كوكايين

الحلقة التاسعة و الثلاثون

🔸️حلقة 39
قربت بخطوات رزينة...كبست عالبواني و حليت الباب هزيت راسي نغزرلو...راقد على كرشو...خذيت نفس و قربت منو...وقفت قدامو بالظبط...و عديت صوابعي على طراف الجرح لي مغطي...غمضت عينيا نمنع في دموعي...نزلت على ركبتي...لين وليت مقابلاتو بالظبط مديت يدي شوية...و عديت صوابعي على خصلات شعرو...و نزلت بيهم لخدو...قداش توحشت اني نلمسو بالطريقة هاذي من غير ما نخاف من اللي جاي...نزلت عليه اكثر...كبست على يدو و بستو من خدو...نحكي
انا:فههد
قربتلو اكثر...و حطيت راسي بجنبو...نغزر لملامح وجهو نتحسس في انفاسو الرزينة...كلشي نحب عليه...إني نرقد في حضنو و كهو...خذيت نفس نمنع في دموعي و نحكي فرد وقت
انا:صدقني منقصدش لي قلتو...انا مستحيل نستخايل حياتي من غيرك..صحيح موجوعة منك عاللخر..صحيح لتوا رافضة فكرة عرسك منها و قربها منك...اما منحبش تمشي و تخليني...و الا باش نضيع في وسطهم اكثر...انا معنديش حد غيرك فهد...انت عيلتي الوحيدة...حتى كان تبعد عليا...يكفيني نعرف أنو عندي شكون نرجعلو في الاخير...اكا علاش منحبكش تخليني جملة
هزيت يدي حطيتها على خدو...و قربتلو اكثر...بستو من شفايفو...نحكي
انا:أنت باش توفي بوعدك مش هكا..ماكش باش تخليني مهما كان السبب...و ماكش باش تحب غيري زادة...أنت باش تبقى متاعي انا و كهو
غمضت عينيا بالوقت...كاني ناخو في قوتي منو...خايفة من اني نخسرو بالحق...كبست على خدو نحكي
انا:ك..كلشي قلتو من قهرتي منك والله...انا تقهرت من فكرة انو باش تكون طفلة أخرى في حياتك من غيري انا...تقهرت خاطر كان عندي أمل باش نعيشو مع بعضنا من غير خوف...باش نعيشو مع صغيرنا...تقهرت خاطر صار عكس هذا الكل...اما ولا مرة تمنيت انك تمشي و تخليني...اكا علاش مكاش باش تعملها...ماكش باش تخليني نواجه الكل وحدي...ماكش باش تحرمني من عيلتي يا فهد
دوب عاودت بستو...و هزيت راسي نغزر لهالة لي دخلت مرة اخرى...تبسمت تحكي
هالة:مفما حتى شي يخوف...متأكدة باش يعدي المرحلة هاذي زادة و باش يكون مليح...من غير ما تعمل في روحك هكا
هزيتلها براسي باهي...مسحت دموعي...و بستو من خدو مرة اخرى...عديت عينيا على وجهو...و جبدت روحي بالسيف...رغم اني نحب نبقى بجنبو لين يحل عينيه و لين يحكي معايا و يجاوبني زادة...اما فرد منحبش ردة فعلو توجعني بعد ما يفيق...خذيت نفس و بعدت عليه...من غير ما نزل عينيا من وجهو...خرجت من البيت بخطوات رزينة كيما دخلتها بالظبط...غزرتلو لآخر مرة من البلار...و عطيتو بظهري نحكي
انا:هالة...كان فما مخرج آخر عاوني...ما نحب نقابل حد
هالة:باهي ايجا معايا...أصلا ياسين بعدهم الكل من هوني
خذيت نفس و خلطت عليها...نمد في الخطوة بالسيف منعرفش كيفاش وصلت لبيرو ياسين...أول ما دخلت قرب مني...شدني من يدي يحكي
ياسين:لباس توا ؟
انا:نحب نمشي لدار توا
ياسين:باهي تو نوصي شكون يوصلك...حاول ارتاح ليلة...و الصباح نجي بحذاك باهي
هزيتلو براسي باهي...معنديش جهد حتى باش نحكي بقيت نطاوع فيه من غير حتى كلمة...حتى منعرفش كيفاش وصلت للكرهبة...عديت الثنية ساكتة...نخمم في الاحداث لي صارت الكل...من اول مرة عرفت بيها بعرسو...لولدي لي قتلتو...و الفرد لي لقيتو في خصرو برشا حاجات مترابطة مع بعضها...حتى كان نخمم اني نحلها منجمش...برشا حاجات متعلقة بيه هو كهو...موت بوه و خدمتو مع خالي هارون...و الخطر لي هو فيه برشا افكار خلاتني نضيع اكثر من قبل...اول ما وصلت هزيت روحي نزلت...طلعت لبيتي...و سكرت الباب من داخل...غطست في وسط فرشي...وين دموعي قوات اكثر...حتى خرجت من عندو فوق طاقتي...و منعرفش شنية باش يصير اكثر من هكا...عديتها ليلة كلبة..لدرجة نحس في قلبي باش يخرج من بقعتو...محسيتش بالنهار كيفاش طلع عليا...هزيت روحي بالسيف...دخلت لبيت البانو...عملت دوش...و بدلت حوايجي كيما جا جبدت الفاليز متاعي...عبيت الدبش لي نستحقو...و لي يكفيني فترة مليحة زادة...لميت شعري و لبست كبوطي حليت صاكي و حطيت صياغتي الكل...و الايكو متاع صغيري...خرجت الفاليز متاعي...و دخلت لبيتو...خذيت نفس طويل...و قربت من الكوافوز...نفركس على مفاتح كرهبتي...حليت كل قجر يعرضني...و قربت من القاردروب حليتها...نغزر لدبشها...سكرتها بالوقت...و وخرت لتالي...ما نحب نفكر في حتى احتمال خاصة توا...قربت من التابل دونوي...حليت القجر..بالعادة يحط مفاتحو هوني...تنهدت براحة كي لقيتهم...هزيتهم في يدي و خرجت..منعرفش كيفاش وصلت اللوطة..حطيت الفاليز في الكرهبة و ركبت..شديت الثنية لأقرب صايغي بعت كلشي شراتو أمي قبل...و مدام بالكارت متاعهم ملقيتش مشكلة...هزيت الفلوس...ملحقتش حتى باش نحسبها...المهم إني ندبر أموري فترة مليحة بعيدة على الكل...خدمت الكرهبة و طرت بيها للكلينيك...منعرفش حتى علاش رجعت مرة اخرى و لا حتى علاش نحب نشوفو و نطمن عليه...نزلت مترددة...ما نحب نقابل حد منهم بعد اللي صار...قربت من الرسيبسيون...سألت عليه الفرملية...و عرفت منها لي وضعو استقر...لي خلاني نرجع من غير ما نشوفو...حتى فتون محبيتش نعطيها خبر..أصلا تليفوني ضيعتو أمس...و معينيش باش ناخو واحد جديد...حتى gps متاع الكرهبة عطلتو نظن الفترة هاذي باش تكون في صالحنا الكل...شديت ثنية المزرعة...خاطرني متأكدة آخر بلاصة باش يجوها وسط الأوضاع هاذي...منعرفش قداش تعدا وقت بالظبط...و لا حتى كيفاش وصلت...ركيت الكرهبة و نزلت...خذيت نفس طويل من ريحة الارض...اصلا هاذي اكثر بلاصة نرتاح فيها...هزيت راسي نغزر لفاتح...يعيط مع الخدامين كي العادة...تبسمت بالوقت..أول ما جات عينو عليا...قربلي بالزربة يحكي
فاتح:روووجين
أنا:أهلا بيك فاتح
فاتح:يااا بنتي وين الغيبة هاذي ؟
انا:هااني جيت توا
فاتح:فههد وينو ؟
أنا:فهد مشغول الفترة هاذي
فاتح:باهي تفضل
انا:شقولك نحكيو مع بعضنا شوية قبل
فاتح:لباس ماهو ؟
انا:لباس...أما نحب خدمة صغيرة منك
فاتح:أكيد روجين
انا:ما نحب حتى يعرف لي انا هوني...لا خالي و لا حتى فهد و ياسين
فاتح:فهد زادة ؟
أنا:خاصة فهد...كان باش تخدمني...وقتها برك نجم نتفضل
فاتح:ياخي هي أول عملة باش نخبيها عليك...هيا إيجا حد ماهو باش يعرف لي إنتي هوني
أنا:عيششك فااتح...وصي شكون يدخل الفاليز متاعي
فاتح:و أنا شنوة نعمل ؟
انا:صحيح شنية أحوال ليزا ؟
فاتح:باش تفرح بيك أكيد
أنا:ملا خليني نتعدالها أول شي...بعدها نخلط عليك
فاتح:رد بالك و إنتي ماشية
أنا:طمن...و حط في بالك لأنا واثقة فيك
فاتح:من غير ما توصي
دوب تبسمتلو...و عطيتو بظهري...منعرفش كيفاش وصلت للإسطبل...هزيت راسي نفركس عليها...تبسمت و قربت منها...عديت يديا زوز..عليها و قربت منها حضنتها نحكي
انا:أهلااا عزيزتي
كبست عليها اكثر...ليا برشا عليها..حتى منذكرش قداش تعدا على آخر مرة جيت لهوني...و بعد اللي تعدا علينا معادش سألت عليها مرة اخرى...صحيح هدية منو...اما كانت صغيرة برشا وقتها...و لتوا نتذكر فرحتي بيها خذيت نفس نحكي
انا:ملقيتش بلاصة أخرى نهرب ليها...متأكدة لي باش نرتاح هوني...صدقني تاعبة برشا...و منعرفش حتى شنية لازمني نعمل
بستها و جبدت روحي منها...وخرت لتالي مروهجة نحس في راسي باش يطرشق...هزيت روحي لدار من غير ما نطول اكثر...حلي الباب يحكي
فاتح:الدار نظيفة كي العادة...و هاني باش نوصي رانيا تحضرلك حاجة تاكلها
انا:من غير ما تعب روحك فاتح ما عيني في شي
فاتح:يززي كهو...ياخي باش نخلوك هكا إحنا
أنا:صراحة أنا باش نقعد فترة مليحة هوني...ميجيش تفد مني مبعد
فاتح:والله جيت في وقتك...مدامك باش تقعد...نحبك تلتهى شوية بأمور المزرعة
أنا:باهي برشا ملا...خاصة ليزا حسيت روحي استفقدتها برشا
فاتح:حتى هي استفقدت مولاتها...برا ارتاح توا لين نرجعلك
أنا:باهي عيشك
اول ما خرج...هزيت الصاك متاع البيسي و ترميت على الفوتاي...حليتو...باش نطمن على آخر الاخبار...الغريبة أنو الصحافة ما هبطت حتى شي...لهدرجة لحق هارون باش يلم الحكاية...حتى قبل ما تخرج...تنهدت بقوة...و عاودت سكرتو...تكيت لتالي نخمم في اللي صار...و لا فيه هو بالظبط...زعمة فاق و لا مزال...زعمة باش يفركس عليا و لا يكتفي بيها هي خاطرو باش يلقاها بجنبو...حطيت يديا زوز على وجهي...فكرة لهو باش ياخو نظرة باهية عليها دخلتني بعضي...مندمتش على قراري...أما حبيت كان بقيت معاه و بجنبو...من غير ما نخمم في حتى شي صار قبل...من غير ما نحاسبو و لا يحاسبني...يمكن حتى أنا بحاجتو هو و كهو...بحاجة إني نحط راسي على صدرو و ما نخمم في حتى شي آخر...و من غير ما نخاف من شي...كيما كنت نعمل من صغرتي...خاطرني نعرف مدامني معاه مدامني تحت يدو...حد ماهو باش يقرب مني و لا يضرني..حتى أمي أما توا...منعرفش شنية لي خسرتو بالظبط..خسرت روحي و لا خسرتو هو...فهد كان عالمي الوحيد...دنيتي لي نفيق و نرقد فيها...زعمة كان سمعتو و حاولت نفهم لي صار...شنوة كان باش يتبدل وقتها...كان خذيت خطوة جريئة و خبرتو بصغيرنا قبل عرسو...كان باش يبطل كلشي و يرجعلنا...و لا كان باش يكمل لي بداه...و يخليها بينا...السؤال هذا بالظبط...باقي يحرق فيا من أول مرة قتلت فيها ولدي...حتى الفترة هاذي...باش تكون كافية ليا...اني نعاود حسابتي من اول و جديد أني نخمم بالقدا...و نجم ناخو قرار ثابت...يخص حياتي و يخص فهد زادة...نحب نعرف شنية باش يصير فينا و في حياتنا اكثر من هكا...اما توا بالظبط...كلشي يهمني انو يكون تعدا مرحلة الخطر...و يكون لباس عليه...باش نجم انا نرتاح من الوجيعة هاذي...عالاقل المرة هاذي كهو