كوكايين

الحلقة الواحدة و التسعون

🔸️حلقة 91
🔸️يحيى_يحكي:
كبست عالدوسي...و مديت يدي دقيت الباب...دخلت مع صوتو يحكي
يوسف:تفضل
خذيت نفس و كبست عالبواني...هزيت راسي نغزرلو نحكي
أنا:صباح الخير سي يوسف
يوسف:أدخل يحيى
سكرت الباب و قربت منو...شاورلي بيدو للكرسي قعدت مقابلو...حط ستيلو من يدو يحكي
يوسف:كيفك مع الخدمة ؟
أنا:ماشي حالها...نحبك تشوف الدوسي هذا
يوسف:مطلبتكش على خاطر الخدمة
ضيقت عينيا مستغرب...مش بالعادة يطلبني على حاجة أخرى...غزرلي ندرا كيف يحكي
يوسف:نجم ناثق فيك ؟
عديت عينيا على وجهو...محاولة مني نفهم شنية ورا سؤالو بالظبط...خذيت نفس نحكي
أنا:تهنى...مهما كان لي باش تطلبو مني...أنا باش نكون عندك ثقتك فيا
يوسف:هذا المطلوب
أنا:تفضل سي يوسف
يوسف:أنا نحبك تراقبلي شكون
أنا:مفهمتكش
يوسف:أنا نحب على شوية معلومات خاصة
أنا:سامحني سي يوسف...أما نظن هاذي ماهيش خدمتي...و ما نجم ندخل في حياة حد
يوسف:مفماش حد غيرك يقدها الحكاية...خاطرها تخص فرد من عيلة الصياد
هزيت راسي مصدوم من كلامو...هذا آخر اسم توقعت نسمعو منو...كمل كلامو يحكي
يوسف:عرفت أنو الطفلة لي أنت معاها هي لجين الصياد...بنت خو الوزير الأول
هزيت روحي وقفت بالظبط...حطيت الدوسي من يدي نحكي
أنا:يمكن فهمت الموضوع بالغالط...أما لجين بالنسبة ليا خط أحمر...لا أنت و لا حد غيرك باش نسمحلو يستغلها و لا نخون ثقتها فيا
يوسف:أنا مانيش باش نستغل حد...المعلومات لي حاجتي بيها تخص بنتي
أنا:بنتك ؟
بقيت نغزرلو مستغرب...بالرسمي دخلت في حيط و مفهمتش شنية يحب بالظبط...مد يدو و حط التصويرة عالبيرو...نزلت راسي نغزرلها...نحكي
أنا:شكون هاذي ؟
يوسف:روجين الناصري...بنت عمة لجين
أنا:مدامها بنتك علاش باش تراقبها ؟ ساعة نتوما عيلة وحدة...نفهم أنو خدمتي هاذي كانت بواسطة ؟
يوسف:أنا طلبت ثقتك...و اللي باش نقولو يموت هوني بيناتنا
أنا:نسمع فيك
يوسف:حد من العيلة ما يعرف بوجودي...معناها الكلام لي هوني ما يسمع بيه حد...خاصة لجين...أنا حاجتي بشكون يكون قريب من العيلة...نحب نعرف تفاصيل تخص بنتي...نحب نتقرب منها قبل ما نخرج في وجها
أنا:شنية لي صار بالظبط ؟
يوسف:هذا باش يكون في مصلحة لجين و خاوتها زوز خاطرني نعرف لي أنت تحبها...أكا علاش نحب نعتمد عليك...خاطرك مهما عرفت و مهما سمعت ماكش باش تخمم تضر حد فيهم
أنا:كان نقبل بعرضك توا...نكون خنت ثقتها فيا...و أنا معنديش إستعداد لهذا الكل
وقف و قرب مني...وقف قدامي بالظبط.. و غزرلي يحكي
يوسف:مقتلكش إستغلها...أنا حاجتي باللي يخص بنتي كهو...شنية تحب...شنية تكره...وين تحب تمشي...كل معلومة مهمة ليا باش نجم نقرب منها...خاطر مستحيل تتقبلني بعد السنين هذوما الكل
أنا:وينك أنت السنين هذوما الكل ؟
يوسف:ميت بالنسبة لعيلة الصياد
أنا:علاش رجعت توا ؟
يوسف:أنت لتوا متعرفش العيلة هاذي
أنا:ما يهمني حتى فرد منها...من غير الطفلة لي نحبها
يوسف:تعرف شنية يعجبني فيك...روحك القوية...أكا علاش رد بالك تسلم في حبك مهما كان لي باش يعرضك منهم...غير هكا أنا وراك ديما
أنا:نعرف نحمي روحي سي يوسف...كيما منوعدكش إني باش نفذ اللي طلبتو مني...أما صدقني كان عرفت أي شي يخص بنتك...باش نعطيك خبر...و ان شاء الله تلاقيها على قريب
يوسف:لحظة قبل ما تمشي...فما أوراق لازمك توقع عليها
أنا:أوراق شنية
يوسف:القرض
أنا:ما طلبت حتى قرض
يوسف:نعرف...أما مدامك تبني في دارك...باش تكون بحاجتو...و تنجم ترجع منو كل شهر
أنا:حاليا مانيش بحاجتو...أما كان استحقيت مانيش باش نتردد...عيشك سي يوسف
جيت باش نمشي...خذيت نفس و رجعت خطوة لتالي نحكي
أنا:تهنى لي صار هوني...حتى حد ماهو باش يعرف بيه حتى لجين...أما نحبك توعدني مهما كان لي في مخك ناحية عيلة الصياد...لجين باش تبقى خارج الحكاية
يوسف:أنا حسابي مع هارون الصياد...أما فيما يخص لجين و خاوتها...هوما أولاد الغالي...مستحيل نأذيهم و لا نخلي حد يأذيهم
أنا:عيشك
خذيت نفس و خرجت من عندو...مستغرب من اللي سمعتو...متوقعتش لي فما حكاية تربط بيناتهم...و لا حتى بنتو تكون فرد منهم...و رغم هكا منحبش نكون وسط اللعبة هاذي...و لا حتى نخلي لجين تضيع في وسطهم...أول ما وصلت للبيرو...وقفتني سيليا تحكي
سيليا:يحيى لحظة
أنا:تفضل
سيليا:فما شكون يحب يشوفك
دورت راسي شوية نغزر لمرا كبيرة واقفة...عديت عينيا عليها مستغرب...شكونها و شنية تحب من عندي هي زادة...فقت من سرحتي على صوت سيليا تحكي
سيليا:مدام سلطانة من بكري تستنى فيك
أنا:باهي تفضل مدام
حليتلها الباب دخلت...و غزرت لسيليا نستفسر من عندها...هزتلي براسها منعرفش...خلطت عليها...سكرت الباب و شاورتلها بيدي باش تقعد...نحكي
أنا:تفضل أقعد مدام
سلطانة:مجيتش باش نقعد...جيت باش نحكي معاك و نمشي
أنا:سامحني و من وين نعرفك انا ؟
سلطانة:هاك باش تولي تعرفني بعد شوية
عدات عينيها عالبيرو...و عاودت غزرتلي تهز فيا و تحط حركتها استفزتني عاللخر...قعدت في بيرويا و حليت الدوسي نحكي
أنا:كان فما شي قولو توا...غير هكا مش لازم نعرفك
سلطانة:أنا عندي كلمتين نحبك تحطهم في راسك...و تنفذهم...بنتي تبعد عليها...بعد السما عالارض...مكانش باش يولي حساب آخر بيناتنا
هزيت راسي بالوقت...عديت عينيا على وجها...معناها في الأخير تقابلنا...أصلا آخر وحدة توقعت أنها تجيني لهوني...خذيت نفس نحكي
أنا:حساب شنية ؟
سلطانة:أسأل على عيلتها تفهم كلامي
أنا:والله أنا نحب هي...مش مظطر نعرف عيلة كاملة
سلطانة:أغزرلي هوني سي يحيى...بنتي خط أحمر...كان تموت مانيش باش نخليك توصل ليها و لا حتى يصير لي في مخك...خاطرني الأشكال لي كيفك نعرفها بالقدا
أنا:و شنية تعرف عليها ؟
حلت صاكها و جبدت شاك موقع حطاتو عالبيرو...تحكي
سلطانة:تنجم تعبيه بالمبلغ لي تحب عليه...و معادش نحبك تدور بيها و لا تظهر في حياتها مرة أخرى
مديت يدي هزيتو...ريت ابتسامتها...خذيت نفس و هزيت روحي وقفت...قربت منها نحكي
أنا:قداش مستعدة تدفع
سلطانة:اللي أنت تطلبو
أنا:لي أنا نطلبو
نزلت راسي غزرت لشاك و عاودت غزرتلها...نحكي
أنا:للأسف لي نطلبو ميجيش بالفلوس
قطعت الشاك على ربعة و طيشتو في البوبال نحكي
أنا:متوقعتش مرا كيفك تكون تخمم بالطريقة هاذي...و مهما كان لي جييت على خاطرو...حط في بالك لأنا عكس توقعاتك...بنتك شاريها و نحبها...و مستعد نعمل أي شي باش ناخوها...الفلوس و المظاهر حاجة زايدة بالنسبة ليا...لا إنتي و لا غيرك ينجم يشريني مدام سلطانة
سلطانة:أنت باش تندم برشا صدقني
أنا:أعمل لي تشوفو مناسب...سامحني توا عندي خدمة ما نجم نضيفك على شي...تعرف باب الخرجة
غزرتلي ندرا كيف...و هزت روحها خرجت...تبسمت على جنب...والله توا استوعبت كلام لجين...طلعت مش قليلة...ترميت عالكرسي...نغزر لتليفوني لي ينوقز تبسمت و هزيت عليها نحكي
أنا:صغرونتي
لجين:ستنيتك باش تطلبني
أنا:حقك عليا تلهيت في الخدمة
لجين:باهي مانيش باش نعطلك أكثر من هكا
أنا:لجين
لجين:شنية يا روحي ؟
أنا:تذكر لأنا نحبك برشا...و لي باش نكون معاك ديما باهي يا روحي
لجين:و أنا نفس الشي...أصلا منستخايلش حياتي من غيرك
أنا:عيش حبي...هاني باش نخليك توا نكلمك مبعد
لجين:نحبك
تبسمت و علقت عليها...تكيت لتالي و تنهدت بالقاوي بالرسمي نهار اليوم تعدا مفاجآت بالنسية ليا...زعمة شنية كان باش يصير لو تقابلت مع سي يوسف...حتى بعد ما قابلتها فهمت كلامو بالقدا...و اللي يقصد بيه على عيلة الصياد...و رغم هكا ما نحب حتى علاقة تربطني بيهم لا من قريب و لا من بعيد...منحبش نخسر لجين جراير المشاكل لي تجمعهم...هزيت راسي على صوت الباب...دخلت تحكي
سيليا:لباس ماهو ؟ شكونها المرا ؟
أنا:لباس سيليا...طلعت معرفة قديمة
سيليا:هيا باهي ملا...أنا باش ننزل للكافي توصي على حاجة
أنا:لا عيشك
سيليا:ملا باش ناخولك قهوة...يظهرلي باش تفيدك برشا
تبسمت و هزيتلها براسي باهي...من غير شي نحس في راسي باش يطرشق...شي من اللي حكيتو مع يوسف...و من أمها لي هدت عليا على غفلة...ماشي في بالها كلشي يتشرى بالفلوس حتى العباد...أصلا استوعبت أكثر أنو ثنيتنا مزالت طويلة...و لي جاي أصعب برشا من اللي توقعت...فرد وقت خايف عليها و على نفسيتها...متأكد لأمها باش تظغط عليها...و الأسوء من هكا يمكن أنها تهز يدها عليها مرة أخرى و تضربها...جرد فكرة خلاتني نعصب أكثر...عديت يديا زوز على وجهي...نهدي في روحي...بالرسمي معادش نعرف شنية باش يصير فينا أكثر من هكا...أصلا مستحيل نجم نعيش من غيرها و لا نستخايلها مع حد آخر...حتى كان نظطر نكسر الحواجز الكل مانيش باش نخليها..مدامها معايا...مستحيل نخون ثقتها و لا نخليها ضايعة في علاقة أنا بديتها...و عطيت فيها الأمل...أكثر شي نحب عليه توا إني ناخوها في حضني...و ننسى كلشي صار و كلشي سمعتو اليوم...هي الحاجة الوحيدة لي تخليني ننسى التعب و التفكير مع بعضهم...مستحيل نسمح لأمها و لا لأي حد آخر يكون جزء من علاقتنا...و مهما كان لي باش يعرضنا بعد توا و مهما طوالت الثنية لي ماشيين فيها...هي باش تكون ليا أنا و كهو.