الحلقة 121
#انت_قلبي
#بوسي_مصطفي
_______________________
في احد المطاعم
وعلى احد الطربيزات
حسام / ياابني كل بقى ... الاكل جميل اوي هتندم صدقني
اسر / قولتلك لو أكلت هتعب بطل تزن على دماغي بقى
حسام / خلاص انت حر
سهر اللي كانت بتكلمك من شويه
اسر / ايوه سهر اللي كانت بتكلمني
حسام / اكيد سألتك انت اتأخرت ليه
اسر / اكيد طبعاً وخصوصاً إنها عرفت اني معاك وبنتعشا كمان مع بعض
حسام / وايه اللي فيها يعني
اسر / خايفه تفسد أخلاقي
حسام / هههههههههه
بقى انا اللي هفسد أخلاقك برضو
انت فسدان لوحدك ياحبيبي
اسر / طيب خلص خلينا نروح بقى
حسام / مستعجل ليه بس دي القعده حلوه ولسه هتحلو اكتر كمان
اسر / عينك ياحبيبي خليها في الطبق وبطل تبص يمين وشمال عشان مقومش واسيبك تتدبس في حساب الاكل ده
حسام / هههههههههه لا بقولك ايه انا جيوبي منفضه على الآخر
يارا مش مخليه حيلتي حاجه
اسر / جدعه برافو عليها
حسام / اكيد نصايح الست مراتك.. شكلكو متفقين عليه
اسر / ماهو انت ياحبيبي لما بيبقى معاك فلوس بتروح توزعها يمين وشمال على ال اااا
متخلنيش اتكلم بقى
حسام / هي حصلت لكده كمان
اسر / ممكن متتكلمش بقى خليني اعرف اتكلم
حسام / اتفضل يااخويه مش عارف انا ايه وجع الدماغ ده كل دقيقة مكالمة
يقاطعه اسر / اششش مش سامع حاجه
ايوه ياوليد بتقول ايه مش سامعك
طب استنى هخرج بره اكلمك
وليد / أسر مدير السجن اللي فيه بابا لسه مكلمني من عشر دقايق
اسر / ليه.. خير
وليد / بيقول إن بابا توفي وعايزنا نروح نستلمه عشان ندفنه
اسر / انت بتقول ايه
ينزل حسام الشوكه اللي في ايده في الطبق وينتبه ل انفعال اسر في التليفون / في ايه يااسر
مين بيكلمك
اسر بحزن / انت فين دلوقت
وليد / بلبس ونازل اهو
اسر / انت متأكد من اللي انت بتقوله ده
وليد بصوت مخنوق من البكاء / ياعم اعتبرني بحلم البس وتعالى يلا
اسر / ألبس ايه انا لسه مروحتش اصلا
عشر دقايق واكون عندك
وليد / سلام
قعد اسر على الكرسي ووضع التليفون على الطربيزة قدامه
حسام / في ايه ياابني متنطق
اسر / بابا مات ياحسام
حسام / انت بتقول ايه
اسر / انا لازم امشي
حسام / طب استنى انا جاي معاك
______________________
تاني يوم الصبح
في البلد.. محسن وسعيد واقفين قصاد الأرض
سعيد / مالك يامحسن أحوالك مش عجباني اليومين دول
محسن / هنادي ياسعيد
سعيد / مالها
محسن / مستخسرها قوي يااخي
سعيد / هتتجوزها غصب يعني
محسن / اني أولى من الغريب ياسعيد
دي كانت مرات اخويه وعيالها ولاد اخويه برضو ومحدش هيخاف عليهم ولا هيحافظ عليهم قدي
سعيد / ماهي قالت قدام الكل إنها مش هتتجوز يامحسن
هتتجوزها غصب يعني
محسن / البت حلوه قوي ياسعيد خساره تضيع من ايدي
سعيد / انت اكيد مش في وعيك
حاسب على كلامك يامحسن
وعيب اللي انت بتقوله ده
محسن / البت دي زي اللي عملالي حاجه مخلياني مش شايف غيرها
كل اما اروح لوحده اتخايل بيها هناك ولما افوق والاقي اللي قدامي مش هي امشي ومرجعش تاني
مع إن كل البنات اللي روحتلهم زي القمر يااخي
سعيد / بقولك يامحسن يااخويه متروح بيت عمك استسمحه واتأسفله وهات مراتك في ايدك وتعالى بيها على البيت مش ده يبقى احسن برضو من اللف يمين وشمال
شوق بنت عمك ومفيش ست هتستحملك غيرها
محسن / يا عم شوق ايه انت كمان
بقولك هنادي يعني العود الأخضر اللي لسه متقطفش
ايش جاب لجاب
سعيد / اخص عليك بقى تعيب في مراتك اللي لسه على ذمتك عشان ايه؟
عشان عايز تتجوز وتعيش حياتك وفاكر إنك كده هترجع شبابك وتنسى إنك داخل على الخمسين وابنك على وش جواز
يااخي احترم حتى شيبتك دي
محسن / وماله اصبغ شعري والواد محمود لو عايز يتجوز اجوزه من الصبح ولا اقولك اتجوز انا وهو في ليلة واحده ونشوف مين اللي هيخلف قبل التاني ههههههههههههههههههه
سعيد / اني مروح سلام
محسن / سلام يااخويه ومتنساش تقول ل امي تخلي رسميه تدبح كام جوز حمام وعلى كام جوز فراخ خلي الواحد يروم عضمه اني نفسي مفتوحه قوي النهارده
سعيد / نفسك مفتوحه ومبقاش هامك حد خلاص
محسن / ياابني انت هتشيلني الهم ليه
كفايه اني شايله طول عمري
خليني ارمي من على كتافي بقى
سعيد / ماشي يااخويه سلام
____________________
أنت تقرأ
أنت قلبي🧡🥀الجزء الأول.
ChickLit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
