كوكايين

الحلقة السابعة و الثلاثون

🔸️حلقة 37
🔸️ياسين_يحكي:
عديت يدي على وجهي...نحس في راسي باش يطرشق شي من الخدمة...و شي من نزلة البرد لي شدتني...فرد وقت نحس في روحي تاعب من اللي قاعد يصير معايا من ظغط الخدمة و الافكار لي لقيت روحي غاطس فيها...و لا مرة توقعت اني نلقى روحي معلق بيها لهدرجة...متوقعتش باش تخلف الفراغ هذا الكل وراها اللي ألفتو و حليت عينيا عليه...انو طول السنين لي تعدات...حد ما كان في قلبي غيرها...يمكن الواقع فرض عليا العكس...قناعتي بانو قرارات امي غالطة...فرضت عليا هذا زادة...اما كلشي كان يمشي بالعكس...بعدها عليا خلاني نفهم برشا حاجات كنت غافل عليها قبل...و اولها اني نفهم روحي...حتى متوقعتش اني نلقى روحي متذكر تفاصيلها الصغيرة...و التفاصيل لي عشتهم معاها الكل...فتون كانت كيف النسمة الدافية في حياتي...و لي خلفت برودة قوية ببعدها عليا...مش انا لي اخترت ؟ و لازمني نتحمل ؟ حتى هذا عجزت عليه زادة...كلشي نحب عليه توا...اني نحس بيها معايا مرة اخرى...نحب نحس بقربها...نحبها تحط راسها بجنبي...من غير حتى كلمة...خاطر حتى اللوم متاعها دوزة قوية...هزيت راسي شوية...نغزر لهالة لي دخلت في لحظة...عديت عينيا على وجها من غير حتى كلمة...حتى هي نحسها تظلمت جرايري...و جراير القرارات متاعي لي محسبتهاش...قربت مني...وقفت ورايا بالظبط...دورت يديها زوز على رقبتي...و حطت راسها على كتفي تحكي
هالة:شبي حبي ؟ صارت حاجة ياخي ؟
مديت يدي حطيتها على يدها...و تنهدت بالقاوي نحكي
انا:نحب نقعد وحدي شوية
هالة:لهدرجة مقلقك وجودي ؟
انا:هالة أماانك...من غير شي نحس في روحي تاعب
جبدت روحها مني...و وقفت مقابلتني...غزرتلي ندرا كيف تحكي
هالة:ندمت على قرارك ياسين ؟
خذيت نفس طويل و هزيت روحي وقفت...مديت يدي كبست عالفاست متاعي...و غزرتلها نحكي
انا:مش وقت الحديث هذا...حتى إنتي تعبت و لازمك تمشي ترتاح...برا حضر روحك...خليني نوصلك في ثنيتي
هالة:باهي كيما تحب
انا:نستنى فيك...في الكرهبة
هزتلي براسها باهي و خرجت...خلطت عليها نمد في الخطوة بالسيف...نحس في بدني مدقدق...حليت الباب و ركبت...تكيت راسي لتالي...نتذكر في كلامنا آخر مرة...مريتهاش من وقتها الفرخة...كانها تتعمد باش تبعد عليا...ساعة الفكرة هاذي بالظبط...كابسة على أنفاسي حتى جواد من يومين مريتوش...حتى وقت نكمل الخدمة...منلحقش بيه...فقت من سرحتي على صوت الباب لي تحل...ركبت و دورت راسها للبلار...خدمت الكرهبة من غير حتى كمة...من اصلو نحس في روحي تاعب...منجمش حتى نتناقش معاها...و لا نحكي في الموضوع...محسيتش بالثنية كيفاه وصلت...ركيت على جنب نحكي
انا:برا ارتاح توا...مبعد نكلمك
قربت مني شوية...حطت يدها على خدي...و تبسمت تحكي
هالة:باهي يا روحي...منحبكش تعب روحك اكثر من هكا...و كان فما مشكلة...تأكد باش تلقاني معاك ديما
انا:نعرف عزيزتي
قربتلي أكثر...باستني من خدي...و جبدت روحها...تحكي
هالة:نحكيو مبعد
هزيتلها براسي باهي...تبسمتلي و نزلت من الكرهبة بقيت نتبع فيها بعينيا لين دخلت لدار...رجعت لتالي و شديت الثنية...منعرفش على روحي كيفاش وصلت لدارها و لا حاى علاش جيت...يمكن خاطرني منجمتش نصبر عليه اكثر من هكا...شديت الفران  نزلت من الكرهبة...نمد في الخطوة بالسيف...من غير شي تأخر الوقت برشا...مديت يدي...دقيت الباب ورا بعضو...شوية و حلت...هزيت راسي نغزرلها...كابسة عالمغرفة في يدها...عديت عينيا على شعرها لي ملموم كعكة...و نزلت بيهم لروبة الروز...آخر شي توقعتو منظرها هذا...و لا مرة ريتها هكا قبل...حتى للحظة ستخايلتها طفلة صغيرة...فقت من سرحتي على صوتها تحكي
فتون:يااسين
خذيت نفس...نراجع في روحي...قبل ما نضيع فيها اكثر...و غزرتلها نحكي
انا:نحب نشوف جواد...كان مفماش مانع
فتون:تفضل
عديت يدي على وجهي و دخلت...سكرت الباب و هزيت راسي نحكي
انا:وينو ؟
فتون:في بيتو
انا:و إنتي فاش تعمل ؟
فتون:نحضر في العشا
هزيتلها براسي باهي...من غير ما نزيد معاها حرف واحد...نعرف لي كان عندي اكثر من فرصة اني نعيش اللحظة هاذي احسن من هكا ببرشا...اما لا الوقت و لا الندم باش يعوضني عاللي صار...خذيت نفس و دخلت لبيتو...قربت من سريرو...طليت عليه...يلعب بيديه و ساقيه...عامل جو مع روحو....تبسمت و نزلت عليه هزيتو في حملتي نحكي
انا:ايجا يا روح البابا
كبست عليه و هزيتو في حضني...خذيت نفس من ريحتو...و بستو من خدو نحكي
انا:محلاااك و محلااا ريحتك...ياخي فاش تعمل وحدك هوني ؟
مد يدو بالوقت...حطها على لحيتي...يمس فيها مستغرب...تبسمت بالوقت...و خرجتو معايا لصالة ترميت عالفوتاي...و وقفتو في حجري...باقي يفركح بساقيه...هزيت راسي على صوتها تحكي
فتون:تفضل
غزرت لكاسة القهوة لي حطتها بجنبي...دوب تبسمتلها و رجعت بتركيزي لجواد...منحبش نضيع معاها اكثر...من غير شي معادش نعرف شنية نحب منها بالظبط..رجعت للكوجينة من غير حتى كلمة أخرى...نزلت راسي نغزر للصور لي عالطاولة...هزيتهم في يدي...نتفحص فيهم عالأقل طلع سي نبيل متاعها يعرف يختار العارضات متاعو...مد يدو يمس في تصاور...تبسمت نحكي
انا:شقولك فيها ؟
هز راسو غزرلي و ضحك...هزيت راسي على صوت خطواتها...وقفت مقابلتني تحكي
فتون:يظهرلي حتى أنت عجباتك ؟
انا:سافا تعدي روحها...طلع عرفك يعرف يختار
فتون:بالطبيعة
انا:باهي برشا
حطيتهم من يدي...و دورتو عندي...جيت باش نحكي رد عليا بالوقت...بعدتو لتالي مروهج نحكي
انا:جواااد شنية هذااا ياخي ؟
قلب شفايفو...و طرشق بالبكا...قربت مني بالوقت..فكاتو من يدي...و هزت بابيي تمسحلو في فمو و تحكي
فتون:شبيك تصيح عليه...مش بلعاني عملها...بااز أنت كبست على كرشو...و معندوش برشا من اللي رضع
هزيت راسي قحرتلها...كبست عليه أكثر...تسكت فيه ساعات نستغرب خوفها الزايد عليه...قربت مني تحكي
فتون:تنجم تغسل...و كان تحب تو نغسلك سوريتك
انا:ميسالش
نحيت الفاست حطيتها على جنب...و هزيت روحي لبيت البانو...حليت الما نغسل في سوريتي كيما جا عملها فيا الفرخ في آخر لحظة...غسلت وجهي مرتين ورا بعضو...نحس في راسي باش يرطشق...خذيت نفس و رجعتلهم...باقي تسكت فيه...مكنتش نعرف باش يتفجع هكا...قربت منها نحكي
أنا:هات عليك
فتون:ميسالش تو نسكتو أنا
انا:فتوون...يززي كهو...تو نسكتو أنا
فتون:معادش تصيح أكاكا...خاطرو مش مستانس
أنا:باهي تدلل إنتي و ولدك...هات عليك و برا كمل اللي تعمل فيه
باستو من خدو...و حطاتو في يدي...وخرت خطوة لتالي...تحكي
فتون:تعشيت ؟
انا:معينيش...برا كمل لي في يدك...لين نرقدو و نمشي
فتون:باهي كيما تحب
خذيت نفس و رجعت ترميت عالفوتاي...نسكت فيه حط راسو على صدري...بعد طرح بكا...خرجلي فيه الجديد و القديم مع بعضو...مسحت على ظهرو نحكي
انا:حقك عليا يا روحي
مد يدو حطها على لحيتي يعدي فيها...لين هزو نوم فرد وقت غلبت باش نهز روحي...منعرفش شنية لي صار معايا...نحس في بدني مدقدق مش نورمال..لدرجة غفيت معاه من غير ما نحس...نسمع في صوتها بعيد برشا...حتى منجمتش نحل عينيا و نجاوبها عليه...يدها لي تحطت على جبيني خلاتني دوب نغزرلها... كبست على جبيني تحكي
فتون:يااسين شبي سخانتك طالعة هكا ؟ تسمع فيا ياخي ؟
هزيت روحي شوية تقعدت...منعرفش علاش حالتي زادت هكا...هزت جواد من حملتي تحكي
فتون:خليك...مستحيل تنجم تمشي و انت في الحالة هاذي...نحط جواد في سريرو و نرجعلك
تكيت راسي لتالي...معنديش جهد حتى باش نرد عليها الغفوة لي خذيتها خلات حالتي تزيد اكثر...و يدها لي سحبتها في لحظة...بردتني أكثر..منعرفش حتى كيفاش غفيت مرة أخرى...و لا حتى علاش منجمتش نقاوم روحي و نقوم...شبيني مرتاح هوني أكثر من أي بلاصة اخرى...يمكن قربها الشي الوحيد لي يخليني نرتاح...من كل شي قاعد يصير معايا...فرد وقت لقيت روحي غاطس في الماضي...حتى منعرفش كيفاش هدت عليا الذكريات هذوما الكل...يدها لي تحطت على جبيني مرة اخرى...رجعتني للواقع...غطاتني تحكي
فتون:ياسين...كان تسمع فيا جاوبني...أنت لباس مش هكا ؟
حليت عينيا شوية...نغزر لعينيها لي ضايعين في وجهي خذيت نفس طويل نحكي
أنا:ل..لباس...شوية برد كهو...لازمني نمشي توا
كبست على يدي بالوقت...و غزرتلي ندرا كيف...تحكي
فتون:ماكش باش تنجم تسوق و أنت في الحالة هاذي إرتاح شوية...بعد تنجم تمشي...هاني باش نحضرلك حاجة تاكلها باهي
هزيتلها براسي باهي...من غير حتى كلمة أخرى...كل مرة نتصدم فيها أكثر...كأني مكنتش نعرفها من قبل رغم كلشي تعدا علينا...أما قعد فيها شي مستحيل يتبدل...طيبتها...و غزرة عينيها زادة...من الحاجات لي تخليني نعرف قداش ضيعت قبل...و قداش مزالني باش نضيع من بعدها...نعرف روحي غلطت...كيما نعرف اني فقدت الحق في اني نصلح اللي عفست عليه...حتى وليت نطلب في القدرة باش نتغلب عالافكار لي قاعدة دور في مخي...خاصة الحكاية لي تتعلق بعرفها...و في احتمال انها تتطور اكثر...قاعدة تخنق فيا في كل لحظة رغم انو انا لي اخترت الثنية هاذي...اما معادش نحب نكمل فيها و معادش نجم نتراجع منها..حتى كلشي قعد مرهون بالوقت...و منعرفش شنية مزال مخبي اكثر من هكا.
🔸️فتون_تحكي:
نزلت قطعات القلاص حطيتهم على جنب...و بليت الضمادات لي في يدي..منعرفش علاش حسيت أعصابي تلفت و انا نغزر لحالتو...يمكن خاطرها أول مرة نشوفو ضعيف لهدرجة...فرد وقت خوف غريب تملكني خايفة انو حالتو تتعب اكثر من هكا...خذيت نفس و رجعتلو غطس في النوم اكثر...مديت يدي شوية نتحسس في سخانتو لي ماشية و تقوا...وين حسيت بدقات قلبي قوات أكثر...قربت من شوية..عدلت المخدة تحت راسو و قعدت عالطاولة...نغزرلو...نبدل في الكمادات ورا بعضو...منعرفش شبيني خفت عليه لهدرجة و منعرفش اصلا شنية لي صار معاه...باش وصل للحالة هاذي...حل عينيه شوية و عاود سكرهم يحكي
ياسين:ف..فتون
أنا:هدي روحك...و حاول ترتاح...هاني باش نحضرلك حاجة تاكلها و نرجع
بدلت الكمادة و هزيت روحي وقفت...رجعت للكوجينة نحضر في شربة دافية...فرد وقت تفكير ضايع معاه نحس في روحي مش قد بعضي...يمكن خاطرها اول مرة نشوفو في الحالة هاذي...مش مستانس يمرض قبل...و حتى كي يمرض...ميتهدش بالطريقة هاذي خذيت نفس طويل...نهدي في روحي و نكمل في العشا حضرت الصينية...و هزيتها بين يديا حطيتها عالطاولة و قعدت بجنبها...فكيت الكمادة من جبينو و مديت يدي حطيتها على كتفو نحكي
انا:يااسيين...ياسين هيا فيق
حل عينيه مروهج...دوب غزرلي و عاود سكرهم..كبست على كتفو نحكي
انا:قوم ياسين...لازمك تاكل حاجة باش ترتاح
هز روحو شوية شوية...و تكا لتالي...هزيت الصينية حطيتها في حجري...و خذيت نفس نحكي
انا:شربة هاذي باش تفيدك برشا...نعرف لأنت تحبها...أما كان فما شي آخر نجم نعملو...خبرني أنت
عدا عينيه على وجهي...وين دخلني بعضي اكثر...تبسم يحكي
ياسين:ل..لا...يكفي هكا
انا:باهي تفضل ملا
هز راسو شوية غزرلي ندرا كيف...كبست عالمغرفة في يدي مترددة...نحكي
انا:ح..حرارتك مرتفعة...أكا علاش لازمك تاكول شوية باش ترتاح
ياسين:باهي
خذيت نفس و قربت المغرفة من فمو...نحس في يدي ترعش بصفة غريبة...حتى منجمتش نركز في عينيه لي محبش ينزلهم من وجهي...كبس على يدي في لحظة هزيت عينيا مروهجة...و قرب مني شوية حطها في فمو...و جبد روحو لتالي...تبسم يحكي
ياسين:عيشك
هزيتلو براسي باهي...كملتلو الصحن من غير حتى كلمة صوت جواد لي بدا يبكي وترني أكثر...حطيت بابيي في يدو...نحكي
انا:هاني باش نجيبو و نجي
ياسين:فتوون
انا:تستحق حاجة ؟
ياسين:يعطيك صحة
انا:من غير مزية
خذيت نفس و عطيتو بظهري...منعرفش كيفاش وصلت لبيتو...نزلت عليه بالوقت...هزيتو في حملتي...و قربتو لحضني...نهدي في روحي بوجودو...كبست عليه و خرجتو معايا لصالة...دوب غزر لبوه سكت...تبسمت نحكي
أنا:يظهرلي يحب عليك...أما من غير ما تعب روحك جرايرو...حاول ترتاح لين نرضعو و نرجعو لسريرو
ياسين:هات عليك شوية
أنا:ماهوش باش يقلقك ؟
هزلي براسو لا...قربت منو شوية و حطيتو في حملتو دوب كبس عليه و باسو يحكي
ياسين:شبي صغروني ؟
أنا:تلقاه جاع أكا علاش
ياسين:قداش ساعة توا ؟
انا:تقريب نص الليل
ياسين:محسيتش بالوقت...تأخرت برشا و عطلتك معايا
مد يدو كبس على راسو...متأكدة لي مزال تاعب...قربت منو شوية...نحكي
انا:خليك الليلة هوني...من غير ما تسوق و أنت في الحالة هاذي
هز راسو غزرلي ندرا كيف...حتى أنا منعرفش كيفاش خرج معايا الكلام...هزيت جواد من حملتو نحكي
انا:عندي حرابش يمكن ينفعوك...حتى تنجم تقراهم و تتأكد منهم
ياسين:ل..لباس عليا فتون...متخليهش يبكي أكثر
عديت يدي على ظهرو...و مشيت لبيتي...أول ما عطيتو يرضع سكت...نزلت راسي نغزرلو...مش مستوعبة لي قاعد يصير معايا...حتى لتوا نحس في بدني يرعش من كبسة يدو و غزرتو...حتى جواد عامل فيا بلعاني...ليلة بالظبط يحب على بوه و مرتاح عندو...تنهدت القاوي نحكي
أنا:نعرف لهو باش يتحسن...و أنت ارقد شوية توا لين نرجعلك
سيب صدري و ضحكلي...على أساس يفهم فيا...و في اللي نقول فيه...قربتو ليا أكثر...بستو...أصلا هو لي مصبرني على كلشي قاعد يصير معايا...و على الوحدة متاعي لي لقيت روحي فيها بعد موت أمي و بعد ما عشت معاهم في الفيلا...أول ما رقد...حطيتو في وسط سريري...و هزيت روحي خرجت...لقيتو غفى مرة أخرى قربت منو غطيتو...و حطيت كمادة اخرى على جبينو حتى الماكلة...من غير لي عطيتهالو بيدي...ما كلا شي منها..هزيت الصينية للكوجينة و خذيت رشفة ما..عديت يديا زوز على وجهي...ورجعت عندو...قعدت على طرف الطاولة مرة اخرى...نغزر لتفاصيل وجهو رغم إني حافظة كل تفصيلة منهم...حتى لتوا مزلت مستغربة من تأثيرو عليا...مديت يدي مترددة حطيتها على خدو نزلت بصوابعي لحيتو...و سرحت بيهم لشفايفو...للحظة حسيت روحي ضعت فيه من غير ما نحس...و من غير ما نخمم أنو هو طليقي توا...و معاد يجمعني بيه حتى حق...حتى نعرف لي أنا نكذب على روحي...نعرف انو رغم اللي تعدا علينا الكل...انا عفست على روحي...أما مش على بلاصتو داخل قلبي...طول السنين لي تعدات كنت نطمع في كل نهار يطلع عليا...حتى جواد حسيتو باش يقوي علاقتي بيه...أما غفلت أنو قرارات ياسين مفيهاش رجوع...مدامو إختار...شي ماهو باش يوقفو فقت من سرحتي على صوت تليفونو...جبدت الفاست متاعو...قبل ما يفيق...خرجتو منها...جات عيني على إسمها...وين دقات قلبي قوات أكثر...مكالمة كانت كافية باش ترجعني للواقع...واقع أنو هو معادش متاعي و مكانش متاعي من الأول...حطيتو عالصامت و بقيت نغزرلو...منعرفش قداش من مرة طلباتو بالظبط يمكن خاطرو مستانس يحكي معاها في الوقت هذا أصلا هاذي عادتو ديما...حتى وقت كنت معاه...كنت نعرف لهو يحكي معاها ديما و في أي وقت...خلي بعد ما ولات خطيبتو و على قريب باش يعرس بيها...نزلت بعينيا شوية...نغزر للخاتم لي في يدو...غمضت عينيا بالوقت و عاودت حليتهم...نرد في نفس ورا بعضو...نلم في أفكاري...و في روحي لي حسيتها باش تضيع فيه مرة أخرى...خذيت نفس طويل و حطيت يدي على جبينو...نتفقد في سخانتو لي زادت أكثر...كبست على خدو نحكي
انا:ياسين...فيق أمانك...حل عينيك
دخلت بعضي أكثر...نسيت كلشي صار معايا دقايق لتالي...خوفي عليه غلب تفكيري...حل عينيه مروهج دوب غزرلي و عاود سكرهم...كبست على خدو نحكي
انا:يااسيين أماانك...كان تسمع فيا جاوبني
مد يدو شوية...كبس على يدي لي فوق خدو...و حل عينيه شوية يحكي
ياسين:ل..لباس...هدي روحك
أنا:س..سخانتك طالعة برشا...و منعرفش شنية نعمل حتى خطيبتك تطلب فيك...يمكن هي تنجم تعاونك نجم نحكي معاها ؟ عالأقل تعطيني طريقة تنزل سخانتك
كبس على يدي أكثر...و جبدني عندو في لحظة...لدرجة منعرفش كيفاش لقيت وجهي في وجهو...أنفاسو السخونة حرقتني...حليت عينيا نغزرلو مروهجة متوقعتش الفازة منو...و متوقعتش نقربلو لهدرجة زادة بدني رعش بصفة غريبة و الكلام وحل في حلقي حتى غزرة عينيه دخلتني بعضي...نزلت عينيا منهم نحكي
انا:ي..ياسين
ياسين:شششش...يزي كهو...مدامك معايا...باش نكون مليح...من غير ما تكلم حد
انا:سخاانتك طالعة برشا...و هاك بالسيف باش فقت
ياسين:فتوون قتلك يزي
هزيتلو براسي باهي...و كبست بيدي لأخرى على طرف الفوتاي نوازن في روحي...و نحكي فرد وقت
أنا:ا..أنت قولي شنية نعمل ؟
ياسين:شي...خليك بجنبي و كهو
أنا:هاني معاك
جبدت روحي منو شوية...رخف يدو على يدي بالوقت يحكي
ياسين:جواد رقد ؟
أنا:إي
ياسين:و إنتي زادة برا إرتاح شوية...من غير ما تعب روحك أكثر
انا:منجمش نخليك وحدك...مش مستانس تمرض هكا
ياسين:و أنا مكنتش نعرف لإنتي باش تخاف عليا بالطريقة هاذي
نزلت عينيا من وجهو...منعرفش علاش منجمتش نغزرلو بعد اللي قالو...كبست على يديا زوز...نحكي
انا:ل..لازمني نجيب قلاص و نرجعلك
هزيت روحي بالزربة....مشيت للكوجينة...هاربة منو و من اللي حسيتو من طريقة كلامو...حضرت كعبات القلاص و رجعتلو مرة اخرى...قعدت بجنبو...نبدل فيهم من غير حتى كلمة...غريبة سخانتو قداش طالعة...حتى يرقد و يفيق بين ساعة و ساعة...دوب نزلت شوية طمنت على جواد...عاودت رضعتو...و رجعتلو...قعدت عالفوتاي بجنبو...نتفحص في ملامحو...لين هزني نوم منعرفش على روحي كيفاش غفيت...حليت عينيا على صوت تليفوني...ضيقت عينيا كي ملقيتوش في بلاصتو نزلت الغطا بيديا زوز...لي نتذكرو اني غفيت من غير ما نتغطى...الفاست متاعو و تليفونو...مزالو هوني زادة هزيت روحي بالزربة دخلت لبيتي ملقيتش جواد زادة مشيت لبيت جواد...لقيتو كابس عليه في حملتو و يحكي معاه...تنهدت براحة...نحكي
انا:صباح الخير
ياسين:صباح النور
أنا:شبيك قمت ؟
ياسين:لباس عليا
انا:بالرسمي
قرب مني شوية...وقف قدامي بالظبط...و مد يدو حطها على خدي يحكي
ياسين:بالرسمي...و نحبك تسامحني خاطرني تعبتك معايا
وخرت خطوة لتالي...دوب تبسمتلو...و خذيت نفس نحكي
انا:من غير مزية
ياسين:تخدم اليوم ؟
أنا:إي
ياسين:باهي برا حضر روحك ملا...نوصلك و نهز جواد للفيلا
انا:ل..لازمني نرضعو
قرب مني شوية حطو في حملتي...وين حط راسو على صدري بالوقت...تبسمت و كبست على ظهرو نحكي
أنا:شبي روحي ؟
ياسين:توحش أمو...هيا من غير ما تبطى عليه أكثر
انا:باهي
خذيت نفس و خرجت من عندو...منعرفش كيفاش وصلت لبيتي...عديت يدي على خدي مروهجة من الفازة لي صارت...قعدت على طرف السرير و قربتو ليا...ريحتو لي تخلطت بريحة بوه...كملت على اللي نحس فيه...حتى لأول مرة بعد الشهور هذوما...نحس لي فما شي مزال قائم لتوا...شي رغم أنو تكسر...اما قاعد يجرح فيا...لا نجم نخرجو مني...و لا نجم نصلحو حتى منعرفش شنية لي مزال مخبيتلي الدنيا اكثر من هكا
#كوكايين 🎭
#سمر_القايد 💙