كوكايين

الحلقة السادسة و السبعون

🔸️حلقة 76
🔸️روجين_تحكي:
دورت راسي نغزرلو...مزال ورايا لتوا...أنفاسي تقطعت و منجمتش نلقى مخرج...متوقعتش لي هو باش ينفذ تهديدو و يحاول يقتلني مرة أخرى...و لا حتى باش نطيح في الموقف هذا...الظلام ماشي و يقوا...و صوت خطواتو ورايا كانت أقوى...و كيما كل مرة لقيت روحي نواجه فيه وحدي...حتى فهد مش موجود معايا منعرفش كيفاش تعثرت و جيت على وجهي...حليت عينيا مروهجة...و هزيت روحي تقعدت...ندور في عينيا عالبيت...تنهدت بالقاوي...نفس الحلمة تتعاود معايا من أيام...يمكن صحتي تحسنت شوية...أما لي صار خلى نفسيتي تتعب أكثر...خاصة بعد ما عرفت أنو بابا ماهوش موجود جملة...حطيت يدي على كرشي...ضو الشمس لي ضرب في وجهي خلاني نرتاح شوية...هزيت روحي وقفت...دخلت لبيت البانو...و غزرت لروحي...من وقت جيت من الكلينيك مخرجتش من بيتي...حتى حالتي تاعبة بصفة غريبة...غسلت وجهي أكثر من مرة ريقلت اموري و رجعت لبيتي...حليت القارد الروب اخترت روبة خفيفة...الجو لي بدا يسخن عاوني برشا غطيت ملامحي بشوية مكياج...وين حسيت روحي تحسنت...هزيت راسي على صوت الباب...جات عيني في عينو...وقفت بالوقت...ضيق عينيه يحكي
فهد:فاش تعمل ياخي ؟
دورت عينيا عالبيت...و عاودت غزرتلو...نحكي
أنا:فاش نعمل ؟
قرب مني بالوقت...رجعلي خصلات شعري بصوابعو و غزرلي ندرا كي يحكي
فهد:شبيك قمت ؟
أنا:لباس عليا
فهد:هاني نشوف...أما رغم هكا مزلت تاعبة و لازمك ترتاح
أنا:أموري نهتم فيها وحدي...أبعد عليا و كهو 
فهد:والله إنتي ماكش باش تنجم تبعدني عليك...أكا علاش من غير ما تحاول
أنا:أنا باش نثبتلك لأنت تنجم تتخلى عليا...كيما مستحيل تنجم طلق مرتك
فهد:قتلك و باش نعاودلك...أنا ما عندي حتى مرا من غيرك...و في وضعك هذا مانيش باش ناقش معاك حتى موضوع
أنا:الحكاية متتعلقش بوضعي...تتعلق بحقيقة أنك ديما تختار مصلحتك...لدرجة أنك عفست علينا الكل...أنت ما تفرق حتى شي على هارون..بالرسمي نجح باش يخليك نسخة منو
فهد:متعبش روحك برشا...إنتي لتوا مبريتش كيما يلزم
نزلت عينيا من وجهو...خاطرني حسيت لي ميحبش ياخو على كلامي...أول ما وصل للباب...نزلت شوية باش نهز الكونفارس متاعي...أما وجيعة الجرح منعتني...كبست على كرشي و غمضت عينيا بالوقت حليتهم كي حسيت روحي بين يديه...كبشت فيه مستغربة...على أساس كان باش يخرج...عديت عينيا على وجهو...بالرسمي توحشتو رغم هو ديما بجنبي...أما الأحداث الأخيرة كان عندها رأي آخر جملة...فقت من سرحتي كي حطني عالسرير...و رجع جابها...قعد على ركبتو مقابلني...و كبس على ساقي...قحرتلو...نحكي
أنا:نلبس وحدي
فهد:روجين...يزي كهو...من غير ما طلعهالي أكثر
أنا:و لا شنووة باش تعمل ؟
فهد:الصبر يا ربي
أنا:حد ما قلك اهتم بيااا
فهد:بالله ؟
أنا:والله
فهد:أغزرلي هوني...مانيش باش نعديلك لي تعمل فيه بالساهل
أنا:على أساس باش نخاف منك توا ؟
فهد:لاازمك تخاف
مديت يدي...ضربتو على كتفو ورا بعضو...و قحرتلو نحكي
أنا:منحبش نخاااف...معااادش نحب نخاااف من تواا...لا منك و لا من أي حد آخرر
كبس على يدي بالوقت...و هز روحو شوية...حسيت بانفاسو لي ضربت في وجهي...غزرلي ندرا كيف يحكي
فهد:قتلك و باش نعاودلك...مدامني حي...حتى حد ماهو باش يحط يدو عليك...و ما تخاف من حتى شي آخر...لي صار غلطة و ماهيش باش تتعاود...نوعدك
خذيت نفس طويل و مديت يدي بالوقت...حطيتها على خدو نحكي
أنا:مدامك وصلت لهوني...رد بالك ترجع لتالي...رد بالك تسلم في الحقيقة لي جريت وراها السنين هذوما الكل و بعد اللي خسرتو الكل...و بعد اللي عملتو فيا زادة
كبس على يدي...باسني منها...و هز راسو غزرلي ندرا كيف يحكي
فهد:نعرف روحي خسرت برشا...أما مستحيل نخلي شي يبعدني عليك
جيت باش نحكي...سكتني كي جبدني عندو بالوقت عنقتي و كبس على شعري...يحكي
فهد:يزي كهو...ما تقول حتى حرف آخر
مديت يديا زوز...حطيتهم على ظهرو...منحبش نخمم في اللي جاي جملة...يكفي نحس بيه توا و كهو...دوب باسني من رقبتي و جبد روحو شوية..نزل راسو يلبسلي في الكونفارس متاعي و يحكي
فهد:باش تولي عندك معالجة فزيائية
أنا:منحبش...مرتاحة هكا
فهد:باهي شقولك نعديو أيامات في دارنا و لا في المزرعة
أنا:فهد...ما نحب حتى شي منك...و لا حتى نكون معاك...أنت توا عندك ما أهم مني
جبدت روحي شوية...عديت عينيا على وجهو و وقفت وقف في جرتي يحكي
فهد:هيا معايا توا
نزلت راسي نغزر ليدو...كبست على يدي...و وخرت لتالي نحكي
أنا:نمشي وحدي
هزيت روحي وقفت...و كبست على يدي مترددة...قرب مني شوية...شدني يحكي
فهد:إيجا هوني
حطيت يدي على كرشي...و خلطت عليه من غير حتى كلمة...نزلت الدروج وحدة وحدة...هزيت راسي نغزر لهارون لي قام من الطاولة...عديت عينيا على وجهو...و غزرت لفهد نحكي
أنا:نحب نقعد في الجنينة...حتى نحب نفطر وحدي
فهد:باهي لي تحب عليه باش يصير
دوب تبسمت و كبست على يدو أكثر...خرج معاايا برا...و عاوني نقعد...يحكي
فهد:لازمني نمشي لسوسيتي توا...كان استحقيت حاجة أطلبني و متعبش روحك...مفهوم كلامي
أنا:مممم مفهوم برشا
مد يدو قرصني من شفايفي...جبدت روحي بالوقت و قحرتلو نحكي
أنا:فاش تعمل يااخي ؟
فهد:باش تتعلم ترد الكلام مرة أخرى
نزل عليا باسني من جبيني...و عدا يدو على شعري يحكي
فهد:رد بالك على روحك
تنهدت بالقاوي...و تكيت لتالي...من غير حتى كلمة...أول ما خرج...جاتني زهور بالصينية حطتها قدامي...دورت راسي شوية...نغزر لهارون لي قعد بجنبي...تكا لتالي يحكي
هارون:نظن إحنا وصلنا لإتفاق
انا:صحيح
هارون:ملا شنية لي قاعد يصير ؟
انا:مانيش مجبورة باش نفسرلك
هارون:ملا فما حاجات باش تتبدل في اتفاقنا
أنا:بالله خالي هارون ؟ ساعة خلينا نحكيو شوية ؟
دورت راسي غزرتلو...و استندت بيدي عالكرسي...نحكي
أنا:أنت حاولت تقتلني...و مزلت تحاول لتوا...كان إحنا ركزنا اكثر...نفهمو لأنت ورا موت خالي كمال و بابا زادة حتى الله أعلم قداش من جريمة أنت كنت سبب فيها زعمة فهد كي يعرف بهذا الكل...و ياسين زادة و كل فرد في العيلة...شعندك باش تعمل فينا وقتها ؟ تقتلنا مع بعضنا ؟ توا شكون لي لازم يخاف فينا أنا و لا أنت ؟
غرست يدي في شعري...تبسمت و أنا نغزر لملامحو وجهو...تنهدت نحكي
أنا:نقطة ضعفك هي فهد ؟ و أنت مستعد تعمل هذا الكل على خاطرو...فرد وقت أنا نقطة ضعفو هو و مستعد يقتلك حتى أنت على خاطري...أما رغم هكا باش نبقى بعيدة مش على خاطرني خفت منك...أما هاذي الطريقة الوحيدة لي تخلي فهد يوصل للحقيقة بسرعة...و لي باش تخليه يكشف أوراقك الكل عالطاولة أكا علاش عندك حاجات أهم مني لازمك تعملها...حتى وقتك بدا من توا
ضحكت و هزيت كعبة زيتون من صحن حطيتها في فمي و تكيت لتالي...مشى من غير ما يقول حرف واحد أصلا معندوش شنية يقول...خبر موت بابا بدل برشا حقائق بالنسبة لينا الكل...فما حلقة مفقودة في الحكاية تجمعنا الكل مع بعضنا...و رغم هكا مانيش باش نقربلو و باش نعمل حساب لكلام هارون من غير ما نخليه يحس بهذا...خاطرني متأكدة أنو ما يهمو حتى حد فينا من غير فهد...خوفنا الكل باش ياقف هوني...و باش يبدا خوفو هو...لازمو يخاف من فهد و ياسين و مني و من كل حد ضرو قبل توا...فقت من سرحتي على صوت زهور تحكي
زهور:تفضل عزيزتي...تليفونك من بكري يضرب
شديتو عليها و غزرت لإسمو...تنهدت بالقاوي...رغم كلشي مزلت نحسو صديق باهي بالنسبة ليا...خاصة في حالتي هاذي...مع إني منحبش نعمل هذا الكل ورا ظهرو أما مدام لتوا مطلقش مرتو...مانيش باش نكسر الحاجز لي بيناتنا...منحبش نخسر روحي أكثر من هكا و مانيش باش نسمح لأي وحدة تكون في حياتو من غيري أنا و كهو...خذيت نفس و هزيت عليه نحكي
أنا:صباح الخير
غسان:صباح النور...شنية أحوالها أميرتنا الصغيرة
أنا:قاعدة تتحسن
غسان:مممم باهي برشا...نعرفك قوية...ساعة باش توصلك حاجة صغرونة...متأكد باش تفرح بيها
أنا:كيما شنية ؟
غسان:تو تعرف
هزيت راسي نغزر لزهور لي حطت بوات بجنبي...تحكي
زهور:تطلب حاجة أخرى ؟
هزيتلها براسي لا...و مديت يدي جبدتها عندي...نحكي
أنا:نجم نعرف شنوة مفاجأتك ؟
غسان:إنتي قولي
تبسمت و كملت حليتها...حليت الغلاف لي عليها و جبدت منها مجلة صغيرة...عليها إسمي و صورتي زادة هزيتها في يدي نتصفح فيها...كل تصاميمي عليها..لقيت روحي سارحة فيهم كأني نتبع في مصمم آخر...فقت من سرحتي على صوتو يحكي
غسان:شقولك ؟
أنا:من وين جبت تصاميمي الكل ؟
غسان:ماهيش صعيبة...وكلت شكون و نجمت نتحصل عليهم من الوكالة و الاستاذ متاعك في الفاك...المهم توا...رايك إنتي ؟
أنا:حبيتها عاللخر...والله منعرفش شنية لي حسيتو كيفاش نجمت تعمل هذا الكل ؟
غسان:ميهمش كيفاش...المهم انك فرحت بيها...حتى مكنتش نعرف لإنتي شاطرة لهدرجة
أنا:بالرسمي لفتة حلوة منك غسان...كنت بحاجة هدية تفرحني هكا...عيشك
غسان:نخليك معاها توا...نكلمك مبعد
أنا:باهي عيشك
علقت عليه...و حليتها مرة أخرى...هاذي أحلى حاجة صارت معايا توا...حبيت الفكرة...و مخممتش إني نجمع تصاميمي هكا من قبل و بالطريقة هاذي...عالأقل لقيت حاجة نعدي بيها وقتي توا من غير ما نخمم في حتى شي آخر...و نخلي مخي يرتاح شوية من الأفكار لي نحس فيها قاعدة تخنق فيا...اصلا لازمني نرتاح بسرعة و نرجع لحياتي كيما قبل...و إلا بالرسمي باش نتجلط من الجو هذا...حتى أمي منحبش نحكي معاها الفترة هاذي و لا نفهم منها لي صار...على خاطر كلشي في وقتو...باش يكون أحسن ببرشا من أي وقت فات علينا قبل.