طريق إلى النار

البارت السابع عشر

رواية#طريق_الى_النار
//بقلم.. نرجــس صــادق //

خالد.. ضحڪـتـﭻ حصــتي
ليــش لـــوجــه غــيري تصــير
حـــرام تضــيع نعــمه بوجــه مامقــهور

ريم.. روحي سنطه ...
وبالأصابع گمت اعد ...
شباقي چم جرة نفس.. !؟

ـــــــــــــــــــــــــــــــــــــــــــــــــــــــــــــــ
علاء.. ما اعرف شلون سيطرت على نفسي واني اشوف خالد بين ادينا مثل الميت..
مخلي خالد بحضني وعباس يسوق..
ـ عباس بسرعة فدوة
ـ اي شبيك بعد شلون اسوق.. بس اريد افتهم شبي
ـ مو وكته خلي نوصل ونعرف شبي ولو اني متأكد الموضوع يخص ريم

وصلنا للمستشفى واخذوا منه واني روحي راحت ويا..
بعد نص ساعة اجه الدكتور..
ـ متعرض لصدمة ادت إلى إنهيار عصبي عنده حاليا يعاني من ضيق بالتنفس..
ـ دكتور يعني شنو فهمني
ـ يعني حالته مو سهلة والصدمة الي متعرضلها قوية لدرجة أثرت على تنفسه... والحمدلله من تلاحكتوا.
ـ شكراً دكتور

راح الدكتور واني دموعي بدت تعلن استسلامها..اجه عباس وكعد يمي..
ـ كول يالله لا تخلي يشوف دموعك هو منهار وانت تبجي منا
ـ عباس خالد ميعيش بدونها صدكني يا أما راح يهج من العراق كله يااما يموت.
ـ نجب أنت ليش هيج تتفائل... أن شاء الله ماكو شي والايام كفيلة تخلي ينساها.
ـ اخوي واعرفه صدكني إذا طلع سالم راح يترك العراق ويروح.
ـ هسة مو وكت هذا الحجي...خلي يصير زين والله كريم.

في بيت جمال...
ريم.. كنت كاعدة ومنتظرة ساعة موتي
دخل ستار باوعلي وكال..
ستار..اسمعي لج اياج وبالج تنطقين كلمة لا..سمعتيني لو أعيد
ريم.. خلاص اني سلعة عندك تبيعني وتشتريني براحتك
ستار.. لا تطلعيني من طوري وهسة اخليهم ينقلوج للمستشفى ميته.. بدون حجي زايد

طلع ستار واني دموعي ما وكفن... هسة خالد عرف لو بعده، اكيد ما عرف بعده لانه لو يعرف ما كان سكت
وودق تأخرت كولش... ليكون خالد صار بي شي
لا ياربي اترجاك احمي واحفضه... واني ادعي وجسمي كله يرجف
دخلت ماما وهي دكولي...
ام ستار.. كومي يمه اجو
ريم.. اخذتني ماما ورحت كعدت يم النسوان
ما انتبهت منو النسوان ولا ردت اعرف اصلا.. شويه واجه ستار..
ستار... خلوها وره الباب خلي يعقدلهم الشيخ

ريم.. كمت وكفت وره الباب
وكل كلمة ينطقها الشيخ وهو يردد العقد احسها سجينة دتوقع اخر لحظات حياتي.. كمل الشيخ وطلب موافقتي
لحظات والكلمة مخنوكة ما ترضى تطلع.. اجتي امي ندستني واني احس إذا نطقتها روحي راح تطلع وياها...
صاح الشيخ.. بنتي موافقة لو لا إذا موافقة كوليلي نعم وانت وكيلي وإذا ما موافقة كوليلي لا.

تقربت امي يمي وهمست.. احجي ولج يمه
ثواني ودخل ستار.. باوعلي بنظرة مرعبة كانه تهديد إذا ما وافقتي راح تكون نهايتج اليوم..
صاح الشيخ.. المرة الثالثة يا بنتي موافقة لو لا