رواية #طريق_إلى_النار
//بقلم.. نرجــس صــادق //
خالد.. كلشي بارد
حته ملگاكم
رسايلكم حجيكم ماچواني
وانه شايلكم جنت ماي بصواني
ريم... جذاب ملكه الفرح جذاب
مكاود مدارس حده للباب
ـــــــــــــــــــــــــــــــــــــــــــــــــــــــــــــــ
ودق...
بعد مرور شهرين على وفاة عموو والوضع هادئ بس علاء تغير ومرات ادخل علي الكا يبجي... عمتي كل فترة يرتفع ضغطها ونركض بيها للدكتور..
مهدي طبيعي من شغله للبيت ومن البيت للشغل... ميطلع أبداً واني كملت الشهر الرابع ودخلت بالخامس وبدت معاناة الحمل والثكل...
علاء وصاني اللتزم بالحجاب والملابس العريضة لأن مهدي هنا واني ما متعودة هيج.. صرت اختنك من الحجاب...
طبعاً قبل شهر رحت اني وعلاء للمدرسة وعرفت نتيجتي جنت ناجحة بس مو مثل ما اني اريد.. علاء كلي تعوضيها أن شآء الله.
بيوم جنا كلنا كاعدين بعد الغده.. جنت لابسة الحجاب بس مختنكة وبطني كبرانة... انتبهت لعلاء جان خازرني.. اجيت اموت بمكاني وتخربطت.. ليش شبي هيج خازرني...
باوعتله أشرلي على حجابي... جنت ناسية حجابي نازل عن راسي... كبل كمت ورحت لغرفتي..
شويه ودخل وراية...
علاء... كم مرة اوصيج حجابج مينزل وملابسج شوية خليها عريضة وانتبهي عليها... يعني عاجبج كاعدة كبال اخوي وصدرج طالع وشعرج وفوك هذا كله ملابسج ضيكة ومبين جسمج كله.
ودق... حبيبي والله نسيت وما انتبهت
علاء... ودق الله يخليج اني ما اتحمل هيج انتبهي مرة ثانيه يصير غير شكل.
اجه تمدد على الجرباية ونام وهو زعلان... من يوم وفاة عمي لليوم علاء أكثر وقته ضايج...
تقربت يمه وحضنته وهو ما انطه ردة فعل... ضجت كولش... كمت وطلعت..
نزلت جوة لكيت مهدي كاعد بالصالة وعمتي وماما بالغرفة نايمات...
رحت كعدت يم مهدي وكعدنا نسولف على الدراسة وهو ميباوع بوجهي أبد... اتعجب شكد مؤدب وحباب..
بعدين فتح جهازه وكام يبتسم.. شكيت ابتسامته وراها شي... طفرت ورحت يمه بسرعة وهو ضم موبايله وضحك...
ودق... امممم منو سعيدة الحظ
مهدي... هههههههه شلون عرفتي
ودق... مبين من ابتسامتك
مهدي... بنية شفتها أول مرة بالشركة جانت دتقدم على وظيفة وجابتلي الملف مالتها واجت...وبعدها كامت يومية تجي يمي وصارت سوالف بيناتنا والبنية عجبتني وفاتحتها بموضوع الخطوبة...كولت لعلاء وامي وان شاءلله بعد دورة السنة اروح اخطبها.
ودق...امممم اريد اشوفها
مهدي....ههههههههه ليش تردين تشوفين حلوة لو لا
ودق...أكيد لازم نشوفها
مهدي... ماشي هسة اشوفجياها
فتح الاستيديو وكام يدور على صورتها..شوفني الصورة وجانت البنية حلوة ومرتبة.
ضلينه نسولف على البنية وهو يحجيلي عليها..شويه وسمعت صوت علاء وراي...
علاء...ودق تعالي وراي
ودق...اي جاية
رحت ورة علاء واني ميتة خوف...خلال هالشهرين اني صارت عندي فزة دائماً اتخيل شغلات مثلاً اسمع اصوات واتخيل عمي موجود بكل مكان...
دخل للغرفة واني دخلت وراا...سد الباب واني رجفت لأن وجها ما يتفسر.. باوعلي واجه عليه ولزمني من ايدي حيلل..
علاء...بعد كومي اكعدي بحضنه شنو رأيج
ودق...ليش شسويت
علاء...الظاهر ما جنتي ملاحظة نفسج لازكة بي لزك ولج فهميني الي براسج شنو.
ودق...والله مو قصدي جان ديشوفني صور حبيبته مو اكثر
علاء...ودق تجفي شري واسمعي الكلام تره روحي طالعة.
ودق...اسفة والله ما تنعاد بعد.
عافني وكعد على الجرباية...نهضمت وصدك بجيت صايرة تصرفاته وياية محلوة وبس يصيح عليه واحسه يكرهني...
كعدت بالكاع ولميت نفسي واني اشهك هو كاعد ويسمع شهكاتي... كام واجه كعد بصفي..
علاء...كوتلج دموعج تأذيني ليش تتعمدين تبجين كبالي
ودق...انت سبب دموعي ملاحظ نفسك شلون تصيح عليه على اقل شي صاير تكرهني
علاء...أبد لا تفكرين اني اكرهج بس قدري ضروفي ودق تعبان والله تعبان وفوك هذا كله تتعمدين تستفزيني من اول يوم اجه مهدي وامي هنا كوتلج هذي التصرفات ممنوع بس مجاي تاخذين حجاية.
ودق...شنو ما عندك ثقة بيه
علاء...شعليها الثقة جاي اكلج اللبسي عريض جسمج مبين اكولج ما اتحمل اشوفج قريبة منه.
ودق...علاء اني هم تعبانة واحس ما عندي تركيز على كلشي حملي متعبني وفوكاها جاي اشوف شغلات تخوف
علاء...شنو شغلات تخوف
ودق... اسمع اصوات واتخيل عمي موجود بكل مكان واسمع صوت صريخ ودائما احلم احلام تخوف.
أنت تقرأ
طريق إلى النار
General Fictionمزيج من الألم لحكاية تروي لنا كيف هي مصائب الدنيا وكيف يُقسم الله الأقدار فَمنا من يكون نصيبه الفراق ومنا من يبقى تحت الاختبار حتى يتفوق فيه.. رواية #طريق_الى_النار تحكي عن فتاة في عمر الأحلام رأت اختها تحترق امامها.. وحينها تكتشف حب كان مخبأ في...
