أنت قلبي🧡🥀الجزء الأول.

الحلقة ٨٨

((الحلقة الثامنه والثمانون))
#انت_قلبي
#بوسي_مصطفي
_________________
كريم / اومال ندي بتقول ليه انك وقعتي من على السلم
فريدة نظرت لندي وبارتباك / لا اصل ندي مشفتنيش هي كانت في شقتها وقتها
ندي / الف سلامة عليكي يافراولة سلام بقى يلا ياحازم
حازم / يلا
كريم مسك ايد فريدة وباسها وطبطب عليها / الف سلامة عليكي ياحبيبتي هريح شويه وبعدين هاخدك اكشف عليكي عندي في العيادة تحت
فريدة / ملوش لازمه ياكريم انا كويسه... الحمد لله
كريم / اطمن بس عشان خاطري
فريدة / طيب ماشي
_____________
كريم / معلش يافريدة انا عارف إنك عايزة تقعدي معايا وندردش شويه بس انا بجد تعبان اوي منمتش بالليل واول م النهار شقشق لبست وجيت على طول
فريدة / لا ياحبيبي مش زعلانه انا حاسه بيك
كريم يبوس ايدها ويقوم يغير هدومه ويقرب من السرير عشان ينام
كريم / لو مش هتنامي ابقى صحيني اصلي الضهر
فريدة / حاضر ياحبيبي
ونام كريم وقامت فريدة دخلت المطبخ حسيت إنها جعانه فتحت التلاجه تشوف اي حاجه تاكلها
حضرت الفطار وعملت نسكافيه
وخرجت من المطبخ وفي ايدها صنية صغيرة عليها الاكل وقعدت قدام التليفزيون
شوية وعينها غمضت
جرس الباب يرن..
سميرة جايه بالأكل... محدش فتح الباب لسه هتنزل.. كان كريم بيفتح الباب
كريم / ماما
رجعت سميرة / حمدا لله... على السلامة ياحبيبي
كريم خرج من الشقة وقرب اخد الحاجه اللي في ايد مامته
كريم / ليه تاعبه نفسك كده ياماما
سميرة / عارفه إن فريدة تعبانه قولت اعملكوا الاكل
كريم / طب تعالي ادخلي
سميرة بتدخل وبتقفل الباب وراها وكريم ينزل الاكل على السفره
سميرة / اومال فين فريدة نايمه؟
كريم يبص حواليه / لا مش نايمه انا قومت ملقتهاش
وقعد كريم وهو تعبان
سميرة / مالك ياحبيبي
كريم / قلقان على فريدة ياماما
سميرة / عشان تعبانه يعني... بكره تقوم بالسلامة وانت ياابني سيبها براحتها بقى في موضوع الحمل ده
كريم / لا خلاص كده كفايه
الحمل اللي فات والمرادي كانوا صعب اوي عليها
بس هو ايه اللي حصل ياماما
سميرة / في ايه ياابني
كريم / انا سيبتها كويسه رجعت لاقيتها تعبانه
سميرة / محصلش حاجه ياحبيبي هي كانت عندي تحت واتزحلقت في الحمام
كريم / ايه!
يعني موقعتش فوق السطوح زي م قالتلي
كانت فريدة خارجه من جوه
سميرة بارتباك / هي قالتلك كده؟
فريدة ابتلعت ريقها
كريم / تعالى يافريدة
فريدة / ماهو انا وقعت فوق بعد م اتزحلقت في الحمام
كريم / وماما مشفتكيش زي ندي مش كده؟!
بتكدبي ليه انا عايز افهم؟!
اكيد في حاجه وانتو مخبينها عني
سميرة / مفيش اي حاجه ياابني متكبرش الموضوع
فريدة / مفيش حاجه ياكريم زي ماقالت طنط
سميرة / قربي يافريدة عشان تاكلي
فريدة / انا اكلت ياطنط... الحمد لله
سميرة / طيب اقعدي جنب جوزك عشان ياكل انا نازله وشويه وهبعتلك محمد
كريم بتنهيده / ماشي ياماما بس سبيه انا هبقي انزل أخده
سميرة / طيب ياابني
وفتحت سميرة الباب ونزلت
فريدة / مبتاكلش ليه ياكريم
كريم / مش لما اعرف الأول في ايه؟
وايه اللي مخبينه عني
فريدة / مفيش ياحبيبي انا وقعت ع السلم بقى فوق السطوح في الحمام مش فارقه المهم انا كويسه وخلاص
كريم / يعني ايه يافريدة مش فارقه ماهو انا عايز اعرف ليه بتكدبي وقعتي اوك
ايه اللي يستدعي انك تكدبي يعني إلا إذا كان في حاجه عايزة تخبيها عني
فريدة / هو انا عمري خبيت عنك حاجه ياكريم
كريم / متأكدة انك عمرك مخبيتي عني حاجه؟!
فريدة / مش فاهمه تقصد ايه بسؤالك ده
كريم / انتي ليه مصره تخبي عني
ليه بتخلي دماغي تفضل تلف وتروح لبعيد وافكر في مليون حاجه
فريدة / كريم تلميحاتك دي مش هسمح بيها
كريم / فاكره الصور اللي اتبعتتلي على العيادة
فريدة / وايه المناسبه إنك تفكرني بحاجه زي دي
كريم / عشان لما واجهتك بيهم مقولتيش الحقيقه مع انك لو قولتيلي وقتها مكانش هيبقى في مشكلة خالص ومكونتش هطلقك عشان انا مش هحاسبك على حاجات قديمة حصلت قبل م تتجوزيني لكن انتي مصره إن يبقى في جزء في حياتك غامض ومش مسموحلي اني اعرفه
فريدة / لا يادكتور انت اللي اتسرعت ومدتنيش فرصة اقولك الحقيقه
كريم / عارفه بسبب غموضك ده ضيعت انا وانتي كام سنه من عمرنا؟
فريدة / بتحاسبني على ايه ياكريم
كريم /" بحاسبك على دماغك وتفكيرك اللي مش عايز يتغير
اشمعنه انا معاكي صريح وكل حاجه تخصني انتي تعرفيها ليه متبقيش معايا كده
انا عايزك دلوقتي تحلفي انك وقعتي فوق السطوح زي م قولتي او على السلم زي م قالت ندي او زي الكلام اللي قالته ماما مع اني مش مقتنع بولا حاجه من دي ومتنسيش اني دكتور وهكشف عليكي وهعرف إن كنتي وقعتي ولا لأ
وقعت الحمام او السلم دي مش سهله وإلا ابقى دكتور فاشل وارجع ادرس من اول وجديد بقى
فريدة / مش هحلف ياكريم
كريم / خلاص يبقى مبقاش في ثقه بيني وبينك طالما بتكدبي في حاجه مفروض اصلا ميتكدبش فيها
فريدة / بقى كده ياكريم
كريم بغصب/ ايه اللي حصل بالظبط يافريدة انا من حقي اعرف
____________________