ابوي قاعدين قصادك و ما عارفة قاعدين وين بالزبط
_ خلاص اتصرفي اطلعي برا
_ انت ما شايف امي حارساني كيف ؟
_ اتصرفي بس
_ في شنو ضروري للدرجة دي؟
_ حاجة سمحة بس انتي تعالي
عاينت ليهو لقيتو طالع ، عاينت لي أمي لقيتا تتونس مع مرة جنبها ، قمت زغت براحة بدون ما تشوفني
طلعت لقيتو واقف هناك
_ اها سريع عشان راجعة
_ بسم الله متين وصلتي عشان ترجعي
_ اها يا كمال
_ عايزك تجي معاي تسلمي علي ناس امي
طبعا انا سكتت و وقفت عاينت ليهو و احترت
_ مالك سكتي؟
هنا افتكرت انو ناوي علي نية مادام عايز يعرفني بي امو و اهلو و التفكير اخدني
_ لا اجي بصفتي منو ما فهمت؟
_ حيكون بصفتك شنو يعني زميلتي في الجامعة و لاقيتا في العرس
_ ايوا ، لو كدة معلش
_ لا و انتي قايلة شنو يعني ، قايلاني عايز امي تشوفك عشان تخطبك لي
في اللحظة ديك انا اتغظت و كان نفسي اضربو بس ما بقدر امد ايدي
_ و هم قاعدين وين؟
_ بعيدين منكم حبة ، ما تخافي المكان آمن هههههه
_ بطل ظرافة ، هم كتار ولا شوية عشان انا بخجل
_ بتخجلي؟  .. كل يوم معلومة جديدة
_ اها
_ و الله معاها خالاتي اتنين بس
_ يعني ما اخواتك ؟
قام مشى قدامي ..
_ انا ما عندي اخوات
_ بجد؟  .. اعتبرني اختك طيب
قام عاين لي بطريقة غريبة
_ ارح
مشى قدامي و دخلنا الصالة بقيت اعاين عشان اشوف ناس ابوي قاعدين وين و امي فقدتني ولا لسة .. أمي شكلها قامت من مكانها و دي الحاجة اللخبطتني و ما عرفت كنا قاعدين وين اصلا
انا و كمال مشينا كدا و اهلو كانوا قاعدين في الطرف .. مشيت سريع عشان الحقو
_ كماال ، ناسك ديل وين؟
طبعا كمال اتلفت علي و كان شايفني بتكلم لكن ما سامعني بقول في شنو قام اشر لي انو ما سامع
قمت اتزهجت و وصفت ليهو
_ ارح ارح امشي
مشيت و سلمت عليهم أمو كانت جميلة شديد
وقفت معاهم مسافة اتونسنا شوية
جوا نسوان ماشين وراي و واحدة بدون قصد لزتني و قربت اقع لمن مسكت في كمال و حسيت بي احراج اتلفت عليها لقيتا امي قامت اتخلعت و عاينت لي و عاينت لي كمال ، انا طبعا بقيت بتبلع ، فجأة الغنية وقفت و جا الفاصل
_ حياة انتي هنا ؟ كنت بفتش ليك
بتديني كلمة و تعاين لي كمال و انا خلاص اتوترت
_ امي دة كمال زميلي في الجامعة
قام كمال طوالي نط و سلم عليها و قعد يتظارف
خليتها سلمت علي ناس امو و حلفوا علينا الا نقعد و بقوا يتونسوا و طلع في معارف كتير بينا