((الحلقة الرابعة والثلاثون))
#انت_قلبي
#بوسي_مصطفي
____________________
فريدة بتكلم ندي ع النت
فريدة / مش عارفه حاسه إنك مخبيه عني حاجه
ندي / هخبي عليكي ايه بس يافريدة المهم قوليلي انتي وكريم كويسين مع بعض
فريدة / الحمد لله
كريم طيب اوي وبيحبني وبيعمل اي حاجه عشان يفرحني
عارفه امبارح رجع من الشغل وكان تعبان اوي بس ياحبيبي عشان وعدني إننا هنخرج مرضيش يزعلني مع اني قولتله
مش عايزة اخرج بس أصر إنه يخرجني
ندي / ربنا يسعدك
يافريدة
فريدة / قوليلي بقى مالك
ندي اتنهدت / مفيش ياحبيبتي احنا كويسين وانس اهوه مش بيبطل شقاوة ومصدع دماغ ماما ع طول هو وعلي
فريدة / بس انا ملاحظة ياندي إن كل م اكلمك الاقيكي عند مامتك انتي مبتروحيش بيتكو ولا ايه
ندي / دول سلمتين يافريدة يعني بيت عمك مش بعيد عشان أفضل قعده في شقتي
فريدة / مش عايزة تقوليلي مالك برضو
ندي / انا تمام
الحمد لله... خلي بالك انتي بس من نفسك... متوحمتيش على حاجه
فريدة / ههههههههههههههههه
لأ
ندي / مش فاكره لما كنت بحرق العيش واكله
فريدة / ههههههههههههههه اه
ولا البن ال كنتي بتسفيه كل يوم حازم بجيبلك وتخلصيه بصراحه محدش استحمل وحمك الرخم دا غيره
هو عامل ايه
ندي / كويس
فريدة / مالك بتقوليها كده من غير نفس انتو متخانقين ولا ايه
لسه ندي هتتكلم
فريدة قاطعتها وهي فرحانه / ياسمين فاتحه اهوه
ندي / ياسمين مين
فريدة /"معلش ياندي هبقي اكلمك بالليل.... سلام
ندي / سلام يااختي
: فريدة بتتصل بياسمين
ياسمين مردتش... بعتتلها مسج ع الواتساب
ردي يارخمه... انا مصدقت فتحتي فونك
ياسمين مردتش ولسه هتقفل الفون
فريده بتتصل... ياسمين نفسها تكلمها بس كرامتها وجعاها ومش قادرة ترد عليها
فريدة تبعتلها مسج مرة تانيه
وايموشن بتعيط افتحي ياسمسمه عشان خاطر فراوله😭
ياسمينه/ الو
فريدة بفرحه وهي بتمسح دموعها / وحشتيني ياياسمين
أخيراً فتحتي الفون
ياسمينه / عاوزه ايه
فريدة / عاوزه اطمن عليكي
ياسمينه / لا ياشيخه
فريدة / عارفه اني ندله ووحشه وقولي فيه كل ال انتي عاوزاه
بس قبل م تتكلمي وتقولي اي حاجه عاوزه اقولك اني تعبانه اوي ومبنامش من يوم مسافرت
عارفه انا بضحك وبهزر اول م كريم يدخل البيت بس عشان ميقولش نكديه وبعكنن عليه بس انا من جوه تعبانه اوي ياياسمين
ياسمين انتي روحتي فين
ياسمينه / معاكي يافريدة
فريدة / عارفه انا سافرت من غير م اسلم ع اخويا ولحد النهاردة مكلمتوش ولا اعرف عنه أي حاجه
ياسمينه / ليه كده يافريدة اخص عليكي ودا ماله ومال ال حصل
انتو اخوات في النهايه ومينفعش تزعلوا من بعض
فريدة وهي بتعيط / هو موجعكيش وهانك انتي هو وجعني انا واحرجني اوي انا لو اعرف مكونتش فتحتله الباب
ياسمينه / خلاص يافريدة ال حصل حصل المهم قوليلي انتي عامله ايه
فريدة / انا بقيت كويسه دلوقت عشان سمعت صوتك
ياسمينه / عامله ايه مع الدكتور بتاعك
ابتسمت فريدة / الحمد لله... سامحتيني يعني
ياسمينه / انا مزعلش منك يافريدة وانتي عارفه
فريدة / طب قولي يافراولة عشان اتأكد إنك سامحتيني
ياسمينه ساكته وايدها ع بوقها وبتعيط
فريدة /"افتحي الكاميرا ال عندك دي عشان اتأكد إنك سامحتيني
فريدة سمعت صوت ياسمينه وهي بتعيط
حاولت ياسمينه تكتم صوتها مقدرتش... غصب عنها
فريدة ودموعها ع خدها / شوفتي بقى إنك مسامحتنيش ولا حاجه... بتكدبي عليه ياياسمين؟!
ياسمينه وهي بتحاول تاخد نفسها وتظبط صوتها / سامحتك يافريدة خلاص وبعدين انتي ملكيش ذنب انا مزعلش منك ابدا
فريدة / خلاص صافي يالبن
ياسمينه وهي مبتسمه / حليب ياقشطه
فريدة وبصوت مخنوق من العياط / ههههههههههههههههه
وقعدت تعيط
ياسمينه / انتي مجنونه يابت يافريدة بتضحكي وتعيطي الاتنين مع بعض
فريدة / عشان وحشتيني اوي ياياسمين وحشتني لمتنا وقعدتنا مع بعض
ياسمينه / يااختي بقى وحشتك ياسمين وقعدت ياسمين من اسبوع واحد بس قعدتيه عندك
اوعي تكوني منكده ع جوزك وبتفضلي تعطيله كده هيزهق منك وينزلك مصر
فريدة / لا انا لسه ملحقتش ازهق بالعكس حاسه اني كنت غبيه اوي لما اخدت قرار اني انزل مصر
ياسمينه /"عيشي واستمتعي بحياتك يافراولتي
فريدة / كده اتاكدت إنك سامحتيني بجد
ياسمينه / يابنتي انا مش زعلانه منك هو اخوكي زودها حبتين بس خلاص مش مهم
فريدة / ازاي يعني مش مهم دا لازم يجي لحد عندك ويعتذرلك وم يمشيش غير لما تسامحيه
ياسمينه / ع ايه يافريدة الموضوع مش مستاهل وبعدين هو مغلطتش
الغلط كان من الاول ع الأب ال بقى نقطة سوده في حياة بناته بدل م يبقى ضهرهم وحمايتهم من الناس بقى هو سبب كل حاجه وحشه بتحصلهم
فريدة / ياااه ياياسمين انتي شايله كتير اوي... عمرك محسستيني إنك تعبانه ولا في حاجه منغصه عليكي حياتك
كنت دايماً اشكيلك وافضفضلك عن ال تاعبني تطيبي خاطري وتقعدي تضحكي وتهزري معايا عشان تنسيني وجعي وهمي
ياسمينه / بت يافريدة انا مبحبش النكد عشان عشت طفولتي كلها مكبوته ومخنوقه م شمتش نفسي غير لما رجعت مصر... يبقى بلاش تقلبي المواجع بقى وتنكدي عليه
فريدة / خلاص ياسمسمه مش هنكد عليكي تاني... قوليلي بتعملي ايه
ياسمينه/ بكتب أسئلة امتحان الشهر بتاعت العيال
فريدة /"اعمليلهم امتحان سهل بقى عشان خاطري
ياسمينه /" حاضر عشان خاطرك بس يافراولة
فريدة / سلميلي عليهم كتير
ياسمينه/ حاضر يوصل
فريدة / مامتك واخواتك أخبارهم ايه
ياسمينه / بخير... الحمد لله
مش هتقفلي بقى
فريدة / هههههههههههههه
زهقتي مني
ياسمينه / يااختي مش فاضيه زي حضرتك عندي شغل وطبيخ ونادين هانم وقعت العصير ع الارض شكلنا هنمسح كمان
فريدة / ههههههههههههه
حبيبتي دودو
ياسمينه / اه يااختي حبيبتك مش بتلعب معاكي إنما أنا للتنضيف والغسيل والحموم لما ضهري اتكسر
فريدة /"ههههههههه
بعد الشر عليكي ياسمسمه
ياسمينه / عقبالك يافريدة
مش هانت بقى
فريدة / هانت ايه ياياسمين؟!
لسه بدري يااختي
ياسمينه / تقومي بالسلامة ياحبيبتي... اقفلي بقى وروحي اعملي اكل ولا شوفي حاجه تانية اعمليها في الشقة قبل م الراجل يرجع يعلقك
فريدة / هههههههههههه
كريم مش ممكن يعمل كده
دا احن وأطيب وارق واجمل راجل عرفته
ياسمينه / انتي سرحتي ولا ايه يابت يافريدة الكلام دا خليهوله لما يرجع يااختي
سلام عشان اعمل اكل لحبيبي انا كمان
فريدة / اوباااا حبيبي يبقى الجو رايق بينكو صح
ياسمينه / بصراحه وقف معايا الفتره ال فاتت وقفه عمري مهنساها وطلع بيحبني بجد
فريدة / ايه دا كله... ايه دا كله
لا بقى دا الموضوع دا عاوز قعدة
ياسمينه / قعدة ايه ياللي تنشكي قومي يابت شوفي وراكي ايه وسبيني انا كمان اشوف شغلي
فريدة / هههههههههههههههه
هكلمك بالليل
ياسمينه / ليل ايه؟
هو انا موريش غيرك النهاردة؟
بالليل بنكون نايمين يااختي عندنا شغل الصبح مش فاضين زيك
فريدة / ماشي ياسمسمه... سلام
______________________
أنت تقرأ
أنت قلبي🧡🥀الجزء الأول.
ChickLit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
