طريق إلى النار

بارت 20

رواية #طريق_الى_النار
//بقلم.. نرجــس صــادق //

خالد... يانضرهن..
ضعف بعدك شوفهن لمن عفتهن
مايوچدن گامن وضلم دربهن
يانضرهن..
على وجهك ليش بيدك عودتهن
يا نضرهن..

ـــــــــــــــــــــــــــــــــــــــــــــــــــــــــــــــ
ريم.. مر اسبوع على زواجي والوضع طبيعي،، وسام كولش حباب وكلبه طيب وتعامله وياي يخبل.. بس ام محمود ما اعرف شبيها وياي احسها تكرهني..

.. فزيت مرعوبة بسبب الكابوس الي شفته واني كلبي يدك وجسمي يرجف واحس حرارتي ارتفعت... باوعت كان وسام نايم بالكاع...
ـ ياربي إن شاءلله ميكون هالكابوس حقيقة
دخل عاصفة افكاري خالد واجتاحها واني سرحت افكر بي... هسة هو وين وشديسوي وشنو حالته بدوني..
واني افكر بي كلبي تسارعت نبضاته وكانه يعلن عن خطر قريب.
باوعت لوسام الي كان نايم بكل هدوء والحزن مالي وجها.. شنو ذنبه واني داخونه اي واني شنو ذنبي..
من هذي اللحظة واني تاكدت بأنه مراح أحب وسام عمري كله..

طلعت من الغرفة بكل هدوء واتجهت للمطبخ.. اخذت كلاص خليت بي مي وداشرب اجاني صوت من وراية..
محمود.. شتسوين هنا
ريم.. اجيت اشرب مي

تقرب يمي وهمس بصوت ناصي.. 
محمود.. اعرف بأنه انتي ووسام ماكو بيناتكم أي شي فاذا تحتاجين شي اني موجود

ريم... رجفت اديه واني اسمع كلماته وحركاته المقرفة.. ابتعدت عنه وكوتله...
ـ لا شكراً ما احتاج واذا احتاج اكول لوسام.

وبعدها رجعت اركض للغرفة وقفلت الباب..  ليش وين ما اروح اكو وحوش تبحث عن غرائزها وبس.
واني ارجف سمعت صوت وسام وهو يكعد..
وسام.. شبيج ريم اكو شي
ريم... لا ماكو شي ارجع نام
وسام.. شبيج خايفة احجي اكو احد أذاج.
ريم... لا بس شفت حلم محلو
وسام.. تمام ارجعي نامي  واذا تخافين تعالي نامي يمي.
ريم.. لا ما اخاف ارتاح انت.

رجع وسام نام واني خليت راسي على المخدة وكلبي ما هدأ.. جبرت نفسي على النوم وفعلا بعد مدة غمض عيوني ونمت.

إيمان.. صحيت الصبح على صوت ماما وهي تكعدني حتى اروح لخالد اكعده علمود ميتأخر عن شغله...
كمت واني ضايجة كولش.. والله ميخلون الواحد ينام مرتاح
اني مبتلية بخالد ميتزوج ويخلصني.. مشيت لغرفة خالد واني ادردم بيني وبين نفسي..
دخلت لكيت خالد ما موجود واكو شي غريب بالغرفه.. صح خالد نضيف كولش بس هالمرة حتى الفراش مرتبه بطريقة حلوة كانه ما نايم بي...

طلعت رحت لماما كوتلها...
ـ كعدتيني من الصبح علمود اكعد ابنج.. وهو طالع من وكت اليوم
قبل الشحاد وبنته شعنده اليوم طالع من وكت..
ـ ولج اخوج طالع.. لعد ليش ما كعدني اسويله ريوك
سودة عليه وليدي.. طلع بدون ريوك.

عفت ماما ضايجة لأن خالد طلع بدون ريوك اوف لو امي تحبني ربع من محبتها لخالد جان هسه اني مدللة..
رجعت لغرفتي حتى أنام.. كولت خلي اتصل على خالد اكوله ليش طلعت بدون ريوك..
اتصلت.. الجهاز مغلق
استغربت.. أول مره خالد يروح لشغله وجهازه مغلق.
ضليت افكر.. والافكار هجمت عليه والف شغلة صارت ابالي.
بعدين تعوذت من الشيطان ورجعت نمت بس اني ما مرتاحة.