رواية #طريق_إلى_النار
//بقلم.. نرجــس صــادق //
خالد... حتى..!
لو مآ بيك
آمل وآعدني بيك
آزرعلي صدفه بـ كُل درب
يمكن آجيك..!
ريم.... ما لحظة فرح بالعمر
كلش يا ورد ذبلان
خدرني الوكت وبلا خمر سكران
ـــــــــــــــــــــــــــــــــــــــــــــــــــــــــــــــ
ريم...
ثاني يوم نصبنا الجادر وجانت اسوء أيام حياتنه وخلصت ايام الفاتحة بين الحجية وعلاوي كل شويه ننقل واحد للمستشفى... جنت صابرة ومصبرة نفسي علمود علاوي ما ينهار، لحد ما خلصت الفاتحة وكل واحد بينه كلبه مجمور واني حايرة بعلاوي الي رفض الأكل نهائيا وبدت حالته تسوء وكل يوم اودي للمستشفى... صدك احتاجيت وسام بهاللحظة...
وبعد مرور اسبوعين على وفاة وسام... جانت الحجية مشلولة واني انتقلت بغرفتها حتى اخدمها وهم لازمة عدة ما اطلع أبد... زينب اخذتها ليليان تقريها ويه ابنها وسجاد وابو الأكبر يمي وجانت سارة هي متكفلة بشغل البيت...
بيوم احنه كاعدين واجه خالو... لبست عباية وحجابي وحجيت وياا...
ابو حسن... بوية ريم وسام كاتب وصيته عند المحامي وراح اجيبها واقراها كبالج.
ريم... الي تشوفه مناسب سوي خالو
أبو حسن... خوش بوية
تمر الأيام والحجية طول الوقت دمعتها بعينها... وبس تصيح...
الحجية... ودوني لوسام، نايم جوة التراب واني هنا
ريم... حجية ميصير تسوين بنفسج هيج انتي مريضه
الحجية... اريده اريد ابني اريده ودوني يمه
ابو حسن... يمه والله اوديج اله بس شويه اريدج تتحسنين
الحجية... كلشي ما بيه ودوني اريد اشوف التراب خرب وجها ومعانيه الحلوة لو هو نفسه وليدي اريد اعاتبه شلون يعوفني جمرة امه لسه ما طفت
ريم... فدوة حجية علاوي يشوفج هيج ويتخبل والله هو امانة وسام كل يوم جان يكولي علاوي وعلاوي شكد يحب أبو الاكبر بس ما وصاني علي بكد ما وصاني على علاوي
الحجية... اوف يمه ولكم نار بكلبي واحد منكم يطفيها ربي شنو مقصرين ربي لو ماخذ واحد من ولدي ولا وسام
علت الاصوات بالبجي والصريخ وهاي كل يوم نفتح جروحنا ونكعد نبجي ونصرخ بس ماكو فائدة... ما حسيت على علاوي من كام وعافني.
بعد 20 دقيقة تقريباً باوعت علاوي ما موجود... صحت بصوت...
ريم... علاوي وين ابني وين
ابو حسن... مو جان هنا وين راح
ام حسن... يااا يمه وليدج مو جان بحضنج وين راح
ريم... ما ادري والله ماانتبهت علي من طلع
ركضنا كل واحد يدور بجهة وكلبنا البيت كلاب وعلاوي ماكو... بوقتها صدك مات حيلي وثكلن رجليه ووكعت من طولي... صرخت بكل صوتي ونسيت اني لازمة عدة...
ريم... جيبولي ابني الله يخليكم ابني اموت اني ولا هو يصيرلة شي امانة وسام هذا
طفر حسن وحسين وطلعوا يدورون علي بره واني اصرخ واللطم وكرهت نفسي شلون غفلت عنه..
بعد ساعة وماكو اي خبر عنه وخالتي تهدأ بيه وليليان لازمة جهالي بايدها... جان سجاد يمشي عمره سنتين... وابو الأكبر عمره سنة.
شويه ورجعوا وهمة يباوعولي ومثل الي يكلولي... ماكو ابنج ضاع
طفرت على خالو وبست ايده...
ري... ابوس ايدك اريد ابني
ابو حسن... ولج بوية والله اجيبه الج بس لا تسوين بروحج هيج
ريم... اريد ابني فدوة اروحلكم
ربي ليش اللهي شمسوية وهيج اختباري صعب... جنت احجي بصوت عالي والكل كام يبجي ويهدأون بيه...
بعد ساعتين واني فرفحت... كمت لبست عباتي وطلعت ركض للشارع... لزمتني خالتي وهي دكولي...
ام حسن... ولج يمه وين رايحة
ريم... ادور على ابني
ام حسن... تعالي رجعي وين تلكينه يمه اكعدي ما يصير تطلعين
ريم... فدوة اروحلج خالة انتي ام وتعرفين كلب الوالدة خليني اروح
ام حسن... يمه والله حاسه بعذابج تره اني هم فاكدة بس اكعدي بلكت هسة يجيبونه الولد
ريم... خابريهم ابوس ايدج
ام حسن... اي يمه هسة اخابرهم بس ارجعي فدوة
رجعتني خالتي واتصلت على خالو وماكو جواب... رجعت اتصلت ومحد جاوبها...
لحد ما صار الليل واني هنا نهاريت وكمت اصرخ واللطم بكل صوتي...
ريم... ولج يمه ابني راح الامانة راحت ولكم موتوني لحظة ما ابقى عايشة إذا ما يرجع علاوي.
هنا اني صدك نهاريت واحس نفسي نار جهنم بكلبي كمت اكوم واوكع وخالتي لازمتني والحجية تبجي وسارة تنحب... كمت وركضت للشارع بدون عباية... فقدت وما حسيت بنفسي شحجيت... وكفت بااشارع وصرخت...
ريم... ما بيكم خير يجيبلي ابني ولكم ابني راح من ايدي وينكم وينكم فدوة اروحلكم اطلعوا جيبولي ابني...
نهاريت وفقدت وصار كل همي يلكون علاوي كعدت بالشارع والجيران طلعوا على صوتي وخالتي تجر بيه تريدني اطب جوة... اجاني رجال جبير جيرانه جان سيد وانسان خير وطيب...
ابو جواد... كومي بوية اخذج للعباس وذبي همومج يمه وما يردج اخو زينب
ام حسن... ولج يمه كومي
ريم... اخذوني لابو فاضل واني اعرفه ما يردني
ابو جواد... كومي بوية خلي اخذج بسيارتي
راح جاب سيارته وخالتي لبست عبايتها وجابتلي عباية... اخذني الرجال لحظرة العباس... واول ما وصلنا رحت اركض مثل المخبلة للضريح... دخلت وذبيت حجابي وعباتي وصحت...
ريم... ياابو فاضل ذبيت ستري بحضرتك واحلفك بستر زينب اريد ابني منك
جان اللتمن عليه النسوان وهنة يبجن وكل وحدة تحجي شكل... اجتني مرة جبيرة وشالت حجابي ولبستنيا وكلتلي...
المرأة... روحي يمه انطاج العباس وما يردج صدكيني روحي وانتي مطمئنة.
بعدها اخذتني خالتي للشباك لزمته وصدك صرخت وطلعت كل جمرة بكلبي ما مطفية... كمت صليت ودعيت وطلعنا...ذبيت حاجتي يم الإمام وطلعت.
رجعنا هذا الرجال لبيتنه وراح واني نزلت واحس روحي مفرفحة...مر الليل كله ومحد رجع لحد الفجر الساعة ب4 ونص...كمت توضيت ورجعت صليت واني دمعتي ما وكفت...بعد ساعة الكل كعد على صياح ليليان وهي تصرخ من الألم...عرفناها راح تولد...
ركضت خالتي وخابرت اخوها...اجه واخذها هي وليليان وراحوا... وجنت اني كل تفكيري يم وليدي الي مرت 15 ساعة وهو ما مبين...صار الصبح واتصلت خالتي وبشرتنه بولادة ليليان بالسلامة...الحمدلله عدت على خير.
ومر اليوم الثاني ومحد يجاوبنه وزاد خوفي واني وليدي يوم كامل بعيد عني...بوقتها نهاريت وبجيت بكل صوتي وسارة حاضنة ابو الاكبر وتبجي...
اجتني زنوبة وهي تبجي وتسألني...
زينب...ماما يعني اخوية علي بعد ما يرجع
ريم...يروحي انتي لا أن شآء الله يرجع بس ادعيله
زينب...ماما اني خايفة علي
ريم...يمه يبعد عمري لا تخافين ادعيله
أنت تقرأ
طريق إلى النار
Fiction généraleمزيج من الألم لحكاية تروي لنا كيف هي مصائب الدنيا وكيف يُقسم الله الأقدار فَمنا من يكون نصيبه الفراق ومنا من يبقى تحت الاختبار حتى يتفوق فيه.. رواية #طريق_الى_النار تحكي عن فتاة في عمر الأحلام رأت اختها تحترق امامها.. وحينها تكتشف حب كان مخبأ في...
