رواية #طريق_إلى_النار
//بقلم.. نرجــس صــادق //
خالد... ياگمر هلبت شفتهم ...؟
گول كونك صادفتهم
إحچيلنه
شـ بيهم
شـ جاهم
ليش خلّونه بدربهم
وهمه يدرون بـ دمعنه ...
تلومنه الـ وادم وراهم
ياگمر والـ مايغمضن
محد بـ گدنه بچاهم
أخ ياشوغة جفاهم ..💔
ريم... فراش الفاتحه لو شفته ملموم
بنص كلوبنه تلكه الجوادر
ـــــــــــــــــــــــــــــــــــــــــــــــــــــــــــــــ
ودق...
مر الاسبوع واني كل بالي يم علاء وكل يوم اباوعله واتمنى اشبع عيوني منه بس هو هذا الحب شكد ما تبقى قريب من حبيبك متشبع منه وتبقى تشتاقله... شلون راح افاركه شلون أكدر بدونه... جنت ماخذة اجازة ولادة 15 يوم وبعد يومين تخلص...خلصت وداومت اول يوم الي وجان فايتني هواي مواد بس إن شاءلله اكملها...
اجه يوم الاربعاء وجنا كلنا سهرانين حتى نودعهم وصارت الساعة ب3 الفجر وطلعوا وودعناهم وقبل لا يطلعون رجع علاء وصاحني... رحت ورا للغرفة واول ما دخلت حضني بكل قوته مثل الي يخاف يعوفني... حضنته ونزلت دمعتي...
ودق... شلون راح أكدر بدونك
علاء...حبيبتي ديريبالج على نفسج وعلى موسى
ودق...ان شاءالله يروحي وانت ديربالك على نفسك
علاء...إنشاءلله يله رايح
ودق... الله ومحمد وعلي وياك حبيبي
طلع وراحوا ورجعت لغرفتي وحسيت نفسي اشتاقيتله..نمت على الجرباية واستنشقت عطره...اوف شلون راح تخلص ايامي بدونك...ياربي سهل عليهم.
بقيت كاعدة وما كدرت انام...صار الصبح وبدلت وطلعت...اجيت اخذ تكسي توصلني وشفت خالد وكف كبالي بسيارته وهو يكولي...
خالد...صعدي خوية من اليوم اني اوصلج للدوام
ودق...لا ما اريد اتعبك اني اخذ سيارة
خالد...مو عيب خوية شنو ما اريد اتعبك انتم امانة يمي.
ودق...رحم الله وآلديك خوية
صعدت ويا ووصلني للمدرسة والحمدلله ما جانت بعيدة حيل...وصلت ونزلت وتشكرت منه.
ايمان....
صرت اراقب دلال بدون ما تحس بيه واشوف كل تحركاتها وبيوم احنه كاعدين كلنا بيت عيالي...رجعت دلال من المدرسة وكالت لابوها...
دلال...بابا ما اريد المدرسة
ابو فارس... ليش بوية تعوفين المدرسة اكو بنات يتمنن المدرسة شبيج انتي
دلال... ما اريدها ما احبها
ام فارس... خليها تبطل البنية أول وتالي مكانها بيت رجلها
ابو فارس... ليش مو حرامات بله هي وصلت بعدلها سنتين وتخلص
فارس... صدك غبية كومة بنات يتمنن المدرسةبس اهلهن ما يخلوهن
شيماء... لا حبي دلال لا تعوفين مدرستج
دلال... ما اريدها شبيكم ما احب المدرسة
مصطفى... يطبج مرض عليمن نتوسل بيج عوفوها
ايمان... لا حرامات مصطفى لازم نشجعها على المدرسة
دلال... رجاءا انتي لا تدخلين بحياتي
مصطفى... شلون ولج ادبسزز شو ما عندج احترام
ابو فارس... مو عيب عليج هيج تحاجين الاكبر منج
دلال... كلكم تحبوها هسة اني شكتلها مثلاً
مصطفى... نجبي يله امشي من كدامي
راحت لغرفتها وهي تصيح وتحجي واني جنت مصدومة من كلامها...صايرة صلفة بكلامها رغم هي جانت حبابة وهادئة...دخلت لغرفتها وضربت الباب حيل صاح بيها مصطفى...
مصطفى... حيوانة اكوملج اربيج تره ادبسزز ماكو احترامات
ابو فارس... مصطفى وفارس وكرار تعالو وراي
اخذهم عمي ودخلوا للاستقبال وعمتي ضاجت...مرت حماي كامت لغرفتها واني اجيت اروح لبيتنا وندستني شيماء وكعدتني...بقيت كاعدة منتظرة مصطفى يطلع حتى نروح لبيتنا..بعد ساعة يله تطلعوا واجه مصطفى وكالي يله كومي تعبان اريد انام...
كمت ورجعنا اني ويا بس وشيماء ورجلها بقوا هناك...واحنه دخلنا للبيت باوعلي مصطفى وسألني....
مصطفى... شوفي لا عبالج ما ادري سبب كلام دلال وياج اعرف كلشي بس منتظر تجين تصارحيني
ايمان... ما فهمت على شنو تحجي
مصطفى... لا فهمتي فلا تضمين عليه شي مرة ثانيه
عافني وراح بدون مينطيني مجال اسأله على شنو يحجي ومعقولة عرف بالي افكر بي...ضل هالشي طول الوقت ياكل بيه واني اريد حل اخلي دلال تعوف هالطريق.
ثاني يوم كملت تنظيف ويه شيماء وعفتها تطبخ بالغدة ورحت لبيت عيالي...اول ما دخلت شفت دلال بالحديقة الظاهر اليوم ما مداومة...رحت لعمتي سلمت عليها وعلى عمي وكعدت يمهم وجانت نيتي اراقب دلال اكثر...
دخلت دلال لغرفتها واجيت اروح وراها وسمعتها تحجي بالموبايل صار عندي فضول اسمعها...تقربت وجانت تحجي ويه صديقتها...رجعت لمكاني يم عمتي وشوية وترخصت ورجعت لبيتنا.
أنت تقرأ
طريق إلى النار
General Fictionمزيج من الألم لحكاية تروي لنا كيف هي مصائب الدنيا وكيف يُقسم الله الأقدار فَمنا من يكون نصيبه الفراق ومنا من يبقى تحت الاختبار حتى يتفوق فيه.. رواية #طريق_الى_النار تحكي عن فتاة في عمر الأحلام رأت اختها تحترق امامها.. وحينها تكتشف حب كان مخبأ في...
