طريق إلى النار

بارت 24

رواية #طريق_الى_النار
//بقلم.. نرجــس صــادق //

خالد.. ناسيّني، بس هم أجي ابالكَ
واترس عيونك حزن وأتلاعب بحالك

ريم.. رحتوا نده... وي غبشة الشمات
‏ليش؟؟؟ شمالكم!!!
‏جا ورد روحي الذابل شسوالكم!؟؟

‏ـــــــــــــــــــــــــــــــــــــــــــــــــــــــــــــــ
خالد.. كنت كاعد بالشقة وداباوع على فيلم بس عقلي مو يم الفلم،، كل عقلي يم بنيتي واني اتخيل هسة حضنها وهسة حاجاها وهسة بجت واني دموعي نزلت وكلبي نارر اشتعلت بي.. غمضت عيوني ومن صدوك بجيت اي بجيت بصوت وصرخت بكل صوتي مثل الي نحرم من امه .. حاولت اتمالك نفسي بس ما كدرت..
شعور حقير لما اتذكر بنيتي اي بنيتي ربيتها باديه.. من عمر 5 سنوات وهي بحضني كانت مميزة بين الأطفال من يضربوها تجيني تركض تبجي واني احرك الدنيا لاجل دموعها وبديت احميها بعيونها ويوم بعد يوم بنيتي بدت تكبر والعيون صارت عليها.. خفت لا تحلى بعيون غيري.. صرت احاسبها واقسي عليها إذا تطلع بره البيت وجانت تتنفرز إذا احاسبها.. اوف كلبي والله نكسر شاتذكر حتى اتذكر من عمر 16 سنة لحد الان واني عيوني عليها.. اللهي اختبارك صعب ارحمني واللطف بحالي.

مسحت دموعي وكمت غسلت.. ورجعت اخذت موبايلي ورحت لعند اوس بشقتهم...
نزلت ودكيت الباب،، شوية واجاني صوت اوس..
اوس.. اي اجيت
خالد.. حبيبي اوس طبعاً اعتذر اجيتك بهالوقت
اوس.. لا اخوي صدوك جذب أنت تدلل وباي وقت تحب احنه موجودين.
خالد.. اوس اريد موبايلك اتصل على الأهل
اوس... اي تدلل

اخذت موبايله واتصلت على علاء.. ماكو مديجاوب وين صار هذا.
رجعت الموبايل لاوس.. وطلعت اني ويا نفتر شويه.

علاء.. صحيت الساعة ب4 العصر واني بعدني نعسان كولش تذكرت لازم اكوم افتح الاستيديو.. طفرت غسلت ورجعت بدلت واخذت موبايلي وطلعت...
دقايق ووصلت للاستيديو.. نزلت فتحت الاستيديو وكعدت..
بعد ساعة من العمل.. تعبت كولت خلي استراح شويه..
اخذت موبايلي وفتحته.. فجأة لكيت مكالمة فائتة..
انتبهت الرقم غريب بعدين تفاجئت الرقم دولي.. يالله معقولة يكون خالد..
رجعت بسرعة اتصل على الرقم.. اجاني الرد..

اوس.. الوو منو
علاء.. العفو انتم متصلين عليه
اوس.. لا اني ما متصل بس أنت شنو اسمك
علاء.. علاء
اوس.. اها مو اني اتصلت عليك.. خالد الي اتصل
علاء.. خالد وينه هسة يمك فدوة انطينيا
اوس.. هسة حبيبي اخلي يتصل عليكم
علاء.. تمام
غلقته واني دمعتي نزلت... اوف يا خالد مشتاقلك ليش يخوي ليش عفتني.

عشر دقايق واجاني اتصال من رقم دولي غير الرقم الي متصل عليه قبل شويه.. عرفته هذا خالد..
علاء.. الو خالد وينك
خالد... شلونك
علاء.. معقولة اهون يا خالد شلون عفتني وانت جنت سندي... مو كتلي للموت ما نتفارك
حجيتها ونزلت دموعي...
خالد... نجبرت يعلاء محد يعرف بالي مريت بي
علاء.. ظهري نكسر بروحتك ولك يخوي روحي موجرة نار عليك
خالد.. اوف مشتاقلك
علاء.. راح اموت على شوفتك والله
خالد.. يبعد اخوك تره روحي مشتعلة لا تزيدها فدوة
علاء.. حبيبي انت لا تهتم كلنا بخير المهم انت تكون بخير فدوة لكلبك لا تأذي نفسك.
خالد.. اهلي شلونهم.. عباس شلونه
علاء.. حبيبي كلهم بخير،، والدتك خبروها وتقبلت الأمر وفاضل اخذها لبيته.. وعبيس بخير بس متحلفلك والله اني من هسه اوصيك لا ترجع أبد.