الحلقة 122
#انت_قلبي
#بوسي_مصطفي
في فيلا أسر
منه / متشكره ياسلمي
سلمي / على ايه بس يامنه احنا أهل
قالتها وهي ناظره ل سهر اللي كانت ساكته
سلمي / اومال اخوكي فين
منه / أسر؟
سلمي / اه طبعاً انا هسأل على وليد ليه يعني
منه / أسر خرج من شويه زمانه جاي
سلمي / يجي بالسلامة انا همشي بقى
منه / تمشي ايه؟!
هو انتي لسه قعدتي؟
سلمي / معلش اصل مالك عند وفاء وانتي عارفه بقى هو إياد ابن عمار زي السمن على العسل انتي فاهمه يعني
منه / اه عارفه
سلمي / طيب استأذن انا بقى.. سلام عليكم
منه / وعليكم السلام
وصلتها منه لغاية الباب ورجعت تاني لسهر اللي كانت لسه ساكته برضو
منه / ايه ياسهر مالك
سهر / مالي يعني يامنه
م انا كويسه اهوه
منه / كويسه ايه؟!
انتي منطقتيش بكلمة من وقت م سلمي جات
في الظروف دي مينفعش نفضل زعلانين كده من بعض
وبعدين دي جات لحد عندك عشان تعزيكي يبقى واجب إنك على الاقل تضايفيها
سهر / وانا مضيفتهاش؟
منه / ايوه بس مقابلتك ليها مكانتش كويسه ياسهر دي في بيتك
سهر / منه سلمي جات عشان تعزيكي انتي... مرات اخوها ولو اخدتي بالك هي سألت على اسر عشان كمان تعزيه
انا بقى بره الحسبه دي
منه / اخص عليكي ياسهر وانتي مش مرات اخويه برضو يعني من العيله ولا انتي بتحسبي نفسك ازاي؟
سهر / من العيله يامنه بس مش في حسبة بنت خالتي وقفلي على الموضوع دا بقى
عشان بايخ وملوش لازمه
منه / هو اسر راح فين
سهر / علمي علمك هو نزل على طول بعد ما جه من بره زي م انتي شوفتي
كان بيكلم مين بقى وليه نزل بسرعة كده
معرفش
منه / اوكيه هطلع اكلم إياد عشان اطمن منه على الولاد
__________________
في احد الكافيهات
وليد / وفجأة كده لاقيتي نفسك عايزة تتكلمي وتقولي إن عندك بنت
هويدا / م انا وقتها مكانش ينفع اتكلم لإن دي رغبة باباك
وليد / وجايه بقى بعد ست سنين تتكلمي
هويدا / انا من اول م عرفت اني حامل اتكلمت مع علي كتير إنه يعلن جوازنا لكن رفض
وليد / واحنا بقى نعرف منين إن بنتك دي تبقي اختنا
هويدا / لو عايز تتأكد يابشمهندس الصبح تعدي عليه تاخد اختك وتعملها التحاليل المطلوبه
أظن انا كده في السليم اهو ومفيش حاجه اخاف منها
وليد / م تتكلم يااسر ساكت ليه
اسر / هتكلم اقول ايه
وليد / قول رأيك في المصيبه اللي احنا فيها دي
نظرت هويدا لوليد واخدت شنطتها وقامت
هويدا / بعد اذنكو... لما تتفقوا بقى هتعملوا ايه ابقى اتصل يابشمهندس ولا اتصل انت يا اسر بيه.. سلام
وليد قاعد مضايق وبيتنهد بكل قوته
وليد / انت ايه البرود اللي انت فيه دا يااخي
اسر / اهدا وفكر بالعقل كده
ايه اللي يخلي واحده تقول على نفسها انها متجوزه بابا في السر
استنى قبل م تجاوب
افتكر إن بابا يعتبر كده مسبش أي حاجه عشان نورثها بعد م قسم كل حاجة قبل وفاته
وليد / لا ياحبيبي الست دي بتلعب على حتة المشاعر والحنيه وإن دي اختنا بقى فهنجري وناخدها في حضننا وطبعاً لا انا ولا انت ولا منه هتقبل إن البنت تعيش في مكان زي اللي عايشه فيه دا مع أهل امها
فناخدها بقى عندنا ونربيها ونرعيها ومعانا هتعيش احلى عيشه دا غير إن الهانم بقى لو معاها ورق رسمي بالجواز فممكن تعيد القسمه من تاني دا لو معاها محامي شاطر طبعا
اسر / يعني انت كل اللي يهمك البنت هتعيش فين
خلاص ياوليد هاخدها عندي دا لو ثبت إنها اختنا
واهي قالتلك اعملها تحليل واتأكد
يعني مش خايفه من حاجه زي م بتقول
وليد / يعني بابا مكفهوش الجوازات اللي فاتت دي كلها جي كمان بعد وفاته تطلعلنا واحده تقولنا انا مرات ابوكو ودي اختكو
يقاطعه اسر / هي قالت اسمها ايه
وليد / انا عارف رهف ولا رؤى
مش فاكر بصراحه
اسر / متتعبش نفسك دا بقى امر واقع خلاص وانا حاسس إن الست دي مبتكدبش
وليد / وهنعمل ايه بقى لو فعلاً كلامها طلع حقيقي والبنت دي اختنا بجد
اسر / ولا اي حاجه.. الموضوع بسيط خالص
وليد / ازاي يعني انت عايز تجنني القسمه كلها هتتغير بالشكل ده ولو طلعت اختنا يبقى مفيش قدامنا غير إننا نراعيها وتبقى تحت عينا
اسر / كويس إنك قولت الكلام دا
عشان كده انت وفرت عليه كتير
وليد / ايوه يااسر بس بابا كتب ليه الشركه وباقي أملاكه بيع وشرا يعني مسبش ورث نتقاسم فيه كلنا
اسر / وانت عملت ايه
وليد / ادتلكوا نصيبكوا طبعاً ضميري مسمحليش إنه أخد كل حاجه لوحدي
اسر / بس كده انت جاوبت على السؤال
وليد / تقصد إننا ندخلها في القسمه معانا
اسر / مش اختنا يبقى لو عايز ضميرك يستريح تدخل معانا
ولو مش عايز هتبقى معايا انا
وليد / عايز تطلع اجدع مني يعني
اسر / مش حكاية جدعنه ياوليد انا بحاول الاقي حل للموقف اللي اتحطينا فيه كلنا وفي النهاية لو ثبت إنها اختنا يبقى مينفعش نرمي لحمنا ولا ايه يابشمهندس
وليد / بس امها تخرج بره الموضوع
اسر / نشوف الموضوع دا بعدين
وليد / منه أخبارها ايه
اسر / كويسه م تيجي تطمن عليها
وليد / بعدين بقى ابقى اروحلها شقتها
اسر / لسه انت واياد متصالحتوش
وليد / دماغه ناشفه اوي
اسر / معلش ياوليد بس انت زودتها معاه وهو اصلا كان تعبان يومها
وليد / الحمد لله.. إن منه رجعت بالسلامة
همشي انا.. انت قاعد ولا ايه
اسر / مليش نفس ارجع البيت م تيجي نتمشى شويه
وليد / غريبه يعني اول مرة تطلب مني طلب زي ده
اسر / مش عارف بس حسيت اني عايز ابقى قريب منك خصوصاً بعد وفاة بابا
وليد / شوفت مامتك عملت ايه
اسر / وبعدين بقى هنفضل نعاتب بعض كده
بقولك ايه ياوليد
وليد / نعم
اسر / م تيجي نفتكر إننا اخوات وبس
وليد / يعني ايه
اسر / يعني لتقولي مامتك ولا انا افكرك إننا مش أم من واحده
ايه رأيك
وليد / طلب غريب
اسر / هتمشي معايا ولا امشي لوحدي
وليد / هاجي معاك يااخويه
اسر / يااااه أخيراً
وليد / انت قلبك طيب اوي يااسر
اسر / وانت اخ جدع اوي يابشمهندس
وليد / م بلاش كلمة بشمهندس والحاجات اللي بتزعل دي
قولي يا ليدو
اسر / ليدو!
على أساس إنه دلع وفي نفس الخروف وكده
وليد / هههههههههه الخروف ايه بس؟!
اسر / ياعم غلطه لسان خلاص بقى مدقش
وليد / طب بس متخبطش على كتفي
اسر يشده جامد ناحيته
وليد / ياابني بقولك بالراحه
تقوم تضربني
اسر / وايه المشكلة يعني اما اضربك مش انا اخوك الكبير
وليد / اخويه الكبير ايه ياعم دي الناس كلها بتفكر إننا اللي اكبر منك وبعدين هو عشان انت الكبير تضربني يعني ولا ايه مش فاهم؟!
اسر / احنا بنهزر صح؟!
وليد / هههههههههه وايه المشكلة
اسر / اصل افتكرت بابا والظرف اللي احنا فيه
وليد / ربنا يرحمه
اسر احنا خلاص ملناش غير بعض ياريت
بقى ننسى كل اللي فات
اسر / مفيش حاجه عشان ننساها احنا اخوات واللي بيجري في عروقنا دا دم واحد وبجد انا في اسعد لحظه في حياتي دلوقت
وليد / أسر انت بتعيط
اسر وهو بيمسح دموعه / متعرفش انا قد ايه كنت بتمنى اللحظه دي
من وانا صغير وعايش مع ماما كنت بشوفكو صدفه في النادي مع بابا وطنط سعاد وانا بسلم عليك انت ومنه كنت عايز اقولكو انا اخوكم ابقوا تعالوا العبوا معايا او اسألوا عليه
والليله اللي كنت ببات فيها في الفيلا مع بابا ببقى عايزيكو تناموا جنبي عشان محسش اني لوحدي واحس اني عندي اخوات بجد مش عايش وحيد مع امي
وليد / يااااه يااسر كل دا كاتمه جواك
اسر / مش عارف انا ليه هقولك الكلام دا
بس انا فعلا اول م شوفت سهر حسيت إنها نصي التاني فينا حاجات كتير من بعض ظروفنا تقريباً واحده بس التفاصيل مختلفه قولت دي اللي هتستحملني واستحملها وهنقدر نفهم بعض
وليد / والحق يتقال إن سهر بنت حلال زي م بيقولوا
وفعلا انتو الاتنين بتكملوا بعض
ربنا يباركلك فيها
اسر / ويباركلك في زوجتك وابنك
وليد / فكرتني اما اتصل اطمن لتكون عملتها
اسر / مش معقوله.. طب اتصل واطمن عليها
__________________
أنت تقرأ
أنت قلبي🧡🥀الجزء الأول.
ChickLit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
