((الحلقة التسعون))
#انت_قلبي
#بوسي_مصطفي
__________________
في شقة كريم بعد م البنات نزلوا من عند فريدة قعدت منتظره مكالمة حازم عشان تطمن على كريم
جرس الباب يرن
فريدة تقوم تفتح الباب
منيره وعلي دماغها صنيه
منيرة / وسعي يافريدة عشان انزل الصنيه
قربت فريدة ونزلت مع منيرة الصنيه على السفرة
منيرة / اومال فين صحابك يابنتي
فريدة / نزلوا
منيرة / هما لحقوا دا انا عملت الاكل وقولت اطلعه ناكل مع بعض
فريدة / و تعبتي نفسك ليه
منيرة / يعني يابنتي يكون ميعاد غدا ومنغدهمش دا حتى يبقى عيب في حقنا
خلاص بقى ملهمش نصيب
قربي عشان تاكلي
وتكشف الحلل والصواني / انا عامله ورق عنب وطاجن باميه باللحمه الضاني وقولت اعمل مكرونة بشاميل عارفه إنك بتحبيها ومخلل اهوه عشان الواد نفسه تفتح
فريدة / وايه اللي عرف حضرتك انه ولد مش يمكن بنت
منيرة / ولد ولا بنت المهم تقومي بالسلامة واسمعي بقى اما اقولك بعد م تقومي بالسلامة كده لازم تقولي لجوزك كفايه خلفه عشان صحتك ياحبيبتي عشان كمان تقدري تهتمي بولادك وجوزك الا يبص بره ويقول أصلها تخنت ولا عجزت اما اشوفلي واحده كتكوته كده لسه صغيرة
فريدة بحزن / كريم... هو فين كريم
منيرة تطبطب على كتفها / ياحبيبتي... إن شاء ﷲ
هيخرج بالسلامة وهيبات في بيته الليلادي...
فريدة بتعيط
منيرة / وبعدين بقى معاكي انتي يابنتي دمعتك دي مبتنشفش على طول كده عياط وغم
خافي على نفسك ولا حتى خافي على اللي في بطنك
فريدة / قوليلي ياماما انتي بتحبيني اكتر ولا بتحبي رحمه اكتر
منيرة / بحبكو كلكو ياحبايبي هي في أم تحب حد من ولادها اكتر من التاني
انا عارفه إنك زعلانه مني عشان كنت شديدة عليكي امبارح بس انا مش عايزه حد يدخل بينكو يافريدة اختك غلطت وانا عارفه دا كويس بس يصعب عليه لما الاقي عمك بيهينها ويضربها
انا ازعل منكو اه بس عمري يابنتي م اكره حد فيكو دا انتو عيني اللي بشوف بيها يافريدة
حضنت فريدة مامتها وهي بتعيط
منيرة / انا هيجيبها لك لحد هنا وتعتذرلك وتبوس راسك كمان
فريدة / لا ياماما بلاش انا مش عايزاها تيجي هنا خالص
منيرة / ليه بس يابنتي
فريدة / رحمه ياماما اتغيرت وحضرتك لازم تنصحيها إنها تشوف دكتور تتعالج عنده
منيرة / تاني يافريدة لسه برضو بتقولي نفس الكلام وانتي عارفه إن هي دي الكلمة اللي ولعت الدنيا وخلت اختك تبقى في الحاله اللي هي فيها دي
فريدة / ماما رحمه من زمان كده بس الموضوع اتطور معاها بصورة بشعه بقت عايزة تدمر كل اللي حواليها مش مهم هما مين المهم ترضى رغباتها وتنتقم من كل الناس
منيرة / عشان خاطري بلاش تتكلمي عنها كده عشان انا اعصابي بتتعب يابنتي
انا عارفه إنها متغيره بس مش عارفه اعملها ايه
فريدة / تروحيلها ياماما ولازم توافق انها تتعالج صدقيني انا بتكلم كده عشان مصلحتها انا خايفه تأذي نفسها او تأذي ولادها
وحاولي تصلحي اللي بينها وبين جوزها واضح إنه معرفش يحتويها بدليل إنها لسه بتفكر في إيهاب لحد دلوقتي
منيرة / حاضر يابنتي بس تعالي عشان تاكلي افتحي نفسي انا بقالي يومين م اكلتش ولا ليه نفس للأكل
فريدة / اطمن على كريم وبعد كده هاكل وهعمل كل حاجه
منيرة / بتحبيه اوي كده يافريدة
فريدة / ماما كريم دا حاجه كده مش عارفه اوصفهالك بس هقولك حاجه انا حساها
هو كتير اوي عليه
حبه وحنيته وهدوءه وصبره عليه انا محبوش عشان هو جوزى لأ انا بحب فيه بابا وصاحبي وأخويه كل حاجه ياماما
منيرة / كان نفسي احس دا مع ابوكي
هو كان كده في الأول كنت حاسه إني كل حاجه في حياته
لحد م كبرتوا وتصرفاته اتغيرت بقى عصبي بيغيب كتير عن البيت نسيت معاه الأمان اللي كنت حساه الأول واكتر حاجه كسرتني لما اكتشفت إنه متجوز عليه ياااه قد ايه كنت مغفله
فريدة / معلش ياماما مفيش حد كامل لازم هتلاقي حاجه كده ضايعه
منيرة / معاكي حق بس انتي مسمحاه يافريدة
فريدة / طبعاً مسمحاه
ايوه هو رفض إن ارجع لكريم وكان سبب اني اتجوزت غيره بس هو بابا وليه ذكريات كتير حلوه في حياتي
منيرة / طب ردي علي التليفون
تجري فريدة تاخد التليفون اللي كان جوه في الاوضه
حازم / الو... ايوه يافريدة
فريدة / انا معاك ياحازم
حازم / معاكي كريم بس بسرعه بقى وانتي بتكلميه
فريدة / حاضر
كريم / سلام عليكم... ازيك ياحبيبتي
فريدة... فريدة انتي قفلتي
وبعد م سمع صوتها وهي بتعيط / متعيطيش ياحبيبتي انا كويس
فريدة بصوت مخنوق بالعياط / هتيجي امتى ياكريم
كريم / طب بطلي عياط عشان اعرف اكلمك
فريدة / هتيجي امتى
كريم / هخرج بالليل
فريدة / وليه مش دلوقت
كريم / هما قالوا كده هعمل ايه يعني
فريدة / اومال ليه اخدوك لما هما هيفرجوا عنك
كريم / هنبقى نرغي ونتكلم في كل حاجه لما ارجع انا بس بكلمك عشان اطمن عليكي واطمنك اني كويس... سلام بقى
فريدة / بسرعة كده
كريم / معلش ياحبيبتي انتي عارفه اني مش حر نفسي دلوقتي
فريدة / اوك ياحبيبي... هتوحشني
كريم / طب اقفلي بقى عشان لو طولتي شويه هتلاقيني خارج من القسم وجايلك دلوقتي
فريدة / لا ابوس ايدك بلاش خليك الكام ساعه دول اما نشوف اخرتها ايه
كريم / سلام ياحبيبتي
حازم بياخد التليفون من كريم
حازم / ايه ياعم انت نسيت نفسك ولا ايه اصبر اما تخرج وابقى قولها كل الكلام اللي عايز تقوله
كريم / هو انا لحقت وبعدين وانت مالك يارخم انت
حازم / رخم!
تصدق اني غلطان اني جيت عشان ادافع عنك
كريم / تدافع عني!
دا الظابط كان هيحبسك معايا امبارح لولا بابا اللي اتوسطلك عنده كان زمانك مشرف جوه
حازم / وكان هيحبسني ليه مش عشان خاطرك واني اتحمقت عشانك لإن مفيش اي دليل ضدك عشان يحبسوك
كريم / متشكر اوي ياريت تراجع نفسك وتفكر تشتغل شغلانه غير دي
حلمي بيضحك
حازم / ايه ياعمي متشوف ابنك ده ولا احبسهولك
حلمي / لا وعلى ايه الطيب احسن
كريم / عايز اغير هدومي دي
حازم / استنى لما ادخل استأذن الظابط اللي جوه اقوله هاخد ابن عمي البيت نص ساعه بس ياخد شاور ويغير هدومه
كريم / بتتريق
حازم / إلا قولي ياكريم انت نمت ازاي جوه
كريم / منمتش خمس دقايق على بعض الدنيا برد وبعدين في حاجات كده بتمشي على الأرض
حازم / بتمشي على الأرض ولا على السقف
كريم / هتفرق يعني
حازم / اه طبعاً تفرق اللي بتمشي على الأرض حاجه واللي على السقف حاجه تانية انت م اخدتش أحياء في ثانوية عامه ولا ايه
كريم / هههههههههههههه لا طلعت على الجامعه على طول
حازم / اومال ايه دكتور وبتاع وانت اصلا متعرفش في انواع الحشرات
كريم / معلش هبقي ادرس من جديد
حازم / بس صاحبك دا طلع جدع اوي يااخي
كريم / مين هشام
حازم / الواحد نفسه في صاحب زيه كده يوقع يلاقيه في ضهره
حلمي / دا بس عشان كريم ابني طيب وقلبه ابيض وبيعمل خير كتير فدايما.. ولاد الحلال بيوقفوا جنبه
حازم / م انا كمان قلبي طيب اوي ياعمي بس مبلقيش حد خالص
حلمي / انت هتقولي علي قلبك الطيب دا حتى انا كنت شاهد على
يقاطعه حازم / خلاص ياعمي توبنا بقى بلاش نقلب في اللي فات
________________
أنت تقرأ
أنت قلبي🧡🥀الجزء الأول.
ChickLit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
