الحلقة 119
#انت_قلبي
#بوسي_مصطفي
_____________________
في شقة مجدي
مجدي داخل من باب الشقة وبينادي على داليا
انتصار / تعالى ياحبيبي اقعد
مجدي / سلام عليكم ياماما
انتصار / وعليكم السلام ياحبيبي
يقرب من مامته ويبوس ايدها
مجدي / قاعدة لوحدك ليه ياست الكل اومال فين داليا والولاد
انتصار / البنات جوه بيذاكروا ومروان نايم وداليا نزلت تشتري حاجه من تحت
مجدي / تشتري ايه
انتصار / هي كانت تعبانه وقالت نازله الصيدليه
مجدي / تعبانه!
ومسك التليفون وبيتصل
انتصار / متتصلش هي م اخدتش التليفون معاها لسه برن عليها تجيبلي حاجه للصداع لاقيت التليفون بيرن جنبي
ومسكت تليفون داليا
مجدي / بقالها كتير بره؟
انتصار / نازله من يجي نص ساعة كده
مجدي / نص ساعة ليه
دي الصيدلية قدام العمارة
انتصار / طب انزل شوفها
كانت داليا بتفتح باب الشقة
دخلت وقعدت / سلام عليكم
رددوا / وعليكم السلام
مجدي / ايه اللي اخرك تحت يا داليا
داليا / كنت بشتري حاجه لوجع السنان دا عقبال مروح للدكتور
مجدي / خلاص ألبسي ويلا بينا
انتصار / استنى ياابني اتغدا الأول
مجدي / لا ياماما ننزل الاول نروح للدكتور انا نسيت موضوع سنانك دا خالص
داليا / معلش ياحبيبي انا عارفه إن دماغك مشغوله اليومين دول في مشاكل الشغل
مجدي / مقدرش انشغل عنك ياروحي
داليا / متحرمش منك ياحبيبي
مجدي / ولا منك يانور عيني
انتصار / اه وايه كمان
مجدي ببتسامة يقرب من مامته ويحضنها
مجدي / انتي بقى الحضن الحنين والدعوة الحلوه اللي بتفتح كل البيبان في وشي
متحرمش منك ياأمي ويفضل حسك في الدنيا ليه ولولادي
وباس ايدها
انتصار / ربنا يباركلك في أولادك ياابني ويراضيك ويوسع رزقك
يارب
مجدي / اهو الدعوة الجميلة دي اللي بتخليني مستحمل مشاكل الشغل والدنيا كلها
داليا / هجهز السفره تتغدا الأول وبعدين ننزل للدكتور
هما البنات ناموا ولا ايه ياماما
انتصار / قولتلهم يدخلوا يعملوا الواجب بتاعهم عقبال م تيجي
داليا / هدخل اشوفهم شكلهم ناموا
انتصار / ايه ياحبيبي مالك
مجدي / مفيش ياماما انا كويس وزي الفل... الحمد لله
انتصار / لا شكلك متغير.. في ايه قولي؟
مجدي / طب ناكل الاول
انتصار / م انت بعدها هتنزل مع داليا تروحوا للدكتور
مجدي / الأستاذ اللي كنت شغال معاه في الكويت قبل م استقل ويبقى عندي مكتب لوحدي فاكراه ياماما
انتصار / اه فكراه ماله ياابني؟
مجدي / توفي امبارح بالليل
انتصار / لا حول ولا قوة إلا بالله
البقاء لله
هو دا اللي مزعلك
مجدي / العشره وسنين الشغل اللي قضيتها عنده في مكتبه بتفرض عليه اني مش بس ازعل دا انا ابكي كمان
كان استاذي وهو اول حد وقف جنبي في الغربه وساعدني كتير عشان اوصل للي وصلتله ده
حتى لما حبيت افتح مكتب لوحدي مزعلش زي م غيره بيعملوا بالعكس دا بيشجعني وفرحان اوي اني قدرت اعتمد على نفسي بقى ليه شهره كبيره كمان
واحد غيره كان حاربني وحقد عليه لكن دا العكس كان بيبعتلي قضايا كتير على المكتب بتاعي في الأول عشان اشتغل وم يأسش وكان بيقولهم متقولوش للأستاذ مجدي انكو من طرفي وعرفت كل دا بعدين
انتصار / ربنا يرحمه
الإنسان سيره ياابني
شوف واحد يموت الناس بتقول عليه ايه وكل واحد بيفتكر للميت حاجه حلوة ويترحم عليه ياااه
السيرة الطيبه دي هي اللي بتفضل للواحد بعد وفاته
عشان كده انا خايفه اوي يامجدي
مجدي / من ايه ياماما
انتصار / خايفه اموت وتفتكرلي حاجه وحشه عملتها فيك وانت صغير
مجدي / بعد الشر عليكي ياأمي
متقوليش كده
انتصار / الموت علينا حق ياابني
مجدي / يعني بعد كل اللي عملتيه معايا والتضحيه اللي ضحيتها عشاني من وانا لسه قد كده لحد دلوقت وشايفه إنك عملتي حاجه وحشه
دا انا لو عشت عمري كله تحت رجلك مستحيل اقدر اوفي لحظة ألم واحده عشتيها بسببي
انتصار / لا ياحبيبي متقولش كده انتي دنيتي يامجدي اللي نورتها بعد م راح باباك انت العوض والصبر عن كل السنين اللي عشتها وحيده من غير راجل
كل م كنت بتكبر قدام عنيه حبه
كنت بقول اهو هو دا راجلي ودي الذكرى الحلوه اللي سبهالي جوزى
مجدي يبوس ايد مامته
انتصار / قول لداليا تسامحني عشان انا مش هقدر اقولها
مجدي / تسامحك على ايه ياماما
انتصار / انا اذيتها كتير ياابني بس صدقني انا مكونتش حاسه انا بعمل ايه
فجأة كده حسيت إن ابني بقى في حضن واحده تانيه غيري بتنام جنبه بتضحكه بيتكلموا مع بعض بياكلوا سوا وانا خلاص بقيت مجرد شيء كده عايش معاكو ذكرى جميله في حياتك وبدأت تتمحي
مجدي /" لا طبعاً مين قال كده
حضرتك حياتي كلها ماضيه وحاضري ومستقبلي ودنيتي كلها ياحبيبتي
انتصار / اهو انا لو موت دلوقت هبقي مستريحه قوي عشان الكلمتين اللي قولتهم دول
مجدي / تاني ياماما
اوعي تكوني تعبانه ومخبيه عليه
انتصار / انا كويسه ياابني وبخير طول م انت ومراتك وولادك بخير
داليا في ايدها الأطباق وخارجه من المطبخ ومقربه ناحية السفره
داليا بمزح / اجيب اتنين ليمون هنا ولا أاجله لبعد الغدا
مجدي / هههههههههههههههه
انتصار / لو غيرانه تعالي اقعدي جنبي المكان دا حلو اوي
داليا / غيرانه!
ليه بقى على أساس اني مبتقليش كلام حلو زي حضرتك
مجدي يغمز ل داليا
انتصار / نعم!
كلام حلو ايه دا اللي بيتقالك؟!
لا ياحبيبتي ايش جاب لجاب ياماما انا امه اللي شلته في بطني تسع شهور واتعذبت في ولادته ورضتعه وربيته لما بقى راجل قدامك اهو
ماشاء ﷲ... عشان يتجوزك ياحبيبتي وتبقى حرم الأستاذ مجدي أشهر محامي في البلد
داليا / هههههههههههههه مامتك بتقول أشهر محامي في البلد
مجدي / ايه مش عاجبك ولا ايه يا مدام داليا
داليا / لا ياحبيبي عاجبني طبعاً
ايه ياطنط انتي هتقلبيه عليه ولا ايه
انتصار / وانا مالي ياحبيبتي امسكي انتي لسانك شويه
داليا / هههههههههههههه انتي اعلنتي الحرب عليه ولا ايه ياصاصا دا انا بحبك
انتصار / قربي يابت ياداليا
داليا / نعم... بت!
انتصار / قربي بس اما اقولك
وسع كده ياواد يامجدي
مجدي / هههههههههههههه حاضر
داليا واقفه مكانها / اقعد فين مش فاهمه
انتصار / هنا هوه في النص بيني وبين مجدي
داليا / وليه ابعدكوا عن بعض خليه جنبك
انتصار / يابت تعالي بقى متتعبنيش
داليا / حاضر بس متتعصبيش عليه
انتصار / ماهو باسلوبك دا هتعصب وانتي مش عارفه لما
ها... بيحصل ايه
مجدي / ههههههههه اسمعي الكلام ياداليا
داليا / وادي قعدة
انتصار / مستريحه كده
داليا / يعني مش اوي الكنبه اصلا يدوب بتسيع اتنين بس
انتصار / عايزة تقوميني من جنبك يعني
داليا / لا مقصدش
مجدي قول لمامتك حاجه
شكلها زعلت بجد
انتصار تشد داليا ناحيتها وتحضنها جامد
مجدي نظر ببتسامة
داليا وهي مدمعه / مالك ياصاصا جرالك ايه
انتصار قرصتها في كتفها / بحبك يابنت حمدي
داليا / طب م انا كمان بحبك
ايه الجديد بقى
انتصار تخبط داليا على ضهرها / قومي خلصي... هاتي باقي الأطباق من المطبخ
خسارة فيكي الحضن دا... قومي يلا قاعده ليه
مجدي / ايه بس ياماما جرا ايه؟!
داليا / ياصاصا انتي حبيبتي وحته من قلبي بهزر معاكي ياحاجه ايه مالك
انتصار / حاجه!
داليا / مش حاجه برضو ولا ايه؟!
ايه يامجدي مش انت قولتلي إن مامتك حجت قبل كده ولا انا غلطانه ولا ايه
انتصار / اه بس محجتش عشان يتقالي ياحاجه... قولي ياصاصا بحبها اوي
داليا / طب ياصاصا.. ياصاصا... ياصاصا... ياصاصا
مجدي / هههههههههههههههه
وقامت داليا ودخلت المطبخ وهي مستمرة / ياصاصا... ياصاصا... ياصاصا
انتصار / مراتك اتجننت
مجدي / هههههههههههههههه
انتصار / قولي للبنات تيجي عشان تتغدا كفاية مذاكرة بقى
داليا من المطبخ / مذاكرة ايه ياصاصا البنات رايحين في سابع نومه
مجدي / حلو اوي يعني مخلصوش الواجبات بتاعتهم
وقام دخل لداليا المطبخ بعد م استأذن من مامته
داليا / كنت بتقول ايه ياحبيبي
مجدي وهو واقف خلف داليا اللي كانت قدام البوتاجاز
وهمس في ودنها / كنت بقول اني بحبك اوي متجيبي حاجه تصبيره كده
داليا / بقولك ايه انت كل مرة تدخلي فيها المطبخ نتقفش انا وانت... ف أحترم نفسك بقى عشان متسمعش كلمتين من ست الحبايب
انتصار واقفه عند حوض المطبخ
انتصار / بتنادي عليه ياداليا
يتخض مجدي وداليا وينظروا ناحية الصوت
مجدي / ماما!
داليا / هههههههههههههه كويس إن حضرتك متأخرتيش ياطنط
وهمست لمجدي / شوفت مش قولتلك.. انا عارفه اللي هيحصل
كويس اني لحقتك
انتصار / انتو بتقولوا ايه
مجدي / ابدا ياماما ولا حاجه. هاتي ياداليا الطبق ذا ويلا عشان ناكل ونلحق الدكتور
وخرج مجدي من المطبخ
انتصار لداليا اللي كانت في ايدها الطبق وخارجه من المطبخ / مش قولتلك قبل كده بلاش المطبخ عشان العيال
داليا / محصلش حاجه ياطنط حضرتك فهمتي ايه
انتصار / ولا حصل هههههههه يابت بضحك معاكي
داليا / ماشي ياعسل انت تعالي بقى عشان ناكل
مش عارفه هعرف اكل على الناحية دي ولا ايه نظامها بالظبط
انتصار / خلي مجدي ياكل بدالك
داليا / هاهاهاها مش حلوه على فكره
انتصار / وانا بقولك نكته ولا ايه ؟!
عشان تقوليلي مش حلوه
داليا / اكسبي فيه ثواب وهاتي مروان من جوه عشان صحي وبيعيط
انتصار / ماشي ياداليا حسابي معاكي بعدين
داليا / لا استنى لما اتصل على حد يقعد معانا وقت الحساب دا
انتصار / بايخااا
داليا / مبقولش نكت على فكره هههههههههههههههه
انتصار / انجري يابنت حمدي قدامي
داليا / م براحه ياطنط الطبق هيوقع مني يحرقني
انتصار / هههههههههه طب قدامي يلا
_________________________
أنت تقرأ
أنت قلبي🧡🥀الجزء الأول.
ChickLit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
