((الحلقة الثامنة والثلاثون))
#انت_قلبي
#بوسي_مصطفي
____________________
في محل إياد
إياد وعمار قاعدين في المكتب بيتكلموا مع بعض
إياد / اشرب القهوة ياعمار بردت
عمار / دورت في كل حته يااياد
روحت كل المدارس اللي جنبنا سألت ع أسماءهم ملقتش
نزلت صورهم في صفحات ع الفيس برقم تليفوني يمكن حد شافهم في أي مكان محدش كلمني انا هتجنن مش عارف هيكونوا راحوا فين
إياد / اكيد مش في القاهرة
عمار / ممكن يكونوا فين
إياد / معرفش بس اكيد مش قريبين مننا هنا
ممكن يكونوا في اسكندريه ولا في اي محافظة من محافظات الصعيد
عمار / ممكن تكون اخدتهم للمكان اللي اتجوزت فيه؟
إياد بيفكر
عمار / بتفكر في ايه
إياد / مش ممكن تسأل في السجل المدني ع اسمها
عمار / ودا هيفيد بأيه
إياد / ممكن تكون جددت البطاقة وغيرت محل الإقامة عشان تسجل اسم الزوج دا لو كانت اتجوزت فعلا
عمار / تصدق ممكن برضو
إياد / بس مش عارف ينفع تطلع ع بيانات اي حد
عمار / ممكن اعمل بحث ع النت بالرقم القومي بتاعها
إياد / جرب وشوف
عمار / قلبي وجعني ع ولادي اوي يااياد مش عارف افكر في أي حاجه حتى الشغل مليش نفس اشتغل والإقامة راحت عليه وعمال اصرف من الفلوس اللي معايا وخايف تخلص مني
إياد / هاتهم اشغلهوملك معايا
عمار / مش فاهم
إياد / ادخل شريك معايا في المحلات انا بخلص في المحل اللي جنبنا وهضمه ع المحلات اللي عندي وانت تقدر تدخل شريك دا لو حبيت
عمار / ماشي هفكر
إياد / فكر ورد عليه عشان انا كده كده محتاج شريك لاني مش معايا سيوله قولت بدل الفلوس بتاعتك متتصرف اهو تدخلها في شغلنا وانت تستفيد وانا استفيد ولو عايز كمان تمسك معايا الشغل معنديش مانع
عمار / هشتري شقه قريب
إياد / ليه م انت قاعد في شقة ماما واهي ع الاقل هتفضل مفتوحه بدل متتقفل
عمار / سلمي بدأت تلمحلي اني واخد الشقه ومستفيد بيها وانا اصلا مفكرتش في كده كل الحكاية اني حبيبت اقعد في المكان اللي في ريحة امي
إياد / متبقاش حساس اوي كده ياعمار اكيد متقصدش
عمار / انا مش زعلان منها هي بتتكلم صح
إياد / ياابني بدل م تضيع القرشين اللي معاك حاول تشغلهم واهو لما يكون معاك غيرهم ابقى اشتري بس دلوقت مينفعش اولا انت سيبت شغلك في الكويت
معندكش شغل هنا وهترجع زي الاول تاني اسمع كلامي انا عاوز مصلحتك وإن كان ع سلمي انا هكلمها
عمار / لا متكلمهاش في حاجه
إياد / ياابني سلمي قلبها طيب هو كلامها بس اللي دبش كده انت تايه عنها ولا ايه؟
عمار / انا كده كده هشتري شقه يااياد
إياد / ياابني مقولناش حاجه بس لما يكون معاك مش تروح تحط فلوسك كلها في الشقة وبعدين تقعد حاطط ايدك ع خدك ومستني وظيفه ولا تنزل تدور ع شغل واديك شايف حال البلد عامل ازاي اللي اشتغل اشتغل من زمان واللي عمله قرشين في وقت الحال فيه كان ماشي اهو مداري فيهم واللي زيك لسه راجع من بره ومعاه قرشين بيدور ع مشروع يعمله ياكل من وراه عيش مش يشتري شقه
وطالما الشقه موجوده تبقى محلوله
عمار / طيب انا ماشي عاوز مني حاجه
إياد / لا ياحبيبي بس فكر في الكلام اللي قولتهولك عشان متندمش
عمار / انا اصلا مش فايق ل حوارات الشقق والمشاريع دي دلوقت انا كل تفكيري في ولادي
لو لاقيتهم هعرف افكر في مستقبلي واشوف انا هعمل ايه في اللي جاي
إياد / بإذن ﷲ
تعتر فيهم
عمار / تصبح على خير... لسه قدامك كتير
إياد / وانت من اهله... نص ساعه وهقفل
عمار / ماشي... سلام
_____________________
أنت تقرأ
أنت قلبي🧡🥀الجزء الأول.
ChickLit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
