طريق إلى النار

البارت العاشر

رواية #طريق_الى_النار
//بقلم.. نرجــس صــادق //
خالد..
لاكيتهم وجه بوجه
ما سلمت بَس بالگلب حاچيتهم.

ريم.. هز ايده كَلبي وماعرف...
المن يودي عتابه
مثل اليودو للمصح...
وهو اعقل من الجابه
ـــــــــــــــــــــــــــــــــــــــــــــــــــــــــــــــ
كنت اركض واني مرعوبة وصوتي اختفى اريد اصرخ اريد اصيح ماما اللحكيلي.. ما اعرف شنو الي كان يركض وراية بس اني كان كل همي اخلص نفسي وانهزم فجأة هدأ كولشي وتوقفت وكانه الزمن توقف..
رفعت راسي كان بابا واكف فوك راسي.. حسيت بي يريد يذبحني رجعت ليورة وهو لزمني همس باذني لازم تموتين..
صرخت لاااااااااااا بكل صوتي... جرني وشمرني بالكاع خله عليه نفط وشعل النار وشمرها عليه واشتعلت النار بيه...
صرخت بكل صوتي مامااااااااااا...
فزيت وكان هذا الكابوس إلي دائماً يهددني... دائماً اشوف هيج كوابيس مخيفة ما اعرف ليش بس صرت اتهرب من النوم بسبب هذي الكوابيس والاحلام.

رجعت خليت راسي على المخدة ونزلت دموعي... شنو مصيري وشنو حياتي وخالد شلون اطلعه من كلبي وانسى.. واني اصارع افكاري غمضت عيوني ورجعت لعالم الأحلام.

.. الصبح واني أصحى على صوت ودق تكعدني..
ـ ريم كومي سويت ريوك تعالي اكلي.
ـ انتي سويتي ريوك ولج... شلون سويتي.
ـ سويت ريوك ووكلت زنوبة وعلاوي.
ـ يااا ولج صايرة شاطرة من شوكت صايرة تسوين ريوك... كبرانة ولج.
ـ مو كوتلج اني كبرت بس انتي تشوفيني صغيرة
ـ هههههههه ولج بس لا تردين تتزوجين
ـ ريممممم اسكتي والله ازعل عليج.. عيب هيج تحجين.
ـ ها ومو عيب من تكعدين تسولفين بالحب..
ـ ريم شبيج هو اني شكوتلج بس شفت نظراتج لخالد وتفكيرج بي كتلج انتي تحبي.
ـ يلا يلا كافي ما كلتي شي امشي خلي اوديج انتي والجهال لبيت أم خالد لأن اريد انظف البيت كله.
ـ لا اني ما اروح اخذي الاطفال بس.
ـ ليش مترحين انتي متردين تلعبين وياهم.
ـ لا اريد ابقى اساعدج..
ـ تقنعيني سالفتج خالية ولج بين يوم وليلة كبرتي..
ـ ريم شبيج... مو ماما كلتلي انتي كبرتي ولازم تعوفين اللعب.
ـ اوف منج ماما إلا تحرميها من اللعب.
يله حبيبتي امشي نودي الأطفال ونرجع.

خالد... الصبح رجعت من بيت علاء لبيتنا ووصيت علاء، يروح للاستيديو بمكاني وكنت ناوي اليوم احجي ويه ريم.

وصلت للبيت ودخلت... تلكتني أمي..
ـ يمه وين جنت صدك هيج تعوفني وتروح وما دكول امي خاف يصير عليها شي.
ـ سلامتج يالغالية بس شوية تعبان
ـ يمه شبيك يبعد امك احجيلي، شنو المضوجك.
ـ ماكو شي يمه لا تهتمين.
رحت لغرفة ايمان...
ـ إيمان كومي ما تشبعين نوم انتي.
ـ أي أي كايمة عبالي ارتاح منك كم يوم رجعت على كلبي.
ـ نجبي وكومي يله.
ـ كمت كمت يله.

خالد.. رحت كعدت بالحديقة واني انتظر ايمان
ندكت الباب رحت فتحت الباب ولاكتني عيونها وتلعثمت ما اعرف شاحجي ما جنت متوقعها تجي..
ـ هلو خالد شلونك
ـ هلا ريم اني الحمدلله انتي شلونج
ـ من الله بخير
ـ تفضلي
ـ لا جبت الجهال ابقيهم يم ايمان اريد انظف البيت وما أكدر اخليهم يمي.
ـ تمام هسة تجي ايمان.
جان كلبي يتسابق قبل عيوني حتى يشبع منها لكن للأسف ما كملت اللحظة وقاطعتني ايمان وهي تسلم عليها..