كوكايين

الحلقة السابعة و الأربعون

🔸️حلقة 47
حليت عينيا عالملحفة لي تحطت على اكتافي...هزيت راسي شوية غزرتلو...عدا صوابعو على خدي...و قرب مني قعد بجنبي...غزرلي ندرا كيف يحكي
فهد:شتعمل هوني ؟
انا:شي...حبيت نقعد وحدي شوية
فهد:نعرف لي مزلت متغشة من موضوع بلقيس
تبسمت بالوقت...و هزيت راسي غزرتلو...عديت عينيا على وجهو نحكي
انا:مانيش باش ننكر...أنو بلقيس كانت أكبر صدمة في حياتي...متوقعتش بعد السنين هذيكا الكل...تفاجأني بالخبر هذا...كانت فما أكثر من طريقة...تخبرني بيها...أما
سكت خاطرني منجمتش نكمل كلامي...منجمتش نتعدا لي صار ليلتها...و كمية الحقرة و الذل لي حسيت بيهم من عندو...تنهد بالقاوي يحكي
فهد:منحبش نبرر الغلطة لي عملتها...أما في الحالتين كنت باش نخسرك
أنا:أنت متتصورش كمية الفرحة و الراحة لي حسيت بيها وقت سمعتهم يحكيو على عرسك...ثقتي في أنك تحبني...خلاتني نستبعد إحتمال أنك تعرس و تخليني حتى خسارتي طلعت كبيرة برشا...أكبر من اللي تتوقعو انت
فهد:عرسي بيها...مبني على ورقة وحدة...اتفاقية باش تخليني ناخو لي حاجتي بيه...و نرجعلك
انا:طول السنين هذوما...أنا ما غلطت معاك في حتى شي...منتذكرش إني تغششت منك...حتى كلشي كنت نعملو من صغرتي...إني نتبع تفاصيل حياتك و كلشي يخصك...و يخص أي طفلة كنت معاها من قبل...حتى أكثر من اللي تعرفو عليا أنت
فهد:لهدرجة ؟
انا:مممم...حتى نتذكر اول طفلة حبيتها...كان إسمها صفاء
فهد:صفاء ؟
انا:مممم وقتها كان عمري 15 سنة...نهارتها جات لعيد ميلادك...مزلت نتذكر ملامحها...شعرها الأصفر...لون عينيها...حتى كان عندها وحمة هوني...في ظهر يدها
مديت يدي نوري فيه بقعة الوحمة...قعد يغزرلي مصدوم...تبسمت و كملت كلامي نحكي
انا:صراحة...كانت أول وحدة نغير منها في حياتي..غرت من قربها ليك...و من علاقتك بيها...حتى كانت أول مرة نخاف من فكرة أنك تبعد عليا...أكا لي خلاني نعمل برشا حاجات خايبين...أنت متعرفش بيهم لتوا
طلع حاجبو مستغرب...كانو يحب يسمع مني أكثر..نزلت على شفايفي شوية...نحكي
انا:ليلة عيد ميلادك مكنتش مريضة..عملتها بلعاني..باش أنت متسهرش معاها برا و تخليني...و أنا لي مرة بدلت الكود متاع الباب...باش توحل في بيت البانو...أما انت تصرفت و خرجتها
فهد:كهو ؟
انا:و مرة علقت عليها من تليفونك...و في آخر مرة تلاقيتها...خبرتها لأنت تخطط باش تعرس و تخليها صدقتني خاطرني صغيرة وقتها
فهد:بالرسمي ؟
انا:والله
فهد:و أنا نقول شبيها طفلة غبرت معادش لقيتها...حتى قصتها معايا من غير ما نفهم شي...طلعت إنتي مولا العملة ؟
انا:منسيتهاش انت ؟
قربلي شوية...و مد يدو حطها على كتفي...جبدني عندو...حطيت راسي على صدرو...غرس يدو في شعري يحكي
فهد:بالنسبة لصفاء...نسيت حتى ملامحها...كان مش إنتي تذكرت اسمها...مستحيل تخطر على بالي...كيما نعرف أنو ليلتها مكنتش مريضة
انا:كيفاش ؟
فهد:كنت نعرف موعد العادة متاعك...و كانت كذبة مكشوفة منك...خاطرني حتى أنا حافظ تفاصيل حياتك يا روحي...أما سايرتك و مشيت معاك في الكذبة...و ريتك نهارتها وقت بدلت الكود متاع الباب...حتى هي ماهيش كيما إنتي مفكرة...خبرتني لإنتي قتلها باش نعرس...و صراحة عاونتني برشا باش نتخلص منها
هزيت راسي شوية...جات عيني في عينو...غزرتلو مستغربة نحكي
أنا:مدامك كنت تعرف هذا الكل...شبيك مبهدلتنيش عليه...خاطر وقتها كل غلطة ناخو عليها درس من عندك
فهد:روجين...وقتها كنت صغيرة برشا...خليتك على راحتك...و فضلت نخليك بعيدة عليا...خاطرني خفت عليك...كان وقتها وضحت مشاعري ناحيتك...كانت الأمور...باش تمشي للاسوء...حياتي ماهيش سهلة كيما إنتي تشوفها...أنا ديما كنت بين نارين...إنتي و الماضي مستحيل نجم نخاطر بيك يا روحي...حتى صدقني ندمت خاطرني كسرت حدودي معاك
أنا:ندمت خاطر هكا ؟ و لا على خاطرك عطيتني وعد و ما مسيت حتى وحدة بعدي ؟
فهد:كيما إنتي عطيتني كلشي...انا عملت نفس الشي مستحيل نجم نحط يدي على وحدة غيرك...و لا حتى نخمم بالطريقة هاذي...إخلاصي ليك باش يبقى لآخر نفس في حياتي
مديت يدي شوية...حطيتها على خدو...منعرفش حجم الأخطاء لي وقعنا فيهم لتوا...و منعرفش شنية يستنى فينا لتوا...و لا حتى شنية نهايتنا...أما كلشي متأكدة منو إني مزلت نحبو...مزلت نعشقو بتفاصيلو الصغيرة فرد وقت مزلت موجوعة منو...و عاللخر زادة...موجوعة من كلامو..من صغيري لي خسرتو و من عرسو..موجوعة من حاجات...رغم قربي الكبير ليه...اما منجمش نحكيلو عليها...و لا حتى نواجهو بيها...كبس على يدي و باسني منها مرتين...تبسمت بالوقت...و حطيت راسي على صدرو...هاربة من دوامة الأفكار لي ضعت فيها...هاربة منو ليه...تنهد بالقاوي يحكي
فهد:مزلت مصممة تخليني وحدي
هزيت راسي شوية...و عديت عينيا على وجهو...نحكي
انا:مهما كان وضعك فهد...أنت لازمك تحط حد لهذا الكل...انا معادش نجم نتقبل فكرة عرسك اكثر من هكا
فهد:باهي لي تحب عليه باش يصير
جبدت روحي منو...مستغربة من كلامو...ضيقت عينيا نحكي
انا:شقصدك ؟
عدا صوابعو على خدي...و رجعلي خصلات شعري لتالي...يحكي
فهد:باش نحاول نلقى طريقة...توصلني للمستندات لي عندها في أقرب فرصة...بعدها باش نطلقها
انا:مستندات شنية ؟
فهد:كان أنا خبرتك عليها المستندات هاذي...باش ندخلك في حيط...و مش بعيد تكره العيلة لي إنتي فيها اكثر من هكا
انا:نحب نعرف لي قاعد يصير...مش أنت تاثق فيا ؟
فهد:ناثق فيك...أما معنديش ثقة في ردة فعلك روجين الحكاية أخطر من اللي في مخك
أنا:عندها علاقة باللي حاول يقتلك...و بالسلاح متاعك ؟
فهد:اللي ريتو حتى شي...القاع لأنا غاطس فيه...مظلم لدرجة منحبكش حتى تلمحو..انتي بالظبط كان تصيرلك حاجة...وجودي معادش باش يولي عندو معنى...أكا علاش نحبك تبقى بجنبي...مهما كان لي باش يعرضنا بعد توا
بقيت نغزرلو من غير حتى كلمة...منعرفش علاش إحساسي يقول أنو فما حاجة كبيرة برشا...مخبيها عليا...مش مجرد مستندات كهو...خذيت نفس و عاودت حطيت راسي على صدرو...نحكي
أنا:منعرفش شنوة لي قاعد يصير...و منعرفش شبيني مزلت نصدق كلامك لتوا...بعد اللي تعدا عليا الكل...أما معاادش نحبك تخذلني فهد و إلا ماكش باش تلقاني مرة أخرى
فهد:انا منعرفش نعيش من غيرك...وجودك في حياتي منع برشا حاجات خايبة ممكن أنها تصير
أنا:كيما شنية ؟
فهد:مع الوقت تعرف يا روحي
تنهدت بالقاوي...و سكت...نعرف لي ماهوش باش يحكيلي...و باش يحتفظ بالحكاية لروحو...أما من كلامو فهمت اني لازمني نلوج من ورا ظهرو...و باش نبدا من خالي هارون...رغم محبتي ليه...و رغم تعاملو الباهي معايا...اما ديما نحسو غامض كيما فهد...و منعرفش علاش إحساسي ديما يقول أنو ورا الصورة متاعو قدامنا و قدام الشعب الكل...فما عبد آخر...عبد تسير فيه مصلحتو...و اهم شي عندو...نفوذو و مكانتو العامة...كان انا بديت منو...وقتها نفهم شنية صار مع خالي كمال قبل...و لي خلى فهد يوصل للحالة هاذي...و مش بعيد نفهم علاش امي تعامل فيا بالطريقة هاذي من أول ما جيت لدنيا...لازمني نفهم حقيقة وجودي في عيلة الصياد...باش نفهم العبد لي حبيتو و عطيتو روحي و بدني...من غير ما نخمم...و حتى كان بعدت عليه و مشيت لآخر الدنيا...حد ماهو باش يبدل حقيقة حبي ليه...هزيت راسي شوية...لقيتو باقي يغزرلي كبست على صدرو نحكي
أنا:لازمك تطلع ترتاح شوية
فهد:مستحيل نرقد مع ياسين فرد بيت
انا:بالله...و شنية الحل توا ؟
فهد:منعرفش...المهم أنك تبقى معايا و كهو
انا:الصبر يا ربي...فهد ياخي نورمال أنت...كان ياسين يشلق بعلاقتنا
فهد:ياخي انا قتلو أخلط عليا لهوني
انا:ميزييتش توا...ياخي أنت تخمم في روحك و كهو
فهد:أنا لي عندي شهور محروم منك...ساعة من إمتى يخرج مع فتون...مش على أساس طلقها و خطب
انا:صحيح والله...منعرفش كيفاش غابت عليا
فهد:ميكونش ندم عليها ؟
انا:منعرفش...أما كلنا نعرفو لي هو كبش في قرارو حتى طلقها جيست بعد ما ولدت
فهد:تو يشبع بقرارو...أصلا ياسين ما يحب حد يجبرو على شي...أما المرة هاذي...حساباتو طلعت غالطة
انا:على أساس انت تحب
فهد:أنا زادة منحبش...أما أنا و ياسين...مناش في نفس الكفة...حتى متأكد باش يجي نهار و يفهم لأنا حاولت نوصل ليه طول السنين هذوما
أنا:أنت ديما كنت بعيد على العيلة...رغم عايش معاهم حتى على طاطا سلطانة
فهد:كان أنا اخترت نبقى بيناتهم على خاطر زوز حاجات و كهو...الاولى بابا...و الثانية إنتي يا روجين
انا:باهي فهد...منقصدش نخليك تحكي عالماضي مرة أخرى
فهد:باهي و شنية عملنا في الحكاية ؟
انا:منعرفش
فهد:باهي ايجا معايا
كبس على يدي و وقفني معاه...خلطت عليه مصدومة منو...منعرفش فاش قاعد يخمم...كبست على يدو نحكي
انا:فهد لبااس ماهو ؟
فهد:ششش...أسكت
منعرفش على روحي كيفاه طلعت معاه...حل الباب...و تبسم يحكي
فهد:أدخل
انا:و ياسين ؟
دخلني و سكر الباب من الداخل...غزرتلو مصدومة جبدني عندو يحكي
فهد:تو يدبر راسو...يرقد في صالة كان لزم
انا:مجنون
فهد:بيك إنتي
جيت باش نحكي...نزل على شفايفي بالوقت...جبد روحو شوية...يحكي
فهد:توا نجم نرقد مرتاح
انا:ههههههه والله مش نورمال لي تعمل فيه يا فهد
مديت يديا...نحل في السبتة متاع يدو...حطيتها على جنب...و خلطت عليه...تسطحت بجنبو...قربلي أكثر حضني من تالي و باسني من رقبتي يحكي
فهد:آخر مرة تفكر في حد غيري...حتى ياسين زادة
كبست على يدو...من غير حتى كلمة...أصلا من بكري عندو نفس ردة الفعل...إتجاه أي شخص و هذا لي يخوفني ديما...أنو لتوا ميحملش شكون يقربلي...حتى مستحيل نجم نقنعو بالعكس...و لا حتى نقنع روحي خاطرني نسخة منو و نعرف لي قاعد يحس فيه بالظبط