رواية #طريق_إلى_النار
//بقلم.. نرجــس صــادق //
خالد... وبهداي
آحترگ بهداي
گضه عمره آلشمع من يحترگ سكته
ريم... الشيب شيب الشعر
حبينه يعني شصار
سنين عمري الكضن
مو اخر المشوار
ـــــــــــــــــــــــــــــــــــــــــــــــــــــــــــــــ
ودق...
بعد مرور أسبوعين واحنه كل تفكيرنا بعلاء وعملية بهاء وبعد ما قرر الدكتور اجراء عمليته بيوم الخميس من هذا الاسبوع.. جانت عمتي كل يوم تتصل عليهم حتى تطمئن... وجانت عملية مصيرية...
وصار يوم الخميس واحنه لازمين كلوبنا وجانت اللسنتنا تلهج بالدعاء... وبعد ما اتصلنا على علاء وطمأنه بانه دخلوا العمليات ومنتظرين... بعد 5 ساعات مرت على العملية وكلما نتصل يكولون بعده... جنا خايفين على بهاء كولش..
بعد 6 ساعات... رن موبايلي وطفرت علي وجان المتصل علاء.. جاوبته بلهفة..
ودق... بشرني علاء طلعوا من العمليه
علاء... اي الحمدلله خلصت العملية ونجحت
ودق... صدك تحجي يعني نجحت العملية واخيرا
علاء... أي الحمدلله
ودق... خلي أبشر عمتي خطيه
علاء... ماشي
سديته منه ورحت لعمتي وبشرتها ومن فرحتها كامت تهلهل وتهوس... الحمدلله نجحت العملية بس ما قبل الهم يرجعون الدكتور إلا بعد شهر من العملية حتى يتأكد من نجاحها كلياًّ.
ريم...
بعد موت وسام علاوي ساءت حالته وكلشي سويت ومفاد وتغير حيل صار طفل هادئ مو ذاك علاوي الي يكلب البيت بضحكته... حسيت نفسي راح أخسر إبني وراح تدمر نفسيته جنت احس بحاجته لابو...
علاوي جان عمره 5 سنوات وقررت ادخله روضة حتى ينسى شويه.. بس هو كلما اودي للروضة يضل يبجي يريد يرجع.
عجزت واني احاول ويا.. عجزت واني احاول ارجعه مثل ما جان لحد ما صار يوم الأربعين ورحنا كلنا للنجف... وصلنا ونزلنا هناك وجانت الحجية تبجي وتنعى وبعد ما اقتربت للقبر جانت اصعب لحظات وجنت لازمة علاوي بأيدي... ركض علاوي على القبر وحضنه وجان موقف كفيل يخلينه كلنا ننحب ونصرخ بألم... خالتي وخالو ذبو نفسهم على القبر والحجية جانت تنعى بألم...
بقينه ساعة يم قبره وبعدين رحنا نزور وزرنا وطلعنا وبعد ساعتين وصلنا كربلاء... رجعنا للبيت وليليان ما راحت ويانة لأن جانت والدة جديد...
ماما اتصلت عليه وجانت تريدني ارجع بس اني رفضت ارجع لأن خايفة ياخذون جهالي مني.
والايام تمر وبدت المشاكل وكل يوم اسمع حجاية من خوات ليليان وامها... وجانن يحجن براس ليليان من باب اني راح اخذ زوجها منها..
بيوم طلعت اربعين ليليان وجانت امها موجودة وكلنا كاعدين على الغده... جان تحجي امها...
ام ليليان... الله لا يوفقهن ارامل هالوكت يكومن يلفن على المتزوجين وياخذنهم
ام حسن... لا خيه مو كلهن اكو بنات اصول
ام ليليان... لا عيني كلهن وداعتج
الحجية... لا والله انتي غلطانة هالشوفة عينج بنيتنا ريم اصيلة وما تدور هالسوالف ولا تشملينهن كلهن ومو كل اصابع ايدج سوة.
ام حسن... أي والله ريم اصيلة ووردة
ام ليليان... اممم أن شآء الله خير
غثتني بكلامها وما حبيت احجي ودكوم تكرهني بس نصدمت واني اشوف نظرات حسن إلي... معقولة جاي يباوعلي بنظرة اشمئزاز لو نظرته بيها غاية ثانيه.
وبعد ما راحت ام ليليان.. طلعت بره انظف الحديقة وما حسيت غير على صوت حسن وراية..
حسن... العفو خوية مو قصدي اختلي بيج بمكان واحد
ريم... لا عادي تفضل خوية
حسن... خوية ليليان امها تحجي براسها على سالفة ما بيها حظ واني ما اريد تصير مشاكل بيني وبين مرتي
ريم... اي من حقك أن شآء الله اشوفلي بيت واطلع منا
حسن... لا خويه بس اريدج تقنعين الحجية حتى تقنع ابوي يخليني اطلع اني وعائلتي حتى تبقى علاقتج طيبة بليليان وما تصير هالمشاكل كلها.
ريم... بس هذا البيت من حقك اني الي لازم اطلع
حسن... انتي مرة وحيدة شلون اسمح لنفسي اخليج تطلعين وتتهجولين لا خويه هذا بيت وسام مثل ما بيتي وانتي الج حق بي.
ريم... الله يوفقك خوية أن شآء الله اقنعها.
والحمدلله جان حسن رجال وزلمة معدل... الله يوفقه ويحفظه لمرته وجهاله.
بعد ما نظفت الحديقة رجعت للبيت ورحت بوجهي لغرفة الحجية وكعدت كبالها وحجيت وياها بهذا الموضوع والحجية نصدمت من كلامي بس فهمت الوضع وكالت أن شآء الله اقنع ابو حسن.
أنت تقرأ
طريق إلى النار
Fiction généraleمزيج من الألم لحكاية تروي لنا كيف هي مصائب الدنيا وكيف يُقسم الله الأقدار فَمنا من يكون نصيبه الفراق ومنا من يبقى تحت الاختبار حتى يتفوق فيه.. رواية #طريق_الى_النار تحكي عن فتاة في عمر الأحلام رأت اختها تحترق امامها.. وحينها تكتشف حب كان مخبأ في...
