الحلقة ١٤٠
#انت_قلبي
#بوسي_مصطفي
________________
في منزل العمدة
كوثر بتصرخ وبتعيط / ااااه ياامه... خليه يسيبني بقى
انت بتضربني ياسعيد يعني بعتلي عشان تجيبني هنا وتضربني
الحاجه امينه / ويكسر دماغك كمان على اللي عملتيه النهارده واحده غير هنادي كانت مسكتك فرمتك
كوثر / وسكتت ليه ياامه... ها سكتت ليه؟؟؟؟
الحاجه امينه / هي مسكتتش
هي قالتلك... اني خصيمتك يوم الدين
عارفه معنى الكلمة دي ولا لأ
نرمين / رايحه تشتميها وتقوللها كلام زي دا في العزا
انتي مش عارفه شتيمتك دي وسبك لشرفها هو سب ل اخوكي كمان
سعيد / اني مش عارف انتي ومحسن عايزين ايه بالظبط
كوثر / اني اللي مش عارفه ايه جو الحنيه اللي نزل عليك فجأة كده لهنادي
وانتي كمان ياست الدكتوره
ايه مالك؟؟؟ م انتي مكونتيش بتطقيها... دلوقت خلاص هنادي بقت حبيبتك وبتدافعي عنها
نرمين / كلنا بنغلط ياكوثر لكن المهم منتمداش في الغلط ده ونحاول بقى نصلحه
وانا في الأول مش هنكر اني كنت مبحبش هنادي وشايفه إن اخويه مينفعش يتجوز من عيله زي دي
لكن لما توفي طارق شوفت انسانه تانيه غير اللي كنت بشوفها قبل كده
ست بمليون راجل رفضت تتجوز وقالت هعيش لولادي مع إن عندها تلاته وعشرين سنه بس يعنى واحده في سنها تقول لا انا هعيش حياتي مش هدفن شبابي ولاد اخوكي اللي انتي بتشككي في نسبهم دول حته منه وانتي م اذتيش هنادي بس انتي اذيتي اخوكي
بس نقول ايه انتي ومحسن وصباح فاكرين إن باللي بتعملوا ده هتسوءوا سمعتها لكن انتو بتسوءوا سمعة اخوكي اللي استحاله كان هيكمل مع واحده هو مش واثق فيها... اظن مفيش راجل يقبل بكده
وانتي عارفه اخوكي كويس وبما انه استمر معاها يبقى واثق فيها وعارف أخلاقها نيجي احنا ونقول الكلام دا... عيب بجد
سعيد / هتيجي معايا تبوسي دماغها وتعتذريلها
كوثر / نعم!
اعتذر لمين ياحبيبي
نرمين / زي م اهانتيها قدام الناس لازم تعتذري كمان قدام الناس كلها اللي جات العزا
كوثر / مش رايحه لحد يادكتوره وخليكي في حالك بقى مش لايق عليكي الوش اللي مركباه دا
عشان اكيد اكيد ورا حاجه
نرمين /حاجة ايه دي
كوثر / انتي ادرا بقى
سعيد / هتيجي معايا ولا لأ ياكوثر
كوثر / مش جايه معاك في حته ياسعيد ايه رأيك بقى
الباب بيخبط يدخل زوج كوثر ويسأل عليها
كوثر بتلبس الطرحه وخارجه
يمسك ايدها سعيد / رايحه فين
كوثر / اوعي كده سيب ايدي
انت عايز مني ايه
اني لا رايحه ولا جايه.. ومصلحتك اعملها بعيد عني
يدخل زوج كوثر / هو في ايه
كوثر / مفيش حاجه يلا بينا
الحاجه امينه تغمز ل سعيد اللي يسيب ايد كوثر وتخرج مع جوزها
زوج كوثر / بعد اذنك ياحاجه... سلام عليكم
سعيد / مخلتنيش ليه ياامه اخدها تعتذر ل هنادي
الحاجه امينه / تعالى معايا
سعيد / على فين ياامه
الحاجه امينه / هنروح لهنادي
نرمين / استنى ياامه هلبس واجي معاكو
____________
في فيلا هشام
امل واقفه عند باب المكتب
امل / ايه يا هشام مش هتنام بقى ياحبيبي
هشام / في حاجه ياامل
تقرب امل وتدخل جوه
امل / بقول قدامك كتير
هشام / لا خلاص اهو خلصت شغل
هشام بيفرد ايده
امل / ايه مالك
هشام / ايدي منمله ومش حاسس بيها
امل / من الكتابة ع الكيبورد ارحم نفسك شويه
صحتك ياحبيبي
هشام / هعمل ايه بس
لازم ادخل كل البيانات دي ومينفعش حد يقوم بالشغل دا غيري
امل / وانا منفعش
هشام / كفايه عليكي الولاد ياامل كمان هتساعديني في الشغل دا يبقى كتير اوي عليكي
امل / انا هبقي سعيده عشان بخفف عنك ضغط الشغل
هشام / لا انتي بس خدي بالك من الولاد.. زينه أخبارها ايه
بترضع كويس
امل / يعني مش اوي
هشام / يبقى هتحتاج لبن صناعي
امل / سألت الدكتور قالي وزنها كويس بالنسبه لسنها مش محتاجه لبن صناعي عشان متبطلش الطبيعي
هشام / خلاص نشوف وزنها الاسبوع الجاي لو في زيادة يبقى خلاص منقلقش لو مبتزدش ووزنها اقل من الطبيعي يبقى تاخد صناعي
امل / اوكيه هشوف
هشام / هاتي ايدك بقى عشان نطلع ننااااام
أنت تقرأ
أنت قلبي🧡🥀الجزء الأول.
ChickLit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
