كوكايين

الحلقة الرابعة و الثمانون

🔸️حلقة 84
🔸️روجين_تحكي:
عديت عينيا على روحي مرة أخرى...هاذي أول مرة بعد الحادثة باش نخرج من هوني لحياتي العادية...دورت راسي على صوت الباب...غزرتلها...و عاودت تلفت نغزر لروحي و نحكي فرد وقت
أنا:شتعمل هوني ؟
صوفيا:نلقى عندك شوية وقت
أنا:لااا
صوفيا:نحب نحكي معاك
أنا:مفما حتى شي نحكيو فيه مع بعضنا...تنجم تخليني وحدي توا
صوفيا:متظنش أنو لازمنا نقعدو مع بعضنا ؟
أنا:و لا مرة حسيت لإحنا بحاجة نقعدو مع بعضنا
صوفيا:روجين إسمعني
خذيت نفس طويل و قربت منها...وقفت قدامها بالظبط نحكي
أنا:منحبش نشوفك و منحبش نحكي معاك زادة...خليك بعيدة عليا كيما كنت تعمل ديما
صوفيا:منحبكش تضيع أكثر من هكا
أنا:كنت قدامك ديما...أما خليتني نضيع...و مخممتش لوين باش نوصل بالظبط...و لا شنوة كان باش يصير فيا من غير فهد
صوفيا:ضيعتك خاطرني كنت و مزلت ضايعة لتوا
أنا:خاطر بابا لي طلع ميت تخلى عليك
صوفيا:منحبش نحكي عليه توا
أنا:أنا نحب...نحب نتعرف على بابا...من تصويرة...من كلمة...من حكاية...نحب نعرف شكون بابا
صوفيا:ماكش بحاجة تعرف...من غير ما تكرهو إنتي زادة
أنا:خليني أنا نحكم كان باش نحبو و لا نكرهو
صوفيا:روجين...أنا بالرسمي منحبش نخسرك مرة أخرى
أنا:أمااا خسرتني..خسرتني وقت كنت نحاول نقرب منك و إنتي تصدني...وقت كنت نحاول نوريك أي رسمة و لا لعبة عندي...تقوم من غير حتى ما تغزرلها...وقت لي حرمتني من إني نقلك أمي قدام أصحابك...و برشا حاجات غيرها...منجمش نذكرها...حتى طلبت منك حاجة صغيرة لأول مرة في حياتي...و منجمتش تعملها و هي مزالت معاه لتوا...أكااا علاش نحبك تبعد عليا...و بابا لي تحكي عليه...مهما كان لي عملو...ماهوش وحش كيفك
هزيت صاكي و مفاتحي...و خرجت من البيت...قبل ما نتخنق أكثر...و لا حتى نتذكر لي صار...منعرفش على روحي كيفاش وصلت اللوطة...هزيت راسي نغزرلو واقف يحكي معاها...كبست على يدي و خرجت...خلط عليا بالوقت يحكي
فهد:روجين
أنا:أبعد عليا فهد
كبس على يدي في لحظة...دورني عندو...غزرلي ندرا كيف يحكي
فهد:شنية لي صار ؟
أنا:نحب نبقى وحدي كان معندكش مانع
فهد:صوفيا مرة أخرى ؟
أنا:صوفيا...و أنت...و كل حد يقرب مني قاعد يخنق فيا إرتحت توااا
جبدت يدي منو...و قربت من كرهبتي...شد الباب بيدو قبل ما نحلها...و قربلي أكثر يحكي
فهد:سألتك شنية لي صار...شبي صغرونتي ؟
أنا:نحب نبقى وحدي فهد
فهد:مزلت تاعبة
أنا:لباس عليا...في دار الأزياء نرتاح أكثر
فهد:خليني نوصلك
أنا:أنا باش نكون لباس وحدي
فهد:باهي...كان حسيت روحك تعبت أطلبني...متاقفش برشا...و أشرب دواك في وقتو...خلي تليفونك بجنبك...و رد عليا كي نطلبك
أنا:على أساس باش تخليني نعدي النهار من غير ما نشوفك
فهد:على أساس إنتي تنجم تعدي النهار من غير ما تشوفني
أنا:نجم نمشي توا
فهد:باش تعمل لي قتلك عليه ؟
أنا:باهي...لي تحب عليه باش يصير
ضيقت عينيا و انا نغزر لرجالو مرة أخرى...نفخت بالقاوي...نحكي
أنا:لاااا...فهد أمااان من غير ما تحطهم في جرتي مرة أخرى
فهد:معندكش حل آخر
أنا:باهي...على شرط يبعدو عليا
فهد:تدلل يا روح فهد
قرب مني أكثر...باسني من خدي و جبد روحو شوية يحكي
فهد:رد بالك على روحك
أنا:و أنت خليك بعيد عليها
تبسم و حلي الباب...خذيت نفس و ركبت...غزرتلو و خدمت الكرهبة...أصلا ليا برشا مسقتش...حسيت روحي هديت شوية بعد ما حكيت معاه...منعرفش على روحي كيفاش وصلت...نزلو في جرتي...قحرتلهم و دخلت لقيت مدام حنان تستنى فيا...صبحت عليها و طلعت معاها...الغريبة إني لقيت بيرو صغير خاص بيا...كلشي نحتاجو موجود عليه...غزرتلها نحكي
أنا:شنية اللي قاعد يصير ؟
حنان:نظن السي فهد هو اللي باش يجاوبك على سؤالك كلشي من ترتيبو هو
أنا:مرسي عيشك
جبدت الكرسي و قعدت...تكيت راسي لتالي...نخمم في كلام أمي...منعرفش شنوة تحب مني بعد الفترة هاذي الكل...فقت من سرحتي على صوت الباب...ضيقت عينيا و أنا نغزر لوجهو لي مخبي ورا بوكي الورد...نزلو شوية شوية...ضحكت بالوقت نحكي
أنا:غسااان
هزيت روحي وقفت...و قربت منو...شديت عليه البوكي و صافحتو نحكي
أنا:مفااجأة حلوة والله
غسان:شحالها أميرتنا ؟
أنا:قاعدة نتحسن...متوقعتش لأنت باش تجي لهوني
غسان:مكنتش باش نضيع فرصة إني نشوفك مرة أخرى أحسن شي خبرتني لإنتي باش ترجع
أنا:مكنتش نعرف لي الوضع باش يكون هكا...حبيت البلاصة هاذي...زادة نخمم نكمل آخر فصل في الفاك
غسان:قبل هذا الكل...إنتي شنية تحس في روحك ؟
أنا:لباس...أنت تعرف شنية لي تعدا عليا لتوا...أكا علاش معادش نحب نخمم في اللي صار جملة...تفضل أقعد
غسان:منحبش ناخو من وقتك في أول نهار ليك...أما نحبك توعدني لإنتي باش تخليني نشوفك مرة أخرى
أنا:أكيد غسان...مرسي برشا على كلشي...و عالورد زادة
غسان:نحب نشوفك هكا ديما روجين
أنا:غسان...أنت بالرسمي ماكش متغشش مني ؟
غسان:مممم منعرفش...أما مدامك حبيت تهربني قبل ما تعرف لأنا عريس الغفلة يحقلي نتغشش
أنا:بالله...ستخايل عريس الغفلة هذا...طلع حد آخر غير الدكتور غسان..و كبش باش يعرس بيا...شنية كنت باش نعمل...الاحتياط واجب
غسان:و رغم هكا...حتى حد ما ينجم يرفضك
أنا:بالله ؟
غسان:أنا معجب بيك روجين الناصري...حتى نتمنى إني نقابلك في ظروف أحسن من هاذي
بقيت نغزرلو من غير حتى كلمة...تبسم و وخر خطوة لتالي يحكي
غسان:رد بالك على روحك
أنا:عيشك
أول ما خرج...حطيت البوكي من يدي...و مديت يدي لتليفوني...هزيت عليه نحكي
أنا:تفضل سي فهد
فهد:نجم نتوقع فاش تعمل توا ؟
أنا:مممم فما هدية جاتني توا...تشكيلة ورد
فهد:هاك إعترفت
أنا:خاطرني نعرف أنك ما تفوت حتى خبر
فهد:إن شاء الله ميطلعش لي في بالي صحيح...خاطرك تعرف العواقب متاعو
أنا:متهددنيش...أكيد متحبنيش نتعب مرة أخرى
فهد:باهي يا فرخة...ساعتين أخرى و نكون عندك
أنا:مكنتش نتوقع العكس
فهد:رد بالك على روحك
أنا:فهد
فهد:روحو
أنا:حبيت هديتك اكثر شي...مرسي برشااا
فهد:نحبك تكون مرتاحة
أنا:حبني أنا
فهد:عندك شك ؟
أنا:جوابي كان عندك ديما...نشوفك مبعد
فهد:نحبك
تبسمت و علقت عليه...خذيت نفس طويل و خرجت نغزر لراجل كبير شوية...واقف مع مدام حنان...شاورتلي بيدها...قربت منهم...و هزيت راسي نغزرلو..ضيقت عينيا مستغربة نحكي
أنا:أنت ؟
حنان:تعرفو بعضكم ؟
أنا:اه...منقصدش...أنا جيست
يوسف:شحالك توا ؟
أنا:لباس عيشك
حنان:سي يوسف...نعرف روجين الناصري
غزرلي ندرا كيف...تبسملي و مدلي يدو...هزيت يدي مترددة...حطيتها في يدو...قلبي خض بالقاوي...لدرجة منعرفش شنية لي صار معايا بالظبط...جبدت يدي بالوقت...غزرلي يحكي
يوسف:لباس ماهو ؟
هزيتلو براسي باهي...و خذيت نفس طويل...نحكي
أنا:كيفها بنتك توا ؟
يوسف:إرتاحت
أنا:الحمد الله
يوسف:أنا جيت سيبسيال على خاطرها...نظن لإنتي تنجم تعاوني...بعد إذنك مدام
حنان:أكيد...أنا باش نخليكم توا
أول ما خرجت...حطيت يدي فوق الجرح بالظبط...و تبسمت نحكي
أنا:كيفاش نجم نعاونك ؟
يوسف:إنتي لباس ؟
أنا:لباس...جيست الجرح لتوا يقلق شوية
يوسف:من غير ما نتعبك معايا...نرجع مرة أخرى
أنا:بالعكس...أنا نجم نعاونك
يوسف:عيد ميلاد بنتي قريب برشا..نحب حاجة تناسبها
أنا:اكيد...شنية تحب بالظبط ؟
يوسف:اختارلها كأنك تختار لروحك
هزيتلو براسي باهي...و شاورتلو بيدي باش يلحقني عديت أكثر من ساعتين نتشاور معاه في موديلات الموجودة...حتى فما لي جربتهم...باش ينجم يشوفهم منعرفش علاش حسيت روحي مرتاحة معاه لهدرجة سكرت آخر وحدة و خرجت نحكي
أنا:هاذي أحلى وحدة بيناتهم...متأكدة باش تعجبها 
يوسف:ملا باش ناخوها هي
هزيتلو براسي باهي...و رجعت بدلت دبشي...شاورت لطفلة و حطيتها في يدها نحكي
أنا:تنجم تحضرها لسي يوسف
هي:أكيد
أنا:نجم نعاونك بحاجة أخرى ؟
يوسف:حبيت التصاميم هذوما
شديت عليه الاوراق لي حطيتها في يدو...من غير ما نشلق بروحي و تبسمت نحكي
أنا:تصاميمي
يوسف:نظن لي هي باش تناسب بنتي برشا
أنا:لتوا ما حضر حتى واحد منها
يوسف:نجم نكون أول زبون عندك
أنا:أكيد...ليا الشرف سي يوسف
يوسف:فرحت خاطرني ريتك مرة أخرى
أنا:و أنا زادة
يوسف:مرسي برشا على مساعدتك
أنا:بنتك محظوظة برشا...خاطر عندها أب كيفك
يوسف:نتمنى هذا يكون رايها فيا...رد بالك على روحك
أنا:عيشك
تبسمت بالوقت...و وخرت لتالي...بقيت نغزرلو من بعيد و هو يحكي مع مدام حنان...للحظة وحدة تمنيت يكون عندي أب كيفو...محسيتش بيه كيفاش خرج...فقت من سرحتي...على دخلة فهد...أول ما قرب مني...ترميت في حضنو...من غير حتى كلمة...أصلا هو الوحيد لي ينجم يعوضني عاللي نحس فيه...كبس عليا و باسني من راسي...أحسن شي أنو جا في الوقت المناسب...و إلا مكنتش نعرف شنية كان باش يصير فيا...عدا يدو على شعري يحكي
فهد:شبي صغرونتي ؟
أنا:شي...تعبت شوية و كهو...أحسن شي أنك موجود توا
فهد:متأكدة ؟
هزيتلو براسي إيه...و كبست عليه أكثر...رغم حسيتو إستغرب من حالتي...أما بقى ساكت...هو الوحيد لي ينجم يعوضني على الإحساس هذا...هو لي كان بابا و أمي...في الوقت لي هوما زوز تخلاو عليا...أكا علاش انا بحاجتو هو و كهو.