أنت قلبي🧡🥀الجزء الأول.

الحلقة ٧٨

((الحلقة الثامنة والسبعون))
#انت_قلبي
#بوسي_مصطفي
__________________

في الصباح... في شقة مجدي
داليا قايمه من النوم داخله الحمام تلمح انتصار قاعده في الصاله
داليا / صباح الخير ياماما
انتصار / صباح الخير ياداليا
داليا / معلش امبارح راحت عليه نومه وانا بنيم مروان
انتصار / م انا كمان قولت كده برضو لما اتأخرتي فدخلت نمت
داليا / فطرتي
انتصار / مستنيه حد يصحى عشان يفتح نفسي
داليا / هدخل اجهز الفطار حاضر
كان مجدي خارج من اوضة البنات
مجدي / صباح الخير
سابته داليا ودخلت الحمام
انتصار / صباح الخير ياابني
باس مجدي ايد مامته وقعد جنبها
انتصار / رجعت امبارح امتى
مجدي / رجعت الساعة حداشر
انتصار / ونمت برضو في اوضة البنات
سكت مجدي ببتنهيدة
انتصار / واخرتها ياابني
مجدي / ملهاش اخر ياماما هي مستريحه كده وانا كمان مستريح
انتصار / عيني في عينك كده
التفت مجدي الناحية التانيه وهو بيتنهد جامد
انتصار / صالحها ياابني الموضوع تافهه وميستاهلش اللي انتو عاملينه ده
مجدي / اصالحها!
ع اساس إننا اللي غلطت فيها واتهمتها بحاجه محصلتش
انتصار / طب اقعد معاها وفهمها هي مش فاهمه إنك بتكلمها على اساس انك عارف انها مراتك
مجدي / ماما داليا عارفه وبتستهبل
الكلام اللي كان بينا حاجات محدش يعرفها غيري انا وهي
ازاي  كنت بقى بكلم واحده تانية؟!
انتصار / انا عارفه؟!
هي دماغها كده بقى هنعملها ايه
مجدي / خلاص خليها براحتها
خرجت داليا من الحمام دخلت المطبخ
مجدي / هدخل اخد شاور عشان اروح الشغل
انتصار / طيب ياابني
بعد شوية
كانت داليا واقفه قدام البوتاجاز بتغلي اللبن وبتعمل فطار
دخل مجدي المطبخ يشرب
داليا التفتت تجيب ملعقة خبطت في مجدي وهو بيشرب المياة وقعت على هدومه
بصلها وقفل الازازه
داليا / انا آسفه
مجدي بيخرج من المطبخ
داليا / رايح فين مش هتفطر
مجدي / لا اتأخرت على الشغل مش هقدر
وخرج مجدي من المطبخ
وقفت داليا قدام البوتاجاز وحابسه دموعها
انتصار / اعملي رضعه لمروان ياداليا
داليا / حاضر ياطنط
انتصار / انت هتخرج ياابني من غير فطار؟
مجدي / هفطر في الشركة ياماما
انتصار / هتفطر في الشغل ازاي ياابني
مجدي / عادي ياماما باكل كرواسون وبشرب كوباية لبن وانا بشتغل
انتصار / طيب ياابني تروح وترجع بالسلامة
__________

في شقة طارق
هنادي واقفه بتحضر فطار تدخل نرمين المطبخ
نرمين / هنادي عايزة تليفونك
التفتت هنادي لنرمين / صباح الخير
نرمين / صباح النور عايزة تليفونك اعمل مكالمة اصل تليفوني معلق ومش عايز يفتح
هنادي / ماشي.. هتلاقيه في الدرج جنب السرير
دخلت نرمين اوضة هنادي اخدت التليفون ودخلت اوضتها
فتحت الواتس اب بتاع هنادي ملقتش اي رسايل موجوده
نرمين / بقى كده ياهنادي
حذفتي كل المسجات عشان محدش يشوفها بس على مين انا اخدت اسكرينه من واتس سامي
طب اعمل ايه انا دلوقت المسدج دي مش كفايه
وصلت نرمين لفكرة قررت تنفذها بسرعه
بتدور في ملف الصور في التليفون
نرمين / لا دي مش اوي
اه دي احلى... لابسه بيجامه وقاعده... هي دي اللي هتولع الدنيا
ماشي ياهنادي إن موريتك
بقى انا تستغفليني وعامله فيها الحمل الوديع بقى كل دا يطلع منك
اغير بقى توقيت الفون عشان تبان إن الصورة اتبعتت من فترة
نرمين بتبعت الصورة لسامي
________