طريق إلى النار

البارت الخامس

رواية #طريق_الى_النار
///بقلم.. نرجـــس صــادق ///

صغيرة كنت أستعجل الأيام كي أكبر ،والآن أرتجي الأيام أن تعيدني حيث طفولتي وتنساني هنآك.
ـــــــــــــــــــــــــــــــــــــــــــــــــــــــــــــــ

بعد مرور 10 أيام على وفاة هبة..
كنت واكفة بالباب مثل كل مرة اباوع للبنات الي يرجعون من المدرسة..

ماما كانت بالشغل وبابا مثل كل مرة بالغرفة وستار ما اعرف وين يروح وودق كاعدة بالغرفة تلعب ويه أطفال هبة.

فجأة حسيت أنه اكو احد يراقبني... باوعت بالشارع ماكو أحد.

مرت صديقتي نور...
نور... شلونج ريم
ريم... هلو نور اني الحمدلله انتي شلونج
المدرسة شلونها والله مشتاقة للدوام.
نور... الحمدلله زينة والله حتى اني مشتاقتلج جنا نروح سوة للدوام.
اكولج ريم اريد اسألج..
ريم... كولي شكو.
نور... الأخبار الي نسمعها عن هبة صدوك.
ريم... كلبي نغزني واني اسمع كلماتها..
شنو الاخبار الي تسمعوها عن هبة.
نور... انه هبة حركت روحها ومصيرها للنار يعني بجهنم.
ريم... حسيت النار بدت تغلي بكلبي... الله ينتقم من كل واحد يحجي هيج
لا نور هبة ما حركت روحها الطباخ طك عليها.
نور... تمام اني ردت اتاكد منج..
يله ريم اني، راح اروح.. باي

ريم... راحت نور واني دموعي اخذت مجراها مثل كل مرة...
ليش الناس ما ترحم بدل ما يترحمولها يطعنون بيها

دنكت وابجي... فجأة حسيت خيال فوكي

رفعت راسي... وكان خالد واكف فوك راسي.
خالد... شبيج تبجين وليش واكفة بالباب انتي ما تخافين لو إلا ستار يكسر راسج.

ريم... هنا صدك اني شطت نار... هو منو حتى يحاسبني
وانت شعليك اوكف بالباب اوكف بالشارع..

(😁😁 كان هناك شخصاً يستشيط غضباً بسبب هذه الكلمات)

خالد... انتي ليش لسانج طويل وما تحترمين.
ريم... بكيفي عندك اعتراض... حجيت هيج بكل معاني طفولية واني اكلب بعيوني حتى احرك كلبه..

لأن هواي يتدخل بيه...

خالد... سهلة يجي يوم اندمج على هالكلمات... صلفة
ريم... العفو حضرتك ابوي اخوي حتى تندمني... رجاءً مالي خلكك
خالد... ماشي

عافني وراح يمشي وصل لنهاية الشارع ودار وجها عليه بس كان وجها ميتفسر،
بعدين صدك ليش يحاسبني هو شعليه.. يبووو اخلص من ستار يطلعلي خالد.

دخلت جوة واني افتر ما اعرف شاسوي.. رحت للغرفة لكيت ودق كاعدة وصافنة..

ـ احم احم ليش صافنة..
ـ هيج ماكو شي
ـ باوعتلها بطرف عيني...
ودق احجي اكو شي..
ـ لا ريم ماكو شي بس خايفة.
ـ من شنو خايفة حبيبتي.. دنكت عليها وحظنتها.
ـ خايفة من روح هبة.. احسها تفتر بالبيت.
ـ اخر كلمات كطعتني واني اتذكر وهي النار مشتعلة بيها وتركض بالبيت وتريد أحد يطفيها..
نزلت دموعي واني انحب بصوت مقطوع حتى ميكعدون جهالها..