رواية #طريق_إلى_النار
//بقلم.. نرجــس صــادق //
خالد... اگرب اگرب غني بيه ولا تسافر
للبعد ما بيه أصيح
ريم... ضايعين
لا فرح يندل دربنا
ولا حزن فك ياخه عنه
ـــــــــــــــــــــــــــــــــــــــــــــــــــــــــــــــ
ايمان...
واحنه ننتظر خالد وفاضل كاعد على نار واني اتمنى خالد ميجي حتى متفرح هاي الحية...
بعد ساعتين وكال عمو...
ابو باسم.. فاضل خالد وين راح
فاضل.. هسة يجي عنده شغلة
ابو باسم...ميصير هيج ياابني الساعة ب7 خلي نكوم نصلي وخلونه عشة وننتظر والله كريم.
كام فاضل ورجع اتصل على خالد وجان جهازه مغلق وهو تخبل وقرر يروحله للاستيديو وشيماء رجعته وكلتله عيب لا تعوفهم وهسة يجي خالد...هدأ ورجع بعد ما كللنا حضرن العشة.
صلوا وخلينه العشة وكملنا كولشي واحنه ننتظر خالد...شوية كاعدين وجان يدخل خالد وبكل كبرياء...اجه يروح لغرفته بعد ما كال السلام عليكم وما انتظر جواب من أحد...
صاح علي فاضل وكله...
فاضل...وين رايح صار ساعة منتظريك
خالد...كمل انتظارك رايح اسبح وابدل واجي
فاضل...لا تتجاهلني واحجي عدل وصير زلمة بيك حظ
خالد...اكول اخوي الجبير وواجبي احترمك
فاضل... يله بسرعة العالم منتظرة
راح خالد بدون ما يجاوب...بعد نص ساعةاجه كعد يمي وهو يكلب بموبايله... كاله عمي..
ابو باسم...بوية خالد ما ناوي نكمل العقد
خالد... قبل لا تعقد خلي اكول للبنية شي وانتم كلكم شاهدين علي.
ابو باسم...اي كول نسمعك
خالد...سمعي يا بنت خالتي إذا جان ابالج تنسيني الي بكلبي فانتي غلطانة لو نسوان العالم كله ما يكدرن يعوضني شوفتها بس وانتي تعرفين اني عاشك ومن زمان مو هسة فخليها ابالج كلمتين لو عندي عشر نسوان وتصحلي الفرصة اخذ محبوبتي فراح اخذها فهمتيني يعني من الاخير زواجي منج مو برغبتي.
كام مرتضى وصاح..
مرتضى...اختي مو لعبة عندك حتى هيج تحاجيها بس العتب مو عليك العتب على فاضل الي خلاني اجي حتى احضر عقد اختي عبالي انت ادمي وتستاهل ننطيك مرة طلعت خرك واحد يركض ورة وحدة متزوجة ضربته بوري.
خالد... لأن دايس بساطي راح ابقى محترمك بس السبب مو بيه السبب باختك الي ذابة نفسها عليه
اجه يحجي مرتضى وطفرت سرى وكالت...
سرى... اني قابلة بالي كلته خالد والله يقدرني واسعدك
مرتضى... انتي شدتحجين ولج
سرى... مرتضى اني اعرف بحياتي واعرف شلون ارتب حياتي
سكت مرتضى وعمي كال...
ابو باسم... بارك الله بيج بنتي
بده عمو يتلو العقد بعد الآيات وخالد راح كعد بصفه وهو عيونه بكصته ودمارات ايده برزت وحسيته على ساعة ينفجر..
كمل عمو العقد وسرى صارت زوجته لخالد...كام خالد ونزلت دمعته وتدارك الوضع وراح لغرفته بسرعة.
الكل صاحوا ورا بس ما اهتم ودخل لغرفته وسد الباب...بعدها راح عمو وخالتي ومرتضى وبقه فاضل وزوجته...شوية هم ترخصوا وطلعوا وبقت سرى بصفتها زوجة خالد...
شيماء ورواء كامن للغرفة ونامن هنة وجهالهن واني بقيت كاعدة اريد اعرف هالحية شتسوي..
كامت وهي تتمايل وراحت لغرفة خالد...دخلت وانب رحت وراها واني اريد ادخل سمعت خالد يكوللها...
خالد...خير شتسوين هنا
سرى...ليش هذي مو غرفة زوجي يعني غرفتي
خالد...مصدكة نفسج زوجتي صرتي
سرى...لعد ليش مو قبل شويه عقدت عليه وصرت حلالك
خالد...سرى اطلعي بره وبعد ممنوع تدخلين غرفتي
سرى...ليش اني مو زوجتك حرام عليك هيج تهيني
خالد... طلعي وسدي الباب وراج
كامت تبجي وكعدت بالكاع... شكد اكرها بس من بجت نقهرت عليها... دخلت للغرفة وشافني خالد وهي كامت وطلعت..
ايمان... خالد شراح تسوي
خالد... شاسوي مثلاً كربسوها براسي
ايمان... اعرف بس لازم تجيبلها غرفة ونيشان على الاقل حسسها انه هي متزوجة لأن هم خطيه
خالد... سهلة اجيبلها كلشي تريده بس خلي تعوفني
ايمان... صارت مرتك بعد مو من حقك دكولها عوفيني
خالد... ايمان انتي تعرفين شبيه فلا تزيدين جروحي
ايمان... اعرف جروحك حبيبي وكل يوم ادعيلك يبرد كلبك يعمري
خالد... الله كريم
عفته وطلعت واني كلبي مجمر شلون بي خالد خطيه... رجعت لغرفتي ولكيت شيماء كاعدة منتظرتني..
شيماء... تعالي اكولج شغلة
أيمان... اي كولي حبي
شيماء... سرى ما مرتاحتلها اني أبد
إيمان... ليش
شيماء... ولج اجتي يمنه بالغرفة تكلب بجهازها وكل ضحكة ولا الثانية تالي بعدين دكول شوكت ترجعن كوتلها ليش عيني نبقى شكد منريد دكولي لا حبيبتي هذا البيت صار بيتي وبكيفي يدخل الي اريده.
ايمان... لا والله عود كلت خطيه شفتها تبجي طلعت صدك حية ودموعها دموع تماسيح خلي تولي لا تغثين نفسج بسببها.
شيماء...ولج خايفة على خالد خاف تسويله عمل لو شي
ايمان...يسونها ذني والله شو خوفتيني اوف ونوب اني راح اتزوج
شيماء...تزوجي وإن شاء الله كل اسبوع وحدة بينه نجي يمه
ايمان...ان شاءالله لازم هيج
راحت شيماء لغرفتهن وهذي الغرفة مخصصة الهن بيت ابوية من زمان...خليت راسي على المخدة واني افكر شلون راح اعوف خالد... نمت واني ما مطمئنة.
أنت تقرأ
طريق إلى النار
General Fictionمزيج من الألم لحكاية تروي لنا كيف هي مصائب الدنيا وكيف يُقسم الله الأقدار فَمنا من يكون نصيبه الفراق ومنا من يبقى تحت الاختبار حتى يتفوق فيه.. رواية #طريق_الى_النار تحكي عن فتاة في عمر الأحلام رأت اختها تحترق امامها.. وحينها تكتشف حب كان مخبأ في...
