الحلقة ١٣٧
#انت_قلبي
#بوسي_مصطفي
________________
في المساء في البلد
هنادي بتخبط تفتحلها رسميه اللي بتشتغل عند الحاجه امينه
رسميه بفرحه / هنادي!
حمدا لله.. على سلامتك يابنتي
البيت نور... ما شاء ﷲ... قمر ياناس
واخدت مريم في حضنها
رسميه / تعالى يابنتي ادخلي الحاجه امينه بس بتصلي وهتخرج ع طول
هنادي / ازيك ياخاله رسميه
رسميه / الحمد لله... نشكر ربنا
الحاجه امينه / هنادي!
هنادي تقرب تبوس ايد الحاجه امينه
هنادي / ازيك ياامه الحاجه اخبارك ايه
الحاجه امينه / الحمد لله... يابنتي هاتي مريم واقعدي مجبتيش مازن معاكي ليه
هنادي / نايم ياامه هبقي اجي الصبح واجيبه معايا
الحاجه امينه وهي بتحضن مريم / الواد دا مبيحبش يجي هنا معرفش ليه
هنادي / لا ابدا بس هو مش واخد ع البيت هنا بس ع طول يقولي مش هنروح نشوف ستي ياماما
الحاجه امينه / سته مين بقى
أم ابوه ولا امك انتي
هنادي / كلكو معزه واحده ياامه
الحاجه امينه / اعملي حاجه لهنادي تشربها يارسميه
هنادي / متتعبيش نفسك ياخاله انا لسه شاربه شاي ومش هقدر اشرب حاجه دلوقت
الحاجه امينه / تبقى جايه وماشيه ع طول ياهنادي
هنادي / انا جيت اشوفك ياامه واطمن عليكي
الحاجه امينه / فيكي الخير يابنتي
العروسة نازله ع السلم
العروسة بتزعق / انتي ياست ياللي اسمك رسميه
رسميه تخرج بسرعة
هنادي / هي مين اللي بتزعق دي ياامه
الحاجه امينه / مرات محسن الجديدة هو انتي متعرفيش ولا ايه
العروسة / انتي ياست انتي مش قولتلك تمسحي السلم بتعملي ايه عندك
الحاجه امينه / ادخلي ياهانم ووطي صوتك شوية
هانم ( العروسة) / يرضيكي يعني ياامه الحاجه اقولها تمسح السلم تقولي حاضر وتنزل تقعد عندك وتطنشني
الحاجه امينه / سلم ايه اللي يتمسح دلوقت؟؟
اني اللي قولتلها متمسحش حاجه الصبح بقى يتمسح عشان الشمس تنشفه بسرعه افرض جوزك ولا سيلفك طالعين دلوقت ع السلم وهو في مياه ومش واخدين بالهم ايه يوقعوا يتكسروا هتبقى مبسوطة بقى وقتها
هانم باستفزاز / بعد الشر على جوزى... اللي يكرهه هو اللي يحصله كده
اومال مين دي ياامه
الحاجه امينه / ادخلي سلمي على سيلفتك هنادي مرات طارق ابني
هانم وهي باصه لهنادي من فوق لتحت / هي دي بقي هنادي
هنادي / وانتي بقى العروسة الجديدة
هانم / عروسة وهفضل عروسة غصب عن أي حد
الحاجه امينه / اقعدي ياهانم وبطلي الشغل بتاعك ده
عروسة ولامتعوسه كنتي جيبتي الديل من ديله يعني
رسميه واقفه بتضحك وايدها ع بقها
نظرت ليها هانم وبعدها التفتت لهنادي والحاجه امينه
هانم / قربي سلمي بقى عشان اني مش عايزة ادوس ع الارض باللي لابساه في رجلي ده
الحاجه امينه / اخلعيه بره واللي
جاي من بره هو اللي يسلم على الموجودين مش هما اللي يجيوا يسلموا عليه
ايه ابوكي معلمكيش الاصول في بيتكو ولا ايه
هانم / علمني ياامه الحاجه احسن علام وعلمني كمان احترم اللي اكبر مني مهما يغلط
الحاجه امينه / هو انتي هتعلميني اقول ايه ومقولش ايه يابت انتي
هنادي قامت / بعد اذنك ياامه الحاجه هطلع فوق اجيب حاجه وجايه
هانم / حاجتك كلها هتلاقيها في شنطة قدام الباب عشان بس متتعبيش نفسك
وبالمرة نزلي الشنطه معاكي عشان الشقة تروق كده واعرف انضفها
الحاجه امينه / انتي بتقولي ايه يابت انتي
هانم / اني مسميش بت وليه راجل يترد عليه واشوف بقى حقي هاخده من مين
الحاجه امينه / لا دا انتي الظاهر اتجننتي.. بتقولي ايه يابت انتي
هانم / تاني برضو
هنادي / مين اللي سمحلك تطلعي شقتي وتدوري فيها محدش قالك قبل كده انه ميصحش ياحبيبتي ولا انتي متعلمتيش حاجه في بيتكو
هانم / انتي بتشتميني
يقاطعها محسن وهو داخل من الباب / بس ياهانم اسكتي
هانم بتعيط / شوفت ياسونه
ياحبيبي الست دي بتقول ايه
الحاجه امينه / سونه!
يااختي استحي من شيبته وبلاش مياصه وقلة ادب
هانم / سامع يامحسن امك بتقول ايه
الحاجه امينه / اني اسمي الحاجه امينه مش امك
محدش عمره اتجرأ وقالهالي هتيجي انتي يابت انتي ع اخر الزمن تقولي امك
ماعاش ولا كان اللي يقولها لحد من ولادي
محسن / جيتي يابنت كامل تولعي فيها
الحاجه امينه / هي والعه لوحدها يامحسن
اطلعي يابنتي شقتك وهاتي اللي انتي عايزاه من فوق
محسن / تطلع فين ياامه
ملهاش شقق هنا عشان تطلعها
هنادي وهي واقفه قدامه / اومال اللي فوق دي تبقي ايه ياابو محمود
قرب منها اكتر وهمس في ودنها / ماهو لو دماغك دي كانت لانت شويه كنا اتجوزنا فيها ياهنادي
هنادي وهي بتبعد عنه / ليه هي العروسة مش ماليه عينك ولا ايه ياابو محمود
لاحقت تفكر تتجوز تاني قصدي تالت
محسن / مين ده اللي هيتجوز
هانم / صدقت عمتي كوثر لما قالت عليكي حربايه
بقى جايه توقعي بيني وبين جوزى بس بعينك ياحبيبتي شغل التلات ورقات اللي كنتي بتعمليهم عليه قبل كده عشان يتجوزك دا خلاص ياحبيبتي بقى مكشوف قوي
هنادي بسخريه / هههههههههه هي مين دي ياحبيبتي اللي كانت بتجري وراه لامؤاخذه ليه
هي كل الستات زيك ولا ايه
هانم وقربت من هنادي بغيظ
هانم بغضب / اني هقطعلك لسانك ده عشان متنطقيش بعد كده
رسميه دخلت تخلص هنادي من ايد هانم
سعيد جه من بره
سعيد / ايه اللي بيحصل ده
محسن واخد عروسته بعيد وطلع بيها ع فوق
هانم بغضب / اوعي بقى سيب ايدي
محسن / تعالى بقى وكفايه فضايح
هانم / اني برضو ولا هي اللي جايه عشان تتخانق
وبعدين شايفاك يعني بتكلميها بحنيه ايه لسه بتحبها
محسن / قفلي بقى ع الموضوع ده وخلي ليلتك دي تعدي ع خير
تحت:٠٠
سعيد / خلاص بقى ياهنادي حقك عليه
هنادي / يعني اجي اخد حاجه من شقتي يقوم يحصلي كده
الحاجه امينه / ماهو انتي برضو ياهنادي غلطانه
هنادي / اني ياامه الحاجه
الحاجه امينه / كنتي سبيها تتكلم ...ليه تعملي عقلك بعقلها
هنادي / يعني تقولي كلام زي دا وانا اسكت ياامه الحاجه ليه هو اني كنت زي م بتقول عشان اسكت واخاف اتكلم يعني ولا ايه
الحاجه امينه / وكده اخدتي حقك لما هزأتي نفسك معاها
سعيد / معلش ياجماعه حقكو عليه
ويتصل بهدي اللي تنزل بسرعة
سعيد / خدي هنادي عندك فوق ياهدي واعمليلها حاجه تشربها
الحاجه امينه نظرت لسعيد وهي فاهمه انه بيجر ناعم مع هنادي لهدف في دماغه
هنادي / لا ياابو حامد كتر خيرك اني هطلع شقتي اجيب حاجتي وانزل ع طول عشان سايبه مازن نايم ليصحي من النوم ميلقنيش يتخض
سعيد / دول كلهم خمس دقايق مش هتتاخري يعني
هدى / تعالى معايا ياهنادي
سعيد / بعد اذنك ياامه
الحاجه امينه / ناوي ع ايه ياسعيد
سعيد / كل خير ياامه.. تصبحي على خير
______________________
أنت تقرأ
أنت قلبي🧡🥀الجزء الأول.
ChickLit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
