كوكايين

الحلقة التاسعة و الستون

🔸️حلقة 69
🔸️روجين_تحكي:
جبد روحو شوية...و عاود رجع بجنبي...يقحر لياسين عبارة باش يقتلو...لين حسيتو بدا يفد منو...كبس على يدي يحكي
فهد:أنت قولي كيفاش و أنا تو ندبر راسي
ياسين:معناها باش نعملك سطاج براتيك توا
فهد:ماهيش حاجة صعيبة
ياسين:فههد تنجم تضرها...مش وقت غيرتك توا...تهنى روجين و لجين نفس الشي عندي
كبست على يدو و هزيتلو براسي باهي...نفخ بالقاوي يحكي
فهد:باهي
جبد روحو مني و خلى ياسين يقعد...وقف مقابلني يحكي
فهد:كهو...من غير ما طلع المريول أكثر من هكا
ياسين:الصبر يا ربي
أنا:ياسين...من غير ما توجعني أمانك
ياسين:متخافش
قرب مني شوية تسطح بجنبي...كبس على يدي و مد يدو لأخرى...يبعدلي في خصلات شعري لتالي و يحكي فرد وقت
فهد:صغرونتي باش تتحمل شوية أخرى...باش ترجع أحسن من قبل
انا:ياخي مظطرة نبدلها كل يومين ؟
ياسين:عالأقل لي يرتاح الجرح
فهد:روجين...تحمل عزيزتي
أنا:قاعدة نحاول
فهد:ياخي عملت لي قتلك عليه ؟
أنا:مممم ريتهم الكل
فهد:و شنية لي عجبك فيهم ؟
أنا:لتوا مقررتش...ياخي مزروب أنت ؟
ياسين:على شنوة تحكيو ؟
فهد:على دارنا
هزيت عينيا في وجهو..مش بالعادة يحكي على علاقتنا و اللي بيناتنا قدام حد...رغم نعرف أنو ياسين في بالو بكلشي...أما متوقعتش باش يقول الكلام هذا...فقت من سرحتي على صوت ياسين يحكي
ياسين:و أخيرا...حطيت مخك في راسك و إنتي روجين كان عملك حاجة...متترددش...تذكر أنا ديما معاك
كبست على يدو...خذيت نفس طويل...و غزرتلو نحكي
أنا:ماهوش باش يضرني
ياسين:إن شاء الله
فهد:ركز في خدمتك ياخي ناوي تهدها على راسي أنت
ياسين:أنا نحب نحكي مع روجين في موضوع
فهد:إعتبرني مانيش موجود
ياسين:معناها ماكش باش تخرج
فهد:من غير ما تحاول
أنا:الموضوع يخص فتون ؟
ياسين:بالظبط
فهد:حمد الله لي حطيت مخك في راسك أنت زادة
انا:فهد يزي
فهد:شعندي قلت ؟
ياسين:كملت...متتحركش برشا...و متقومش وحدك باهي ؟
أنا:باهي...نحكيو في موضوعنا مبعد
ياسين:أكيد...أنا لازمني نمشي توا...رد بالك على روحك
انا:عيشك ياسو
تبسملي و هز روحو خرج من البيت...دورت راسي نغزرلو...نزل عليا بالوقت...باسني من شفايفي يحكي
فهد:موجوعة ؟
أنا:لا يا روحي
فهد:شنية حكاية ياسين و فتون ؟
أنا:منعرفش...أما نظن يستحقو فرصة اخرى
فهد:أكيد صغرونتي...حاول ترتاح توا و ما تخمم في حتى شي
أنا:وين ماشي ؟
فهد:لسوسيتي...فما خدمة لازمني نكملها
أنا:و شنية صار مع بلقيس ؟
فهد:كي العادة...نستنى فيها باش توقع الاوراق
أنا:أنت خممت كيفاش باش تخبر الكل بعلاقتنا ؟
فهد:أنا ما يهمني حتى حد روجين...يكفي لأنا باش نكمل حياتي بجنبك
أنا:مطولش عليا...القعدة هوني وحدي تخنقني...لجين تقرا و فتون تخدم زادة
فهد:مانيش باش نطول ساعة..فما فيلم حلو برشا نحبك تحضرو...و زهور باش تحضرلك حاجات بنينة زادة نكمل لي عندي و نرجعلك باهي
أنا:باهي
جبد روحو مني...هز البيسي من تابل دونوي...حلو و حط الفيلم لي قال عليه...حطو بجنبي...باسني من خدي و هز روحو وقف يحكي
فهد:متتحركش من بلاصتك و هاني باش نطلب من زهور طل عليك كل شوية
أنا:فهدد
فهد:روح فهد
انا:مطولش عليا أماانك
فهد:باهي...كان حسيت روحك تقلقت أكثر أطلبني
أنا:باهي
نزل عليا مرة أخرى...باسني...و عدا صوابعو على خدي يحكي
فهد:متقلقش روحك...لازمك تبرا فيسع...هذا إتفاقنا
أنا:قاعدة نبرا
فهد:أما مزلت متنجمش تسافر
أنا:أماان فهد
فهد:لازمك تبرا الأول
أنا:باهي و رغم هكا مطولش
فهد:تهنى يا عمري
باسني من جبيني و جبد روحو...بقيت نشيع فيه بعينيا لين خرج من البيت...مديت يدي حليت عالفيلم...أما فرد وقت نحس في أنفاسي كابسة عليا...نفس الإحساس لي راودني ليلتها...خوف غريب خلى الوجيعة لي في كرشي...تزيد كلش شوية...الوقت تعدا رزين غير العادة لدرجة إني غفيت و عاودت و فقت...مديت يدي لتليفوني...إستغربت من الوقت...هزيت راسي على حلة الباب...نغزر لزهور لي دخلت بصينية العشا...غزرتلها نحكي
انا:فهد رجع ؟
زهور:لا...تحب حاجة أخرى عزيزتي ؟
هزيتلها براسي لا...و كبست على تليفوني...طلبتو ضيقت عينيا كي لقيتو مسكر...خذيت نفس طويل...و هزيت روحي وقفت...وين دخلت أمي بالوقت...قربت مني تحكي
صوفيا:روجين فاش تعمل ياخي ؟
أنا:ش..شتعمل في بيتي ؟
صوفيا:مش وقتو الكلام هذا...ياخي تحبني نخليك وحدك ؟
قربت مني شوية باش تشدني...نطرت يدي منها...و قحرتلها نحكي
أنا:متمسنيش
صوفيا:روجين
أنا:أخرج من هووني...و مدامك بقيت بعيدة عليا سنين هذوما الكل...متقربش مني توا...مستحيل ننسى الشي لي عملتو فيا...حتى باش نعمل اللي كنت تطلبو مني ديما...باش نمشي من هوني في أقرب فرصة
صوفيا:أرجع لبلاصتك توا...و هاني باش نخلي سلطانة تجي بحذاك...مدام هذا يريحك
أنا:ماااا نحب حتى شي...أبعدني و كهوو
مديت يدي حطيتها على كرشي...نرد في نفس ورا بعضو وين جبدت روحها مني بالوقت تحكي
صوفيا:باهي متقلقش روحك...هاني باش نخرج أنا توا
غمضت عينيا بالقاوي...و عاودت حليتهم...خرجت بالوقت...رجعت قعدت في بلاصتي...نطلب فيه ورا بعضو...وين حسيت روحي باش نفقد أعصابي أكثر منعرفش قداش تعدا وقت بالظبط...و أنا على نفس الحالة...خذيت نفس نهدي في روحي...و عاودت وقفت نمد في الخطوة بالسيف...منعرفش كيفاش وصلت للباب...كبست عالبواني و حليتها...أصلا بعد العشا كل حد يشد بيتو...و هو لتوا مفماش...تقريبا نص ليل..شنية الحاجة لي تخليه يطول لهدرجة...حسيت بحركة في بيتو...أصلا مفماش غيرها...خاصة بعد ما رجعت من الكلينيك...كل ليلة يعديها بجنبي...زعمة إحساسي باش يخيبني المرة هاذي زادة...و تصير حاجة أخرى...أصلا متأكدة أنو صعيب برشا...باش ينسحب من هذا الكل قربت من الدروج باش ننزل...أما الصوت الخفيف لي جاي من بيرو خالي وقفني...منعرفش شبيني قربت منو...من غير ما نخمم مرتين...مديت يدي باش نكمل نحلو...أما تراجعت مع صوتو يحكي
هارون:نحبك تقضي عليه...و لا باش يقضي عليناااا هو
ضيقت عينيا مستغربة...و كبست على كرشي بالوقت الخوف لي حسيتو من كلامو...خلى وجيعتي تقوا أكثر خممت إني نتراجع...أما فضولي منعني...شكون لي باش يقضي عليه...و في شنوة يخمم المرة هاذي زادة...نكمل نسمع و نكتشف عليه حاجات جديدة كيما قال ياسين و لا نبعد من كلشي كيما قاعد يعمل فهد...دقايق حسيت روحي باش نضيع فيهم...و صوتو رجعني للواقع مرة أخرى...وين قربت للباب أكثر...نسمع فيه يحكي
هارون:كاان يوصل لفهههد...صدقني ماهوش باش يرحم حد فينا
إسم فهد...خلى دقات قلبي تقوا...وين حسيت بحاجة إني نسمع بقية حديثو...لي كملو يحكي
هارون:أنااا منحبش نخسر فهد...اللي يعمل فيه غالط مينجمش يتخلى على كلشي جرايرها هي...أصلا كان يعرف لأنا ورا لي صار...حد ماهو باش يوقفو
غزرت للفراغ محاولة مني إني نسمع لي يقول فيه كأني نحب نوصل لنتيجة من كلامو...و لي كانت تفصلني عليها ثواني بعد كلامو الأخير
هارون:روجين كان لازمها تموت ليلتها...و مدام الكلب هذاكا منجمش يحل الحكاية و مكملش لي بداه...لازمو هو يموت توا...و إلا باش يولي مصدر تهديد لينا
مديت يدي حطيتها على فمي...نكتم في صوتي من الصدمة لي حسيتها من كلامو...آخر حد توقعت انو يعمل فيا هكا...خاالي ؟ علاش ؟ شنوة السبب لي يخليه يخمم أنو يعمل فيا هكا...وجيعتي زادت مع آخر كلام منو
هارون:لازمها تموت...كان مش توا مبعد...أما الأول نحبك تنظف لي صار...و روجين حكايتها متاخوش وقت برشا...مفهوم كلامي
وخرت خطوة لتالي...وين حسيت الفاز لي ورايا باش يطيح...شديتو بالوقت...خايفة من أنو يحس بيا...ثواني معرفتش شنية نعمل فيهم بالظبط...لي سمعتو خلاني عاجزة باش نتحرك من بقعتي...مديت يدي مسحت دمعتي لي نزلت...فهد هو الوحيد لي جا في مخي لازمو يعرف...لازمو يسمع لي صار الكل...هو الوحيد لي ينجم ياقف في وجهو...و ينهي هذا الكل...أصلا و لا مرة توقعت لي خالي هارون باش يكون قاتل...و لا حتى يوصل يقتلني أنا...دورت راسي ورايا و عاودت تلفت للباب لي تحلت...جات عيني في عينو...وين دقات قلبي قوات أكثر...للحظة تمنيت إني ما سمعت شي...و لا عالأقل وجود فهد في اللحظة هاذي..كان باش يخفف عليا برشا...غزراتو ليا خلات الوجيعة لي في وسط كرشي تقوا...إحترامي ليه و مكانتو في عيني...طاحت بصفة غريبة...قوة الصدمة خلاتني عاجزة حتى باش نقول حرف و لا نواجهو باللي عرفتو...و لا حتى نرجع لتالي...خوف غريب سيطر عليا...و قوا مع كل غزرة منو ناحيتي...مكنتش نتوقع إني باش نلقى حد يكرهني أكثر من أمي...تي هاو طلع يحب يرزيني في عمري مش يطردني كهو...مديت يدي شوية شوية...حطيتها على كرشي...نخمم في كلام نخرج بيه روحي من الوحلة هاذي...عالأقل لي يظهر فهد و نخبرو بكلشي قاعد يصير...غمضت عينيا نرتب في الكلام لي باش نقولو...و نستحضر في صوتي لي حسيتو تقطع من الصدمة...و غزرتو لي حسيت وراها برشا حاجات...توا بالظبط...أنا واقفة قدام حاجتين...القاتل لي عديت أيامات نخمم فيه...و الثانية هي الحقيقة...الحقيقة لي قاعد يفركس عليها كل حد فينا...موجودة عندو هو و كهو...غمضت عينيا و عاودت حليتهم...كأني نستنى في معجزة تبعدني من قدامو توا...و إلا غزرتو وحدها كافية باش تقتلني...كبست على كرشي و هزيت عينيا في وجهو...و مهما لي كان باش يصير توا...و رغم الخوف لي نحس فيه...اما مستحيل نخليه يضرني بعد توا.
وخرت خطوة لتالي...مع قربو مني...من غير ما نزل عينيا من وجهو...ضيق عينيه يحكي
هارون:لباس ماهو ؟
عديت عينيا على وجهو...و خذيت نفس طويل...نحكي
أنا:ش..شي...جيت عندك باش نسألك على فهد...نطلب فيه تليفونو مسكر
هارون:على حد علمي في بيتو توا
أنا:إمتى رجع ؟
هارون:كان مع مرتو اللوطة...تلقاه في بيتو توا...إنتي شبيك قمت من فرشك ؟
انا:هاني باش نرجع توا...تصبح على خير
هارون:و إنتي بخير عزيزتي
جبد روحو مني...و مشى لبيتو...خذيت نفس ورا بعضو لين حسيت روحي باش نتخنق...دورت راسي...غزرت لبيت فهد...إمتى رجع و شيعمل معاها غادي...أما أهم من تفكيري في اللي قاعد يصير...هو أنو لازمو يعرف بكلشي و توا...مستحيل نجم نخبي حاجة هكا...لازمنا نخرجو من هوني في أقرب فرصة...تفكيري وصلني لبيتو من غير ما نحس...مديت يدي كبست عالبواني باش نحلها...سبقتني كي حلتها هي...عديت عينيا من ساقيها لوجها...نثبت في الغطا لي ملفوف على بدنها شعرها لي داخل بعضو...حالتها خلاتني نسكت بالسيف عليا...عاجزة باش ننطق و نفهم لي قاعد يصير...غزرتلي ندرا كيف تحكي
بلقيس:مشى في بالي متنجمش تقوم من فرشك
عديت عينيا على وجها...مرة أخرى...منحبش نصدقها و لا نصدق أنو ممكن تصير حاجة بيناتهم...نعرف لي فهد يوفي بوعدو ديما...و ماهوش باش يعملها...كبست على كرشي أكثر...نلم في الحروف لي ضاعت مني...حلت الباب أكثر...و رخفت يدها عالبواني...فازة متعمدة منها باش تخليني نشوف دبشهم لي عالأرض...سريرهم لي داخل بعضو تبسمت تحكي
بلقيس:فهد توا في بيت البانو...من غير ما تستناه هوني
كبست عالباب مرة أخرى...و استندت عليها...تحكي
بلقيس:بعد توا...باش نعتبرك ماكش موجودة في حياتنا...هذا كلامك إنتي...تصبح على خير
غزرتلي ندرا كيف...و سكرت الباب في وجهي...من غير ما تخليني نقول حرف...أصلا ملقيتش شنوة نقول بالظبط...ضربتين فرد مرة...خلاوني في وسط الحلمة مرة أخرى...هارون...بلقيس و فهد مع بعضهم...زعمة بالرسمي باش يتحقق كلشي توا ؟ نزلت يدي شوية شوية...نغزر لدم لي قوا على غفلة...أصلا كيفاش الجرح يتحل بالطريقة هاذيكا...وخرت بخطوات رزينة...دوب نثبت في اللي قدامي...في آخر لحظة فقدت توازني يدها منعتني...و لقيت روحي في حضنها...هزيت راسي نغزرلها...كبست عليا...تحكي
صوفيا:رووجين ؟ شبيك عزيزتي شفما ؟
مديت يدي شوية نوريها في الدم...وين عينيها وساعت كبست عليا أكثر تحكي
صوفيا:شنية لي صار ؟ و شتعمل هوني ؟
أنا:م..متخلينيش هوني
صوفيا:هدي روحك هاني باش نطلب فهد يا روحي
كبست على يدها أكثر...و خذيت نفس طويل...وين حسيت عمري باش تخرج معاه...و هزيت راسي غزرتلها نحكي
انا:ل..لا...م..منحبوش يعرف...ه..هزني عند ياسين تواا
صوفيا:شنية لي صار ؟
أنا:ا..أمي أمانك...ع..عالأقل المرة هاذي كهو
صوفيا:باهي يا روحي...تحمل شوية...تو نرجعلك
جبدت روحها مني...مديت يدي إستندت عالحيط...و تلفت نغزر لبيتو...حبيت أنو يخرج و يفسر لي صار عالاقل يواجهني و يقول لي هي تكذب... نعرف لي مستحيل يعمل فيا هكا...و مستحيل يحط يدو عليها رغم أنو كلشي يقول العكس...رجعتلي بالوقت...حطت الفاست متاعها على أكتافي...و كبست عليا تحكي
صوفيا:تحمل شوية باهي
هزيتلها براسي باهي و كبست على يدها...نمد في الخطوة بالسيف...منعرفش كيفاش نزلت معاها اللوطة أحسن شي ما لقينا حد...حلتلي الباب ركبت و خلطت عليا...خدمت الكرهبة تحكي
صوفيا:متخاافش باهي
أنا:م..ما تخبر حتى حد باللي صار
صوفيا:فهد عملك حاجة ؟
أنا:لا...أما ماكش باش تخبرو...أوعدني
صوفيا:هدي روحك...متخافش مني...مانيش باش نخبرو بحتى شي
تكيت راسي...و غمضت عينيا بالقاوي...أنفاسي كبست عليا...لدرجة حسيت أنها باش تقتلني...الثنية طوالت بصفة غريبة...وين لقيت روحي نجاهد باش منخممش في اللي صار...شدت الفران على غفلة...و نزلت...دقايق و رجعت مع ياسين...حل الباب من جيهتي و نزل عندي يحكي
ياسين:روجين شفما عزيزتي ؟
انا:م..موجوعة ياسين
ياسين:باهي متخافش...أنا معاك
كبس على يدي و نزلني معاه...قعدني عالكرسي لي بحذاه...يحكي
ياسين:شنية لي صار ؟
صوفيا:منعرفش
نزلت يدي من كرشي وين حسيت الدم قوا أكثر...و دوخة قوية روهجتني...فقت منها بعد ساعتين أو أكثر دوب حليت عينيا...غزرت لياسين لي قاعد بجنبي مد يدو بالوقت...عداها على شعري...يحكي
ياسين:روجين...كيفاش تحس في روحك ؟
عديت عينيا على وجهو...من غير حتى كلمة...ثواني خلاتني نسترجع لي صار معايا الكل...و لي سمعتو من هارون زادة...وين دموعي نزلت من غير سابق إنذار..لين وليت نبكي بالحرقة...كبس على يدي أكثر يحكي
ياسين:رووجين...يزززي كهو...هكا باش تضر روحك أكثر...اهدا و خبرني لي صار...تعاركت إنتي و فهد ؟
هزيتلو براسي لا...مد يدو مسحلي دموعي...و غزرلي يحكي
ياسين:ملا شبيك متحبش تشوفو ؟ و لا صوفيا هي لي رافضة ؟
أنا:ف..فهد
ياسين:تكلم عزيزتي
غمضت عينيا بالقاوي و عاودت حليتهم...دوب خذيت نفس...نحكي
انا:ف..فهد...و...ب..بلقيس
ياسين:شقصدك بفهد و بلقيس ؟ مش على أساس باش يطلقو ؟
انا:م..مش لازم...م..معادش يهمني...م..معادش نحبو يكون موجود في حياتي بعد توا
ياسين:مش خليتكم لباس ؟
أنا:ف..فهد...مستحيل يطلق...و..و كيما كذب عليا قبل ينجم يكذب توا زادة
ياسين:نفهم منك أنو الحكاية أكبر من أنها تتصلح ؟ لهدرجة إنتي متغشة منو ؟
انا:م..مانيش متغشة...اللي قاعد يصير معايا أكبر من إني نتغشش على خاطرو
ياسين:روجين...قتلك قبل و باش نعاودلك...أنا معاك في أي قرار يخليك تكون مرتاحة...أكا علاش ما نحبك تخبي عليا حتى شي باهي ؟
أنا:ك..كان باش نخبرك...بحاجة توا..أنت باش تصدقني ؟
ياسين:فما مرة كذبتك فيها ؟
هزيتلو براسي لا...و بعدت عينيا من وجهو...نسترجع في اللي سمعتو الكل...و لي ريتو بعينيا زادة...منعرفش كيفاش باش نخبرو...و لا حتى إذا باش يصدقني و لا لا...كان جا فهد موجود توا مكنتش ترددت...أما حتى هاذي معادش عندو حق فيها...و معادش لازم يطلق مرتو و لا حتى يكمل في تمثيليتو معايا...كان ماهوش معاها توا...راو حس بغيابي...و لا عالأقل تفقدني كيما يعمل ديما...الوقت كان كافي باش يثبت أنو مزال غاطس معاها...و ماهوش يفكر فيا توا...خذيت نفس طويل و عاود غزرت لياسين...لي يستنى في جوابي كبست على يدو...نحكي
أنا:قبل ما نجي هوني...سمعت خالي هارون يحكي في تليفون
ياسين:مع شكون ؟
أنا:م..منعرفش...أما سمعتو و هو يحكي مع شكون
ياسين:شنوة سمعت ؟
أنا:ه..هو لي كان السبب في الحادث
ياسين:شقصدك ؟ فاش تحكي ياخي ؟
انا:هو لي بعث ورايا شكون ليلتها...ه..هارون...هو القاتل لي يفركس عليه فهد يا ياسين
بقى يغزرلي من غير حتى كلمة...دقايق عداهم ساكت كأنو يستوعب في كلامي...جبد يدو مني يحكي
ياسين:ر..روجين...شنية الكلام لي تقول فيه إنتي ؟ هارون قتل شكون ؟
انا:ا..إذا كان قاتل من قبل منعرفش...أما سمعتو و هو يحكي مع شكون...يحب يوصل لراجل لي بعثو ورايا باش يقتلني...صدقني ياسين...أنا ما نجم نخبر حد باللي سمعتو...و فهد مش لازم يعرف أصلا
عدا يدو على وجهو...و هز راسو شوية غزرلي ندرا كيف...يحكي
ياسين:تحب تخبي عليه موضوع كيما هذا ؟ تعرف شنية باش يصير كان يعرف ؟
أنا:حتى شي ماهو باش يصير...أصلا كلشي نعيش فيه لتوا...هو السبب فيه...فهد مينجمش يصلح لي عملو معايا...و أنا معادش عندي طاقة باش نسامحو على كلشي...مستحيل ينجم يوفق بيني و بين الماضي متاعو...حتى أنت يا ياسين...عندك رغبة باش تعرف شكون قتل بوك...و لي حرمكم منو...الفرق الوحيد...أنت حاولت تبدا من جديد...أما فهد مستحيل ينجم...و في طريقو للحقيقة هاذي...قاعد يفركس على حياة جديدة مع مرتو...في الأخير أنا نذكركم الكل بالليلة لي مات فيها خالي
ياسين:روجين...فهد يحبك...و هاذي الحقيقة الوحيدة لي ما ينجم يبدلها حد
أنا:و أنا حبيتو زادة...أما الحب وحدو ميكفيش...أنت لازمك تحميني ياسين...معنديش حد غيرك بعد توا
ياسين:هدي روحك...كان يمس شعرة أخرى منك صدقني نهايتو باش تكون على يدي
أنا:منحبكش توسخ يديك بيه...أنت باش تحميني و تعاوني نكشف كلشي وراه...هارون باش يتحاسب بالقانون لي قاعد يستغل فيه...أما من غير ما فهد يتضرر في الحكاية
ياسين:هارون يعرف لإنتي سمعتو ؟
انا:لا...عالأغلب مسمعنيش
ياسين:باهي برشا...حاول ترتاح ليلة...و أنا من غدوة باش نرجع معاك للفيلا
أنا:ماكش باش تمشي لدارك مرة أخرى ؟
ياسين:لا...أصلا غديكا مينجمش يقربلك...بطبيعتو يخاف من فهد
أنا:فهد ماهوش باش يعرف...أوعدني توا ياسين
ياسين:منجمش نوعدك بحاجة هكا
أنا:مجبور أنك توعدني...و لا صدقني باش نمشي من هوني جملة...و مستحيل نخلي حد يلقاني مرة أخرى
عدا يدو على وجهو...و هزلي براسو باهي...يحكي
ياسين:باهي...لي تحب عليه باش يصير...مانيش باش نخبر فهد بشي...أما إنتي باش توعدني زادة
أنا:شنوة ؟
ياسين:إنتي باش تخبرو بكلشي سمعتو في الوقت المناسب
أنا:باهي نوعدك
ياسين:باهي برشا...حاول ترتاح توا...نكمل لي في يدي و نرجعلك
هزيتلو براسي باهي...باسني من جبيني و هز روحو خرج...غمضت عينيا بالوقت...مزال عندي أمل لي هو باش يحس بغيابي...و لي باش يجي توا و يكذب كلشي صار...أما الوقت قاعد يمشي...و يأكد انو كلشي صار هو الحقيقة...و اللي ريتو في الحلمة...عشتو الليلة في الواقع...بيني و بين فهد الماضي و بلقيس...كان تخلص من واحد فيهم...مستحيل ينجم يتخلص من الثاني.
#روجين_فهد 💙💙💙
#كوكايين 🎭🎭🎭🎭
#سمر❤❤❤❤❤