رواية #طريق_إلى_النار
//بقلم.. نرجــس صــادق //
خالد... روحي شتهتكم خايبين شبيكم .، ؟
ريم... .
شبعد يالماتمرّ مو كافي الغياب
وصار اهواي ننتظرك تمرنه ...
ونذرنالك تجي وندعيلك اتعود
وعمت سچينّه وشيّب نذرنــــه
ـــــــــــــــــــــــــــــــــــــــــــــــــــــــــــــــ
إيمان...
صحيت الصبح واني راسي يريد ينفجر من كد الألم... كمت ادور على موبايلي.. ماكو تذكرت موبايلي اخذه مصطفى..
كمت غسلت ورحت للمطبخ.. ماكو احد كاعد كلهم نايمين انتبهت للساعة جانت ب6 الصبح...
رجعت لفراشي واني اتذكر مصطفى وحضنه... اوف اعترف حبيتك بس طعنتني من ما صدكت بيه..
ضليت بتناقض مشاعري وما اعرف احبه لو اكرها على الي سوا بيه...
الساعة ب7 ونص سمعت صوت شيماء وهي تدخل للمطبخ وتصيح على ابنها...
رحت يمها وكوتلها..
إيمان... صباح الخير
شيماء... صباح النور
إيمان... خالد بغرفته
شيماء... اي بغرفته
إيمان... رواء وين
شيماء... نايمة هي وجهالها بالغرفة
أيمان... ما شفتي موبايلي فدوة
شيماء... لا والله البارحه عزلنا اني ورواء ما لكينا
مر اليوم طبيعي وهدوء ومحد فتح موضوع البارحه بس اني جنت كاعدة على نار وتمنيت يكلولي شصار..
خالد طلع للمستشفى علمود ابو علاء مريض واني بقيت انتظره لان بس هو الي يكدر يهدئني... رواء اجه زوجها واخذها اما شيماء فعمتها مسمعتها حجاية وهي منتظرة زوجها يجي حتى دكوله...
صار العصر واني وشيماء كاعدين بالحديقة... ندكت الباب واني فزيت... تمنيت هذا مصطفى.. كامت شيماء وفتحت الباب... وجان زوجها فارس...
دخل فارس وكعد مقابيلي وهو يكولي...
فارس... شلونج بنيتي إيمان
إيمان... الحمدلله زينة
فارس.. باباتي لأزم تسمعيني وتفهمين كلامي
إيمان... اي
فارس... الي صار البارحه مو سهل واني ما اكولج راضي على تصرف مصطفى بس لازم ناخذ الامور من وجهة نظر حقه رجل غيور وفجاة يسمع شخص يحجي هيج ويه خطيبته شتتوقعينه يسوي... بس ما حبيت تصرفه وهو مد ايده عليج..
الي اريد اكوله مصطفى متخبل وهو يدور على صاحب الرقم ما خله واحد ما راحلة من البارحه لليوم ومصطفى مقرر يجي يعتذر منج... الي اريده منج اكسري الشر وتقبلين اعتذاره.
إيمان... ابو ضرغام هذا الكلام مو الي دكوله هذا الكلام كوله لخالد وشوفه راح يقبل يرجعني لانسان ما قدرني ولا احترمني.
فارس... أكيد بنيتي أكيد اسولف ويه خالد بس اني اجيتج حتى تهدأ النفوس.
إيمان... باللنسبة الي ما اريد مصطفى بعد
فارس... شنو هالحجي بنيتي ما يصير انتي صرتي زوجته على سنة الله ورسوله وهسة هو ولي امرج مو خالد.
إيمان... مو مهم المهم عندي كلمة خالد ما اكسرها والي يفصله خالد اني اللبسه.
فارس... ان شاء الله خير
اجتي شيماء وكعدت كباله وكلتله...
شيماء... ابو ضرغام اختي ما رجعت لاخوك شلون يعني حتى اني لازم اتطلك
فارس... شنو هالحجي شيماء انتي مرتي وام جهالي شنو طلاك هذا الكلام ما اريد اسمعه بعد.
شيماء... هذا كلام عمتي البارحه
فارس... امي ضايجة على الي صار وكالتها بوقت عصبية لا تاخذيها صدك... يله كومي جيبي الجهال وخلي نرجع.
شيماء... خلي انطي خبر لخالد.
أنت تقرأ
طريق إلى النار
General Fictionمزيج من الألم لحكاية تروي لنا كيف هي مصائب الدنيا وكيف يُقسم الله الأقدار فَمنا من يكون نصيبه الفراق ومنا من يبقى تحت الاختبار حتى يتفوق فيه.. رواية #طريق_الى_النار تحكي عن فتاة في عمر الأحلام رأت اختها تحترق امامها.. وحينها تكتشف حب كان مخبأ في...
