أنت قلبي🧡🥀الجزء الأول.

الحلقة ٤٢

: (((الحلقة الثانية والأربعون))))
#انت_قلبي
#بوسي_مصطفي

_________________________

في شقة عمر
ياسمينه قاعده ع السرير وسرحانه...
عمر قرب ينام وبيسحب الغطا
عمر / مالك ياياسمين سرحانه في ايه؟
اوعي تكون الفلوس زغللت عينك
ياسمينه / الاسم دا سمعته فين قبل كده؟
عمر / اسم ايه
ياسمينه / على الحسيني
عمر / على ابراهيم الحسيني
ياسمينه / ايوه... سمعته فين بقى...
عمر / تلاقيه حد من صحاب خالي
ياسمينه / انا معرفش حد من صحابه
عمر / يبقى جالك في الحلم
ياسمينه / بتكلم بجد ياعمر... الاسم دا مش غريب عليه... سمعته بالترتيب دا بالظبط
على ابراهيم الحسيني
لأ كان في اسم قبله
عمر / ريحي دماغك ونامي
ياسمينه / مش عارفه انام
دماغي لفت
عمر / اتغطي كويس ونامي
ياسمينه قربت وحضنته
عمر / ايه دا بقى انتي رضيتي علينا ياام نادين
ياسمينه / عايزين نجيب اخ ولا اخت لنادين
عمر / هههههههههههههههه أخيراً م انا عمال اقولك الكلام دا من زمان
ياسمينه / بصراحه الموضوع ابتدا معايا لما شوفت بيبهات اصحابي
عمر / ماشاء ﷲ
بيبهات ههههههههههه
ياسمينه / فريدة وداليا وهنادي
تعرف إن ولادهم تقريباً قد بعض
اتولدوا في شهر واحد
عمر / عقبالنا... بس المرادي انا اللي هسمي البيبي
ياسمينه / ليه هو اسم نادين وحش
عمر / لا ياحبيبتي مقصدش متوقعنيش مع حماتي
ياسمينه / بتخاف منها
هههههههههههههههههه
عمر / لا مش حكاية خوف بس انا بحبها ومش عاوزها تزعل مني
ياسمينه / خلاص سامحتك بعد الكلمتين دول
عمر / متشكر اوي يااستاذة ياسمين مش عارف كنت هنام ازاي وانتي زعلانه مني
ياسمينه / شكلك بتتريق ياعمر
عمر / هههههههههههههههه لا ياحبي انا مبتريقش متجيبي قبله
ياسمينه / هههههههههه انحرفت ياعمر وبعدين ايه قبله دي
عمر / ماهو أستاذة زيك مينفعش اقولها كلمة تانيه
ياسمينه / اشمعنه
عمر / عشان ايدك تقيله اوي ياياسمين
ياسمينه / ايه الرجاله الخرعه دي متنشف اومال يابشمهندس
عمر / بقالي تمن سنين بضرب
من نفس الايد دي... عاوز اغير
ياسمينه وكشرت / نعم!
عمر / اقصد غيري الايد اللي بتضربيني بيها
ههههههههههه
ياسمينه / بجد ايدي تقيله فعلا؟
عمر / ليه مبتحسيش وانتي بتضربي
ياسمينه / لأ... طب خليني اشوف كده
وخبطت عمر ع كتفه
عمر / أي.. أي... يامفتريه كل دي ايد هو انا ااكلك عشان تضربيني
اتخمدي ياياسمين
ياسمينه ومسكت المخده خبطتها في وش عمر جامد / ولو متخمتدش ياعمر هتعمل ايه
عمر واحمر وشه / ع فكره دا مش هزار ابدا ياياسمين
ياسمينه / وجعتك ياحبيبي انا آسفه معلش متزعلش
عمر بعد ايدها عنه / اوعي كده متلمسنيش
ياسمينه غمزتله / انت بتلكك بقى هههههههههه
عمر / انا لا بتلكك ولا نيله انا خارج انام مع بنتي اشبعي بالسرير لوحدك ياياسمين
ياسمينه / استنى ياعمر رايح فين
______________________

في فيلا أسر
دخل اسر ينام.. ملقاش سهر في سريرها خرج يشوفها
سهر كانت واخده ولاد هايدي في حضنها ونايمه والسرير التاني كانت مليكه ومجدي نايمين عليه
اسر دخل بهدوء.. وقرب من سرير سهر وهو مبتسم بعد م شافها وهي حاضنه الولاد ونايمه
أسر بهدوء وقرب من ودنها /سهر... سهر ياحبيبتي
سهر لسه نايمه
رفع الغطا وشالها بهدوء وغطا الولاد تاني
سهر بتفتح عينها وأسر شيلها
سهر / انا فين
اسر / اششش الولاد يصحوا
ابتسمت سهر وغمضت عينها مرة تانية... خرج بيها اسر لغرفة نومهم
نيمها ع السرير وقفل نور الاوضة وشغل الابجوره اللي جنب سهر ووضع ايده ع المخده وهو بيتأمل ملامح وشها ببتسامة
قلقت من الضوء اللي جاي في عينها
سهر / مين شغل النور ده
اسر / انا
سهر / أسر! ... انا فين
ايه اللي جابني هنا
اسر  / شكلك بتمشي وانتي نايمه هههههههههههههههههه
قامت سهر وقعدت ع السرير وعماله تبص يمين وشمال ومش مركزه
اسر قرب منها وحاوطها بدراعاته
اسر / متخافيش ياحبيبتي انتي معايا
سهر بعدت ايده عنها / لو سمحت متلمسنيش
اسر / ليه ياسهر... مالك؟
سهر / بجد مش عارف مالي ولا بتستعبط؟!
اسر / عشان اللي حصل الليلة يعني
سهر وهي بتعيط / انا خوفت منك اوي
احتضنها اسر / وانا عمري م اعمل معاكي كده ياسهر
بس انتي متعرفيش انا عملت كده ليه
سهر / طب م تقولي في ايه
اسر / مش هقدر اتكلم ... كل اللي اقدر اقولهولك دلوقت اني مظلمتهاش وولادها هتشوفهم مش همنعهم عنها بس هيعيشوا في حضني انا
انا اللي هربيهم عشان يطلعوا كويسين
سهر / تفتكر الولاد هيقبلوا يعيشوا هنا بعد اللي عملته الليلة في امهم
اسر / لسه صغيرين ميعرفوش حاجه... وبكره يفهموا إن دا كان في مصلحتهم
سهر / اوعي تفتكر إن العيال مش فاهمه ولا عارفه اي حاجه
انا فاكره طفولتي كلها... فاكره اللي كان بيحبني وبيكرهني فاكره الكلام الحلو اللي كنت بسمعه والكلمة الوحشه اللي لسه معلمه جوايا
ولادك مش صغيرين يااسر.. َدول بيفهموا ويحسوا اكتر مني ومنك
اسر / طب كنت أعمل إيه اسيبهم يروحوا معاها ويعيشوا في حضن راجل غريب
سهر / تتفق معاها انهم يعيشوا بينك وبينها متحرمهمش منها عشان مش هيسامحوك لما يكبروا
اسر / سهر انا كنت بحافظ عليهم وياريت كان ينفع اقولك السبب اللي خلاني عملت كده بس انا مقدرش اتكلم لا أخلاقي ولا تربيتي يسمحولي اني اتكلم عنها بس اللي عايزك تفهميه اني حفظت عليهم ع قد مقدرت
سهر / انا حاسه إن في سبب وسبب كبير اوي خلاك تعمل اللي عملته ده بس انا مش عايزاك تظلمها وسيبها تشوف ولادها
اسر / مش دلوقت ياسهر
سهر / امتى يعني
اسر / معرفش لسه مفكرتش هعمل ايه.
يلا ننام بقى عندي حاجات كتير اوي لازم اعملها الصبح
تصبحي على خير
سهر / وانت من اهله
ضمها ليه وهو بيغمض عينه
سهر / انا متأكدة إن العيون البريئه دي عمرها متظلم ابدا
اسر / هههههههههههههههه
طب نامي مش وقت تثبيت
سهر / كده طيب تصبح على خير
وقامت سهر... اسر مسك ايدها
اسر /على فين
سهر / هنام مع الولاد
اسر / لا خلاص متزعليش ثبتيني زي م انتي عايزة هههههههههههههههههه
سهر / ايوه كده اتعدل
اسر / خلاص تعالى نامي بقى
قربت سهر ونامت جنب اسر وغمضت عينها للصبح
______________________