كوكايين

الحلقة الخامسة و العشرون

🔸️حلقة 25
🔸️ياسين_يحكي:
نزلت عليه شوية...هزيتو بين يديا...و قربتو لحضنو..من اول ما وصل...و هو فاحم بالبكا...كبست عليه نسكت فيه...من غير شي معادش عندي وقت عالخدمة...و حتى نحب نخلط عليها قبل ما تمشي...دخلت أمي بالبيبرون في يدها...قربت منها شوية...نحكي
أنا:وينها فتون ؟
سلطانة:خرجت توا
انا:باهي شد عليا...معادش عندي وقت للخدمة
سلطانة:ربي معاك
أنا:عيشك سلطانة
هزيت مفاتحي...و خرجت...منعرفش كيفاش وصلت اللوطة...اول ما حليت الباب...لقيتها مشات على روحها أصلا من يومين مريتهاش...و منعرفش علاش قاعدة تتهرب مني...و لا حتى علاش قاعد نفكر فيها...معادش نعرف شنية لي قاعد يصير معايا الأيامات هذوما شيعت راسي لتالي...نرد في النفس ورا بعضو...نحب نحي الافكار هذوما الكل من مخي و نرتاح..حتى وقيت باش نتقبل خدمتها...مدامها تحب تبدا من جديد مانيش باش ناقف في طريقها اكثر من هكا...يمكن حتى تصرفي معاها ايامات لتالي...كان انانية مني...لتوا منعرفش شبيني كنت رافض فكرة اختلاطها بالناس يمكن خاطرني طول السنين هذوما...ستانست بيها هكا...خذيت نفس و حليت الباب ركبت...شديت الثنية للكلينيك...عالأقل نلحق قبل العملية لي عندي بشوية عديت الثنية ضايع في الأفكار لي قاعد نحاول نهرب منها فرد وقت...منعرفش على روحي كيفاش وصلت ركيت على جنب و نزلت من الكرهبة...أول ما دخلت جات عيني عليها...تحكي مع الفرملية و تفهم فيها بيديها...عديت عينيا عليها...نتفحص فيها من بعيد خذيت نفس و قربت منهم نحكي
انا:صباح الخير
صبحت عليا الفرملية و مشات على روحها...غزرتلها نحكي
أنا:ماكش باش تردلي
هالة:صباح الخير
أنا:شفما ؟
هالة:معادش برشا على العملية...هاني باش نمشي نحضر روحي
كبست على يدها قبل ما تمشي...جبدتها عندي...و عديت عينيا على وجها نحكي
انا:شبيك ؟
هالة:حتى شي ياسين...من غير ما توخر على العملية جرايري
جبدت روحها و عطاتني بظهرها...ملامحها و نبرة صوتها تقول لي هي متغشة مني...أصلا نعرف روحي هملتها اليومين هذوما..جراير الظغط لي تعديت بيه و خطواتي لي نحس في روحي نعمل فيها لتالي...ساقي لي قعدت معلقة بين الماضي و المستقبل...خايف لا نقدم خطوة في الحياة لي مخططلها...فرد وقت خايف نعفس على برشا حاجات...مستحيل نجم نصلحها مرة أخرى...المد و الجزر لي لقيت روحي فيه...اكبر من الدوامة لي كنت عايشها طيلة السنين هذوما...شهور قليلة خلاتني عاجز باش ناخو قرار كنت مكبش فيه سنين...منعرفش شنوة لي مانعني...يمكن جواد...لي تعلقت بيه اكثر من اي شي آخر في دنيا...و لا فتون لي نحس في روحي مزلت نظلم فيها لتوا...و من شيرة هالة لي نشوف معاها حياتي لي حبيت نعيشها ديما...خذيت نفس طويل و خلطت عليها...بدلت دبشي...تفحصت الدوسيات و دخلت للعمليات...اربع ساعات تقريبا عديتهم غادي...اول ما تجي عيني في عينها...تقحرلي...ساعات الفازات متاعها هذوما يخلوني نتعلق بيها اكثر...مصدقتش لي العملية نجحت و وفات على خير...تنهدت بالقاوي...و خرجت نطمن في عيلة المريضة لي عندي...خرجت ورايا...استأذنت منهم و خلطت عليها نحكي
أنا:اخلط عليا للبيرو توا
غزرتلي ندرا كيف...و هزتلي براسها باهي...خذيت نفس و سبقتها...نحيت الشارلوت من راسي...و ترميت عالكرسي نستنى فيها...دقايق و دقت الباب...تكيت لتالي نحكي
انا:ادخل
هزيت راسي شوية نغزرلها...دخلت عندي من غير حتى كلمة...كبست على يديها زوز تحكي
هالة:علاش طلبتني ؟
انا:يظهرلي انا لي نسألك و انتي تجاوبني
هالة:باهي نسمع فيك
انا:شنية التصرفات هذوما لي خرجتلي بيهم ؟
هالة:انا ما عملت حتى شي...كان فما شكون اشتكى من خدمتي
انا:مانيش نحكي عالخدمة
هالة:ياسين كان باش تحاسبني توا...المرة هاذي أنا ما عندي حتى ذنب
عديت يدي على وجهي...مع الغصة لي حسيتها في حلقها...هزيت روحي قمت و قربت منها...وقفت قدامها بالظبط...هزيتلها راسها شوية...نحكي
انا:مانيش باش نحاسبك...أما نحب نعرف شنية لي مقلقك ؟
هالة:أنا غلطت معاك في حاجة ياسين ؟
أنا:فاش قام سؤال هذا توا ؟
هالة:خاطرني حسيت لأنت بعدت عليا برشا...لين وليت نحاسب في روحي...خاطرني نعرف غشك...و خاطرني خفت من اني نحل الموضوع معاك
أنا:لهدرجة وليت نخوف ؟
هالة:و أكثر
تبسمت و انا نغزر لشفايفها لي قلبتهم و هي تحكي غصتها خلاتني نقربلها من غير ما نخمم...حطيت يدي على ظهرها و جبدتها في حضني...نزلت عليها شوية خذيت نفس من ريحتها...و سكرت عينيا بالوقت منعرفش علاش جات بين عينيا...و لا شنوة لي قاعد يصير معايا بالظبط...معادش نعرف شنية لي مخليني نفكر فيها بعد ما إخترت ثنيتي...أنا خليت كلشي ورايا على خاطر الطفلة لي بين يديا توا...و معنديش إستعداد نرجع خطوة لتالي...كبست عليها أكثر...محاولة مني باش نخرج من المد و الجزر لي نحس فيه...نحب على خطوة ثابتة...تقرر مصير حياتي...خطوة مانيش باش نندم إذا عملتها...و نسكر بيها أبواب الماضي...خذيت نفس و جبدت روحي شوية...نغزر لدموعها لي نزلو ورا بعضهم...عديت صوابعي على خدها...نحكي
أنا:ميزيتش توا ؟
هالة:لا...و مانيش باش نسامحك المرة هاذي
انا:معناها الفرخة متغشة ؟
هالة:مانيش فرخة ياسين...أنت كهو لي تشوفني هكا
انا:باهي...شقولك نعديو نهار برا الكلينيك ؟
هالة:تحكي بالرسمي ؟
أنا:إي بالرسمي
هالة:و الخدمة ؟
انا:بطبيعتي جيت على خاطر العملية كهو...هيا برا حضر روحك فيسع
هالة:باهي...و مزلت متغشة هاني باش نقلك
حلت الباب و خرجت تجري...تبسمت و تلفت نريقل في الاوراق...بدلت دبشي...و حضرت روحي...هزيت تليفوني و طلبت أمي...ردت عليا تحكي
سلطانة:أهلا عزيزي لباس ؟
أنا:لباس أمي...كلمتك نحب نسأل على جواد
سلطانة:لباس عليه...هوكا عامل جو مع روجين
أنا:رد بالك عليه...و كان صار شي كلمني
سلطانة:حتى أمو من بكري تطلب و تعاود...ساعة كان هزيتوه معاكم مش أحسن
أنا:باهي سلطانة من غير ما تستلمني...عندي ما نعمل توا
سلطانة:و شنية صار في الطفلة لي تحب تعرفني بيها مزال ملحقش الوقت
أنا:مش وقتو الموضوع هذا
سلطانة:مش طلقت باش تاخو الطفلة لي تحبها ؟
أنا:نحكيو مبعد سلطانة
نزلت تليفون و علقت عليها...سؤالها كان في محلو...انا عملت هذا الكل باش نكون مع هالة...مع الطفلة لي دخلت لحياتي...و قلبتها...خلاتني نتحرر من قيود تربطت بيها من سنين...شنية لي مانعني توا منعرفش شبيني منجمش نقدم حتى خطوة في اللي حبيت نعملو...غمضت عينيا بالقاوي...و عاودت حليتهم...نحب نحيها من مخي...و معادش نفكر فيها بعد توا...لا وين مشات و لا شنية عملت...يمكن احسن شي نجم نشوف ولدي من غير ما نقابلها...و من غير ما ندخل في حياتها اكثر...هزيت راسي على صوت الباب...خذيت نفس و تبسمت نحكي
انا:حاضرة ؟
هالة:اي و أنت ؟
انا:خلينا نمشيو ملا
هزيت مفاتحي و تليفوني و خلطت عليها...نمشي وراها تلفتت عندي تحكي
هالة:هيا فيسع ياسين...جعت عاللخر
انا:باهي...أركب لالة
حليتلها الباب ركبت...و خلطت عليها...خدمت الكرهبة و شديت الثنية...غزرتلي تحكي
هالةياسين
انا:اشكي
هالة:نحب نعرف...أنا فاش غلطت معاك ؟
أنا:مش على أساس سكرنا الموضوع
هالة:ماهو باش يتسكر...خاطرني نحس فيك مجبور عاللي تعمل فيه...ياخي أنت تحب ترجع لمرتك ؟
شديت الفران مع كلامها تالي...و تلفت عندها...قحرتلها نحكي
أنا:هااالة تعرف روحك فاش قاعدة تحكي ؟
هالة:هدي روحك...أنا جيست سألتك و كهو...منعرفش شبيك تغششت لهدرجة
أنا:مدامني طلقتها علاش نرجعلها ؟
هالة:منعرفش...منعرفش ياسين...أما إهتمامك بيها واضح...اهتمامك بيها قاعد يقتل فيا
انا:قصرت معاك في حاجة...باش قاعدة تحاسب فيا ؟
هالة:ياسين...أنا وقت حبيتك...و وقت بديت علاقتي معاك...سألتك أكثر مرة إذا حبيتها ؟ و جوابك كان ديما بالرفض...و أنا صدقتك...أكا لي خلاني نتعلق بيك أكثر و معنديش إستعداد اني نخسرك و لا حتى نكمل حياتي من غيرك...تاعبة برشا و أفكاري خانقتني..خايفة منك و من اللي جاي زادة
قربت مني شوية...حطت يدها على خدي...و غزرتلي ندرا كيف تحكي
هالة:أوعدني ماكش باش تخليني ياسين...اوعدني باش تبقى معايا ديما اماانك
عديت عينيا على وجها...و هزيتلها براسي باهي...من غير ما نخمم في حتى شي...لا في الماضي...و لا حتى في فتون لي صورتها بين عينيا...مدامني وصلت لهوني مانيش باش نتراجع و مانيش باش نخسر أكثر من هكا...غمضت عينيا على بوستها و حليتهم على تعنيقتها القوية...حطيت يدي على ظهرها نحكي
أنا:شقولك نعرسو ؟
جبدت روحها شوية...غزرتلي ندرا كيف...و كبست على شعري من تالي تحكي
هالة:ي..ياسين...تحكي بجدك أنت ؟
أنا:مممم نظن وقيت باش نخططو لحياتنا مع بعض
هالة:معناها علاقتنا باش تولي رسمية ؟
انا:إي يا روحي باش تولي رسمية...و منها إنتي ترتاح من الأفكار لي قاعدة تنكد بيها عليا و على روحك
هالة:الحق عليا خاطرني نحبك
أنا:صاار...تحبني نعتذر منك بطريقتي
ضحكت و دخلت في حضني اكثر...كبست عليها بيدي و بستها من راسها...منعرفشا لقرار لي خذيتو توا شنية باش يكلفني...أما هذا لي سعيت عليه من أول ما فسخت علاقتي مع فتون...معادش نحب نتلفت ورايا و لا نرجع بخطوة لتالي...مدامني وصلت لهوني باش نكمل في ثنيتي...و نعيش بالطريقة لي نحبها انا و كهو