((الحلقة 96))
#انت_قلبي
#بوسي_مصطفي
__________________
معتز / انا آسف ياعمي اني جيت من غير ميعاد بس الانسه هدى كانت تعبانه وانا
قطع كلامه دخول ههدى
هدى /" سلام عليكم
يرددوا / وعليكم السلام
كمال / حطي الحاجه اللي في ايدك ياهدي وشوفي ماما عايزه ايه
فهمت هدى إن باباها بيوزعها
هدى / حاضر يابابا
كمال ومسك كوباية العصير وبيقدمها لمعتز / اتفضل ياابني اشرب العصير
معتز / متشكر ياعم
كمال / اه كنت بتقول ايه بقي
في المطبخ
نادين / شغلي الشفاط دا ياهدي
هدى / حاضر
نادين / خمس دقايق والاكل يكون جاهز
هدى / براحتك انا مش جعانه
نادين / ايه الحكايه بقى
هدى / حكاية ايه
نادين / انتي فاهمه سؤالي كويس
هدى / هو شافني تعبانه فعرض عليه إنه يوصلني انا رفضت طبعاً بس هو أصر وانا معرفتش اهرب منه بقى
نادين / وتهربي منه ليه
في حد يهرب من اللي بيحبه
هدى / حب ايه بس ياماما
انا خلعت الدبله من زمان والموضوع خلص خلاص
نادين / متأكدة
هدى / متأكده من ايه
نادين / متأكدة إن الموضوع خلص
بقولك ايه اعملي السلطة دي عشان بابا يلحق يتغدا قبل ماينزل
هدى / حاضر بس مفيش حاجه من اللي في دماغ حضرتك دي هتحصل اطمني
نادين / وايه اللي في دماغي بقى
ياحبيبتي طالما بتحبيه ليه بقى بتعامليه كده
الولد كويس وبيحبك حد يضيع من ايده فرصة زي دي
صدقيني الحب دا مش سهل إننا نلقاه في ناس بتعيش حياتها كلها تدور على الحب ده
حاولي تتمسكي بيه ومتضيعهوش من ايدك ياحبيبتي
اما بخصوص فلوس الجهاز دي بقي
فأنا آسفة ياهدي صدقيني لو بابا قالي على الموضوع دا كنت رفضت تماما بس انتي عارفه انا كنت فين وقتها
هدى / جهاز ايه انا مش فاهمه حاجه
نادين / انا عارفه إنك سمعتي بابا وهو بيتكلم عن فلوس الجهاز وإن خطيبك عايز يعجل في موضوع الجواز انا عارفه إن مكانش قصدك تسمعي حاجه من دي
بس ياحبيبتي متشليش هم الموضوع دا
هتتحل... إن شاء ﷲ
بس متضيعيش خطيبك من ايدك
لا انا ولا بابا هنبقى مبسوطين لما تسيبي خطيبك
هدى / اولا انا مكانش قصدي فعلا اني اسمع اي حاجه من اللي قالها بابا انا كنت نايمه وخرجت بالصدفه وقتها كنت داخله المطبخ اشرب وسمعت غصب عني
وانا مش هقدر اكلف بابا فوق طاقته
نادين / ملكيش دعوة ب الحكاية دي
هدى / ازاي بس وانا عارفه كل حاجه وبعدين انا لسه صغير و
قاطعتها نادين / بتحبيه ولا لأ
هدى بخجل / انا داخله اوضتي
نادين / بسألك بتحبيه ولا لأ مفيش هروب ولازم تجاوبي حالا بتحبيه ولا لأ ياهدي
في الصالون
معتز / انا عارف اني مسمعتش كلامك واني كلمتها بدون علم حضرتك بس انا بجد مكونتش اقدر اقعد المدة دي كلها من غير م اكلمها او حتى اشوفها انا اسف ياعمي للكلام اللي بقوله لحضرتك
بس انا واضح وصريح ومش بتاع لف ودوران خالص
وعايز اعرف رأي هدى قبل م امشي
كمال بينادي / هدى... ياهدي
جات هدى بسرعه / نعم يابابا
كمال / جاوبيني دلوقت و بكل صراحه انتي فكرتي فالموضوع اللي كلمتك فيه قبل كده بخصوص الدكتور معتز
هدى بخجل وارتباك / ايوه يابابا
كمال / وايه رأيك
نظرت هدي لكمال وبعدها نظرت لمعتز
كمال / عايز اجابه حالا
نادين خرجت من المطبخ ودخلت عندهم
نادين / معلش ياكمال سيب هدى تدخل جوه دلوقت
معتز / بس ياطنط انا عايز اسمع منها عشان اخرج من هنا وانا فاهم انا هعمل ايه بالظبط
نادين / معلش سيبها تدخل جوه
كمال / ادخلي ياهدي اوضتك
هدى /حاضر يابابا
نادين / اسمحلي ياكمال اتكلم
كمال / اتفضلي يانادين
نادين / شوف ياابني انت طبعاً عارف إن بنتنا بتحبك
كمال نظر ليها وسكت
نادين / معلش ياكمال ماهو لازم نتكلم بصراحه
هي بتحبك بس موضوع الاستعجال في الجواز دا هو اللي غير رأيها غير كده هي معندهاش مانع إنها ترتبط بيك
معتز / طب ممكن اقول انا وجهة نظري وحضراتكم ليكم الرأي في النهاية
كمال / اتفضل
معتز / انا زي اي شاب عايز استقر واتجوز وزهقت من حياة العزوبيه اللي انا عايشها دي خصوصاً إن ليه صحاب كتير من سني متجوزين فأنا بصراحه صعبان عليه الكام سنه اللي هيضيعوا من عمري بدون اي فايدة. انا مستعد امضيلكو على اي حاجه تضمن إني هسيبها تكمل دراستها مش بس الجامعه
لأ عايزة تشتغل بعد التخرج انا معنديش مانع عايزة تكمل دراسات عليا معنديش مانع برضو
وانا شقتي جاهزة من كله ممكن تيجو تشوفوها وبخصوص جهاز العروسة فأنا بشوف ان عيب اوي إن راجل يستنى من اهل خطيبته عشان يكملوا فرش الشقة اللي هي في الأساس بتاعته هو ومش معنى كده إني ملهاش مهر
بس انا همشي بالاصول هي تاخد مهرها وتنزل تشتري حاجتها بنفسها
كمال / بس ياابني
يقاطعه معتز / عمي انا اسف للمقاطعه بس انا مش داخل في بيزنس عشان ارتبط بواحده تكملي فرش شقتي اللي هي في الأساس ملكي انا وهتبقي ملكها كمان بعد م تشرف بيتي طبعاً
حضرتك مشترطتش عليه أي حاجه انا بعمل في بيتي وانا كمان مقدرش اشترط على حضرتك في أي حاجه لان حضرت مش ملزم بده
كمال / بس ياابني احنا في مجتمع في عادات وتقاليد مينفعش نتغاضي عنها وانت عارف الناس بقى مبتبطلش كلام
معتز / الناس كده او كده هتتكلم
انا مش عايز من حضرتك غير انك تسمحلي اني اتجوز بنتك ... بحلال ربنا
ووعد مني اني هصونها ومش هيحصل في يوم اني ازعلها او تجي تشتكيلك مني
ساعتها اعتبر انك مجوزتهاش لراجل
ابتسمت نادين لكمال وهي مدمعه
كمال / انا مش عارف اقولك ايه
بصراحه كلامك اكدلي إني اكيد عملت حاجه كويسه في حياتي عشان... ربنا
يرزقني براجل زيك لبنتي
معتز / افهم من كده إن حضرتك موافق
ككمال / بس نسمع رأي صاحبة الشأن الأول
ابتسم معتز وقلبه بيتنطط من الفرحه
نادين / هدخلها واجيلكوا عشان اكيد هتتكسف منكو
هز معتز راسه ببتسامة وخرجت نادين لهدي عشان تعرف منها رأيها النهائي في الموضوع ده
__________
أنت تقرأ
أنت قلبي🧡🥀الجزء الأول.
Chick-Lit#انت_قلبي قصة اجتماعية رومانسية ((مليئة بالمواقف النبيله بين الأصدقاء)) وهي عبارة عن ست "٦" شخصيات نسائيه فيهم المرحه والطيبه والعنيدة والطموحه والخجولة والجدعة بتجمعهم الصداقة وهتحصل مواقف كتير بينهم تعالوا نشوف _ امل _ ياسمينه _ فريدة _ دا...
