طريق إلى النار

بارت 53

رواية #طريق_إلى_النار
//بقلم.. نرجــس صــادق //

خالد... و چان وجهك
اول ولايات عمري وآخر دروب الضياع .،

ريم... حيره تعوفني تتشمت الناس
تجي يمي املك هذا تعويد

وفضا للنزاع بعشرتي وياك
تظل عشرتنه من ابعيد ل بعيد
ـــــــــــــــــــــــــــــــــــــــــــــــــــــــــــــــ
ريم....
بعد ما ولدت ليليان وجابت ولد ثاني والكل فرحان بيها وهاي الأيام كلها البيت ما فرغ.. ناس تجي وناس تروح وماكو احد غيري اشتغل وارجع بالليل لغرفتي ميته تعب..

صرت احس الم بطني وظهري قوي كولش واني شاكه بنفسي حامل بس ما اريد انصدم كلما دكولي خالتي ام حسن خلي ناخذج للدكتورة اكوللها ما بيه شي.
لحد ما طلعت الاربعين مالت مرت حسن وصار ابنها عمره 40 يوم وحوراء كملت شهر الثامن ودخلت بشهرها بس حوراء ذبلانة ومثل الي مريضة بس كلما تروح للدكتورة دكوللها كولشي ما بيج والطفل صحته تمام...
بس كل يوم نشوفها تذبل ووجها يصير أصفر والكل خايفين عليها وما خلينا دكتورة اذا ما رحنالها... جان وسام طول الوقت يمها وميفاركها وجانت كل يوم دكول.. اني راح اموت وكل مرة نصيح عليها ونكوللها لا تتفائلين بالشر..

بيوم من الأيام بالليل كملت كل الشغل ورحت لغرفتي واني ميتة تعب... نومت علاوي وزنوبة واني هلكانة بس اريد انام...
نمت وما حسيت بشي بعدها..
اني نايمة ودخلت عليه حوراء وهي تبتسم..
حوراء... ريم سامحيني
ريم... ما عندي شي وياج حوراء على شنو اسامحج
حوراء... لازم تسامحيني الله يخليج
اشرت على بطنها وكالت ابني الج دير بالج على ابني..

فزيت واني مرعوبة وكوة اخذ نفس... تذكرت هذا حلم بس معقولة حوراء بيها شي... طفرت من مكاني وفتحت الباب وركضت لغرفة حوراء...

جان وسام نايم بصفها وهي نايمة... اوف اطمأنيت ما بيها شي اجيت اطلع وسمعت صوتها تون..
تقربت يمها وكوتلها..
ريم... حوراء حبيبتي شبيج
فتحت عيونها وكلتلي الم يمكن راح اجيب...
اجيت اكعد وسام وهي صرخت صرخة البيت كله كعد... اجوو يركضون ووسام كعد على الكرسي وركض للسيارة وخالتي لبستها عباية واني لبست عبايتي وركضت وياهم...
ما اعرف ليش ردت اروح وياهم لأن جان كلبي ينغزني.. اخذنا اخوها ووسام ويانه وامها واني وهي تصرخ وكل صرخة تشك الكلب.. خفت اكثر واني اشوفها تتكلب كبالي..
وصلنا للمستشفى واخذوها منه واحنه وراهم... دخلوها لغرفة الولادة وجان صياح النسوان يكطع الكلب.. راح تفكيري بنفسي واني شاكة اخاف حامل للحظة كرهت الحمل بسبب الولادة والصياح الي اسمعه...

بعد ساعة واحنه كاعدين على نار وخالتي ام حسن حضرت اسم للطفل وحضرت جكليت حتى تطشه على حوراء وابنها...
طلعت الدكتورة وكلوبنا وكفت.. منتظرين الدكتورة تنطق..

تقربت يمنه وسلمت الطفل بأيد خالتي ونطقت بكلمات جانت مثل النار الي حركت كلوبنا..
الدكتورة... هذا الطفل سليم والحمدلله لكن الأم ماتت البقاء بحياتكم..
ما استوعبنه الكلام ولا انطينه اي ردة فعل غير خالتي شمرت الطفل عليه وصاحت على الدكتورة...
ام حسن... دكتورة أكيد تجذبين علينه بنيتي وينها ولج يمه حويرة
كامت تدك على راسهل وتصرخ... رجعولي بنتي الله لا يوفقكم