🔸️حلقة 141
هزيت واحد منهم مترددة...منعرفش علاش تملكني الخوف بالطريقة هاذي...اما رغم هكا...تقويت على روحي و عملت تاست...كبست عليه في يدي و هبطت غطا توالات نستنى في النتيجة لي حسيتها طولت و خاب ظني مع ظهور خط واحد...كبست عليه و استندت براسي على يديا زوز...خذيت نفس نحكي
انا:عادي ما صار شي يا روجين
خذيت نفس طويل و هزيت راسي شوية...نثبت في الخط الثاني لي ظهر...قلبي خض بالقاوي...نطرت من بلاصتي جيت واقفة...دموعي نزلو بالوقت و معرفتش شنية نعمل خممت نطلبو أما تراجعت...خفت يطلع الشي هذا مش صحيح...وين لقيت روحي جربت التاست الثاني و الثالث و كلهم طلعو بوزيتيف...شديتهم بيديا زوز...نمشي و نجي في البيت...مش مصدقة لي قاعد يصير معايا و لا علاش قاعدة نبكي بالظبط...حطيت يدي على كرشي و رجعت بذكرياتي لتالي...لنهار لي عرفت بروحي حبلة...وين سيطر عليا الخوف و الفرحة في نفس الوقت...كيما لقيت روحي نسترجع في الليلة لي تقلب فيها كلشي و ظطريت اني نمشي نتخلص منو من غير ما نخمم في العواقب...دموعي غلبتني أكثر و لقيت روحي في دوامة...فقت من سرحتي كي دخل عندي على غفلة...وجهو أصفر مش نورمال حتى اني حسيتو مش قد بعضو...خاطرني خرجت من غير ما نعطيلو خبر...قرب عندي باش يحكي عنقتو بالوقت و كبست عليه بيديا زوز...عدا يدو على ظهري يحكي
فهد:روووجين...شبيك ؟ شنية لي صار ؟ علاش رجعت لهوني وحدك ؟ اصلا شبيك مرديتش على تليفونك جاوبني...لتوا منعرفش على روحي كيفاش وصلت لهوني خفت من فكرة أنك تعبت مرة أخرى
خذيت نفس و جبدت روحي شوية...خوفو عليا خلاه يحكي ورا بعضو..نزلت راسي شوية نغزر ليديا..ضيق عينيه يحكي
فهد:شنية هذا ؟ و إنتي شبيك تبكي يا روحي ؟
أنا:ه..هذوما أنا جربتهم
فهد:جربت شنية ؟
أنا:الكل خرجو بوزيتيف...النتيجة ايجابية فهد
فهد:باهي...حاول تاخو نفس و فهمني بالشوية...نتيجة شنية ؟ و شنية لي بوزيتيف ؟
انا:هذوما الكل بوزيتيف
شدهم عليا بالوقت يثبت فيهم و عاود غزرلي يحكي
فهد:هذوما شنية ؟
أنا:شنية لي شنية ؟
فهد:هذوما ؟
أنا:تاست
فهد:تاست شنوة ؟
انا:تاست متاع حبالة
فهد:علاش هذوما الكل ؟
انا:فهههد ركززز اماانك...ياخي وليت متعرفش تاست الحبالة توااا
فهد:وين ريتو أنا قبل باش نعرفو
انا:توقعت حاجة ما تخفى عليك
فهد:هوكا طارتلي في حاجة...زيد شنية الخطوط لي هوني
انا:الخطوط لي هوني تقول انو انا حبلة يا سي فهد
هز راسو شوية غزرلي ندرا كيف و عاود غزرلهم يثبت فيهم بالواحد...ملامح الخوف لي كانت على وجهو تبدلت لصدمة و خلات دقات قلبي تقوا اكثر و أكثر دقايق عداهم ساكت من غير حتى كلمة..خذيت نفس طويل و قربت منو شوية...غزرلي يحكي
فهد:ر..روجين...ياخي لي قلتو صحيح ؟
كبست على يدو...و قربت عندو أكثر...حطيتها على كرشي و غزرت لعينيه نحكي
أنا:صحيح...هوني فما بيبي متاعنا...و أنت باش تولي أب كيما كنت تحلم ديما
عدا عينيه على وجهي...تبسمت محاولة مني باش نهدي روحي...أما تصدمت من ضحكتو لي تخلطت بدموعو جيت باش نحكي عنقني بالوقت و كبس عليا بكل قوتو يبوس فيا ورا بعضو و يحكي
فهد:ر..روجين...إنتي تحكي بجدك ؟ نقصد أنا باش يولي عندي صغير ؟
هزيتلو براسي إيه...ضحك مرة أخرى و غزرلي يحكي
فهد:معناها أنا زادة باش نولي أب ؟
تبسمت و جيت باش نحكي...قص عليا كي دور يدو على ظهري و هزني بالوقت...دورت يديا زوز على رقبتو حتى انا مش مصدقة لي قاعد يصير معانا...كبست عليه و بستو من رقبتو نحكي
أنا:باش يولي عندنا صغير يا روحي
جبدني من عندو شوية...حاوط وجهي بيديه زوز يحكي
فهد:روجينتي
غزرلي ندرا كيف و نزل عليا شوية...باسني من شفايفي و حط يدو على كرشي يحكي
فهد:هوني موجودة قطعة مني
أنا:ف..فهد يا روحي
فهد:أنا مش مصدق اللي نسمع فيه...توقعت أنو مزال برشا باش نعيش الإحساس هذا
أنا:حتى أنا...يمكن لازمني نجرب تاست آخر شقولك ؟
فهد:لا كان نمشيو للكلينيك أحسن...نحب نطمن عليكم الزوز يا عمري
أنا:لاااا منحبش...أماانك من غير ما نمشيو اليوم خليك معايا و كهو...توا بالظبط نحبك تبقى معايا نمشيو في وقت آخر...ما نحب حتى شي يفسد عليا فرحتي
فهد:إنتي لباس يا عمري ؟
أنا:ا..أنا عشت نفس الشي هذا من قبل و حبيتك تعيشو معايا زادة...أكا علاش خلينا مع بعضنا توا نحب نحس بالأمان على صغيري و أنا بين يديك
فهد:هيا إيجا معايا
كبس على يدي و جبدني معاه...شديت بلاصتي نحالي الكونفارس متاعي و تمدد بجنبي...عدا يدو على كرشي مرة أخرى و حط راسو عليها يحكي
فهد:سامحني على كل خسارة خليتك تعيشها قبل...و على الصغير لي حرمت روحي و حرمتك منو
غرست يدي في شعرو...نتحسس في كبسة يديه نحكي
أنا:و أنا غلطت خاطرني تسرعت برشا...فهد أنا معادش نحب نعيش الشعور هذاكا مرة أخرى مهما صار
باسني من كرشي و كبس عليا أكثر من قبل...يحكي
فهد:نحبها تكون صغرونة...نسخة منك إنتي في كلشي
أنا:بلكشي يطلع طفل و نسخة منك أنت
فهد:لا إحساسي يقول العكس
أنا:يكفي أنك تكون معايا توا...نحب نعيش كلشي تحرمت منو أكا ليلة
فهد:أنا معاك يا عزيزة قلبي و باش نبقى معاك لآخر لحظة في عمري
أنا:و أنا زادة يا روحي
باسني من كرشي مرة أخرى و طلع عندي شوية يحكي
فهد:إيجا عندي
قربت منو أكثر دخلت في حضنو و غمضت عينيا وجودو خلاني نحس براحة غريبة و نطمن أكثر و هذا الشي الوحيد لي كنت بحاجتو في الوقت هذا...نحب نحس بالأمان و كهو.
أنت تقرأ
كوكايين
Romantizm??? #كوكايين ❌❌❌ باش تكون بداية جديدة ليا و ليكم...بداية قصة جديدة...حكاية و موضوع عكس لي كتبت عليه قبل...منعرفش اذا باش تكون فاشلة و لا ناجحة...اما نحب ناخو التجربة هاذي معاكم...نحب نعرف مدى تأثير الكوكايين في كل حد فيكم...زعمة مستعدين باش تغوصو مع...
