رواية #طريق_إلى_النار
//بقلم.. نرجــس صــادق //
خالد... مشينا بلا موادع
غيضنه شكبره
وخفينه الدموع
البالجفن حمره
ونصبر والمكابر
بالكطن جن نار
سكته المحترك ووجارهم كبره
ريم...فوك همي وفوك جرحي
وجيتك اتقاسمنه همك
لجن موش بكيفي صدك
شاهد بمسرح جريمه
الناس جبروني اعله رسمك
ـــــــــــــــــــــــــــــــــــــــــــــــــــــــــــــــ
ريم...
الكل فرحان بجية أبوالاكبر وكانه اول طفل بالعائلة ووسام ميرضه ينومه بالكاروك مخلي بحضنه وصافن بي..
صحيت الفجر ب3 على صوت أبو الاكبر وهو يبجي وشفت وسام طفر على الكرسي وشاله وجابه الي...
اخذته وخليته يرضع وجانت ماما نايمة يمنه بالغرفة واني ميته الم احسه يشلع روحي من يرضع..وهو ولا هامة يرضع ولا عبالك مرضعته قبل ساعة...ووسام يكوله..
وسام...ارضع حبيبي اشبع يبعد ابوك.
ريم... انت شهامك والله ما تدري اني الي طايح حظي برضاعته ما تدري بالالم عبالك يسحب روحي من يرضع.
وسام... على كيفج هي حليبه منيتي بيهن على ابني باجر اجيبله مرضعة حتى ما تعيرينه بحليبج.
ريم... عود انت تحجي صدك بس المرض ميوجع غير راعيه
وسام...ههههههه اشاقة وياج حبيبتي انتي الاولى والاخيرة.
ريم... عادي روح تزوج ملازمتك
وسام...يعني عادي اتزوج مرة ثانية
ريم...عادي ميهمني
شفته ضاج وتغيرت ملامحه وكلي...
وسام...حقج صح انتي بايعتني بس اني ما اشتري غيرج
اخذ علي مني ورجع لجهته نومه بحضنه ويشم بي...بعد ميبوسه لأن خدوده تحسست من لحيته.
رجعت نمت وما حسيت غير على ايد وسام وهو يمسد بشعري...فتحت عيوني وشفته مبتسم وهو يكولي...
وسام...صباح العافية يالعافية
ريم..صباح النور
وسام...اعرف بيج تحبين الكيمر جبتلج واجيت
ريم...صدك والله مشتهيته من زمان
وسام...الف عافيه تغذي زين
ريم... الله يعافيك ابو علاوي
وسام...كولي ابو علي لأن ابني هو علاوي الجبير
جابتلي امي الريوك وهي فرحانة ودكولي...
ام ستار...يمه الله عوضج وانطاج زلمة مثل وسام ماكو مثله فدوة لطوله شكد يحبج ومعتني بيج
ريم... اي
ام ستار...شبيج ولج شو بوزتي
ريم...لا ما بيه شي
ام ستار...ريم الماضي تنسينه عبالج ما ادري بحبج انتي وخالد اسمعي مني وانسي الله عوضج بالاحسن من خالد...المرحومة ام خالد حجتلي عن علاقتكم وطلبت مني ابعدج عن ابنها.
ريم...ماكو احد أحسن من خالد والي سوته المرحومة الله يحاسبها علي لأن ضلمتني وضلمت خالد
ام ستار...نجبي واللزمي بيتج وعار على المرة الي مخلية براسها زلمة وهي نايمة بحضن رجلها ما ربيتج هيج
ريم... كلتي تخلي براسها غلطانة اني مو براسب اني بكلبي نايم خالد ولا سنة ولا بعد عشر سنين يطلع من كلبي وابقى احبه لحد ما اندفن بالتراب وبيوم القيامة اطلب الله يجمعني بي وانتو متعرفون الألم الي اعيشه كل يوم والي مثل الخنجر نايم بكلبي.
أنت تقرأ
طريق إلى النار
General Fictionمزيج من الألم لحكاية تروي لنا كيف هي مصائب الدنيا وكيف يُقسم الله الأقدار فَمنا من يكون نصيبه الفراق ومنا من يبقى تحت الاختبار حتى يتفوق فيه.. رواية #طريق_الى_النار تحكي عن فتاة في عمر الأحلام رأت اختها تحترق امامها.. وحينها تكتشف حب كان مخبأ في...
