كوكايين

الحلقة الثالثة و الأربعون

🔸️حلقة 43
🔸️لجين_تحكي:
حطيت السيتلو من يدي...و تكيت لتالي...منجمتش نركز أكثر...حتى منعرفش فاش قاعدة بالظبط...نفخت بالقاوي...و عاودت غزرتلها نحكي
انا:سحر...تو بالرسمي هي باش تجي لهوني
سحر:للأسف إي
أنا:و حتى هو باش يجي لهوني...و أكيد أمك باش تجبدلو الموضوع مرة اخرى
سحر:لجين اهدا عزيزتي...من شيرة متحبش أمي تعرف بالحكاية...و من شيرة أخرى داخلة بعضك...تي هاك إنتي نبهت عليا و عليه
انا:مبدئيا منحبش يحيى و طاطا ثريا...يعرفو بعيلتي و لا حتى موضوعنا يخرج...أمانك سحر
سحر:باهي طمن...أما عالأقل متظهرش بالوجه هذا قدام أمي
أنا:شبيني
سحر:الصبر يا ربي...لجين...صدقني مدام يحيى عطاك كلمة ماهوش باش يدور فيها...و لا حتى يخلي أحلام تقرب منو
أنا:نعرف...واثقة فيه...أما مش واثقة فيها هي...حتى طاطا ثريا تحبها برشا
سحر:باش تهبلني يا طفلة...ساعة نتوما زوز عملتو كلشي ورا ظهري...و توا وحلتوني في مشاكلكم زادة
انا:سحر أماان
سحر:باهي باهي...ركز توا...خلي نعديو الامتحانات هذوما على خير...بعد ننصبلك العسة عليه...طمنت هكا
هزيتلها براسي باهي...و هزيت القلم من طاولة...محاولة مني باش نركز في الورقة لي قدامي...أما شي...تفكيري غلب عليا...و صوت الباب دخلني بعضي اكثر...تلفت بالوقت نغزرلها و هي تسلم عليها...تنهدت بالقاوي نحكي
أنا:سحر كلمو انتي...و قولو من غير ما تجي لهوني
سحر:لجين عزيزتي...هدي روحك...ساعة مكنتش نعرفك باش تغير منها لهدرجة
جيت باش نحكي...قصت عليا كي قربت منا...قعدت بجنبي تحكي
أحلام:شحالكم ؟
سحر:أهلا بيك احلام
أحلام:عيشك...و إنتي ذكرني في اسمك
كبست عالقلم في يدي...و هزيت راسي شوية...نحكي
انا:لجين
أحلام:لجين
أنا:مممم لجين
سحر:صحيح...مقريتش اليوم ؟
أحلام:عطلة
سحر:باهي...هاني باش نجيبلك حاجة تاكلها
أحلام:متعبش روحك عزيزتي...هاني باش نفطر مع يحيى في الورشة
دورت راسي بالوقت...غزرت لسحر...لي شدت بلاصتها أول ما سمعت كلامها...للحظة حسيت روحي باش نطرشق منها...حتى ما نجمت نعمل شي في الوضع هذا ساعة كان نلقاه قدامي ماهوش باش يفلت مني...دقايق عديتهم على أعصابي...لين رجعت طاطا ثريا...تحكي
ثريا:هوكا فطورك و فطور يحيى...صحة و بالشفا
أحلام:عيشك خالتي...هاني باش نمشي انا توا
ثريا:رد بالك على روحك
أحلام:باهي طمن
ثريا:و نتوما فطوركم حاضر زادة
سحر:باهي امي...تو نخلطو عليك
بقيت نتبع فيها لين رجعت للكوجينة...و عاودت غزرت لسحر...نحكي
أنا:على اساس ماهمش باش يقعدو مع بعضهم...أما سي خوك ناوي على فطور زادة
سحر:لجين عزيزتي...مش اول مرة أحلام تهز الفطور هدي روحك
مديت يدي لصاكي...و جبدت تليفوني...طلبتو مرة و زوز و ثلاثة...أما شي...نفخت بالقاوي...نحكي
انا:و ماهوش يرد زادة..أصلا أنا الغالطة خاطرني وافقت نكون معاه...ياخي شنية ملزني لهذا الكل ؟
سحر:باهي قوم تاكول شوية...بعد احكي معاه
هزيت روحي وقفت...نلبس في كبوطي...غزرتلي مستغربة تحكي
سحر:فاش تعمل ياخي ؟
أنا:هاني باش نمشي عندو
سحر:هبلت ياخي ؟ تو تلقاها فما
أنا:نعرف...تو ندبر كذبة...مهم مانيش باش نخليهم مع بعضهم
سحر:باهي خلي نجي معاك
أنا:لا خليك هوني...من غير ما نكبرو الحكاية و تشلق طاطا ثريا بيها
سحر:باهي...رد بالك على روحك
أنا:طمن...نكلمك مبعد
هزيت تليفوني و صاكي...و خرجت من عندها...حتى قبل ما تشدني طاطا ثريا...منعرفش على روحي كيفاش قطعت المسافة لي بين الدار و الورشة...كلشي يهمني إني نوصل و نتأكد من اللي قاعد يصير...كل خطوة نعملها...نكرز عليهم أكثر...هزيت حاجبي مستغربة و أنا نغزر للباب لي مسكرة...خذيت نفس طويل و قربت منها حليتها من غير ما ندق...جات عيني عليها...تحضر في طاولة...طلعت راسها...غزرتلي مستغربة تحكي
أحلام:لجين ؟
عديت عينيا عليها...و هزيت راسي نغزرلو...يمسح في يديه...ظاهر حتى هو محضر روحو باش ياكل...قحرتلو بالوقت...خاطرني حسيتو مستغرب حتى هو...فقت من سرحتي على صوتها تحكي
أحلام:فاش تعمل هوني ؟
أنا:حاجتي بيحيى كان معندكش مانع
يحيى:أدخل لجين
أنا:لاا من غير ما نقص عليكم قعدتكم
أحلام:شفما ياخي ؟
انا:ملقيتش طاكسي...ميسالش تعاوني سي يحيى
أحلام:طبيعي ماكش باش تلقى طاكسي في الحومة كنت تخرج لطريق عزيزتي
أنا:عندك حق...هاني ماشية ملا
هزيت راسي قحرتلو...و كبست على صاكي...نحكي
انا:صحة و بالشفا
عطيتو بظهري...و مديت يدي حطيتها عالبواني...وقفني بالوقت يحكي
يحيى:لجييين
نزلت يدي شوية شوية...و عاودت تلفت عندو...قحرلي يحكي
يحيى:أدخل
انا:منحبش
يحيى:مانيش باش نعاود كلامي مرتين
نزلت عينيا من وجهو...أصلا تكبست من طريقة كلامو قرب مني يحكي
يحيى:هيا فيسع تحرك
أنا:نحب نمشي توا
يحيى:أدخل
كبست على صاكي...و دخلت من غير ما نزيد حرف آخر معاه...قربت منو تحكي
أحلام:يحيى شنية لي قاعد يصير ياخي ؟
يحيى:أحلام أرجع لدار انتي توا
أحلام:شقصدك...مش على أساس باش نفطرو مع بعضنا ؟
يحيى:أنا باش نخرج توا...و مرسي برشا عالفطور
غزرتلو ندرا كيف...هزت صاكها من الكرسي...أول ما وصلت للباب...تلفتت عندي قحرتلي و خرجت...قرب مني بالوقت...وقف قدامي يحكي
يحيى:تفضل لالة لجين ؟ شفما ؟
أنا:ش..شي...نحب نمشي على روحي
يحيى:مش على أساس باش تريفيزي مع سحر
أنا:و أنت مش على أساس باش تفطر في دار ؟ أما يظهرلي كان عندك مخطط آخر
غزرلي ندرا كيف...و قربلي اكثر...لي خلاني نوخر خطوة لتالي...تبسم على جنب يحكي
يحيى:ياخي غايرة منها انتي ؟
أنا:لا علاش حتى نغير منها
يحيى:مممم باهي...و كيفاش تفسر اللي عملتو
أنا:ما عملت شي
وخرت اكثر...أصلا حسيتو قطع عليا النفس بالقرب متاعو...حبست كي حسيت بالحيط ورايا...مد يدو حطها جنب راسي بالظبط...و نزل عليا اكثر يحكي
يحيى:لي عملتو الكل...إسمو غيرة يا روحي
انا:مغرتش
يحيى:غرت
انا:لااا
يحيى:اعترف
انا:مغرتش
يحيى:ملا شبيك لحقتها لهوني ؟
هزيت عينيا شوية شوية...نغزرلو...أنفاسو لي ضربت في وجهي...حتى متوقعتش باش يقربلي لهدرجة..جيت باش نحكي...سكتني كي قرب لشفايفي...يحكي
يحيى:شبيك ؟
انا:ش..شي
يحيى:ملا مغرتش ؟
هزيتلو براسي لا...طلع حاجبو مستغرب...و تبسم على جنب يحكي
يحيى:متأكدة ؟
هزيتلو براسي اي...أما غزرتو...خلاتني نلم الحروف مرة اخرى...نحكي
انا:غرت...إرتحت توا ؟
عدا صوابعو على خدي...و غزرلي ندرا كيف...يحكي
يحيى:ساعة مكنتش نعرف غيرتك باش تجيبك عندي
أنا:يحيى
قص عليا كي نزل على شفايفي...دوب لحقت نستوعب أما قوة احساسي...خلاني نضيع معاه أكثر...فلت صاكي من يدي...و كبشت في صدرو...مترددة بين إني نبعدو عليا...و لا نستسلم لإحساسي معاه...جبد روحو شوية يحكي
يحيى:يا روح يحيى
حليت عينيا مروهجة...من قربو...من بوستو...و من بحة صوتو زادة...للحظة لقيت روحي ضايعة...منجمتش حتى نزل يديا من صدرو و لا حتى نحكي معاه...نحس في قلبي  يخض بالقاوي...لدرجة معادش نجم ناقف قربتلو شوية و ترميت في حملتو...كبس عليا بالوقت يحكي
يحيى:لجين لباس ماهو ؟
نزل راسو شوية...محاولة منو باش يغزرلي...كبشت فيه اكثر...نحس في خدودي باش يطرشقو...كبس عليا أكثر يحكي
يحيى:باهي ايجا معايا تراه
خذيت نفس و خلطت عليه...قعدني و قعد بجنبي...لي صار خلاني عاجزة حتى باش نهز عينيا في وجهو
كبس على وجهي يحكي
يحيى:اغزرلي هوني
دوب هزيت عينيا في وجهو و عاودت نزلتهم...منعرفش علاش حسيتو شايخ عليا...كبس وجهي اكثر يحكي
يحيى:باهي من غير ما تغزرلي...اما لامتى تبقى تتهرب مني
انا:ن..نحب نمشي
يحيى:نحبك تبقى معايا شوية
هزيت راسي و عاودت غزرتلو...تبسم بالوقت...و رجعلي خصلات شعري لتالي يحكي
يحيى:معاادش تغزرلي هكا...في الأخير منجمش نقاوم غزرتك و تصرفاتك
انا:ب..باهي...أما شبيك مزلت تحكي معاها لتوا...حتى طاطا ثريا...لتوا تحب تعرسلك بيها
يحيى:لجين...معادش نحبك تخمم بالطريقة هاذي مرة اخرى...انا عطيتك وعد...و مستحيل نتراجع عليه...أنا ولا مرة غزرت لأحلام بالطريقة لي غزرتلك فيها
انا:شمعناها ؟
يحيى:معناها...باللي تعدا عليا قبلك...هاذي أول مرة نحس إني حاجتي بشكون...إنتي كان ترضى...نخطبك في أقرب فرصة..و نحاول نريقل أموري في اقرب وقت زادة...و هكا انتي ترتاح من التفكير لي يدور في مخك و من شيرة اخرى...تاثق فيا أكثر
انا:واثقة فيك يحيى...من غير ما تظطر لهذا الكل...حتى منحبش نظغط عليك...انا جيست معادش نحبها تقرب منك مرة اخرى
يحيى:تدلل يا روحي
تبسمت بالوقت...جبدني من يدي...حطيت راسي على صدرو...نخمم في الكلام لي قالو...نخمم كيفاش نحكيلو على عيلتي و على عمي هارون زادة...فكرة انو ماهوش باش يتقبل...و فكرة انو امي ترفض و لا حد من خاوتي يضرو...خلاتني نكبش فيه اكثر...غرس يدو في شعري يحكي
يحيى:مش على أساس تحب تمشي
انا:جعت
طلعت راسي شوية...و عديت عينيا على وجهو...نحكي
انا:و مدام مدموزال أحلام ماهيش باش تفطر معاك قلت خلي انا نعوض بلاصتها
يحيى:صااار يا فرخة
انا:ممممم
باسني من جبيني...ضحك بالوقت...و عدا يدو على شعري يحكي
يحيى:بلاصتك ما يفكها حد تهنى...و مدام صغرونة جاعت...مانيش باش نخليها تستنى أكثر
جبد روحو مني...يحضر في طاولة...تبسمت بالوقت...و لا مرة توقعت...انو حظي باش يحطو في ثنيتي...و انو باش يجي نهار نحظى فيه بالاهتمام هذا الكل...و رغم اني حاسدة روحي على هذا الكل...اما فرد وقت خايفة من العاصفة لي ممكن انها تاخو مني كلشي في لحظة وحدة كهو. 
#لجين_يحيى 💕💕💕
🔸️فهد_يحكي:
حليت عينيا شوية شوية...نحس في راسي باش يطرشق كي العادة...حتى الوجيعة لي في كتفي مزالت على حالتها...خذيت نفس طويل و تبسمت...فكرة لي هي بجنبي توا...تخليني مرتاح بصفة غريبة...مديت يدي بالوقت...بعدتلها خصلات شعرها لتالي...و نزلت بصوابعي لخدها...و لشفايفها...نعرف روحي تعبتها برشا و نعرف انو جيتي لهوني باش تعبها زادة...اما شي اقوى مني...يخليني نتعلق بيها لهدرجة...لدرجة اني منجمش نعدي نهاري...من غير ما نسمع صوتها و لا نضيع في ملامحها...حتى رغم اني متأكد لي قربي ليها...هو شبه انتحار...و لي هو باش يخليها في خطر دائم...اما مهما هربت و مهما قاومت...نلقى روحي رجعت ليها...مدت يديها شوية...محاولة منها باش تفيق...نزلت عليها أكثر خطفت بوسة من شفايفها...لي خلاها تحل عينيها بالوقت...غزرتلي ندرا كيف...كانها تستوعب في اللي قاعد يصير...تحكي مستغربة
روجين:ف..فهد
فهد:صباح النور
روجين:شتعمل هوني انت ؟
انا:هيا فيق صغرونتي...تو تعرف شنعمل هوني
روجين:مممم باهي...نحب نرجع نرقد أنا توا
قربت مني أكثر...و غمضت عينيها...لي خلاني نشيخ عليها أكثر...كبست على شعرها نحكي
انا:باش تعديها نوم ياخي ؟
روجين:سيبني فهد
تنهدت بالقاوي...و لزيتها ليا أكثر...حطت يدها على صدري...تحكي
روجين:شبيك ديما تفيق بكري أنت ؟
انا:هاذي العادة الوحيدة لي متعلمتهاش مني
هزت راسها شوية...غزرتلي ندرا كيف و مدت يدها حطتها على جبيني تحكي
روجين:سخانتك لتوا طالعة
انا:قوم داويني ملا
نزلت بيدها لخدي...و هزت روحها شوية...عوجت فمها تحكي
روجين:شنعملك كي أنت متحبش تاخو دواك ؟
عديت يدي على جنبها...و جبدتها عندي شوية...نحكي
انا:إنتي معادش تبعد عليا و كهو
روجين:باهي...أنت خليك هوني...لين نرجع
انا:أبقى هوني معايا
روجين:لازمك تفطر...باش تاخو دواك
نفخت بالقاوي...و رخفت يدي عليها...تبسمتلي و جبدت روحها مني..بقيت نتبع فيها من وقت دخلت لبيت البانو لين خرجت من البيت...غمضت عينيا بالوقت...نعاود في حساباتي...مدامني لقيتها لازمني نخمم في اللي صار بالتفصيل...و نجبد لي كان السبب...دقايق عديتهم غاطس في افكاري...يمكن قدومي لهوني باش نعتبرو فترة نقاهة ليا خاصة بوجودها معايا...باش نرتاح أكثر هزيت روحي بالسيف دخلت لبيت البانو...غسلت وجهي و ريقلت اموري...وسط الوجيعة لي نزلت لنص ظهري أول ما خرجت...لقيتها في وجهي...غزرتلي مستغربة تحكي
روجين:شبيك قمت ؟
انا:سافا...هاني باش نبدل دبشي و ننزل اللوطة
روجين:لااا...أنت باش تبقى هوني لين ترتاح
انا:ناوية تحصرني ؟
روجين:كان لزم إي...أنت لتوا تاعب...ملا باش تسمع كلامي المرة هاذي باهي
جيت باش نحكي قصت عليا كي حطت الصينية عالطاولة...و شدتني من يدي تحكي
روجين:هيا ايجا
انا:الصبر يا ربي
روجين:أقعد هوني
انا:باهي
خذيت نفس...و رجعت لبلاصتي...من غير ما نزيد كلمة معاها...جابت الصينية و قعدت بجنبي...تحكي
روجين:أول شي تكمل فطورك...بعد تاخو دواك و ترجع ترقد
انا:معندكش أوامر اخرى ؟
روجين:فهد أماانك...مدامك باش تعمل لي في راسك علاش خرجت من الكلينيك
انا:كان إنتي بقيت وقتها...مكنتش باش نعمل الخطوة هاذي
روجين:انا ما غلطت في حتى شي...اصلا هذا لي كان لازم يصير من الاول...حتى مكانش لازمك تخلط عليا لهوني
عديت عينيا على وجها من غير حتى كلمة...نعرف و متأكد لمزالت متغشة من كلشي صار...و اللي يخليني نسكت خاطرني منحبش نضرها اكثر...حتى الفطور كليتو بالسيف...حتى وليت خايف من عصبيتها الفرخة فرد وقت متوحشها و منحبهاش تبعد عليا...نفخت بالقاوي...كي ريت نفس الدوا في يدها...قحرتلي تحكي
روجين:من غير ما تغزرلي أكاكا...أنت باش تشربو من غير مقاومة
انا:باهي...مانيش صغير تو نشربو وحدي
روجين:مممم والله هكا الظاهر...نذكر سيادتك شنية عملت امس ؟
انا:روجين يزي...ديجا قوم توا...نحب ننزل اللوطة
روجين:ممنوع انت باش تبقى هوني...لين نرجع
انا:وين عندك ماشية ؟
روجين:نحب نعمل دورة كي العادة
انا:ماكش باش تمشي اليوم
روجين:بالاهي
انا:مممم خاطرني تاعب عاللخر...و نحبك تبقى بجنبي
روجين:هاك من بكري تكش معناها لباس عليك
انا:كان معندكش مشكلة...جيبلي دبشي توا
روجين:باهي...متتحركش
انا:باهي
أول ما خرجت...حطيت ساقيا عالارض...نحس في الجرح باش يطرشق...منعرفش من وين الوجيعة هاذي الكل...حتى بدني ولا يعرق بصفة غريبة...رجعت عندي بالوقت...حطت الكابة عالطاولة...و حلتها تحكي
روجين:شنية تحب تلبس ؟
هزيت راسي غزرتلها...دوب نجمت نركز في وجها..قربت مني بالوقت...تحكي
روجين:هذا أحسن واحد
حطت يدها على كتفي...و نزلت عندي بالوقت...غزرتلي مصدومة تحكي
روجين:فهههد...لباس ماهو ؟ شبي حالتك هكا ؟
مديت يدي بالسيف...كبست على يدها من غير حتى كلمة...هزت روحها وقفت...و قربتلي أكثر...حطت يدها على رقبتي من تالي تحكي
روجين:ف..فهد...انت قاعد تنزف يا روحي
انا:ل..لباس
شاورتلها بيدي لكاسة الما...شربتني منها بالوقت...تحكي
روجين:ت..تليفونك وينو...لازمني نكلم ياسين ضروري
انا:م..ما تكلم حد
روجين:فههد مااكش في حالة باش تقرر شنية لازم تعمل
انا:روجين أمانك
روجين:باهي...أبقى هوني تو نرجع...متتحركش امانك
هزيتلها براسي باهي و مديت يدي...حطيتها على كتفي محاولة مني باش نخفف الوجيعة لي زادت دقايق تعدات.. و رجعتلي...تحكي
روجين:ن..نجم أنا نظف الجرح ؟
هزيت راسي غزرتلها بالوقت..نعرفها تخاف من الحاجات هذوما...حتى وقت كانت تتجرح متغزرش لروحها جملة جيت باش نحكي...تبسمتلي تحكي
روجين:معادش نخاف كيما قبل طمن
جاوبتني قبل ما نسألها...حتى مخلاتش مجال باش تسمعني...طلعت عالسرير...و قعدت ورايا بالظبط حسيت بصوابعها و هي تتحسس فيه...لي خلاني نغمض عينيا بالوقت...نسمع فيها تحكي
روجين:قتلك متتحركش...أحسن شي الغرز متحلتش
خذيت نفس طويل...محسيتش بيها إمتى كملت...حليت عينيا على شفايفها لي تحطت فوق الجرح...دوب باستني و جبدت روحها شوية...طلت عليا...جات عيني في عينها...تبسمت تحكي
روجين:تو تبرا...أنت بكري ديما كنت تقولي هكا
دوب تبسمت و هزيتلها براسي باهي...متوقعتش الفازة منها...حتى بكري كنت نعمل معاها الفازة...خاطرها كان فحمت بالبكا شي ماهو باش يسكتها....تنهدت بالقاوي نحكي
انا:إيجا بجنبي
قربت مني بالوقت...قعدت بجنبي...مديت يدي حطيتها على خدها نحكي
انا:لباس عليا...شوية تعب و برا
روجين:ماكش لباس...أنت قاعد تكذب عليا كي العادة فهد...لازمك ترتاح...و إلا حالتك باش تسوء أكثر...و باش تظطر ترجع للكلينيك
انا:يزي كهو...هيا قوم عاوني نلبس مريولي
روجين:لحظة
هزت روحها بالزربة...جابتو في يدها و رجعتلي...تسايس فيا...و تحكي فرد وقت
روجين:ارخف يدك فهد...و إلا باش يتحل الجرح مرة اخرى
أنا:باهي روجين
روجين:سيبون...وينها السبتة متاعك
انا:منحبش نلبسها
روجين:على كيفك ياخي ؟
أنا:إي
روجين:مدامك جيت عندي...كلشي باش يمشي على كيفي...باهيشي هكا ؟
انا:باهي
نزلت عينيا من وجها...و لبستها من غير ما نعاندها أكثر...تكيت لتالي...نحكي
أنا:خليك بجنبي
روجين:لازم حاجة تهبط سخانتك
كبست على يدها و جبدتها عندي...عديت عينيا على وجها نحكي
انا:خليك معايا و كهو
روجين:باهي
قربت مني بالوقت...قعدت على طرف السرير...خذيت نفس و حطيت راسي على حجرها...هارب من الاحداث لي قاعد تتعاود في مخي من سنين للحظة متاع الحادثة...غرست يدها في شعري...و عدات صوابعها على كتفي تحكي
روجين:فهد فما حاجة تحب تخبرني بيها ؟
انا:برشا حاجات...فما حاجات نحبك تسمعهم بعدها يخرجو من مخي جملة...نحبك حتى إنتي كي تسمعهم تنساهم زادة
روجين:باهي شبيك متحبش تخبرني...علاش ساكت لتوا ؟
فهد:كان أنا حكيت لي عندي...معناها باش نحضر روحي لبرشا إحتمالات...و اولها إني نعيش من غيرك
روجين:و اللي قاعد يصير توا...شنية تسميه انت ؟
أنا:حتى شي
مديت يدي شوية...حطيتها على جنبها...و لزيت ليها أكثر...خايف من فكرة انها تخليني و تبعد عليا...يمكن هي الحاجة الوحيدة لي نخاف اني نخسرها...صوابعها لي قاعدة تمشي و تجي بين خصلات شعري...خلات انفاسي تهدا...نزلت عليا اكثر...باستني من خدي...تحكي
روجين:باهي...ما تخمم في حتى شي توا...و أنسى كلامي زادة...أنت تاعب و لازمك ترتاح...ساعة خالتي ماجدة باش تحضرلك كلشي تحبو
انا:ساعة مكنتش نعرف لي انتي باش تهتم بيا لهدرجة
روجين:أنت كنت باش تعمل معايا نفس الشي زادة
تبسمت من غير حتى كلمة...فكرة انو اللي صار الكل كان مخطط ليها هي...لتوا محبش يتنحى من مخي كان صارلها شي...مستحيل كنت نجم نقاوم كيما توا...و لا حتى نحاول ناقف من جديد....التعب لي حسيتو في بدني...حضنها الدافي...و كلامها...ريحتها...كلشي فيها خلاني نهدا...حتى هاذي اول مرة نحس روحي مرتاح بعد اللي تعدا علينا الكل...و رغم الظروف لي إحنا فيها و اللي مزال يستنى للقدام...حتى متأكد لي هي عايشة وسط خوف كبير...بعد اللي صار آخر ليلة...كيما متأكد انو مزالت واقفة عند كلامها ليلتها...و لي لتوا مجروحة مني و من كلشي عاشتو جرايري...و لي حتى باش يبقى النقطة الكحلة في حياتنا...مهما حاولت اني نصلح منو من فكرة لفكرة...لقيت روحي غاطس في النوم...بين يديها...يمكن هذا كلشي كنت بحاجتو...حضنها و لمسة يديها...باش نهرب من الواقع لي لقيت روحي نتخبط فيه من غيرها...في الاول و الاخير...هي بر الامان...لي نلجألو في آخر الرحلة.
#روجين_فهد 💕💕💕
#كوكايين 🎭🎭🎭🎭
#سمر 💙💙💙💙💙