كوكايين

الحلقة الواحدة و العشرون

🔸️حلقة 21
🔸️يحيى_يحكي:
هزيت راسي شوية...حتى ساعة لي حبيت نرتاحها من تعب النهار...طارت مع اصواتهم اللوطة...عديت يدي على وجهي...و هزيت روحي وقفت...نحيت تليفون من شارجور...حليت الباب و خرجت...وين قوات الاصوات اكثر...ساعة كان تعرف ثريا اني هوني...الا ما تتجلط أحسن شي سرقت شوية وقت و خليت بابا مع الجماعة خذيت نفس و نزلت اللوطة...تعديت عالصالة...و رجعت خطوة لتالي في لحظة...نغزر لأمي و هي تحطلها في الحنة...تذكرت فازة قبيل...ضحكت في سري..متوقعتش باش تخاف من أمي لهدرجة...اصلا لتوا منعرفش شكونها...أما عالاغلب صحبت سحر...نزلت بعينيا للبونداج لي في يدها...للحظة حسيت روحي سبب في اللي صارلها...هزت راسها على غفلة...جات عينها في عيني...غزرتلي ندرا كيف...و قحرتلي فرد وقت...تبسمت على جنب...و هزيت روحي خرجت...لتوا نحس في روحي شايخ عليها...جيت باش نخرج...اما وقفت على صوتها تحكي
احلام:يحيى لحظة
خذيت نفس طويل و تلفت عندها...دوب تبسمت نحكي
انا:اهلا احلام
احلام:متوقعتش باش نشوفك ليلة
انا:الله غالب...مع قضية العرس
احلام:شحالك توا ؟
انا:لباس و انتي ؟
احلام:لباس...شنية صار معاك بخصوص الخدمة
انا:كي العادة احلام...هيا ارجع انتي بحذا الجماعة توا...نشوفك مبعد
احلام:باهي
خذيت نفس و خرجت من الدار...عديت يدي على وجهي نهدي في روحي...قربلي بابا يحكي
بابا:شبيك...شنية لي صار ؟
انا:حتى شي بابا
بابا:احلام كي العادة ؟
عديت عينيا على وجهو...و تبسمت...هو اكثر حد يفهم عليا...يعرفني فاش و كيفاش نخمم...يعرفني شنوة نحب و شنوة نكره...حتى كلشي وصلت ليه لتوا...كان بفضلو هو...حط يدو على كتفي يحكي
بابا:تهنى...كلشي باش يكون لباس
انا:كان ثريا نحات الفكرة من مخها...اكيد باش نكون لباس
بابا:احلام طفلة باهية...انت جيست حاول تتعرف عليها اكثر...اما قبل هذا الكل...حط راسك في اللي تحب توصلو
انا:عيشك بابا
بابا:هوكا صحابك من بكري يسألو عليك...برا اقعد معاهم شوية...لين تفرغ الدار شوية
هزيتلو براسي باهي...و هزيت روحي قعدت معاهم...اما تفكيري قعد في اللي ريتو لحظات لتالي...منعرفش شنية لي شدني فيها...و لا علاش ركزت معاها لهدرجة...و من شيرة تعلق امي بأحلام مقلقني...و منحبهاش تظغط عليا اكثر...من غير شي...ملقيتش خدمة ثابتة و كيما نحب زادة...آخر شي ممكن اني نخمم فيه هو العرس...منحبش نحصل روحي من توا...على خاطر عندي برشا حاجات نحب نوصللها قبل ما نستقر في حياتي...و من شيرة نحب نتهنى على رزان و سحر...و ما ينقصهم شي...عديت الوقت ضايع في افكاري...فقت من سرحتي على يدو لي تحطت على كتفي يحكي
ايمن:وين سرحت ؟
انا:هوني جيست سرحت شوية و كهو
ايمن:عديت السهرة و انت في دنيا اخرى
انا:تاعب شوية و كهو...هاني باش نجيب قهوة و نرجع
ايمن:باهي
دوب تبسمتلو و رجعت لدار...لتوا خايضة بالزغاريت...عاملين جو مع بعضهم...دزيت الباب شوية...و دخلت...نغزرلها واقفة عند باب الكوجينة...منعرفش من وين قاعدة تطلعلي الفرخة هاذي...مدت يديها زوز تحب طلع الشركة متاع الروبة لي جاية في جنبها...فرد وقت تبعد في شعرها لي هبط عليها...حطيت يديا زوز في مكاتبي نغزرلها...يديها زوز ملفوفين وحدة من الجرح و لاخرى من الحنة...نفخت على خصلات شعرها مرتين ورا بعضو...تحكي
لجين:شنية الحالة هاذي لي وصلتلها...ياخي تو ظهرتلها تهبط
طلعت حاجبي مستغرب...شدني ضحك على حالتها...يمكن اول مرة تصادفني وحدة كيفها...حتى هاذي ثالث مرة نشوفها اليوم...و في كل مرة نلقى روحي مركز معاها غير العادة...هزت راسها على غفلة...غزرتلي مصدومة تحكي
لجين:ااانت ؟
تلفت ورايا شوية...و عاودت غزرتلها...ضيقت عينيا نحكي
انا:عندك مشكلة ؟
لجين:شتعمل هوني ؟
انا:كان معندكش مانع...انا في دارنا توا
غزرتلي ندرا كيف...و بعدت خصلات شعرها على وجها تحكي
لجين:اما عالاقل دق الباب قبل ما تدخل
قربت منها شوية...لي خلاها توخر خطوة لتالي...غزرتلها نحكي
انا:عندك اوامر اخرى ؟
لجين:فاش تعمل انت ؟
انا:ثريا لتوا متعرفش بعملتك
لجين:شعندي عملت ؟
انا:توا نسيت لي عملتو
لجين:الحق عليا نصدق فيك...هوكا سحر قالت هي شراتو
انا:باهي...تو نشوفو راي ثريا
جيت باش نمشي...وقفتني كي قربت مني شوية...مدت يديها زوز تحكي
لجين:لحظة...لحظة
انا:شفما زادة ؟
لجين:علاش تحب تخبرها ؟
انا:في رايي من حقها تعرف...قبل ما تعمل كارثة اخرى
لجين:اما انت السبب
انا: انا ؟
لجين:ن..نقصد انت دخلت وقتها...و منعرفش كيفاش طاح من يدي...زيد علاش تحب تخبرها توا ؟ والله بعد العرس نشري واحد آخر...هوكا عرفت المودال متاعو كيفاش...اما منحبهاش تتغشش مني...والله اول مرة نحضر عرس هكا...اماانك
بقيت نغزرلها مستغرب...دوب نجمت نفهم الكلام لي قالتو ورا بعضو...عدات صوابعها تبعد في شعرها لي محبش يركح و عاودت غزرتلي تحكي
لجين:هاذي اول مرة امي تخليني نبات برا الدار...كان انت خبرت طاطا ثريا...اكيد باش تتغشش مني...و ترصيلي نرجع لدار توا...حتى مكنتش نعرف لانت خو سحر...منقصدش نحكي معاك اكاكا والله
ضحكت على كلامها و تصرفاتها و الحكاية لي صدقتها...غزرتلها نحكي
انا:اهدا يا بنتي...ما عندي علاش نخبر ثريا...برا تفرهد مع لبنات و انسى الحكاية...مفماش علاش تقلق روحك
لجين:تحكي بجدك ؟
انا:مممم
لجين:ملااا فاش قام حتى تحكي معايا اكاكا
انا:رجعنا لنفس النقطة ؟
لجين:باهي باهي...منقصدش هاني باش نمشي انا توا
انا:قول لسحر طلعلك الشركة متاعك
عديت عينيا على جنبها...غطاتو بيدها في لحظة...قحرتلي و هربت من قدامي...تبسمت على جنب...و دخلت للكوجينة...احسن شي لقيت قهوة حاضرة...صبيت منها و تلفت على صوت امي...تحكي
ثريا:يحيى شتعمل هوني ؟
انا:راسي يوجع فيا
ثريا:وه لطف عليك...تحب نجيبلك حربوشة ؟
انا:لباس امي تهنى
ثريا:متأكد ؟
انا:مانيش صغير ثريا...نجم نهتم بروحي
ثريا:باهي منقصدش...ساعة قولي حكيت مع احلام ؟
انا:انتي بعثتها قبيل ؟
ثريا:يا ولدي وقيت تتعرفو على بعضكم اكثر...و طفلة تحبك ليها برشا...و فوق هكا صحبة اختك...و عيلتها معروفة...و بوها صاحب بوك زادة
انا:نفس الاسطوانة مرة اخرى ؟
ثريا:ماكش باش تلقى احسن منها والله...حتى الحومة الكل تشهد باخلاقها
انا:ربي يبارك امي...اما موضوع الزواج و العرس...و اللي انتي تخمم فيه مزال بعيد برشا...هاك انتي لتوا مخرجتش بنتك و تحب تحصلني ؟
ثريا:ربي يهديك...و لامتى ناوي تبقى هكا ؟
انا:لين نريقل اموري امي...انا لتوا مزلت نخدم مع بابا...و لتوا مزلت ندور بالشهادات لي عندي...من وين نعيشها انا المرا ؟ تحبني نولي ناخو مصروفي منكم ؟
ثريا:منقصدش لي فهمتو...اما في الوقت لي تشد فيه خدمة باهية...تعرف عالطفلة اكثر...متاكدة لانت باش تحبها...و زيد حتى هي عزيزة عليا برشا
انا:مستحيل نخرجو منها الحكاية هاذي
ثريا:هيا عيش ولدي...هاك وصلت لثلاثينات و الطفلة تحبك من صغرها...اعطيها و اعطي لروحك فرصة
انا:باهي امي باهي...توفى حوصة العرس لي احنا فيها و نحكو في الموضوع هذا مرة اخرى باهي
امي:باهي يا روحي...من غير ما تتغشش مني...والله نخمظ في مصلحتك و كهو...حتى نحب نشوف صغارك...قبل ما يهز ربي امانتو
انا:لطف عليك ثريا...فاش قام الكلام هذا توا
قربت منها شوية...بستها من راسها...و تبسمت نحكي
انا:تهنى...باش تلحق على صغاري...و تشوفهم يلعبو قدامك لين تفد منهم
حطت يديها زوز على صدري...و غزرتلي ندرا كيف...تحكي
ثريا:مستحيل نفد منهم مدامهم قطعة...ربي يخليك ليا يا روحي
انا:عيشك امي...هيا برا بحذا بنتك توا...تمشيش تحطني في قفص الاتهام...لي انا خطفتك منها
ثريا:هاني ماشية...و هوكا باش نبعثلك سحر...كان استحقيت حاجة اطلب منها
هزيتلها براسي باهي...و تكيت عالرخامة...منعرفش علاش حكيت معاها اكاكا...اصلا ما عندي حتى نية باش نتعرف على احلام اكثر...الغريبة اني نعرفها من سنين...اما لتوا ما نحس معاها بشي...لتوا منحسش روحي معلق بيها لا من بعيد و لا من قريب...رغم انها صحبت رزان...و بنت الحومة زادة...فرد وقت ما ينقصها شي...اما منعرفش علاش نحس في روحي بعيد برشا على اني نكون معاها و نرتبط بيها...حتى نعرف انو امي هي لي تلز فيها باش تحكي معايا...و تعطي فيها في الامل لاحنا باش نكونو لبعضنا في الاخير...يمكن هذا لي خلاها تتعلق بيا اكثر...عديت يدي على وجهي و تنهدت بالقاوي...عندي تخطيط لحياتي...اما لتوا منجمتش نعمل اول خطوة لتوا...من بكري تبعت المثل لي يقول اقرى تلقى...و هوكا عديت اربع سنين او اكثر و انا نفركس على خدمة لين فديت و لقيت روحي نتبع في حرفة بابا و ناخو مصروفي منها...و لتوا منعرفش امتى ناخو فرصتي و نلقى روحي في الدومان لي حبيتو من صغري...لتوا منعرفش شكون ينجم يقبل مهندس متخرج معندوش خبرة...هاني حاولت و حاولت...و ما خليت حتى سوسيتي لتوا...خذيت نفس طويل...هارب من الافكار لي هدت عليا و من كلام امي...اصلا قبل ما نوصل للي نحب عليه...مستحيل نقدم على خطوة هكا...و لا حتى نخلي بنت الناس تتعب معايا...كلشي عندو وقتو بالنسبة ليا...على هذاكا منحبش نزرب الامور من توا...حطيت الكاسة من يدي...و هزيت روحي طلعت لبيتي...الليلة بالظبط نحس في راسي باش يطرشق...و زيد بعد السهرية فما عرس يستنى فينا غدوة...و الاميرة الكبيرة باش تغادر الدار...عالاقل نحط راسي و نرتاح شوية من الجوجمة لي في مخي...و خيالها لي صادفني من اول مرة و منعرفش شبيه مرافقني لتوا...رغم اني لا نعرفها و لا ريتها من قبل...تنهدت بالقاوي...و ترميت في وسط سريري...هارب من الواقع و من كلشي يدور في مخي...بالرسمي نحب نرتاح و كهو
#يحيى_لجين 💕💕💕