كوكايين

الحلقة التاسعة و العشرون

🔸️حلقة 29
🔸️ياسين_يحكي:
مديت يدي نغزر لساعة...مش بالعادة توخر في الخدمة للوقت هذا...كبست عالتليفون أكثر...منعرفش فاش قام عليها حتى تسكرو...صوت جواد لي محبش يسكت وترني أكثر...تلفت لأمي نحكي
انا:هاني باش نمشيلها لسوسيتي توا
سلطانة:فااش قام عليك...على ساعتين روطار عملتهم تحب تهد دنيا فوق راسها ؟
أنا:ساعتين لي تحكي عليهم إنتي...محسوبين على ولدها لي خلاتو وحدو
سلطانة:ماهوش وحدو...ولدها وسط عيلتو و بوه موجود زادة
أنا:لي نعرفو الصغير بحاجة أمو توا
سلطانة:ياااسين يزي كهو...خلي الطفلة تخدم على روحها
انا:شنية كان ناقصها باش تخدم ؟
سلطانة:ملا تحبها تمدلك يدها طول عمرها...يزيهاا..مدام إختارت حياتها حد ماهو باش ياقف في وجها...و جواد
في دارهم و بين عيلتو...مفماش علاش تخاف عليه
عديت يدي على وجهي...و خرجت من البيت...منحبش نسمع كلامها أكثر...أصلا منعرفش شنية لي صار معايا يمكن خاطرها أول مرة توخر هكا...إحتمال لي صارت معاها حاجة دخلتني بعضني...و من شيرة هدوء أمي موترني أكثر...منعرفش على روحي كيفاش وصلت اللوطة...أحسن شي نمشيلها و نفهم لي قاعد يصير...مع حلة الباب...جات عيني عليها...طلعت حاجبي مستغرب ملحقتش بشكون لي كان واقف معاها و رجع ركب من تالي...اما لحقت بتبسيمتها ليه...و يدها لي شاورتلو بيها...كبست عالبونية متاعي...من غير ما نعمل خطوة وحدة...اصلا منعرفش شبيني جمدت في بقعتي...نتبع فيها بعينيا...تي حتى محستش بيا...هوكا طلعت لباس عليها و متفرهدة...في الوقت لي قاعد ناكول في روحي عليها...اول ما هزت راسها...وقفت في بلاصتها...جات عيني في عينها...منعرفش قداش بقيت نغزرلها...تعدا برشا وقت على آخر مرة تقابلنا فيها..رغم أنهم أسبوعين او أقل...أما حسيتهم برشا...يمكن خاطرها و لا مرة غابت عليا من قبل...قربت مني شوية...غزرتلي ندرا كيف تحكي
فتون:جيت باش نهز جواد و نمشي
أنا:وين كنت ؟
فتون:شقصدك ؟
أنا:سألتك جاوبني فتوون
فتون:في الخدمة
أنا:لتوا ؟
فتون:ظطريت نوخر
أنا:اكا علاش خليت شكون يوصلك ؟
فتون:و أنت شنية لي مقلقك في الموضوع...ساعة وخرت على ولدي برشا...هاني باش نهزو و نمشي على روحي
أنا:مش قبل ما تجاوبني
فتون:مانيش مجبورة باش نجاوبك باهي
قحرتلي و دخلت...خذيت نفس طويل و خلطت عليها تمشي بالزربة...حتى الدروج طلعت تجري...خلطت عليها بالوقت...حلت الباب و دخلت لبيت امي...دخلت وراها تلفتت عندي بالوقت...تحكي
فتون:وينو جواد ؟
انا:في بيتي
فتون:علاش ؟
أنا:فتوون...جواد ماهوش باش يهرب...و ماكش باش تشوفو قبل ما تجاوبني
هزت راسها غزرتلي ندرا كيف...لونها لي تخطف خلاني نفيق على روحي...أصلا منعرفش كيفاش خرج معايا الكلام هذا...و لا حتى علاش قلتو...فرد وقت أكثر من سؤال قاعد يدور في مخي...لازمها تجاوبني عليهم فقت من سرحتي على صوتها تحكي
فتون:نحب نشوف ولدي توا
قربت مني باش تخرج...وقفت في وجها...قحرتلها نحكي
أنا:فتووون
فتون:شبيك تصيح عليا ؟ أصلا علاش تحب تعرف وين كنت ؟
أنا:نحب نعررف خاطرك أم ولدي...تسمع فياااا
فتون:معندكش حق باش تحاسبني...نعرف لي ولدي باش يكون في أمان هوني
أنا:بربي...أكا علاش سكرت تليفونك...ناسية شكون خليت وراك
فتون:رد بالك تشكك في اهتمامي بصغيري...أصلا أنا الغالطة خاطرني مزلت نحكي معاك لتوا
أنا:و ماكش باش تخرج من هوني...قبل ما تحل فمك
فتون:جواد قاعد يبكي...نسمع فيه راني
أنا:مش من توا...نهار كامل و هو على نفس الحالة
قربت مني باش تخرج...وقفت في وجها مرة أخرى غزرتلي تحكي
فتون:ياسين...أبعد خليني نمشي...نحب نشوف ولدي توا
أنا:وين مشيت ؟
فتون:و كان مخبرتكش...شنية باش تعمل...تحرمني من ولدي ؟
أنا:إنتي أدرى بالأمور
فتون:منستغربش منك...أما كان يمشي في بالك لأنت تنجم تحرمني من ولدي...غالط...مستحيل نخليك تعملها يززي توا و خليني نخرج من هوني...يااخي ماكش تسمع فيه ؟
أنا:الحل في يدك
غزرت للباب...و عاودت غزرتلي...دموعها لي تحصرت وصلتلي خوفها عليه...و خلاتني نحقر روحي...أما معنديش طريقة اخرى...تخليها تحكي كلشي عندها قحرتلي تحكي
فتون:كان فما جلسة تصوير...ظطريت نحضرها...و لي وصلني عرفي...المدير متاعي...ارررتتحت توا ؟
بقيت نغزرلها من غير حتى كلمة...منعرفش شنية حكاية المدير هذا من مرة دخلت فيها...و علاش حتى يوصلها جيت باش نحكي...دزتني بيدها و خرجت...دخلت أمي بالوقت...تحكي
سلطانة:ياااسين...ياااخي هبلت شنوة هذا لي تعمل فيه ؟
خليتها واقفة و خلطت عليها...دخلت وراها لبيتي سكرت الباب...و كبست عالزر...نزلت عليه...هزتو في يدها...و حطاتو في حضنها...تبوس فيه و تحكي
فتون:ششش...هاني معاك يا روحي...ماماتك معاك يا عمري
غمضت عينيا بقوة و عاودت حليتهم...حتى هو سكت في حملتها..عاودت باستو...ضحك بالوقت..عديت يدي على وجهي...نحكي
أنا:شنية كنت تقصد بكلامك متاع قبيل ؟
فتون:معندكش حق تسألني أكثر...تأخرت و نحب نمشي نرتاح
قربت منها شوية...فكيت جواد من يدها...و رجعتو لسريرو...قربت مني تحكي
فتون:شنية تستخايل في روحك تعمل ؟
كبست على يدها و جبدتها عندي...ضربت فيا بالوقت نزلت راسي و قحرتلها نحكي
أنا:فتووون...ياااخي من إمتى تعرفو المدير متاعك باش تركب معاه...و تخليه يوصلك ؟
فتون:و أنت شمدخلك فيااا...نركب معاه و لا لا...ساعة شبيك عليا اليوم
انا:نحب نفهم لي قاعد يصير
فتون:ياااسين يزي كهو...معندكش حق باش تسألني...و لا حتى تتصرف معايا هكا...باهي نعرف روحي تأخرت على جواد...أما قتلك تشديت في الخدمة
انا:تشديت في الخدمة...تخليه هو يوصلك...و تسكر تليفونك زادة ؟
فتون:تليفوني طفى وحدو
أنا:كنت تخلي خبر...لي إنتي باش توخر
فتون:خبرت خالتي سلطانة...و مانيش مجبورة باش نعلمك شنية قاعدة نعمل باهي
أنا:هاك كبرت لالة فتون...ساعة إمتى لحقت تعرف مديرك و تخرج معاه ؟
فتون:و أنت شمدخلك فيا سي ياسين ؟ بصفتك شكون قاعد تصيح عليا توا ؟
كبست على يدها أكثر...و عديت عينيا على وجها نحكي
أنا:متستفزنيش فتووون...اعتبرها آخررر مرة
فتون:و إلا شنية باش تعمل ؟ ياخي أنت من إمتى يهمك أمري...نمشي و نجي مع شكون نحب واضح
أنا:عاجبك عرفك...لقيت راحتك معاك ؟
فتون:سيبني وجعتني
انا:صدقني كان نعرف لي فما بينكم شي...ما تلوم كان روحك
فتون:تعرفشي حاجة...قبل ما داوي المرضى لي عندك داوي روحك...و لآخر مرة نعاودلك...أنت ما عندك حتى دخل في حياتي...و متتصرفش معايا كاني فرد منكم في الأخير...انا طليقتك...و أنت على قريب باش تعرس على هذاكا حياتي الخاصة...ملكي أنا و كهو...و طمن ولدي مانيش باش نفرط فيه لا قبل و لا توا باهي...و رد بالك تخمم في نهار من نهارات تهددني بيه يا ياسين كلشي في كفة و جواد في كفة أخرى...حتى أنت ماكش باش تبعدو عليا
جبدت يدها مني و بعدت عليا...خذيت نفس و عاودت جبدتها عندي...قبل ما توصل لجواد...رعشت صوتها و كلامها...وصلتلي بيهم خوفها...و تفكيرها وين هزها أصلا مستحيل نخمم في اللي قالتو مش حتى نوصل انتي نعملها و نفرقهم على بعضهم...هزت راسها غزرتلي ندرا كيف...مديت يدي لاخرى و كبست على وجها نحكي
أنا:أغزرلي هوني...آخر مرة نسمع الكلام هذا منك يا فتون...مانيش ساقط لهدرجة...باش نخمم ناخو منك جواد...و لا حتى نحرمك منو...حتى حد في دنيا ما ينجم يعمل هذا شي...حتى أنا...مفهوم كلامي ؟
فتون:مش هذا لي عملتو بكري ؟
أنا:منقصدش...نعرف روحي تقلقت...أما ما قصدت حتى حرف من اللي قلتو
مديت يدي من زندها...لخصلات شعرها...بعدتهم بصوابعي...رعشتها بدات تهدا...حتى من أنفاسها نفس الشي...نزلت بعينيا شوية لشفايفها...منعرفش شنية لي جا لمخي وقتها...و لا حتى علاش نخمم فيها بالطريقة هاذي...أصلا أول مرة تصير معايا...رغم السنين لي تعدات الكل...رغم أنها كانت قدامي ديما...أما هاذي أول مرة نحس روحي شاهي قربها...أول مرة رغبتي تخليني نضعف قدامها...مع انو ماهيش اول مرة نمسها فيها و لا نقربلها...صوت جواد...فيقني على وضعي...و خلاني نجبد يدي...قبل ما نتمادى اكثر...جبدت روحها مني...و رجعت هزاتو في يدها تحكي
فتون:هاني يا روحي...متخاافش
هزت راسها...غزرتلي ندرا كيف...و كبست عليه أكثر تحكي
فتون:نحب نمشي من هوني توا
انا:كلامي معاك مزال موفاش...حتى مزال باش نحكيو في الخدمة متاعك مرة أخرى
فتون:والله تأخرت برشا سي ياسين...انا تقبلت في الخدمة...حتى عرفي لي ماهوش عاجبك...عطاني فرصة أخرى بالنسبة للخدمة...خاطرني تقبلت معاهم
أنا:بربي مدام فتون...و شنية الفرصة الجديدة هاذي زادة ؟
فتون:شمدخلك انت...بعد توا مانيش مظطرة نخبر حد باموري الخاصة
هزيت حاجبي مستغرب...تعلمت تجاوب الفرخة...اصلا معادش نعرف روحي نضحك و لا نتكلم...هزتني و حطتني...تحكي
فتون:بعد توا كل حد يتلهى في حياتو الخاصة...و معادش باش نحكو في حتى شي...كان في الامور لي تخص جواد و كهو
أنا:عندك أوامر اخرى ؟
فتون:حلي الباب نحب نمشي من هوني
مدت يدها...هزت الغطا متاع جواد...حطاتو عليه...و قربت من الباب تحكي
فتون:فيسع...نحب نمشي نرتاح...خاطرني نفيق بكري
انا:باهي...هدي روحك
خذيت نفس و قربت منها...مديت يدي كبست عالزر...و نزلت البواني...استغربت كي محبتش تتحل...جربتها اكثر من مرة نفس الشي...قربت مني...تحكي
فتون:شفما ؟
انا:علقت الباب
فتون:شنوة ؟
انا:لي سمعتو
هزت راسها قحرتلي...حتى انا لقيت روحي مش فاهم شي...حتى منعرفش علاش علقت...و شنوة لازمني نعمل في الموقف هذا...خاصة مع حالتها لي داخلة بعضها....ملقيتش حل كان اني نسلم أمري لربي و كهو
خذيت نفس طويل و قربت من الباب مرة اخرى...كتبت الكود مرتين...نفس الشي...حتى من جواد فحم بالبكا مرة أخرى...كبست عليه تسكت فيه و تحكي فرد وقت
فتون:شششش يززي يا عمري
هزيت راسي غزرتلها...تعدي في يدها على راسو...و تبوس فيه فرد وقت...عديت يدي على وجهي...نهرب في الافكار لي هدت عليا...قحرتلي تحكي
فتون:مزال ياخي ؟
انا:حلها إنتي...مدامك مقلقة
قربت مني أكثر...حطت جواد في يدي...كبست عليه بالوقت...قربت من الباب تكتب في الكود...و كبست عالبواني...نفس الشي...هزت راسها قحرتلي...تحكي
فتون:بدلت الكود زادة ؟
عديت عينيا على وجها...منعرفش علاش حسيت أكثر من معنى ورا كلامها...خذيت نفس نحكي
انا:لا...منعرفش شبيه
فتون:معناها باش نبقى هوني
انا:وين المشكلة ؟
فتون:ياسين...ياخي تحكي بجدك أنت ؟ لازمني نمشي لداري توا
انا:شنية تحبني نعمل...لازمك تصبر عالأقل ساعتين تعرف لي الباب تتحل بنفس السيستام من برا...و مدامها علقت...معناها لازمني نطلب الصيانة
فتون:و الخدامين لي هوني ؟
أنا:فتون ياخي توا معادش تعرف سيستام الدار هوني ؟
فتون:مممم نعرف...ساعة كان يوحل حد هوني يموت
أنا:من غير ما تضخم الأمور...هاني باش نطلب أمي تتصرف من برا...و تحل الموضوع
مديت يدي...جبدت تليفوني...نوقز في يدي بالوقت جات عيني على إسمها...اصلا نسيت لأنا باش نقابلها ليلة...قربت مني بالوقت...فكت جواد من يدي...وين فحم أكثر...كبست عليه تحكي
فتون:تصرف...نحب نخرج توا
أنا:برا إرتاح توا...من غير ما تبقى واقفة هكا
قحرتلي و عطاتني بظهرها...قعدت على حرف السرير تسكت فيه...علقت عليها...و قربت منها...نحكي
انا:هدي روحك...أكيد فما حل
فتون:نحب نرضع جواد...و الا ماهوش باش يسكت
مديت يدي...عديتها على شعري من تالي...المشهد متاع شهور لتالي...حسيتو تعدا قدامي... منعرفش علاش حسيت روحي ضيعت برشا تفاصيل...مانيش باش نجم نسترجعهم...خذيت نفس نحكي
انا:خوذ راحتك...هاني باش نطلب أمي و نعمل دوش لين تتحل الأمور
فتون:باهي
خذيت نفس طويل...هزيت دبشي و دخلت لبيت البانو...تكيت عالرخامة بيديا زوز...و هزيت راسي نغزر لروحي...معادش نعرف شنية لي قاعد يصير معايا تفكيري فيها قاعد يقتل فيا بالعرق من اول ليلة خرجت فيها من هوني...معادش نجم نسد الفراغ لي خلاتو داخلي...اصلا ولا مرة توقعت باش يصير معايا هذا الكل...متوقعتش طلاقي منها باش يرجعني لنقطة الصفر...حتى تصرفاتي معادش نجم نضبطهم قدامها منجمتش نتقبل فكرة قربها لراجل آخر...و لا حتى بعدها...باهي هالة وين في الحكاية...شبيني نحس في روحي بعيد عليها...حتى في قربها...معادش نعيش معاها نفس اللي كنت نحسو قبل...حتى خطبتي ما بدلت شي بالنسبة ليا...كان اني عملت الخطوة لي حبيت عليها...و سعيت على خاطرها...اما احساسي ناحية فتون ماشي و يقوا...حتى لقيت روحي نستحضر في كل لحظة عشتها معاها قبل...ماشي في بالي نسيتها و لا ماهيش مهمة بالنسبة ليا...الاسوء لقيت روحي نعرف تفاصيلها الصغيرة لي حضرت عليهم...غمضت عينيا بالقاوي...و عاودت حليتهم...عملت دوش خفيف تفرهدت بيه...بدلت دبشي و خرجت عندها...تبسمت بالوقت و انا نغزرلهم...حطاتو في وسط السرير و تمدت بجنبو...حتى هي غطست في النوم...هزيت تليفوني عطيت خبر لأمي...و ميساج لهالة...باش متستنانيش اكثر من هكا...حطيت المنشفة من يدي...و قربت منهم قعدت على طرف السرير وراها...و غزرت لجواد...مد يديه زوز على طولهم و غاطس في نوم...معناها طول النهار كان بحاجتها باش يرقد بالراحة هاذي...مديت يدي شوية..عديت صوابعي على خدو و تبسمت بالوقت وجودو بجنبي...يخليني نحس بالفرق ديما...مستحيل نخلي شي يفرقني عليه مهما صار...دورت راسي شوية غزرتلها...يدها فوق يدو...و يدها لأخرى تحت راسها مديت يدي...بعدتلها خصلات شعرها لتالي...و سرحت في تفاصيل وجها...تفاصيلها لي نحس روحي اول مرة نسرح فيهم من غير ما نخمم في شي...نزلت بيهم على خدها نحكي
انا:شنية لي قاعد يصير معايا منعرفش...لا نجمت نرتاح في قربك...و لا في بعدك يا فتون...شنية عملت فيا انتي...شبيني منجمتش نبعد عليك ؟
كبست على يدي و جبدتها منها...و مديت الغطا حطيتو عليهم...شيعت راسي لتالي...نطلب في القوة...جواد لي بدا يتحرك باش يبكي...خلاني ننزل عليها بالوقت عديت يدي عليه...و رجعتلو السوسات متاعو...قلبي خض بالقاوي...من ريحتها...و لا نقول ريحة جواد لي حاطة منها...من انفاسها لي ضربت في وجهي...لحظات صغيرة...كانت كافية باش تخليني في دوامة مشاعر جديدة...قدام المرا لي كانت في النهار من نهارات مرتي و على اسمي...المرا لي خسرت ادنى حقوقي معاها وليت نعتبر طلاقي منها خسارة ؟ خسارة مزالت باش تكلفني برشا...جبدت روحي منها بالوقت...و هزيت روحي قمت...هارب من اللي قاعد يصير معايا...ترميت عالفوتاي مروهج...و حطيت راسي بين يديا...حتى لاول مرة نحس في روحي مقيد بالرسمي...باهي لي كنت نعيش فيه قبل شنوة ؟ حتى اول مرة بعد شهور..نحس لي البيت هاذي رجعت فيها الروح كيما قبل...الامان لي حسيتو توا خلاني نغفى من غير ما نحس...فقت على صوت الباب لي تحل...غزرتلهم زوز غاطسين في نوم لتوا...هزيت روحي بالوقت...و قربت منهم...نحكي
أنا:من غير ما تعملو حس
رديتها بيدي...غزرت لأمي...و عاودت غزرتلهم...نحكي
أنا:شنية لي صار ؟
هو:المشكل تحل...جيست السيستام تعطل كهو
انا:باهي عيشك
سلطانة:فتوون وينها ؟
أنا:راقدة أمي
سلطانة:منعرفش شنية لي مخلي كل حد فيكم محتفظ بالكود لروحو...كان يصير شي...كيفاش نجمو نحلو الباب هذا
أنا:ماهو باش يصير حتى شي سلطانة...من غير ما تكبر الحكاية...و بنت أختك لباس عليها...ما عندي ما نعمللها باش تخاف عليها مني
سلطانة:والله اللي يشوفك قبيل...مينجمش يأمنك على شي
جيت باش نحكي...صوت جواد خلاني نرجع لتالي...من غير ما نجاوبها...نزلت عليه...هزيتو بين يديا...قبل ما يفيقها...كبست عليه في يدي...و خرجت من البيت..حط راسو على صدري بالوقت...مروهج بالنوم الفرخ...بستو نحكي
انا:نحكو في الموضوع مبعد امي...برا خليهم يحضرو عشا لفتون...مدامها تاعبة تتعشى هوني
سلطانة:توا وليت تهتم بيها فتون...وين كانو عينيك قبل ؟
انا:اممممي
قحرتلي و عطاتني بظهرها...رجعت للبيت و ترميت عالفوتاي...جبدتو من حضني نحكي
انا:صحة نوم يا روحي
مد يدو يمس في وجهي...تبسمت بالوقت...قربتو ليا نشم في ريحتو...هزيت راسي نغزرلها...تقعدت في بلاصتها مفجوعة...ضيقت عينيا و هزيت روحي وقفت قربت منها نحكي
انا:لباس ماهو ؟
وقفت في جرتي...و فكت جواد من يدي...حضناتو بالقاوي تحكي
فتون:ح..حلمت...حلمة خايبة برشا
كبست عليه أكثر...و غمضت عينيها...قربت منها شوية نحكي
انا:هات عليك توا...و حاول ترتاح
وخرت خطوة لتالي...و هزتلي براسها لا...تنهدت بالقاوي نحكي
انا:فتون...هدي روحك متخافش...أصلا ماهوش باش يسكت بالطريقة هاذي
فتون:نحب نمشي من هوني توا
قربت منها أكثر...فكيت جواد من يدها...حاولت تمنعني كبست على يدها و جبدتها عندي...نزلت على ظهرها نحكي
انا:ششش...هدي روحك...ما صار حتى شي...مجرد كابوس كهو
حسيت بيها بدات تهدا...خوفها و رعشتها وصلوني...فرد وقت لقيت روحي أول مرة نعنقها...أول مرة نتبنى خوفها...و نحس بيها...جبدت روحها شوية لتالي...ترجع في شعرها...و تمسح على وجها...خذيت نفس نحكي
انا:الحلمة تتعلق بجواد ؟
هزتلي براسها ايه...حطيتو في سريرو...و قربت منها شديتها من يدها نحكي
انا:متخاافش...جوااد لباس عليه...مجرد كابوس و كهو باهي
فتون:نحب نمشي من هوني
انا:تأخر الوقت برشا...خليك هوني الليلة
جبدت يدها مني...و وخرت خطوة لتالي...هزت كبوطها تلبس فيه و تحكي
فتون:مش لازم...نحب نمشي و كهو
دخلت امي بالوقت...قربت منا...و غزرتلها...تحكي
سلطانة:هيا عزيزتي...زهور باش تجيب عشاتك...خليك للة هوني...و من غدوة تنجم تمشي تخدم من هوني
فتون:منجمش خالتي...نحب نبدل دبشي و نرتاح
سلطانة:هذا آخر كلام عندي..مدامك تاعبة ما عندك وين تمشي
انا:دبشك مزال هوني
هزت راسها غزرتلي بالوقت...كبست عالبونية متاعي...و انا نتذكر في الفاليز متاعها لي رجعتها قبل ما نخلي زهور تهزها...حتى دبشها رجعتو بيدي لبلاصتو...اصلا لتوا مستغرب الفازة لي عملتها...رغم اني حبيت نخرج كلشي يخصها و نرتاح جملة...معادش فاهم روحي لا في حضورها و لا في غيابها زادة...نزلت عينيها من وجهي...و هزت جواد في يدها تحكي
فتون:باهي خالتي...باش نعدي ليلة في بيت الضيوف مع جواد...هاني باش نبقى في بيت روجين لي تحضر
سلطانة:باهي على راحتك عزيزتي
تلفتت عندي...و هزت راسها غزرتلي ندرا كيف...تحكي
فتون:تصبح على خير...اصلا جواد موعد نومو مينجمش يبقى أكثر من هكا
هزيتلها براسي باهي...من غير حتى كلمة اخرى...بقيت نغزرلها لين خرجت من البيت...و امي في جرتها...كبست عالبونية متاعي اكثر...نهدي في روحي...نعرف و متأكد لي تحب تتهرب من كلشي يربطها بيا...كيما نعرف لي معنديش حق نلومها على حتى شي...مهما كان...كان فكا شكون الغالط...هو انا و كهو...و لي نعرفو منجمش نصلح غلطة بغلطة اخرى...يمكن طلاقي ليها هو اكبر غلطة...غلطة مانيش باش نجم نتراجع عليها...و لا حتى نصلحها...غلطة قاعد نكتشف في العمق متاعها نهار بعد نهار...غلطة قاعد نغرق فيه...و دوامة كبيرة صعيب باش نخرج منها...و ثنية مجهولة تستنى فيا...منعرفش شنية باش نواجه فيها و شنية باش نخسر فيها اكثر من هكا.
#فتون_ياسين💔
#كوكايين🎭
#سمر 💜